مَتّی 6
6
صدقه دادن
1«حَواسِرون ببو کن اِشتَن چاکه کارون مردمی چَمون نَ کا اَنجوم نِدَرَ، اِم قَصدینَه کن شمَه بِوینن و بَشِمکا تَریف بِدرِن، اِمی خونه کن اَموقه، دِ شمه آستامونیَه دَدَ وَریکا پاداشی نینَّداشت.
2«پس وَقتی کن ایلَه گیدَلیی کاریَری بَداش، هِنتَه دِسَرَ کَرچَنگون شیوار کن عیبادَتگا اونکا و کوچه‌َ اونکا بَکَن تا مردوم اَوون ستایش بِکَن جار مَژَنه. حَییقتا، بَه شمَه باتیمَه، اِمن گِردِ اِشتَن پاداشی گَتَشونه. 3پس ته وَقتی کن ایلَه گیدَلیی بالی بَگَتیش، کاری بکَه کن اِشتِه چپَه بال اَچیی ایکا کن اِشتِه راسته بال بکَیَه، سَر آمَگِنِه. 4تا اِشتِه آرَستِه نونَکِه ببو؛ اَموقه اِشتِه آستامونیَه دَدَ کن نونَکِه چییون بَویندیَه، بَه تِه پاداش آرَدا.
دوا
5«هَنگومی کن دِوا بکَشَه، هنتَه دِ سَرَ کَرچَنگون شیوار مَبِن. اِمی خونه کن اَیِن رَی بَداشتینَه عیبادَتگااونکا و کوچَه اون سَردِرِ پامندَکِه دِوا بکن، تا مردوم اَوون بِوینن اَوونکا تَریف بدَرِن. حییقتا بَه شمَه باتیمَه، اِمن گردِ اِشتَن پاداشی گَتشونه. 6ولی تِه، هَنگومی کن دوا بکَشَه اِشتَن اوتاقیرا بش، بَرَنگا دبَست و اِشتَن آستامونیَه دَدَ حِضوریکا کن چَمون نَکا نونَه دوا بکَه. اَموقه اِشتِه آستامونیَه دَدَ کن نونَکِه چییون بَویندیَه، بَتِه پاداش آرَدا.
7« هِنتَرَکِه دوا کردِ موقه، هِنتَه بت پَرستَه قامون شیواردَدارَ گَفون جیگیر مَکَرَ، اِمی خونه کن اَیِن فکر بَکَنه وِرَ واجینَه چَوون دوا قِبول آرَب. 8پس هنته چَوون شیوار مَبه، اِمی خونه کن شمهَ آستامونیَه دَدَ نارتَر اَز اِمکن اَیکا درخواست بکَرَ شمهَ نیازون بَموستی.
9«پس شمَه اِنتَرَکه دوا بکَرَ:
«چَمه آستامونیَه دَدَ،
اِشتِه نوم موقدّس ببو.
10اِشتِه پادیشاهی با.
اِشتِه ایرادَ، هَتهَ کن آستامونیکا اَنجوم بَبیَه،
زَمینی سَردِرِ نی اَنجوم ببو.
11چَمه روجَه نونی، اُمروج اَمه عطا اَکَن.
12وچَمه قَرضون ببَخش،
هَتَه کن امَه نی چَمه قَرضدارون بَبخشِستیمون.
13و اَمه وَرداوَردیکا مَوَ،
بَلکَم اَ آوشَریکا اَمه اَراخمون.
[اِمی خونه کن، پادیشاهی، قودرَت و شکوه وجلال، تا ابد اِشتِنَه. آمین.]
14اِمی خونه کن اَگَم مَردومی خطااون ببَخشَه، شمَه آستامونیَه دَدَ نی بَشمَه بَبَخشِستیَه. 15ولی اَگَم مَردومی خطااون مَبَخشَه، شمَه آستامونیَه دَدَ نی شمَه خطااون نیَه بَخشِست.
روجَه
16«هَنگومی کن روجَه بَگَتیرون، دِ سَرَ کَرچَنگون شیوار بَرضَخ آمَبه. اِمی خونه کن اَیِن اِشتَن صَفَتی نمودی عوَض آنَّکرد تا مردومی آمونن کن روجَه گَتشونه. حییقتا بَه شمَه باتیمَه کن اَیِن، گردِ اِشتَن پاداشی گَتَشونَه. 17ولی تِه، اَموقه کن روجَه بَگَتیش اِشتَن کَلَّکا روعَن آسا و اِشتَن صَفَتی بوشور. 18تا اِشتِه روجۀ اِشتِه آستامونیَه دَدَ را کن نییَب بَی چَمینه ویندِ دیار ببو نِه کن مردومیرا و اِشتِه آستامونیَه دَدَ کن نونَکِه چییون بَویندیَه، بَتِه پاداش آرَدا.
آستامونیکا گَنج ذَخیرَ بکَرَ
19«زَمینی سَردِرِ گنج گِردآمَکرَ، جگایی کن پِت و ژَنگ بَی بَژَیَه و خراو آرَکَرد و پتارچیِن اَی پِنَّتارِست. 20بَلکَم اِشتَن گنجی آستامونیکا گرد آکَرَ، اَجگا ایکا کن پِت و ژَنگ بَی نییَژن و پتارچیِن نینَّشا اَی پِتارِستِه. 21اِمی خونه کن اِشتِه گَنج هَر جِگاکا ببو اِشتِه دل نی اَجگا کا بَبیَه.
22«چَم، جَندَکی چرایَه. اَگَم اِشتِه چَم سَق ببو، گردِ اِشتِه وِجود نورینَه پَتلمَه بَبیَه. 23ولی اَگَم اَشته چَم مچم ببو، ظلَمات گردِ اِشتِه وجودیی بَگَتیَه. پس اَگَم نوری کن بَتکارَ ظِلَمات ببو چه یاله ظِلَماتی بَبیه!
24«هیچ‌کس نیَشا دِ اَربابی خیدمَت کَردِ، اِمی خونه کن یا ایلَه کا نیفرِت بَداشتی و دیَری موحبت بَکی و یا ایلَه نَه وفادار بَبیه و دیَری گچ بَه حیساب بوعَردی. شِمَه نینَّشا هِم خدا خیدمَت بکَرَ و هِم پولی.
تَفشیشیکا مَبَ
25«پس بَه شمَه باتیمَه، اِشتَن زندَگیرا تَفشیشیکا مَبه کن چِه بَرَ یا چِه بِنجهَ، و نِه اِشتَن جندَکی تَفشیشیکا کن چِه دَکَرَ. مَگَم زندَگی هَردَ چیکا و جندَک دَکَردَ چیکا مهیمتَر نیَه؟ 26آستامونی پَرَندَ اون بِوینَه کن نِه بکَشتینَه و نِه بَدورنوستین و نِه کِرِجیکا ذخیرَ بَکَن و شمه آستامونیَه دَدَ اَوون روزی دَرِ. مَگَم شمَه ارزش اَوونکا ویشتر نییَه؟ 27کییَه شمَه کا کن بِشا تَفشیشینَه، ایی ساعت اِشتَن عُمری ایضاف آکَرِ؟
28«چیرا شِندِری خونه تَفشیشی کاینَه؟ ویاوونی سوسَنه گولون دَیَسَه کن چِنتَرَ پِنَّرا؛ اَیِن نِه زحمت بَکَشتین و نِه دَوَتینَه. 29ولی بَه شمَه باتیمَه کن حتی سِلیمون پادیشا نی گردِ اِشتَن شکوه و جلالینَه هنتَه ایلَه اَ گولون شیوارخاص نِبَه. 30پس اَگَم خدا، ویاوونی واشی کن اُمروج هستَه و سَو سَه تندوریکا دَنَّفَند، اِنتَرَ پوشام نیَشَه، اَی کم ایمانِن، بَشِمَه خَیلی ویشتَر اَوونکا نِه پوشامونِه؟
31«پس تَفشیشیکا دَمَگِنَه نِواجَه کن چه بَرَم یا چه بِنجَم و یا چِه دَکَرَم. 32اِمی خونه کن بت پَرَسته قامن اِنتَرَ چییون دوملَه بگَردِستین، ولی شمَه آستامونیَه دَدَ بَموستی کن گردِ اِم چییون نیاز دارَ. 33بسکَم شمه اوَلیکا خدا پادیشاهی وچَی عیدالَتی دوملَه بِبَه، اَموقه گردِ اِمن نی بَه شمَه عطا بَبیَه. 34پس سَوسَرا تَفشیش دَمَگِنَه، اِمی خاطیرکن سَوسَه اِشتَن تَفشیشی دارِ. اورنَه موشکیلات اورنَرا وَسَّه!
Selectat acum:
مَتّی 6: CTB
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
@ 2024 Korpu Company
