Matyiu 4
4
1Jâ ndi ja Jisus ja tumbwanwě na Ilina o nginga ka yějudwě na Děvil. 2A yokakindi nja, o Mâ‐a diyakidi a bě mabo ma meehe manai na ma mebulu manai aa je. 3O Uyějiyi u pâkidi o Mâ‐a jadi u vâki, na, Oningě na o te Mwana ua Anyambě, sombiyakě malale těkama na ma ’lwake beja. 4Ndi a yavwanakindi, na, E lěndwěngo, na, Moto aa diye kabo na beja pa, ndi tepě na ndaga yěhěpi e pumakě o udumbu mua Anyambě. 5Jâ ndi ja Děvil ja valana Mâ o mboka ya hole, ka mâ‐a tědě Mâ o hâkâ ya těmpěl. 6Ka mâ‐a vâ na ju, na, Oningě na O te Mwana ua Anyambě, pukwaka o he: ikabojana e lěndwěngo, na,
A ka sombiyěndi enjěl o pěl‘ âvě, na jâ i ka hukand‘ âvě o benâ beabu o banga ’gombe te ’gombe wa tudiya eko o ilale.
7Ka Jisus, a vâ na mâ, na, E tepě lěndwěngo, na, O yějěkiye Upangiyi Anyambě ’âvě. 8Ka Děvil ya valana pě Mâ o ukodi mwa udomba uitě, e ka levakidě Mâ mapangiya ma he měhěpi, n‘ ivenda ja omě. 9Ka yâ‐ya vâ na ju, na, Mbi ka věnd‘ Âvě belombo těkabe beěhěpi oningě O balamingě na nâvě wa kaliya ’mba. 10Jâ ndi ja Jisus ja vâ na ju, na, Věngěměkě ’Mba o mbuhwa Setan; ikabojana e lěndwěngo, na, Kalakiya Upangiyi Anyambě ’âvě, o ka dilakě Mâ dipâ. 11Jâ ndi ja Děvil ja dika Mâ; umbwakiyate, ka benjěl bya viya be ka hakiya Mâ.
12O Jisus a yokakidi na Jân a vamudwěndi o meboka, ka Mâ‐a vala o Galili. 13Ka Mâ‐a věngěmě o Nazarěth, ka Mâ‐a vala ka diya o Kapěrnaum, e jadi o etěbě, o mekabo mea Zabulon na Něftalim: 14Ovaně nd‘ o yâ e ka hohongane ka usâki Isea a kalakidi, na,
15Ehe ya Zabulon na ehe ya Něftalim o pěl‘ ’a njeya ya manga, o pělě ’pâkwě ya Jordan, Galili ya Betomba,
16Bato ba diyakidi o ivititi ba yěněkindi bwe eněně; bwe e panyakindi o ba diyakidi o indendandenda via ’dingihě y‘ iwedo.
17Oviya ’gombe těně ka Jisus a yalě ipakwaniya, na, Ulwakani melema; ikabojana ipangiya ja Hěvěn ja běndi pyělě.
18A tamwaka pyělě na manga ma Galili, ka mâ‐a yěně ba nyangwě pâkâ babale, Saimân a tubakwě na Pitě, na Andru mwana‐nyangwě, ba uhwaka elâba o manga; ikabojana ba diyaki bahombwedi. 19Ka Mâ‐a vâ na bâ, na, Vitanaki ’Mbani, vâkâna Mbi pangindi ’nyěni mehombwedi mea bato. 20Ka bâ‐ba paniya o dika belâba beabu, ka bâ‐ba vitě Mâ. 21A věngěměkětě oviya iboko těvině, ka Mâ‐a yěně bapâkwě ba nyangwě pâkâ babale, Jems mwana wa Zěbědi na Jân mwana nangwě, o ele nde na Zěbědi hangw‘ abu, ba hângâkâ belâba; ka Mâ‐a ndiya bâ. 22Ka bâ‐ba paniya o dika ’lende na hangwě ’abu, ka bâ‐ba vitě Mâ.
23Ka Jisus a vala A kěkě A ’lwanakidě Galili, A yokwakidě o ndabo jabu ja Anyambě, A pakwaka tepě sango eyamu ya ipangiya, A yongakě jângâ ja ebědi jěhěpi na jângâ ja mehiyo jěhěpi be diyakidi na bato. 24Ka kum‘ aju ya hamana o Siria yěhěpi; ka bâ‐ba vana Mâ mebědi měhěpi me diyakidi na bebědi bea mangâmangâ na majili, na ba diyaki na děvil, na ba diyaki beboki, na ba diyaki bevandi limbelimbe: ka Mâ‐a yongě bâ. 25Bebimba bea bato beněně be vitanakidi Mâ oviya Galili na Děkapolis na Jěrusalěm na Judia na ba mwidi mua Jordan.
Selectat acum:
Matyiu 4: BNG1895
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Published by the American Bible Society in 1895.
