انجیل لوقا 21
21
ویوَ ژِنی خَلا
1عیسی اَطرافی دَیَشتِشَه و ویندِشَه کن ثیروتمندِن اِشتَن خَلااون، مَعبدی صوندوخیکا کان دَرَفَندِ. 2ایلَه گیدَلیَه ویوَ ژِنِش ویندَ کن دِ قران صِوندوخَه کا دَرَفَندِش. 3عیسی واتِش: «حَقیقتَا بَشِمَه باتیمَه، اِم گیدَلییَه ویوَ ژِن گِرد اَوونکا وِیشتَر صِندوخیکا پول دَرَفَندَشَه. 4اِمی خونه کن اَیِن گِرد، اِشتَن دارایی ایضافَکا آداشونَه، ولی اَ ویوَ ژِن اِشتَن گیدَلی گیری نَه، گردِ اِشتَن دارایی، آداشَه.»
عیسی مَعبَدی ویراوُنَستَه پیشگووی بَکَی
5وَقتی کن بَعضیِن مَعبَدی خونه گَف اژَنینَه کن چِنتَر خاصَه سِه اونَّه و خَلا اونَّه تَزین آبَه یَه، عیسی اَیِنِش واتَه: 6«روجِنی بومَنَه کن، اِم چییِنیکا کن بَویندیرون، دِ اِم جِگاکا سِه ای سِه سَریکا نیَمَند بَلکَم گرد ویرَریست.»
7اَیِن عیساکا دَپرسستینَه: «اِستا، اِم ایتفاقِن کَینی دَرَگِنِست و چَوون نِزِک آبِه نِشونَه چِه چیَه؟» 8عیسی واتش: «حواسِرون ببو تا گمراه آمَبهَ؛ اِمی خونه کن خَیلیِن چمن نومینَه بومَنَه و باتینَه: ”اَز هَه ایمَه“ و ”اَ تَعیین بَه وَقت آرَستَیه“. چَوون دوملَه مَشَه.
9« وَقتی کن جَنگون و آشوبون خَبَری دَرَستِرون، مَترسَه. اِمی خونه کن پی اوَلیکا اِم چییِن ایتفاق دَرَگِنن، ولی دِنیا جَخت بَه آخییر آنیَرَست.» 10چَی بَه دومله عیسی اَیِنِش واتَه: «میلَتی دییَرَ میلتی زِرَبَرا و حِکومتی دییَرَ حِکومتی زِرَبَرا راست آنَّب. 11یالَه بومَه لَرزَاِن بومَیَه، قحطی و طاعون مُختَلیفَه جگا اونکا بومَیَه. و ترسناکَه ایتفاقِن دَگِنِن و آستامونیکا یاله نِشونه اِن دیار آرَبن. 12«ولی گِردِ اِم ایتفاقون دَگِنِسته بَه نَه، شمَه ویلاخِنِن، واَیذت آزار بَکَنَه. بَشِمَه عیبادَتگا اون و زیندانون تَحویل بَدان. چمن نومی خونِه، شمَه پادیشاهِن و والیون وَر بَبَردینَه. 13اِم شِمَرا فِرصَتی بَبیَه تا شَهادَت بدَرَ. 14پس اِمی چاک اِشتَن یادیکا غَم بَرَ کن نار تَر اِم فِکریکا مَبَه کن پی چِنترَ جواب بدَرَ. 15اِمی خاطرکن اَز بَه شمَه اِنتَرَ گَف ژِ خِنَری و حیکمتی آمَدا کن هیچ کِرَم شمهَ غَنیمونکا مَشان شِمَه رودَکَر بومونن یا شمَنه موخالیفت بکن. 16حتی شِمَه ددَ ننَه اِن، برااِن، خیشِن و شمهَ رَفِقن بَشمَه غنیمی تَسلیم بَکَنَه و بعضی شِمَه اونکا بَکشتین. 17گِرد آدَمِن چِمِن نومی خونِه شمه کا نیفرَت بَداشتین. 18ولی شِمَه کَلَّه کا ایی تا مو نی کَم آنیَبِن. 19شمه اِشتَن صبر و تهمولینه اِشتَن جانی نیجات بدَرَ.
20«ولی وقتی ویندِرون کن غَنیمی لَشکَرِن شَهر اورشَلیمی موحاصیرَ کَردَشونَه، بِزنهَ کن اورشَلیمی ویراوِنستِه نِزکَه. 21اَموقه اَیِنی کن وِلَتِه یهودیَه کا مَندین کومونرا بیوریجِن، اَیِنی کن شهری دِلَکانَه شهریکا بِرِن بَرشون و اَیِنی کن ایسبیتیکا و وَیاوونیکا مَندینَه دِ شهری دِلرا نان. 22اِمی خونِه کن اَ روجِن، مِکافاتَه روجینَه کن هَر چیی کن موقَدَسَه نوشتَه اونکا نِوِشتَه آبَه یَه اَ روجونکا اَنجوم بَبیَه. 23برامِه اَ ژِنونی حالیرا کن اَ روجون دِلَکا خامیلَه اینَه یا خِردَن شِت بَدان! اِمی خونه کن یاله غَرّی زَمینی سَریکا بَبیَه وخِدا اِم مَردومی سَردِرِ غَضَّب بَکَیَه. 24شَمشیری دَمینَه اَوون بَکشتین و اَوون گِردِ مِیلتون دِلَکا بَه ایسارَت بَبَردین و غَیر یَهودییِن اورشَلیمی پا پِکو بَکَن تا زَمانی کن غَیر یَهودیون دوورَ تمون آبو.
اینسانی زوعَه آمِه
25«نشونَه اِنی آختاو و مانگُ و اِستَرَاونکا دیار آرَب. زَمینی سَردِرِ میلتِن، دَیرا و موجون غورشیکا تتَه وسَّه کا دَنَّگِنِست. 26آدَمِن تَرسیکا و اِم فکریکا کن دِنیا سَر چِه کا آمه بیهوش ببین، اِمی خونِه کن اَ اینجارِنی کن آستامونون آمبَست غَم بردینه بَلَرزِستین. 27اَموقه اِینسانی زوعَه بَویندینَه کن خِنَرو و یاله شکوه و جلالینه، ایلَه خِری دِلَکا آ. 28وَقتی کن اِم چییون دَمَندین ایتفاق دَگِنِستِه، دیک پا بومونهَ و اِشتَن کَلّه اون کَفا بیگِرَ، اِمی خاطر کن شمه رَخِستِه نِزکَه!»
29عیسی اِم مَثَلی چَوونرا وَردِشَه: «اِنجیلَه داری و گِردِ دارون بِوینَه. 30اَیِن تا لیو بوعَردین، بَشارون ویندِ وسَر آگِنستِه کن تاواستون نِزِکَ. 31هنتَرَکِه، هروَقت بِوینَهَ اِم چییون ایتفاق درَگِنست، بِزنَه کن خدا پادیشاهی نِزک آبَه یَه. 32حَییقتَا بَه شمه باتیمَه، تا گرد اِم چییون ایتفاق دَمَگِنه، اِم اودوم نیفیت آنیَب. 33آستامون و زمین نیفیت آنَّب، ولی چمن گَفِن هرگز نیفیت آنینَّب.
هوش بِبَه
34«هوش ببهَ، نِکَرِ وِرَ هَردِ، مستی و اِم زندَگی تَفشیشِن شِمَه دِلی سنگین آکَرِ و اَ روج دومی شیوار ایکَرَایی شِمَه ویلاخِنِه. 35اِمی خونه کن اِم ایتفاق دِنیا اِم اسَر اَسَریکا گِردِ آدَمون سَردِرِ بومیَه. 36پس اوزون هوش ببَه و دوا بکرَ تا زبق بِدارَ کن گردِ اِم ایتفاقونکا کن چَی اَنجوم بِه نِزِکَه، بشوعَه بَروَشتِه و اینسانی زوعَه حِضوریکا پا بومونَه.»
37عیسی هَمَه روج مَعبَدیکا آموج اَدَریَه، وَلی شَوِن شهریکا بِرِن اَشیه و کُوایی سَریکا کن چَی نوم زَیتون بَه، شَوی صِب آکری. 38سوکَه خون مَردوم گِرد مَعبَدیرا چَی وَر آین تا چَی گَفون دَرَسِن.
Selectat acum:
انجیل لوقا 21: CTB
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
@ 2024 Korpu Company
