LUCAS 21
21
U siibal jun túul otzil x quimen íicham
(Mc 12.41-44)
1Te j kulnajo' tu yilaj Jesús le ayikal máaco'obo' táan u dzáico'ob taakin tu nu'uculil siibalo'ob. 2Tu yilaj xan jun túul óotzil x quimen íichame' tu dzáaj ca'a p'éel mejen taakin. 3Ca tu ya'alaj Jesús: Tu jaajil quin wa'alic ti' te'exe' le óotzil x quimen íichama' asab ya'ab le siibal tu dzáajo' ti' le tu dzáaj le u láako'obo'; 4tumen tuláacal le máaco'oba' tu dzáajo'ob chéen le ba'ax tu yalabtaj ti'obo', ba'ale' le co'olela' ichil u yóotzile' tu dzáaj tuláacal le ba'ax yaan ti' ca'ach u ti'al u cuxtale'.
Jesús cu ya'alic bíin pu'ucuc le kulnajo'
(Mt 24.1-2; Mc 13.1-2)
5Dze'edzec máaco'obe' táan ca'ach u t'aano'ob tu yo'olal le kulnajo', bix jadzutzquinta'anil yéetel qui'ichquelem tuunicho'ob bey xan yéete le ba'alo'ob siiblanta'ano'ob, ca tu ya'alaj Jesús:
6Bíin taalac u kiinil u pu'ucul tuláacal le ba'axo'ob ca wilique'exa'. Mix jun p'éel tuunich bíin p'áatac tu yóokol u láak.
Chíiculalo'ob cu ye'esic táan u náadzal u xuul
(Mt 24.3-28; Mc 13.3-23)
7Ca túun j káata'ab ti' Jesús: Aj ca'anbesaj, ¿ba'ax kiin quéen úuchuc lela'? ¿Ba'ax chíiculal cun e'esic bin u ca'aj úuchul le ba'alo'oba'?
8Jesuse' tu ya'alaj: Canantaba'ex yéetel ma' a cha'ic a tu'usule'ex. Tumen bíin taalac máaco'ob tin kaaba' cun u ya'alo'obe': Ten le Cristoo', yéetel: Bejela'e' u kiinil. Ba'ale' ma' a bine'ex tu paacho'ob. 9Le quéen a wu'uye'ex u péectzil ba'atelo'ob yéetel u líikil máaco'obe', ma' u ja'akal a wóole'ex, tumen kaabéet u yúuchul táanil le ba'alo'oba', ba'ale' ma' tu séeblaquil quéen kuchuc u xuuli'.
10Jesuse' tu ya'alaj túun ti'ob: Jun p'éel caaje' yaan u ba'atel yéetel u láak caaj, bey xan jun p'éel ajawil yaan u ba'atel yéetel u láak ajawil. 11Bíin yanac nucuch quíilbal lu'umo'ob, wi'ijilo'ob yéetel koja'anilo'ob ti' jejeláas cúuchilo'ob, bey xan nucuch chíiculalo'ob yéetel ba'alo'ob cu taasic ja'asaj óolal bíin ila'ac tu táan ca'an. 12Ba'ale' ma'ili' úuchuc lela', te'exe' bíin chu'ucuque'ex, bíin ch'a'apachta'aque'ex, bíin ku'ubuque'ex te j sinagogaobo', bíin ka'alque'ex yéetel bíin bisa'aque'ex tu táan ajawo'ob yéetel tu táan jalach wíinico'ob tu yo'olal in kaaba'. 13Lela' bíin u dzáa tu'ux a t'aane'ex tin wo'olal. 14Ilawile'ex túun ma' a sen tucultique'ex táanil ba'ax can a wa'ale'ex u ti'al a núuquiqu'ex u t'aano'ob, 15tumen teen quin in dzáa te'ex u t'aanilo'ob na'at mix jun túul a enemigoex cun páajtal u xachicubáa mix u káat núuctic te'ex. 16Ba'ale' te'exe' bíin ku'ubuque'ex tac tumen a taataex, a sucu'une'ex, a láake'ex bey xan tumen a amigoex; dze'edzec ti' te'exe' bíin quíimsa'aque'ex; 17bin ch'a'a p'ecta'aque'ex xan tumen tuláacal máac tin wo'olal. 18Ba'ale' mix jun cúul u tzo'otzel a póole'ex bíin sa'atac. 19Wa cu chúucpajal a wóole'ex, bíin yanac te'ex le jaajil cuxtalo'.
20Le quéen a wile'ex bakpachta'an u caajil Jerusalén tumen soldado'obe', ojéelte'ex dzo'oc u náadzal u kiinil u xu'ulsa'al. 21Le máaxo'ob yano'ob Judeao' púudzuco'ob te j pu'uco'obo', le yano'ob ichil u caajil Jerusaleno' jóokoco'obi', le yano'ob xan káaxo' ma' unaj u suuto'ob te j caajo'. 22Tumen lelo'obo' u kiinilo'ob yaayaj óolal, u ti'al ca dzo'ocbesa'ac tuláacal le ba'ax cu ya'alic le Quili'ich Dzíibo'obo'. 23¡Yaj yanil le co'olelo'ob koja'ano'ob ti' chaan paal wa táan chu'uchil u chaan palo'ob ti' le kiino'obo'! tumen yaan u taal nojoch yaj óolal yóokolcaab yéetel jun p'éel yaayaj jaadz tu yóokol le máaco'oba'. 24Dze'edzeque' bíin quíimsa'ac ti' ba'ateltáanbail, u láako'obe' bíin ma'achac bisbilo'ob ti' tuláacal caajo'ob; le j táanxel lu'umilo'obo' bíin u pepe'cha'ato'ob u caajil Jerusalén tac quéen kuchuc le kiin a'ala'an ti'obe'.
Bix bíin taalac u Paal Máac
(Mt 24.29-35,42-44; Mc 13.24-37)
25Bíin yanac chíiculalo'ob ti' le kiino', ti' le ujo' bey xan ti' le eeko'obo'. Way lu'ume' le caajo'obo' yaan u sa'atal u yóolo'ob; yaan xan u ja'akal u yóolo'ob tu yo'olal u quíilbal u cuclilo'ob le ka'anabo'. 26Máaco'obe' yaan u lúubul u muuko'ob yéetel sajaquil le quéen u tuculto'ob ba'ax cun úuchul yóokolcaab, tumen tac u páajtalilo'ob ca'ane' yaan u quiquilanquilo'ob. 27Bíin ila'ac túun u Paal Máac táan u taal ti' jun p'éel múuyal yéetel páajtalil bey xan yéetel qui'ichquelemil. 28Le quéen cáajac u yúuchul le ba'alo'oba', yanac a wóole'ex, líikes a poole'ex tumen séeba'an can jáalkabtbile'ex.
29Tu ya'alaj xan ti'ob le quet t'aana': Ile'ex jun cúul higoo' yéetel tuláacal che'ob. 30Le quéen a wile'ex táan u tóop'ol u le'e, te'exe' a wojele'exe' táan u náadzal u kiinil u beetic kíilcab. 31Bey xano' le quéen a wile'ex táan u yúuchul le ba'alo'oba', ojéelte'ex u ajawil Jajal Diose' naadz yanil. 32Tu jaajil quin wa'alic te'exe' tuláacal le ba'alo'oba' yaan u yúuchul ma'ili' quíimic tuláacal u máaquilo'ob le kiino'oba'. 33Ca'an yéetel lu'um bíin máanaco'ob, ba'ale' in t'aano'obe' ma' bíin máanaco'ob.
34Canantaba'ex, ma' a cha'ic u chichtal a pucsi'ikale'ex tu yo'olal kaakas cuxtal, cáaltal yéetel u táan óolal u ba'alubáa le cuxtala', u ti'al ma' u taasic ja'ak óolal ti' te'ex le kiino'. 35Bey jun p'éel léech cu ka'alale', tumen bey bíin taalac le kiino' tu yóokol tuláacal u cajnáalilo'ob yóokolcaab. 36P'il a wiche'ex túun yéetel payalchi'inene'ex mantadz u ti'al ca páatac a toquicabae'ex ti' tuláacal ba'al cun úuchula' bey xan u ti'a'al ca páatac a wantale'ex tu táan u Paal Máac.
37Yéetel kiine' Jesuse' cu ca'ansaj kulnaj, yéetel áakabe' cu bíin u ti'al p'áatal te j pu'uc cu kaaba'intic Olivo'ob. 38Tuláacal le máaco'obo' cu kuchulo'ob kulnaj jach ja'atzcab kiin u ti'al u yu'ubico'ob u ca'ansaj Jesús.
Selectat acum:
LUCAS 21: YUA04
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Maya de YucatánTumben Nupt'an NT © Sociedad Bíblica de Mexico, 2004.
