PIANCILNA 26
26
Gerar le Beer-sheba ah Isaac Teeng
1Abrahamʼ hun lai-a kialpi banah, tu-in tua gam sungah kialpi dang khat tung hi. Filistia miteʼ kumpipa Abimelekʼ omna Gerar ah Isaac pai hi. 2Ama tungah Topa kilang a, “Egypt ah pai suk kei inla, kong gen ding leitang ah teeng in. 3Hih leitang ah tawl khat om in. Nang tawh kong om khawm dinga, thupha kong pia ding hi. Bang hang hiam cih leh nang le na suanlekhakte tungah hih leitangte kong pia dinga, na pa Abrahamʼ tungah ka thuciam ka tungsak ding hi. 4Na suanlekhakte van a aksi bangin tampi ka phasak dinga, na suanlekhakte tungah hih leitang khempeuh ka pia ding hi. Na suanlekhakte thupha ka piak bangin leitung minam khempeuh in thupha a ngah nadingun hong ngen ding uh hi.#Pian 22:16-18 5Bang hang hiam cih leh Abraham in ka thu mangin, ka sawlna, ka thupiakna, ka ngeina kip le ka thu zui hi,” a ci hi.
6Tua ahih ciangin Isaac, Gerar ah teeng hi. 7Tua mun mite in ama zi tawh kisai thu a dot uh ciangin amah in, “Ka sanggamnu hi,” a ci hi. Bang hang hiam cih leh, “Rebekahʼ hangin tua gam mite in hong that kha ding ahih ciangin,” ci-in ngaihsun ahih manin, “Ka zi hi,” a cih ding lau hi. Bang hang hiam cih leh amah ngaihbaang hi.#Pian 12:13; 20:2 8Tua lai ah amah sau veipi a om khit ciangin, Filistia miteʼ kumpipa Abimelek a tawlet panin khuadak a, Isaac in a zi Rebekah a noh laitak mu kha hi. 9Tua ahih manin Abimelek in Isaac samin, “En in, amah na zi ahi hi. Tua ahih ciangin bangci-in nang in, ‘Amah ka sanggamnu hi,’ ci thei na hi hiam?” a ci hi. Isaac in ama kiangah, “‘Ama hangin si kha ding ka hih ciangin,’ ci-in ngaihsun ka hihna hang hi,” a ci hi.
10Abimelek in, “Ko tungah bangci-a hih bangin hong gamta na hi hiam? Mite khat peuhpeuh na zi tawh lum khawm pak kha thei dinga, koteʼ tungah mawhna hong tun na hi ding hi,” a ci hi. 11Tua ahih ciangin Abimelek in mi khempeuh thu zasak a, “Hih mipa ahi zongin a zi ahi zongin a su kha peuhmah kithat ding hi,” a ci hi.
12Isaac in tua leitang ah khai tuh a, tua kum mahin a zah za khat la hi. Topa in amah thupha pia a, 13a neihsa kibeh laplap ahih manin a hau mahmah khat a suak hi. 14Amah in tuu hon le bawng hon le innkuan mi tampi nei a, Filistia mite in amah eng uh hi. 15(Ama pa Abrahamʼ hun lai-a a paʼ nasemte in a tawh tuikhuk khempeuh tu-in Filistia mite in hucipin lei vuk uh hi.)
16Abimelek in Isaac kiangah, “Koteʼ kiang panin paikhia in. Bang hang hiam cih leh kote sangin nang na vanglian zaw hi,” a ci hi. 17Tua ahih ciangin tua mun panin Isaac paikhia a, Gerar kuam sungah phual satin tua munah a teeng hi. 18Isaac in a pa Abrahamʼ hun lai-a a kito sa tuikhukte to phakik hi. Bang hang hiam cih leh Abrahamʼ sih khit ciangin Filistia mite in tuate vukcip uh hi. Amah in a paʼ phuah sa minte mah phuakkik hi.
19Ahih hangin Isaacʼ nasemte in tua kuam sung to-in tuikhuk a muh uh ciangin, 20Gerarʼ gancingte le Isaacʼ gancingte kitawng uh a, “Tui, ko aʼ hi,” ci uh hi. Tua ahih ciangin amah in tua tuikhuk Esek ci-in min a phuak hi. Bang hang hiam cih leh amaute le amah kitawng uh hi.
21Tua ciangin amaute in tuikhuk dang khat to uh a, tua tungtang ah zong amaute kitawng leuleu uh hi. Tua ahih ciangin amah in tua pen Sitnah ci-in min a phuak hi. 22Tua mun panin amah kiin-in tuikhuk dang khat to leuleu hi. Tua tungtang ah amaute kitawng nawn lo uh hi. Tua ahih ciangin amah in Rehoboth ci-in min a phuak hi. “Bang hang hiam cih leh tu-in Topa in eite adingin omna hong bawlsak khin a, eite hih gamah i pung ding hi,” a ci hi.
23Tua lai mun panin amah Beer-sheba ah pai to hi. 24Tua zan mahin ama tungah Topa kilang a, “Kei pen na pa Abrahamʼ Pasian ka hi hi. Lau kei in; bang hang hiam cih leh ka nasem pa Abrahamʼ huhau-in nang tawh kong om a, nang le na suanlekhakte thupha hong pia-in kong pungsak ding hi,” a ci hi. 25Tua ahih ciangin amah in tua lai munah biakna tau khat lamin Topa bia a, tua munah puanbuk a lam hi. Tua lai ah Isaacʼ nasemte in tuikhuk khat a to uh hi.
Isaac le Abimelek Thuciamna
26Tua ciangin Gerar panin Abimelek a thulamlak pa Ahuzzath le a galkap mangpa Fikol tawh Isaac kiangah hong pai hi.#Pian 21:22 27Isaac in amauteʼ kiangah, “Note in kei hong mudahin noteʼ kiang panin hong hawl khia na hih uh ciangin bang hangin keiʼ kiangah hong hawh na hi uh hiam?” a ci hi.
28-29Amaute in, “Nang tawh Topa a omna teltakin ka mu uh hi. Tua ahih ciangin, kote in nang hong su kha loin, nangʼ tungah bangmah hong hih loin, a hoihin gamta-in lungnuam takin kong sawlkhiat mah bangun koteʼ tungah nang in siatna nong bawl loh nadingin nang le koteʼ kikalah kiciamna khat om henla, nang tawh thuciamna khat bawl ni, a ci hi ung. Nang pen tu-in Topaʼ thupha piak na hi hi,” a ci uh hi. 30Tua ahih ciangin amah in amaute adingin pawi khat bawl a, amaute in pawi an ne-in a dawn uh hi. 31Zingsangin amaute tho baih uh a, khatlekhat kiciamna a bawl uh hi. Isaac in amaute a lampi ding uh ah kha a, ama kiang panin amaute lungnuam takin a paikhia uh hi.
32Tua ni mahin Isaacʼ nasemte hong pai-in amauʼ tawh sa tuikhuk thu ama kiangah hong gen uh a, “Tui ka mu zo uh hi,” hong ci uh hi. 33Amah in tua pen Shibah ci-in min phuak hi. Tua ahih ciangin tua khuapi min pen tu ni dongin Beer-sheba kici hi.
34Esau kum sawm li a phak ciangin, Hit mi Beeriʼ tanu Judith le Hit mi Elonʼ tanu Basemath zi-in la hi. 35A zi tegel in Isaac le Rebekahʼ nuntakna haksasak uh hi.
Selectat acum:
PIANCILNA 26: TBR17
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Tedim Bible © Bible Society of Myanmar, 2017.