Matyiu 3
3
1O hwi tědině Jân Baptist a vakindi, a vaka, a kalakiya o nginga ya Judia, 2na, Ulwakani melema: ikabojana ipangiya ja Hěvěn ja bě ndi piělě. 3Ikabojana Mâ nd‘ ekaně ua usâki Iseas a vâkidi, na,
Joyi j‘ umbâkâ i yamaka o nginga, na, Kenjakěni njeya ja Upangiyi, těkiděni njeya jaju.
4Jâ Jân tě i diyakidi na ngâi ya mevâtâ mea kaměl, na utumba mwa ekoto o ’hen‘ aju: beja beaju be diyakindi lohěnjěnjě na boyi boa ’hiki. 5Ka bato ba Jěrusalěm na Judia běhěpi, na ba indendandenda via Jordan viěhěpi, ba valanidě o mâ‐a jadi, 6na bâ na baptisakwě na mâ o Jordan, ba měměkě mabe mabu. 7Nd‘ o mâ‐a yěněkidi Farisi na Sajusi iitě i vaka o baptisma ’aju, a vâki na bâ, na, A! igona ja mbamba, nj‘ a kelevidě ’nyěni na kweyakiyani malingwa na vakě? 8Nandi, lângâkâni bebuma be di lukango n‘ iluwa j‘ ulema; 9o pikilakiyeni o vâ inyi mětě, na, Ho na hangw‘ ’ahu Ebraham‘: ikabojana mbi vâki n‘ inyěni, na, Anyambě a t‘ a yâlâkě o ’mudě malale těkama na ma a panga mâ bě bana ba Ebraham. 10Nandi, ubâki u tepě nangudwěngo o tina ya bele: ovaně vâkâna ele yěhěpi e ha langâkâ bebuma beyamu e kwělěkwěndi, na yâ ya ’hwě o veya. 11Mbambayě, mbi baptisakandi ’nyěni na miba o iluwa ja melema: ndi A vakě o mbuhwa ’amě, A wa n‘ umba, mbi ’bě weyango ibapě ja makogo maju: A ka baptisandi ’nyěni n‘ Ilina Iyamu na veya. 12A na ’pepa o ’nâ ’aju, A ka viyândi nděk‘ ’aju, na mâ‐a yolě hwit jaju o ndabo; nd‘ A ka dikidi behavu na veya vi ha dimaka.
13Ka Jisus a viya oviya Galili nala o Jordan ka baptiswě o Jân a jadi. 14Ka Jân a petuwa na Ju, na, Umba ndi mbi vahakě o baptiswě o Âvě o jadi, na nâvě o ka vaka pě umba‐mbi jadi? 15Ka Jisus a yavwana mâ, na, Bâbâkâ kya těkaně: ikabojana kakana nd‘ o yâ e lukakě na hwě‐ho timakě bwam‘ bwěhěpi. Ka mâ‐a bâbâ Ju. 16O Jisus a běkidi baptiswěngo, ka Mâ‐a hungana o jabuwa o miba: umbwakiyate, oba e dubwakudwi Mâ, ka Mâ‐a yěně Ilina ja Anyambě i hubaka ona mbenga, ka jâ ja batama o Mâ‐a jadi. 17Ka joyi ja viya oviya oba, na, Ekaně a ndi Mwan‘ ’amě a tândâkě, a tândâkidě ’Mba bwamu.
Selectat acum:
Matyiu 3: BNG1895
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Published by the American Bible Society in 1895.
