مَتّی 7
7
دییَر کَسون مَحکوم مَکَرَ
1«کَسی سَردِرِ دیوون مَکَرَ تا شمَه سَردیوون مَبو. 2چون هَتَرکِه کن دیَر کَسون سَر دیوون بکَرَ، شمَه سَردِرِ نی دیوون بَبیَه و هَه پَیمونَه اینَه کن پِدارَ، شمَرا نی هَه پَیمونه نَه پِنَّداشت. 3چیرا چینِپولی اِشتِه برا چَمیکا بَویندیشَه، ولی اَ دارَ کونَه اییکا کن اِشتِه چمیکا دَرِ سَر آنیشَگنست؟ 4وقتی کن اِشتِه چَمیکا دارَ کونَه دَرِ، چِنتَرَ بَشاشَه اِشتِه برا بواجی، ”بَرزِن چینِپولی اِشتِه چَمیکا بَروَرم“؟ 5اَی دِ سَرَ کَرچَنگ، اَولیکا دارَ کونه اِشتِه چَمیکا بَروَ، چَی بَه دوملَه بِیتَر بَشاشَه ویندِ تا چینِپولی اِشتِه برا چَمیکا بِرِن بَرکَری.
6«اَچیی کن موقدّسَه، عِسبه اون مَدَرَ و اِشتَن مِرواریدون خوعون نَ کا ویمَدارَ، نِکَرِ اَوون پا بِژَنِن و آگَردن و شمَه بِزارنِن.
خواستِه و دومله گَردِستِه و کوستِه
7«بِپیَه کن بَه شمَه آدوعِه بَبیه؛ بگَردَ کن پَیدا بَکَرون؛ بوکوعه، کن بَرَنگا شمه ناریکا آج آرَبن. 8اِمی خونِه کن هَر کَم بَپیشَه، بِه دَست بوعَردی و هر کَم بگَردِ پَیدا بَکَی و هر کَم بکو، بَر چَی نَ کا آج آرَبن. 9کِرَم گلَه شِمَه کا اَگَم چَی زوعَه اَیکا نون بخا، نونی عوض بَی سه آرَدا؟ 10یا اَگَم مای بخا، مای عوض نَلَتی بَی دَرِ؟ 11پس اَگَم شمَه کن آوشَرینَه بَموستیرون کن پی اِشتَن خردَنون چَاکَه خَلااون بِدَر، چَنه ویشتَر شمَه آستامونیه دَدَ، اَیِنی کن اَیکا بَپیشون، چاکَه خَلااون بَبَخشستیَه. 12پس مردومینَه هَته رفتار بکَرَ کن بَپیرونَه شمَه نَه رفتار بکَن. اِمَه تورات و پَیغَمبَرون نوشتَه اِن خولاصَه.
تَنگَه بَرَنگا
13«تَنگه بَرَنگاکا دِله دَشه، اِمی خونه کن وِشا اَ برَنگا و راحته راه، نیفلَه آبِه طَرَف بَشیه و کسِنی کن اِنتَرَ بَرَنگاکا دِلَه دَنَّش وِرینَه. 14ولی تنگَه اَ بَرَنگا و چِتینه اَ راه کن زندَگی طَرَف بَشی، و چَی اَوینِن کَمینه.
دار و چَی اَکین
15«دِروعَه پَیغَمبرونکا رَت آبَه. اَیِن پَسون شیوار شندر دَنَّکَرد و شمَه وَربومَن، ولی باطنیکا بزارنَه وَرگینَه. 16اَوون چَوون میوَ اونکا بَشارون آزنِستِه. مَگَم اَنگری، چغیکا و اِنجیلی، بِریکا بَچینَه؟ 17هنتَرَکِه هر چاکَه دار چاکه میوَ دَرِ اَمّا بَدَ دار بَدَ میوَ. 18چاکه دار نِیَشا بَدَ میوَ بدَرِ، و بَدَ دارنی نیَشا چاکَه میوَ بوعَرِ. 19هر داری کن چاکَه میوَ نِدَر اَی دَنَّبیرد و آرا کا دَنَّفَند. 20پس، اَوون چَوون اَکینیکا بَشارون آزنِستِه.
21«فکر مَکَرَ هر کَم بَمن ”خداوندا، خداوندا “ خِلِه بکَرِ آستامونی پادیشاهیکا دِلَه دَرَش، بسکم تاکَه اَ کن چمن آستامونیَه دَدَ ایرادَ بجا بوعَرِ آستامونی پادیشاهیکا دِلَه دَرَش. 22دیوون کَردِ روجیکا خَیلیِن بَمن باتینَه: ” اَی خداوند، اَی خداوند، مَگَم اَمه اِشتِه نومینهَ پیشگویی نِکَریمون؟ مَگَم اِشتِه نومینه پَریان بِرِن بَنِکَریمون؟ مَگَم اِشتِه نومینه وِرَ موعجِیزَ اَنجوم آنِدَریمون؟“ 23اَموقه اَز آشکارا اَوون باتیمَه: ”هَرگز شمه آزنِستَم نیَه. اَی بَدکارن، چمن چَمی نَ کا رَت آبه!“
دِ گِلَه کَه
24«پس هر کم چمن اِم گَفون دَرَسِه و اَوون اَنجوم بدَرِ، هنته اَلمَندَ مِردیی بَمَندیَه کن اِشتَن کهَ هیمی، کازی سَریکا سِی آرَکَرد. 25وَقتی کلاک وارِستَه و لَیس آمَه و وا راست آبَه و اَ کهَ سَر زور وَردِشَه، اَ کَه خراو آنییَبن اِمی خونه کن چَی هیمی کازی سَریکا سِی آکردَشَه. 26ولی هر کم چمن اِم گَفون دَرَسه و اَوون اَنجوم نِدَرِ، نافمَه مِردی بَمندی کن اِشتَن کَه هیمی فوشی سَردِرِ سی آکَردَشه. 27وَقتی کلاک وارَ و لیس آمِه و وا راست آبَه و اَ که سَر زور وَردِشَه، اَ کَش ویراوِنِستَه، و چَی ویراونستِه خَیلی یال بَه!»
28وَقتی عیسی اِم گَفِنِش ژَ، مردوم چَی آموجیکا حَیرون آبینه، 29اِمی خونه کن هنته چَوون موعَلّیمون شیوار نِبَه و زاکیندار آموج اَدَریَه.
Selectat acum:
مَتّی 7: CTB
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
@ 2024 Korpu Company
