یوحنا 8
8
زنا کارَ ژِنی بخشِستِه
1اَمّا عیسی زَیتونی کورا شَه. 2سوکه خون، عیسی هَنی معبدیرا آمَه. مردووم گرد عیسی ور آمین و عیسی نشته، دَمندَ اَوون آموج دوعه. 3توراتی مُعَلّیمِن و فَریسیِون فرقه عالیمن، ایلَه ژنی کن زینا کَردِ موقه ویلاخنیَشون بَه وَردشونهَ و بَی مردمی دِلکا پا داشتِشون، 4اَیِن عیساشون واتَه: «اِستا، اِم ژن زینا کَردِ موقه ویلاخیستَه یَه. 5موسی پیغمبر، شریعتیکا اَمَش حِکم کَردیَه کن اِنتَرَ ژِنِن سَنگ سار ببون. ایسَه تِه چِه باتیشَه؟» 6اَیِن اِمی واتِشون تا عیسی وَرداوَرد بکَن و رِقی چَی موتَّهم کردِرا بوینِن. ولی عیسی اِشتَن کَلَّه بن بَرَفندِش و اِشتَن اَنگِشتینَه زَمینی سَردِرِ نوِشتِش. 7ولی وَقتی اَیِن هَی اَیکا سؤال اَکَرینَه، عیسی راست آبَه و اَیِنِش واتَه: «شمَه دلَکا، هر کَمی کن بیگناخَه، اولین سِه اِم ژِنی بژَنه.» 8و هنی کلّه بِن برَفندشَه، زَمینی سَر نِوشتِش. 9اَمّا وَقتی اَیِن اِمِشون دَرَستَه، ایلَه ایلَه، یال تا گِچ اَجگاکا شینه و تاکَه عیسی مَندَ اَ ژِنینَهَ کن چَی نار پا مَند بَه. 10عیسی راست آبَه و اَ ژِنی واتِش: « اَی ژِن، اَیِن کِرَم جِگاکان؟ هیچ‌کَم بَتِه محکوم نکردِش؟» 11ژِن جواب داشَه: «هیچ‌کَم، آقا.» عیسی بَی واتِشَه: «اَز نی بَتِه محکوم نمَکَرد. بش و چیمی بَه دوملَه دِ گِناخ مَکَه.»
اَز دِنیا نوریمَه
12عیسی هَنی مَردومینَه گَف ژِشَه و واتش: «اَز دِنیا نوریمَه. هر کم بَمنکا پیروی بکَرِ، ظِلَماتیکا گل نیَژِن، بَلکَم زندَگی نوری، بَداشتیَه.» 13پس فَریسیون فرقَه عالیمِن عیساشون واتَه: «تِه اِشتَن، کایشَه اِشتَنرا شاهیدی دوعه، اِشتِه شاهیدی معتبَر نیَه.» 14عیسی چَوون جَوابیکا واتِشَه: «حتی اَگَم اَز اِشتَن اِشتَن خونه شاهیدی بَدرِم، چمن شاهیدی دِرَستَه، اِمی خونِه کن بَموستیمَه کِرَم جگا آمَه ایمَه و کِرَم جگارا بَشیم. اَمّا شمَه نینَّموست اَز، کِرَم جِگاکا آمیم و کِرَم جگارا بَشیم. 15شمَه اینسانیَه فکرینَه دیوون بَکَرون، ولی اَز کَسی سَردِرِ دیوون نِمَکَرد. 16با ام حال حتی اَگَم کَسی سَردِرِدیوون بِکَم، چمن دیوون کَردِ دِرِستَه، اِمی خونِه کن اَز تاک نیمَه کن دیوون بَکَم، بَلکَم اَزیمَه و دَدَ کن بَمِنِش عَندَیَه. 17شمَه شریعتیکا نِوشتَه یَه کن دِ گِلَه شاهیدی شَهادَت موعتَبَرَ. 18هِم اَز اِشتَن، اِشتَنرا شاهیدی بَدامَه و هِم دَدَ کن بَمنِش عَندَیَه، مِرا شاهیدی دَرِ.» 19اَموقه عیسی کا دَپَرسستین: «اِشتِه دَدَ کرَم جگاکارَ؟» عیسی جواب داشه: «شِمَه نه بَمن آزنَه و نه چمن دَدَ. اَگَم بَمن آرَزنیرون چمن دَدَ نی آزنیرون.» 20عیسی ام گَفون اَموقه کن مَعبَدی خزانۀ کا آموج اَدَریَه، واتِش. ولی هیچ‌کَسی بَی نِویلاخنیشَه، اِمی خونه کن هَنوزنی چَی وقت آرستَه نِبَه.
21عیسی ایکَر دییَراَیِنِش واتَه: «اَز بَشیم و شمَه چمن دوملَه بَگَردِستیرون، ولی اِشتَن گِناخیکا بَمَردیرون. اَجگا کن اَز بَشیم شمه نینَّشا آمِه.» 22پس یهودیِن واتِشون: «مَگَم اَ بَپیشَه اِشتَن بِکِشه کن باتی، ”اَجگا کن اَز بَشیم، شمَه نینَّشا آمِه“؟» 23عیسی اَیِنِش واتَه: «شمه زَمینی شِنینه از آستامونی شِن. شمه اِم دِنیا شِنینَه، اَزاِم دِنیا شِن نیمَه. 24بَه شمَه واتمه کن اِشتَن گِناخونکا بَمَردیرون، اِمی خونه کن اَگَم ایمان مَوَر کن اَز، اَ هِستیمَه، اِشتَن گِناخونکا بَمَردیرون.» 25پس اَیِن عیساشون واتَه: «تِه کییشَه؟» عیسی جواب داشَه: «اَز هَه ایمَه کن اَوَلیکا بَه شمَه واتَمَه. 26اَز شمَه خونه وِرَ چییون دارِم کن بواجم و دیوون بِکَم. اَمّا اَکَن بَمن رونه آکردِش، حَقَّه و اَز اَچیی کن اَیکا دَرستمَه دِنیا را باتیم.» 27اَیِن سَر آنِه گِنینَه کن عیسی آستامونیَه دَدَ خونِه اَوونَّه گَف بَژَی. 28پس عیسی اَیِنِش واتَه: «وقتی کن اینسانی زوعَشون چو سَریکا راست آکَردَ، اَموقه بَفَهمستیرون کن اَز اَ هِستیمه و اِمکن اَز اِشتَن زاکینی سَردِرِ کاری نمَکَرد، بسکم هَتَه کن چمن آستامونیَه دَدَ بَمن آموتَشَه، گَف بَژَم. 29و اَ کن بَمن رونه آکردَشَه، بَه مِنَه دَرِ. اَ بَمن تاکَه آهَشتَش نی، اِمی خونِه کن اَز اوزون اَ کارونی اَنجوم دَرِم کن، اَی خَش آرَکَرد.» 30اِم گَفون خونه، خَیلیِن بَی ایمان وَردِشونَه.
حَییقت بَشِمَه آزاد آرَکَرد
31عیسی یهودیِنی کن بَی ایمان وَردَشون بَه، واتِش: «اَگَم چمن کَلامیکا بومونَه، حَییقتا چمن شاگردنینَه. 32و حقیقتی آزنَه، و حقیقت بَشمَه آزاد آرَکَرد.» 33اَیِن عیساشون جواب دوعَه: «اَمه ابراهیم پَیغمبری نَتاجیکامون و هیچ موقه، هیچ کَسی وَزیَرنِبیمون. چِنتَرَ یَه کن باتیشَه، ”آزاد بَبیمون”؟» 34عیسی اَیِنِش جواب داشَه: «حَییقتا بَشمَه باتیمَه، کَسی کن گِناخ بَکَی، گِناخی وَزیَرَ. 35وَزییَرِ هیچ جِگایی کَکاش نیَه بَلکَم ، زوعَه را همیشَه جِگا هِسته. 36پس اَگَم زوعَه شمه آزاد آکَرِ، واقییَن آزاد آنَّب.
37«بَموستیم کن ابراهیمی نَتاجیکارون، ولی چمن کِشتهِ دومله ایرون، اِمی خونِه کن چمن کلام شمَه دِلَکا جگایی پَیدا آنیَکرد. 38اَز اَچی اییکا کن دَدَ وَریکا ویندَمَه گَف بَژَم ولی شمَه اَ کاری بَکَرون کن اِشتَن دَدَکا دَرَستَرونه.» 39اَیِن واتِشون: «چَمَه بابا ابراهیمَه.» عیسی اَیِنِش واتَه: «اَگَم اِبراهیمی نَتاجیکا بیرون، اَ کارونی اَکَریرون کن ابراهیم اَکَریَه. 40ولی ایسَه شمَه چمن کِشتِه دوملَه اییرون؛ اَزی کن، حقیقتی کن خدا کا دَرَستِمهَ شمرا جیگیر کردِمَه. ابراهیم اِنتَرَ کاریش نِکَردَ. 41اَمّا شمَه، شمه دَدَ کارون اَنجوم دَرَ.»
اَیِن واتِشون: «اَمه بوجَه کِتهَ نیمون! اَمه ایلَه دَدَ دارَم کن هَه خدایَه.» 42عیسی اَیِنِش واتَه: «اَگَم خدا شمه دَدَ بَه، بَمن رَی داریرون، اِمی خونه کن اَز خدا طَرَفیکا آمَه ایمَه و ایسَه اِم جگا کایمَه. اَز اِشتَن بَسَر آمَه نیمَه، بَلکَم خدا بَمن رَونَه آکَردَشَه. 43چِه خونِه چمن گَفونکا سَر آنِگِنَه؟ اِمی خونِه کن شِمَه نِپیسترونَ چمن کلامی قِبول بکَرَ. 44شمَه، شمَه دَدَ ابلیسی شِنینَه وشمه خواسته اِمَه کن اَ چیی اِنی کن شمه دَدَ بَپیشَه اَنجوم بدَرَ. اِبلیس اَوّلیکا ایلَه قاتل بَه و حقیقتینه هیچ کاری نِداری اِمی خونِه کن هیچ حقیقتی اَیکا نیَه. اَ گف کن بَژَی، کا درو واتِه اِمی خونه کن چَی ذات دِرو واتِه یَه؛ اِمی خونه کن درو اَواجَه و دِروعون دَدَیَه. 45اَمّا اِمی خونه کن حقیقتی شِمَرا باتیم، شمَه چمن گَفی باور نینَّکَرد. 46کِرَم گلَه شمَکا بَشایَ بَمن گِناخیرا محکوم بکَر. اَگَم اَز حقیقتی باتیم چیرا بَمن باور نینَّکرد؟ 47کَسی کن خِداکا ببو، خدا کَلامی قِبول بَکَی؛ ولی اِمی خونه یَه کن شمَه قِبول نینَّکرد، اِمی خاطرکن شِمَه خدا کا نینَه.»
اِبراهیمی بَه نَه اَز هِستیم
48یهودین عیساشون جواب دوعَه: «اَمه دِرست نَواجیمونَه کن تِه سامری هِستیشَه و پَریانی ایشَه؟» 49عیسی جواب داشَه: «اَز پَریانی نیمَه، بَلکَم اِشتَن دَدَ حُرمتی غَم بَردیم، ولی شمَه بَمن بیحرمتی بَکَرون. 50با اِم حال اَز اِشتَن جلالی دوملَه نیمَه؛ کَسی کن چی دوملَه هِستَه هَیَه کن دیوون بَکَیَه. 51حَییقتا بَه شمَه باتیم، اَگَم کَسی چمن کَلامی اَنجوم بدَرِ هرگز نییَمرد.» 52یهودیِن بَی واتِشون: «ایسَه دِ یقین بَموستیمون کن پَریانی ایشه! ابراهیم مَردَ و دییَرَ پَیغَمبرِن نی مَردینَه، هَنوزَنی تِه باتیشَه، ”کَسی چمن کلامی اَنجوم بدرِ نییَمَردِن!“ 53تِه چَمَه بابا ابراهیمیکا یال تَریشهَ؟ اَ مَردَ و دییَرَ پَیغَمبرِن نی مَردینَه. بَشتَن کی بَموستیش؟» 54عیسی واتِش: «اَگَم اَز اِشتَنرا جلال بِنَم چمن جلالیرا ارزشی نیَه. اَکَن بَمن جلال بَبَخشِستی چمن دَدیَه، هَه کن شمَه باتیرون، ”چَمَه خِدایَه“. 55ولی شمه اَی آنینَزنی، ولی اَز بَی آمَموست. اَگَم بواجِم اَی آنیمَموست شمه شیوار درو اَواج بَبَیمه، ولی اَز اَی آمَموست وچَی کلامی اَنجوم دَرِم. 56شمه بابا ابراهیم خَشی اَکَریَه کن چمن روجی بِوینِه؛ و اَی ویندِشَه و خَش آبَه.» 57یهودین بَی واتِشون: «تِه هَنوزَنی پنجاه سالِر نیَه، ابراهیمی ویندَرَ؟» 58عیسی اَیِنِش واتَه: «حَییقتا بَه شمَه باتیمَه، نارتَر از اِمکن ابراهیم ببو، اَز هِستیم!» 59پس سه پگَتشون تا اَی سِنگ سار بِکَن، ولی عیسی اِشتَن نون آکردشه و معبدیکا بِرِن بَرشَه.
Selectat acum:
یوحنا 8: CTB
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
@ 2024 Korpu Company
