انجیل لوقا 22
22
عیسی کِشتِه نَقشَه
1فَطیرَ عید کن بَی پِسَخَه عید باتین کایبَه نِزِک آبِه، 2و سَران کاهنِن و توراتی مُعَلیمِن عیسی کِشته را راهی دوملَه اَگردین، اِمی خونه کن مَردومیکا اَترسینَه. 3اَموقه شَیطون یَهودا دِلیکا دَشَه، اَ یهودا کن بَی اَسخریوط خِلِه اَکَرینَه. یَهودا ایلَه اَ دانزَ گِلَه شاگِردیکا بَه. 4اَ سرانِ کاهِنن ومَعبَدی نیگبانون فَرماندَاون وَر شَه و اَوونَّه گَف ژِشَه کن چِنتَه عیسی چَوون تَسلیم بکَرِ. 5اَیِن نی خَش آبینه و قِبول کَردشون بَی پول بدَن. 6یهودا نی قِبول کَردِشَه و فِرصَتی دوملَه بَه تا بی اِمکن جَماعَت اِم ایتفاقیکا باخبر ببون، عیسی اَوون تسلیم بکَرِ.
پِسَخی سور شاگِردونَّه
7فَطیرَ عیدَ روج آرَستَه کن اَروجیکا پی پَسَخَی وَرَ قِربونی بکَن. 8پس عیسی، پِطروس و یوحناش عَندَ و اَیِنِش واتَه: «بشَه و پِسَخَه عیدی سوری چمَرا آمادَ بکَرَ تا بَرَم.» 9اَیِن دَپرسستین: «بَپیرَ کِرَم جگا آمادَ بکَرَم؟» 10عیسی جواب داشه: « هَنگومی کن شهریکا دِلَه دَشیرون، ایلَه مِردی کن کا آوَ کَتلَهَ ایی بَردِ شِمَنه سَراسَر بَبی، چَی دوملَه بشَه و کَه اِیرا بِشه کن اَ اَیکا دِلَه دَرَش، 11و کَه صاحیبی بِواجَه: ”اِستا باتی: میمان خونَه کِرَم جگا کارَ تا پِسَخَه عیدی سوری اِشتَن شاگِردونَّه بَرم؟“‘ 12اَ یالَه بالاخونه ایی کن جیکَردَشونه بَشِمَه آمونِه. اَجِگاکا پِسَخَه عیدی سوری آمادَ آکَرَ.» 13اَیِن شینَه و گرد چییون هَتَرَکه کن عیسی اَیِنِش واتَه بَه ویندِشون و پِسَخَه عیدی سوری آمادَ آکَردِشون.
14وَقتی تَعیین به ساعَت آرَستَه، عیسی رسولونَّه سفرَ سَر نشتهَ. 15عیسی اَیِنِش واتَه: «خَیلی رَی داریمَه چمن عَذاب کَشتهِ بَه نَ، اِم پِسَخَه سوری شمَنهَ بَرم. 16اِمی خونه کن بَشِمَه باتیمَه دِ اِم سوریکا نِمَرد تا اَ هَنگوم کن خدا پادیشاهی کا اَنجوم ببو.» 17چَی بَه دومله گولَه پِگَتشهَ و شکر کَردِ بَه دوملَه و واتِش: «اِمی بیگرَ و اِشتَن دِلکا رَسَت بِکرَ. 18چون بَه شمَه باتیمَه کن ایسَکا تا خدا پادیشاهی آمِه موقه، دِ اَنگِری اَکینیکا نیمِنت.» 19چَی بَه دوملَه نونِش پِگَتَه، شکر کَردِ بَه دوملَه پزارنِستِش و اَیِنِش آدوعَه و واتِش: «اِم چمن تَنَ کن شمَه خونِه آدوعَه بَبی؛ اِم کاری چمن یادیرا اَنجوم بِدَر.» 20هِنتَرَکه، سوری بَه دوملَه گولَه پِگَتِشَه و واتِش: «اِم گولَه چمن خونَه کن اِم تازَ عهدی بَینه موهر بَکَم و چمن خون شِمَه خونه ویرَب. 21ولی اَ کَسی بال کن بَمن خَیانَت بکَیَه، چِمِن بالینه سفرَ کارَ. 22اِمی خاطر کن اِینسانی زوعَه هَته کن چَیرا موقَدَر بَیَه بَشیهَ، اَمّا برامِه اَ کَسی حالیرا کن بَی غَنیمی تَسلیم بَکَیَه. 23اَموقه اَیِن دَمَندین یِندِ کا دَپَرسِستِه کن کِرَم گله اَوونکا بَشایَه اِنتَرَ کاری کَردِ.
کی گِردیکا یالتَرَ
24شاگِردون دِلَکا نی بحثی شِروو بَه کن کِرَم گلَه اَوونکا گِردیکا یال تَرَ. 25عیسی اَیِنِش واتَه: «دیِرَ قامون پادیشااِن و حاکیمِن، چَوون سَردِرِ حِکم بَکَنَه؛ اَمّا مردوم هَنی باتینه اَیِن خیرخا اینَه. 26ولی شمَه انتَر مَبه. شِمَه دِلَکا یال تَرین پی هِنتَه اَ کَسی شیوار ببو کن گِردیکا گِچ تَرَ و رَییس پی هِنتَه پاسَری شیوار ببو. 27اِمی خاطر کن کِرَم گله یال تَرَ، اَ کن سفرَ سَربَنِشتیَه یا اَ کن پاسَریَه؟ مَگَم اَکَن سِفرَ سَر بَنِشتیَه یال تَر نی؟ ولی شمَه دِلکا اَز هَه کَسی شیواریم کن پاسری گیری بَکَیَه.
28«شمَه کَسِنی هستیرون کن چمن وَرداوردونکا چمن وَر مَندیرون. 29پس هَتَه کن چمن آستامونیَه ددَ پادیشاهی ایی بَمن آدوعَشَه، اَز نی اَی بَه شمَه آمَدا. 30تا شِمَه نی چمن پادیشاهیکا چمن سِفرَکا بَرَ، بِنجهَ و تَختون سَر بنشهَ وخِدا قامی دانزَ طایِفَه سَردِرِ حِکومت بکَرَ.
31«شَمعون، شَمعون، دَیَس شیطون اِمی دوملَه بَه هِنتَه کَشاوَرزی شیوار کن گَندِمی سِنبَریکا تاکَه آرَکَرد بَتِه اِشتَنرا تاک آکَرِ. 32ولی اَز اِشتِه خونه دوا کَردِمَه تا اِشتِه ایمان هیچ آمَبو. وَقتی کن هَنی ویگَردِستیشَه، اِشتِه بِراوون قوَت بِدَ.» 33پِطروس جَوابیکا واتِش: «چمن سَروَر، اَز حاضِریمَه هِم بَتِنَه زیندانیرا بشوم و هِم بَتِنَه بِمِرم.» 34عیسی جواب داشه: «پِطروس، بَتِه باتیمَه کن اُمروج سوکی خَندِ بَه نَ، سه کَرَ حاشا بَژَشَه کن بَمن آشَزنی.»
35چَی بَه دوملَه عیسی اَیِنش واتَه: «اَموقه کن بَشمَه بی پوله کنجهَ و بوخچَه بار و پا غَب، عَندِمَه مَگَم چیی محتاج آبیرون؟» اَیِن جواب داشونَه: «نِه، هیچ چیی؟» 36عیسی اَیِنِش واتَه: «ولی ایسَه هر کَم پولَه کِنجه یا بوخچَه بار دارِ، اَی پِگرِ و ا کَسیرا کن شمشیر نی، اِشتَن شِندری بخرَشِه، شمشیری بخِرِ. 37اِمی خاطِرکن بَشمَه باتیمَه، موقدسَه نیویشتَه اون اِم پیشگویی، پی چمن خونه ایتفاق دَگِنِه کن باتی: ”اَ خطا کارون کاولَکا بَه حیساب آمَه.“ ها، اَچیی کن چمن خونَه نوشتَه بَیَه، کا ایتفاق دَگِنسته.» 38شاگردِن واتِشون: «چَمَه سرور، دَیس، دِ گِلَه شمشیر دارَم.» ولی عیسی جواب داشه: «دِ وَسَّه!»
عیسی زیتونی کوکا دِوا بَکَی
39چَی به دوملَه عیسی بِرِن شه و اوزونَه عادتی شیوار، زَیتونی کورا شَه و چَی شاگردِن نی چَی دوملَه رونَه بین. 40وَقتی عیسی اَجگارا آرَستَه، اَینش واتَه: «دِوا بکَرَ تا وَرداوَردیکا دَنِگِنَه.» 41چَی بَه دوملَه عیسی ایلَه سِه ای ویداشتِه قَدَر اَوونکا دور آبَه و زِنگ ژِشَه، دوا کردش: 42واتش: «اَی دَدَ، اَگَم اِشتِه ایرادَیَه، اِم عذابی گولَه بَمنکا رَت آکَه؛ با اِم وِجود اَ چیی کن من بپی مبو، بَسکَم اَ چیی ببو کن کن ته بَپیرَ.» 43اَموقه ایلَه فرشتَه آستامونیکا عیسی را اَیر آبَه وبَی زبق آداشَه. 44عیسی هَتَه کن عذابیکا بَه، ویشتَر دوا کَردشَه، و چَی عَرق هنتَه خونَه چِلَه اون شیوار زَمینی سَردِرِ ویرَبیَه. 45وَقتی عیسی دواکا پِبَ و شاگردون وَرآگَردستَه، ویندِشَه شاگِردِن قورصَه خونه ختینهَ. 46عیسی اَیِنِش واتَه: «چیرا ختیرون؟ پِبَ و دِوا بکَرَ تا وَرداوَردیکا دَنِگِنَه.»
عیسی تَسلیم آبِه
47هَنوزَنی عیسی گَف اَژَنیَه کن جماعتی راکا آرَستین. یهودا،کن ایله اَ دانزّشاگردونکا بَه، جماعَتی ناریکا کایبَه آمِه. یهودا عیسی کا نِزک آبه تا اَینَه ماچینِه بکَر، 48ولی عیسی بَی واتِش: «یهودا، تِه ایلَه ماچینِه نَه اینسانی زوعَه تسلیم بکَش؟» 49وَقتی اَیِنی کن عیسی دووریکا بینَه ویندشون کن چه ایتفاقی کا دَگِنِستِه، واتِشون: «چَمَه سرور، چَمَه شمشیرِون دَراکِنَم؟» 50و ایلَه اَوونکا شَمشیرینَه یالَه کاهنی پاسَری ژِشهَ وچَی راسته گوشی آبیردِش. 51ولی عیسی واتِش: «دَست غَم بَرَ!» واَ مِردی گوشی دَست آسا کَردِشَه و شفا داشَه. 52چَی بَه دوملَه عیسی سران کاهنِن و مَعَبَدی نیگَبانون فرماندَاون و ایسبیَه ریشِنِش کن چی ویلاخِنیِه خونِه آمَه بینَه، واتِشَه: «مَگَم اَز پتارچی ایمَهَ کن لِسو و شمشیرینَه چمن گَتِه را آمَه اینَه؟ 53اَموقه کن اَز هَمه روج معبدیکا شمنَه بیمَه، بَمن دست نِژِرون. اَمّا ایسَه شمَه وَقتَه و ظِلَماتی زبقی وقت.»
پِطروس عیسی اینکار بَکَی
54چَی بَه دوملَه اَیِن عیساشون گَتَه و یالَه کاهِنی کَرا بَردشون. پِطروس دوریکا کایبَه چَوون دوملَه شِه. 55کهَ صِرا وسَطیکا، آرایی رِوشون بَه و کاولَه ایی چَی دوور نِشت بینَه. پِطروس نی چَوون دلَکا نشتَه. 56اِم هنگومیکا، ایلَه کنیز پطروسی کن آرا شَپَقیکا نشت بَه، بَویندی و بَی چَم دَشتِشَه واتِش: «اِم مِرد نی عیسا نَه دَرِ بَه.» 57ولی پِطروس حاشا ژِشَه و واتِش: «اَی ژِن، بَی آنِمَزنست.» 58تیکَلی ایی گِذَشتَه، دیَیرَکَسی پطروسی ویندشَه و واتِش: «ته نی ایلَه اَوونکاشَه.» ولی پِطروس جواب داشَه: «اَی مِرد، اَز اَوونکا نیمهَ.» 59ایی ساعتی گذَشته و دیَیرَ کَسی تأکیدینه واتِشَه: «یقین بَموستیم کن اِم مِرد نی عیسی دَرِبَه، اِمی خاطرکن اِم مِرد نی جلیلی آدَمونکا اَ.» 60اَمّا پِطروس جَوابیکا واتِش: «اَی مرد، نِمَموست چیش باتی.» پِطروس هنوزَنی گَف دَرِ بَه کن هَه موقه کا سوک خَندشه. 61خداوندعیسی اِشتَن دیمی آگاردِنِستِشَهَ و پِطروسی دَیَشتِش. پِطروس خداوند عیسی گَفی یاد آرَفندِشه کن بَی واتَش بَه: «اُمروج سوکی خَندِ بَه نَه، تِه سِه کَرَ بَمن حاشا بَکَشه.» 62پِطروس بِرِنیرا شَه و بَرک کایبَه بِرَمِستِه.
عیسی دَسپَر بگَتین
63اَیِنی کن کایبین عیسی کا نیگبانی دوعِه، اَی دَسپَر اَگِرین و اَژَنینَه، 64اَیِن عیسی چَمِنشون دَبَستَبَه، یَژَن اَیکا دَرَپرسینه: «ایسَه غَیب بواج کن کی بَتِه بَژَی؟» 65و اَیِن وِرَ دیَیرَ زَمون عیسی اَدَرین.
عیسی یَهودی شورا ناریکا
66وَقتی کن صبح آبهَ، قامی ایسبیَه ریشِن، یعنی سران کاهنِن و توراتی موعَلیمن، یَندِنَه ایی جِگاکا گِرد آبین و واتِشونَه کن عیسی چَوون وَر بِبَرن.اَیِن عیساشون واتَه: 67«اَگَم تِه وَعدَ آدوعَه مَسیح ایشَه، اَمَرا بواج.» اَمّا عیسی واتِش: «اَگَم بواجِم، چمن گَفی باور نینَّکَرد، 68و اَگَم شمه کا دَپَرسِم، چمن جَوابی نینَّدا. 69ولی چیمی بَه دوملَه، اینسانی زوعَه خدا خِنَری راستَه بالی وَریکا بَنِشتیَه.» 70اَیِن گرد واتِشون: «پس تِه خدا زوعَه ایشَه؟» عیسی جَوابیکا واتِش: «شمَه اِشتَن باتیرون کن اَزهِستیمه.» 71پس اَیِن واتِشونَه: «دِ شاهیدِمون چیروعَه؟ اَمه اِشتَن اِم گَفی، چَی اِشتَن گَوینَه درَستِمون.»
Selectat acum:
انجیل لوقا 22: CTB
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
@ 2024 Korpu Company
