یوحنا 7
7
عیسی اَوالَه اون عیدیرا بَشیَه
1چیمی بَه دوملَه، عیسی ایی مودَّتی وِلَته جلیلیکا اَگَردیَه. اَ نَپیش بَه یهودیَه کا ببو، اِمی خاطِر کن یهودیِن اَپیشون به اَی بکشِن. 2اَوالَه اون عیید کن یهودیون ایلَه عیدونکارَ، نِزِک بَه، 3پس عیسی برا اِن بَی واتِشون: «اِم جِگاکا بَرشِن و یَهودیَرا بش تا اِشتِه شاگِردِن نی، اَ کارِنی کن بَکَشَه بِوینِن، 4اِمی خونِه کن هر کَم اَپیشه کن اَی آزنن، نونکِه کار نییَکَرد. اَگَم اِم کارون بَکَشَه، بَشتَن دنیارا آمون.» 5اِمی خونِه کن حتی چَی برااِن نی بَی ایمان ندارینَه. 6پس عیسی اَینِش واتَه: «هَنوزَنی چمن وقت آرَستَه نیَه، ولی شمَرا هر وقتی مناسیبه. 7دِنیا نیَشا شمَه کا نِیفرت بِدارِ اَمّا بَمنکا نیفرَت دارِ، اِمی خونِه کن اَز شاهیدی بَدامَه کن چَی کارِن بَدینَه. 8شمَه اِشتَن عیدیرا بشه، اَزایسه اِم عییدیرا نام، اِمی خونه کن چمن وَقت هَنوزَنی آرَستَه نی.» 9عیسی اِمی واتشَه و جلیلیکا مَندَ.
10ولی بَعد اِمکن کن چَی برااِن عیدی خونه شینَه، اَ نی شَه، ولی آشکارنِشه، بَلکَم نونَکِه شَه. 11پس یهودیِن، عییدَ هَنگوم چَی دوملَه اَگَردین و دَرَپَرسینَه: «اَ مِرد کرَم جگاکارَ؟» 12و چَی خونِه مَردومی دلَکا بَرکه خَرا خلِه ایی بَه. بعضی اَواجینَه: «چاکَه مِردیَه.» اَمّا بعضی اَواجینَه: «نِه! مَردومی گومراه بَکَی.» 13ولی اِمی خونِه کن یهودیونکا اَترسینَه، هیچ‌کَم آشکارا عیسی خونِه گَف نَژَنیَه.
14اَمّا وَقتی عیدی نِصب گِذشتَه بَه، عیسی معبدی دَلَرا آمَه و دَمندَ آموج دوعِه. 15یهودیِن تَعَجُب کَردشون بَه و دَرَ پَرسینَه: «اِم مِرد کن دینی درسی خَندَش نِیهَ، چِنتَر بَشایَه اِنتَر دانشی بِدارِ؟» 16عیسی چَوون جَوابیکا واتِش: «چییِنی کن بَشِمَه آموج دَرِم، بَمنکا نیَیه، بَلکَم اَیکارَ کن بَمن رَونَه آَکَردَشه. 17اَگَم کَسی بَپیشه چَی ایرادَ اَنجوم بدَرِ، بَموستیه کن اِم آموجِن خدا کارَ، یا اَز اِشتَنکا باتیمَه. 18اَکَن اِشتَنکا باتی، اِشتَن شکوه وجَلالی دوملَه یَه، ولی اَکَن اِشتَن رَونَه آکَری شکوه و جَلالی دوملَه ببو، صادیقَه و بَیکا هیچ درویی نیَه. 19مَگَم موسی اِ پیغَمبر شریعتِش بَشمَه آنِداشَه؟ اَمّا اِم حالینه هیچ‌کم شِمَکا، شَریعتی واتَه چییون اَنجوم نِدارون. چیرا بَپیرونَه بَمن بِکِشَه؟» 20مردوم جواب داشونه: «ته پَریانی ایشَه! کی بَپیشَه بته بکشِه؟» 21عیسی چَوون جَوابیکا واتِش: «اَز ای کاری کَردِمه و شمه گرد اَیِکا تَعَجب کَردِرونَه. 22موسی سنَت کَردِ حکمی شمَه آداشَه - البت اِم حکم موسی کا نِبَه بَلکَم بابااونکا بَه و شمَه موقدسَه شَنبَه روجیکا زوعَه اون سنَت بَکَرون. 23پس اَگَم اینسان موقَدسه شَنبَه روجیکا سنَت بَبی تا موسی شَریعَت مَچَکِه، چیرا بمنکا آسرَنگینَه کن ایلَه اینسانی جَندَکی موقدسَه شَنبه روجیکا کامیلا شفا دامَه؟ 24بَه ظاهیر دیوون مَکَرَ، بَلکَم بَه‌حَق دیوون بکَرَ.»
مَگم بو اَ مَسیح ببو
25بَعضی اورشَلیمی آدَمونکا واتِشون مَگَم اِم هَه نیَه کن اَپیشونَه بَی بِکِشِن؟ 26اَ اِم جِگاکارَ، کا آشکارا گَف ژِ و اَیِن بَی هیچی ایی نینَّوات! بَبیَه کن قامی یالَه آدَمِن واقییَن سَر آگِنَه ببون کن اِم هَه وَعدَ آدوعَه مسیحَه؟ 27ولی اَمه بَموستیمون کن اِم مِرد کَرَم جِگاکا آمَیَه و وقتی کن وعدَ آدوعَه مَسیح ظهور بِکَرِهیچ کَم نییَموست کن اَ کِرَم جِکا کا بومَیَه.» 28پس وقتی کن عیسی مَعبَدیکا آموج اَدَریَه، تَّته لَسَّنَه واتش: «شِمَه بَمن آزنَه و بَموستیرون کِرَم جِگاکا آم. ولی اَز اِشتَن بَسَر آمَه نیمَه و اَ کن بَمن عَندشَه حقَّه؛ و شمه اَی آنینَّموست. 29ولی اَز بَی آمَموست، اِمی خونِه کن اَز چَی طَرَفیکا آمَه ایمَه و اَ بَمن عَندَشَه.» 30پس اَپیشون بَه بَی ویلاخِنِن، اَمّا هیچ‌کَم چَی سَردِرِ بال دراز آنِکَردِشَه، اِمی خونه کن عیسی وَقت هَنوزَنی آرَستَه نِبَه. 31اِم حالینه، خَیلیِ مَردومیکا بَ عیسی ایمان وَردشونَه. اَیِن اَواجینَه: «مَگَم وَقتی مسیح ظهور بکَرِ، اِم مِردیکا ویشتَر نشونه و موعجیزَ بَکَیَه؟»
32ولی فَریسیون فرقه عالیمون گوش آرَستَه کن مردوم عیسی خونه اِنتَرَ گَفونی بَژَن. پس سران کاهینن و فَریسیِون فرقه عالیمِن، مَعبَدی مَامورون عَندِشونَه تا اَی ویلاخِنِن. 33اَموقه عیسی واتِشَه: «دِ تَلَکه ایی شمَنه دَرِ ایمَه، وچَی بَه دوملَه کَسی وَر بَشیمَه کن بَمِنِش عَندیَه. 34چمن دوملَه بَگَردستیرون، ولی بَمن پَیدا نینَّکرد؛ اَجگا ایی کن اَز هِستیمَه، شمه نینَّشا آمِه.» 35پس یهودیِن یَندِ واتِشون: «اِم مِرد بَپیشَه کِرَم جگارا بِشو کن اَمه نِمونَه شا اَی ویندِ؟ اَپیشه یهودیونی وَر بشو کن یونانیون دلَکا ولاخ آبَه اینَه و یونانیون آموج بِدَر؟ 36چَی مَنظور چه چی بَه کن واتِش، ”چمن دوملَه بَگَردِستیرون، ولی بَمن پَیدا نینَّکَرد؛ و اَجگا کن اَز هستیمَه، شمه نینَّشا آمِه“؟»
ربارِی کن زِندَ آو دارِ
37عیدی آخرَ روجیکا، کن عیدی یاله روج بَه، عیسی پا مَندَ و تَتَه لَسَّنه واتش: «اَگَم کَسی تشیشَه، چمن وَر با و بِنجِه. 38هر کم بَمن ایمان بوعَرِ، هَته کن موقدَسه کیتاوون دِلَه باتی، چَی دِلَکا زِندَ آوَ ربارِن شِر شِر دَران.» 39عیسی اِم گَفی موقدسَه روح خونِه واتِش، کن، اَیِنی کن بَی ایمان بوعَرن اَی وینَّگَت؛ اِمی خونه کن هَنوزَنی موقدسَه روح عَطا آبَه نِبَه، اِمی خونه کن عیسی، هَنوزَنی جلال، گَتَش نِبَه.
40وَقتی مردوم اِم گَفِنِشون دَرَستَه، بَعضییِن واتِشون: «واقییَن کن اِم مِرد، هَه وعدَ آدوعَه پَیغَمبرَکن پی با.» 41بَقییَه اَواجینَه: «اِم مِرد هَه وعدَ آدوعَه مسیحَه.» ولی دییَرَ کاولَه ایی واتِشون: «مَگَم مسیح جَلیلیکا آ؟ 42مَگَم مُقدسَه کیتاوِن نَواجینَه کن مسیح داوودِ پادیشا اوودومیکارَ و بیت لَحِمیکا و اَ آوادی ایکا آ کن داوودِ پادیشا اَ جِگا ایی به؟» 43پس عیسی خونه، مَردومی دلَکا ایختلاف دَگنستَه. 44بَعضییِن اَپیشون بَه اَی ویلاخِنِن، ولی هیچ‌کَم چَی سَردِرِ بال دراز آنِکَردِشَه.
45اَموقه مَعبَدی مامورِن، سران کاهینن و فَریسیون وَر ویگردِستین. اَیِن مامورونکا دَپَرسِستین: «چیرا عیسارون نِوردَ؟» 46مامورِن جواب آداشون: «تا ایسَه، کَسی اِم مِردی شیوار گَف ژَش نیَه!» 47فَریسین اَیِنِشون واتَه: «مَگَم شمَه نی گوول هَردَرونه؟ 48مَگم قامی یالونکا یا فَریسیونکا کَسی هِستَ کن بَی ایمان وَردَش ببو؟ 49ولی اِم جمعییَت کن شریعتیکا چی ایی نینَّموست، ملعونینه.»
50نیقودیموس کن چیمی بَه نَ عیسی وَر شَه بَه وایله فَریسونکا بَه، اَیِنِش واتَه: 51«مَگَم چَمه شریعت کَسی محکوم بَکَیَه، بی اِمکن اَولیکا چَی گَفی دَرَسِه و سَر آگِنِه کن چِش کَردَیَه؟» 52اَیِن جوابیکا واتِشون: «مَگَم ته نی جَلیلی ایشَه؟ بگرد و بِوین کن هیچ پَیغَمبری جلیلیکا راست آبَه نی.» 53چَی به دوملَه هر کَم اِشتَن کَرا شَه.
Selectat acum:
یوحنا 7: CTB
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
@ 2024 Korpu Company
