LUCAS 20

U páajtalil Jesús

(Mt 21.23-27; Mc 11.27-33)

1Jun téene' ti' yaan Jesús kulnaje' táan ca'ach u ca'ansic le máaco'obo', táan xan u tze'ectic ti'ob u ma'alob péectzilil tocsajil. U nojochilo'ob le aj kiino'obo' yéetel u aj ca'ambesajilo'ob le a'almaj t'aano' j kucho'ob jun múuch' yéetel le anciano'obo', 2ca tu ya'alajo'ob ti': A'al to'on yéetel ba'ax páajtalil ca beetic le ba'alo'oba'. ¿Máax dzáa teech le páajtalila'?

3Ca j a'ala'ab ti'ob tumen Jesús: Bey xan teen bin in ca'aj in káat te'ex jun p'éel ba'al. Núuque'ex teen: 4¿Máax túuxt Juan u ti'al dzáic ocja'? ¿Jajal Dios wa wíinico'ob?

5Ba'ale' jo'op' u tucultico'ob tu baatzilo'ob, táan u ya'alico'ob: ¿Ba'ax je'el c a'alique'? Wa c a'alic Jajal Dios túuxte', yaan u núuquic to'on: ¿Ba'ax teen ma' ta wocsaj óolte'exi'? 6Wa xan c a'alic chéen wíinico'obe', tuláacal le máaco'oba' je'el u quiimsico'on yéetel ch'iine', tumen leti'obe' u dzaama tu yóolo'obe' Juan jun túul aj bóobat.

7Ca tu núucajo'obe' ma' u yojelo'ob máax túuxt Juan u ti'al dzáic ocja'i'.

8Ca túun j a'ala'ab ti'ob tumen Jesús: Mix teen quin wa'alic te'ex yéetel ba'ax páajtalil quin beetic le ba'alo'oba'.

U quet t'aanil le lolob j meyajo'obo'

(Mt 21.33-44; Mc 12.1-11)

9Jo'op' u ca'ansic Jesús le máaco'obo' ca tu dzáaj jun p'éel quet t'aan ti'ob: Jun túul máaque' tu xabla'antaj u paklil uvaob tu lu'um, cu dzo'ocole' ca tu dzáaj meyajtbil tumen dze'edzec máaco'obe' ca j bin leti' táanxelil ya'abcach kiino'ob. 10Le ca j kuch u kiinil u yéemsa'al u yich le pakalo', tu túuxtaj jun túul u palitzil u ti'al u káatic ti' le j meyajo'obo' le jun jaatz u yich le pakal cu ti'alintico', ba'ale' leti'obe' tu loobiltajo'obe' ca tu túuxto'ob mix ba'al yaan tu kab. 11U yuumil le lu'umo' tu túuxtaj u láak jun túul palitzil, ba'ale' leti' xane' j po'opo'och'a'abe', j beeta'ab loob ti'e', ca j túuxta'ab xan mixba'al yaan tu kab. 12U yuumil le lu'umo' tu túuxtaj u láak jun túul, ba'ale' le j meyajo'obo' tu beetajo'ob loob ti' xane' ca tu tojolch'intajo'ob.

13U dzooque' u yuumil le lu'umo' tu ya'alaj: ¿Ba'ax quin in beete? Bin in ca'aj in túuxt le in paal in yaabiltmajo'. Le quéen u yilo'obe' úuchac u tziquico'ob. 14Ba'ale' le j meyajo'obo', le ca tu yilajo'obe', tu ya'alajo'ob tu baatzilo'ob: Lela' leti' máax cun ti'alintic le ba'alo'oba'; co'one'ex quíimsic u ti'al ca p'áatac to'on le ba'alo'oba'. 15Ca tu jóokesajo'ob paachil ti' le lu'umo' ca tu quíimsajo'ob. Ca j káata'ab ti'ob tumen Jesús: ¿Ba'ax ta t'aane'ex cun j beetbil ti'ob tumen u yuumil le lu'umo'? 16Le quéen taalaque' bíin u quiims le j meyajo'obo' yéetel bíin u dzáa xan le lu'um ti' yaanalo'obo'. Le máaco'obo', le ca tu yu'ubajo'ob lela', tu ya'alajo'ob: ¡Mix u yóoltic Jajal Dios!

17Ba'ale' j pacta'abo'ob tumen Jesuse' ca j a'ala'ab ti'ob: ¿Ba'ax u káat ya'al le ba'ax yaan ti' le Quili'ich Dzíibo'obo'? Cu ya'alic beya':

Le tuunich p'ecta'ab tumen le j pakbalo'obo' j kuch u beet u noj tuunichil le pako'.

18Le máax bíin lúubuc yóokol le tuunicha' bíin xe'exet'a'ac, ba'ale' le máax bíin lúubuc le tuunich tu yóokola' bíin xi'ixcunta'ac.

U bo'olal le páatano'obo'

(Mt 22.15-22; Mc 12.13-17)

19U nojochilo'ob le aj kiino'obo' yéetel u aj ca'anbesajilo'ob le a'almaj t'aano' tu yóoltajo'ob u macho'ob Jesús ti' le jun súutuco', tumen tu na'atajo'ob tu yo'olalo'ob tu ya'alaj le quet t'aano', ba'ale' sajacchajo'ob ti' le máaco'obo'. 20Ca tu túuxtajo'ob ch'úuctbil tumen máaco'ob cu beeticuba'ob bey jach utzo'obe', u ti'al u beetico'ob u ya'alic wa ba'ax ca yanac tu'ux u kubico'ob ti' u jala'achil le caajo'. 21Le máaxo'ob túuxta'abo'obe' tu ya'alajo'ob ti' Jesús: Aj ca'anbesaj, c ojel ca wa'alic yéetel ca ca'ansic ba'ax toj yéetel ma' táan a wilic chéen le ba'ax yaan tu yo'ocabil máaque', ba'ale' yéetel jaajil ca ca'ansic u beel Jajal Dios. 22A'al to'on: ¿Utz wa c bo'otic páatano'ob ti' César, u noj jalachil Roma, wa ma'?

23Ba'ale' Jesuse' tu kaj óoltaj u kaakas tuuculo'obe' ca tu ya'alaj ti'ob: ¿Ba'axten ca túuntique'ex in wóol? 24E'ese'ex teen jun p'éel taakin. ¿Máax ti'alintic le ich yéetel le kaaba' dzíibta'ana'? Leti'obe' tu núucajo'ob: U ti'al César.

25Ca tu ya'alaj Jesús ti'ob: Dza'ex ti' César ba'ax u ti'al César, dza'ex xan ti' Jajal Dios ba'ax u ti'al Jajal Dios.

26Ma' páatji' u beetico'ob u lúubul ti' mix jun p'éel kaas ti' ba'ax cu ya'alic tu táan le máaco'obo'. Ja'ak u yóolo'ob yéetel ba'ax tu núucaj, ca tu máac u chi'ob.

U káatchi'il le ca'a púut cuxtalo'

(Mt 22.23-33; Mc 12.18-27)

27Cu dzo'ocole' j bin dze'edzec saduceob u yilo'ob Jesús. Le saduceobo' cu ya'alico'obe' ma' tu ca'a púut cuxtal le quimeno'obo'. Bey túuno' tu ya'alajo'ob ti' Jesús: 28Aj ca'anbesaj, Moisese' tu dzíibtaj to'on beya': Wa jun túul máac cu quíimil ba'ale' ma' yanchaj u paalal ti' u yatane', u yíidzin le máaco' unaj u dzo'ocol u beel yéetel le x quimen íichamo' tu yo'olal u yantal u paalal u ti'al le sucu'untzil j quíimo'. 29Yanji' siete sucu'untzilo'ob. Le yáax jun túulo' j dzo'oc u beele' ba'ale' ma' yanchaj u paalal, ca j quíimi. 30Le u ca'a túulo' j dzo'oc u beel yéetel le x quimen íichamo' ba'ale' ma' yanchaj xan u paalal, ca j quíimi. 31Le u yóox túulo' j dzo'oc u beel xan tu yéetel. Bey tu beetilaco'ob xan le u láako'obo'. Tu sieteilo'ob ma' yanchaj u paalalo'ob ca j quíimo'obi'. 32Tu dzooque' j quíim xan le co'olelo'. 33Le quéen ca'a púut cuxlaco'obe', ¿máacalmáac ti'ob cun atantic le co'olelo'? tumen u sieteilo'ob j dzo'oc u beelo'ob tu yéetel.

34Ca túun j núuca'ab ti'ob tumen Jesús: Way yóokolcaabe' yaan dzo'ocol beel, 35ba'ale' le máaxo'ob cun u najmato'ob u ca'a púut cuxtalo'ob yéetel u kuchulo'ob ca'ane', te'elo' ma' bíin dzo'ococ u beelo'obi'. 36Ma' tu páajtal u quíimilo'ob tu ca'a téen, tumen beyo'ob ángelo'obe', yéetel u paalalo'ob xan Jajal Dios, tumen dzo'oc u ca'a púut cuxtalo'ob. 37Tac Moisés cu ca'ansic to'on cu ca'a púut cuxtal le quimeno'obo', tumen ti' le dzíib tu'ux cu chíicpajal le jun cúul chan che' cu yelele' cu ya'alique' Yuumtzil u Jajal Dios Abraham, Isaac yéetel Jacob. 38Ba'ale' Jajal Diose' ma' u Jajal Dios quimeno'obi', ba'ale' u Jajal Dios cuxa'ano'ob, tumen u ti'al leti'e' tuláacal cuxa'antaco'ob.

39Ca j a'ala'ab ti' tumen dze'edzec u aj ca'anbesajilo'ob le a'almaj t'aano': Aj ca'anbesaj, jach ma'alob ba'ax ta wa'alaj.

40Ma' tu yóoltajo'ob u káat chi'ito'ob tu ca'a téeni'.

¿U Paal wa David le Cristoo'?

(Mt 22.41-46; Mc 12.35-37)

41Ca j a'ala'ab ti'ob tumen Jesús: ¿Bix u ya'ala'al Cristoe' u paal David? 42Tumen David cu ya'alic ti' u dzíibil ju'unil Salmo'obe': Yuumtzile' tu ya'alaj ti' in Yuumtzil: Culen tin x no'oj kab, 43ca'aliquil in dzáic a aj p'eeco'ob tu yáanal a wooc. 44¿Bix je'el u páajtal u paalinta'al Cristo tumen David wa David cu ya'alic Yuumtzil ti'e'?

Jesuse' cu taquic u pool u aj ca'anbesajilo'ob le a'almaj t'aano'

(Mt 23.1-36; Mc 12.38-40; Lc 11.37-54)

45Tuláacal máac tu yu'ubaj u ya'alic Jesús ti' u aj canbalo'ob: 46Canantaba'ex ti' u aj ca'anbesajilo'ob le a'almaj t'aano', tumen utz tu t'aan u máano'ob yéetel chowac nooko'ob, u káato'ob xan ca tzi'iquico'ob yéetel ca chíinpolta'aco'ob te j kíiwico'obo', cu yéeyico'ob xan le yáax cúuchilo'ob te j sinagogaobo' yéetel le ma'alob cúuchilo'ob te j tu'ux cu yúuchul janalo'. 47Cu luksico'ob xan u yotocho'ob le x quimen íichamo'obo'; u ti'al u balico'obe' cu beetico'ob chowac payalchi'ob. Leti'obe' bíin u kamo'ob táaj nojoch jaadz.

Selectat acum:

LUCAS 20: YUA04

Evidențiere

Partajează

Copiază