Yohanes 1
1
Bhoasaono Lahataꞌala nembali manusia
1:1-18
1Pakatandano ⸤ miinaꞌo nandumandoo dhunia,⸥
nekonando Bhoasao nonandoomo.
Bhoasao amaitu nopobhai bhe Lahataꞌala.
Bhoasao amaitu nopototo bhe Lahataꞌala.
2Anoa maitu mpini pakatandano nopobhai bhe Lahataꞌala.
3Sabhaha ndumandoono nofokonandooꞌe Lahataꞌala noangka ne Anoa.
O ae maka dua nefokonandoo, kanandooꞌano noangka ne Anoa.
4Bhoasao amaitu kamaiꞌaoꞌano dadi,
dadimo amaitu meowano tilanga mbali manusia.
5Tilanga amaitu nokotila weo kahohondo,
bhe kahohondo amaitu miina namoolie nopeonie.
6Nohatomo seemie katuduno Lahataꞌala neano Yohanes.
7Anoa ini nomai nosakusiiꞌao tilanga amaitu,
neanomo kosasawindo manusia dametingke bhihitano
bhe damarasaea ne tilanga.
8Anoa ini suano tilanga amaitu,
nomai kaowu nasumakusiiꞌao tilanga amaitu.
9Tilanga amaitu tilanga sakotuꞌuno,
nahumatomo we dhunia somo tumilano kosasawindo manusia.
10Bhoasao amaitu nonandoomo we dhunia;
dhunia nofokonandooꞌe Lahataꞌala noangka ne Anoa,
tamaka dhunia miina namandeꞌaanea.
11Anoa nohato ne liwuno wutono,
tamaka saliwuno miina datumahimaea.
12Tamaka nandoo dua tumahimae bhe marasaeano weo neano.
Kosasawindo maitu nowaꞌanda kapooli daembali anaꞌino Lahataꞌala.
13Dembali anaꞌino Lahataꞌala, maꞌanano miina peda lentendo manusia,
nomaiꞌao ne kapoindalono mbadha tawa kapoindalono moꞌane,
tamaka dadi buꞌou naꞌa nomaiꞌao ne Lahataꞌala.
14Bhoasao amaitu nembalimo manusia
neate bhe intaodiomu;
dowohaemoomu kakalabhiano,
dadino noponoꞌao kanini kaasi bhe kabanara.
Kakalabhia naꞌa notahimae peda seemie Ana Kaenseemieno Lahataꞌala.
15Yohanes nosakusiiꞌao Anoa bhe nekei-kei ambano,
“Anoamo ini nepulaoꞌaoku wakutuuno afohatokoomu,
‘Anoa nahumato namada idi,
tamaka sakotuꞌuno nofoliu kanau Anoa,
hampano nonandoomo wawo Anoa bhe idi!’ ”
16Kabhalano kanini kaasi sampe kosasawintoomu
nopoangka-angkatulu deꞌawaomu kabarakati.
17Tubhono agama Yahudi dotahimaeꞌomu ne anabii Musa,
tamaka kanini kaasi bhe kabanara notiwoha ne Yesus Kristus.
18Bhe naseemie miinaꞌo bhe mohano Lahataꞌala, mpahinomo Ana Kaenseemieno. Anoa ini nopototo bhe wutono Lahataꞌala bhe notai mpuu lalono ne Amano. Anoamo ini motiwohae ne intaodiomu.
Yohanes nosakusiiꞌao wutono
1:19-28
Mat 3:1-12; Mrk 1:1-8; Luk 3:3-6-15-17
19Neangkaꞌindo miendo Yahudi we Yerusalem detudumo seemie hodua imamu bhe sampuꞌano Lewi, ⸤ o palima-limano imamu⸥ . dakumala ne Yohanes maka dofeena ambado, “Laꞌae bhahaa hintu ini?” 20Yohanes miina nagumau-gauda, nekapunaanda menta-mentalea ambano, “Idi ini suano Mesias, Omputo Fosalamatino.”
21Ambado toha, “Ane peda naꞌa, laꞌae gahaꞌa hintu ini? Bhahaa anabii Elia?” Tamaka Yohanes notobhoosi ambano, “Suano.” Ambado dua, “Hintumo bhahaa anabii neanta-antagi?” Ambano, “Suano.” 22Maka dopugau dua, “Laꞌae gahaꞌa hintu ini? Kapaꞌamo insaodi ini tetewei tamosampee katobhoosimu ne tumudu kainsami. Kona wutomu laꞌae bhahaa?” 23Ambano Yohanes, “Idimo ini nepulaoꞌaono anabii Yesaya, ‘Nandoo suaha mekei-keino we pandaso bhalano. Fekalaaꞌeomu so kaangkaꞌano Ompu.’ ” #Yes 40:3
24Ne olotando mie netudundo maitu nandoo dua miendo Farisi. 25Andoa ini dofeenamo ne Yohanes ambado, “Ane hintu suano Mesias Omputo Fosalamatino, suano anabii Elia, suano dua anabii neanta-antagi, noafa dua fokadiuꞌao?” 26Yohanes notobhoosidamo ambano, “Idi afokadiuꞌao oe, tamaka ne wunta-wuntamiu itu neehe-ehe seemie tapa nepandeꞌaomiu. 27Anoamo so humatono namada Idi; mahinggamo alumense katapuno kaampini ne aꞌeno pae amantasia.”
28Aini nokadhadhia we Betania, we sewetano umeleno Yordan, we kafokadiuꞌano Yohanes.
Anano Dhumbano Lahataꞌala
1:29-34
29Nomentae Yohanes nowohamo Yesus nomaiꞌie. Nopugaumo ambano, “Ondoeꞌomu Anano Dhumbano Lahataꞌala, tumolosino dhosano dhunia. 30Anoamo nepulaoꞌaoku wakutuu apugau, ‘Anoamo so humatono namada idi; tamaka sakotuꞌuno nofoliu kanau Anoa, kapaꞌamo nonandoomo wawo Anoa bhe idi.’ 31Kabhao-bhaono miina dua amandeꞌaanea bhahaꞌi laꞌae Anoa maitu, tamaka patudhuno kahatoꞌaku ini afokadiuꞌao oe, neanomo Anoa amotiwohaandae miendo Israel.” 32Yohanes nosakusiiꞌao dua newohano, “Idi awoha Rohino Lahataꞌala nosampu nomaiꞌao te lani nokatu futeꞌo maka neate te wawono. 33Wakutuu anaꞌa idi miinaꞌo dua amandeꞌaanea bhahaꞌi laꞌae Anoa maitu. Tamaka Lahataꞌala tumudu kanau afokadiuꞌao oe tokamo nokobhoasao ne idi ambano, ‘Ane moha Rohino Lahataꞌala nasumampu maka naeate te wawono seemie, Anoamo itu so fokadiuꞌaono Rohino Lahataꞌala.’ 34Idi awohaꞌaomo wuntano mataku, dadiꞌanomo asakusiiane Anoamo ini Anano Lahataꞌala.”
Anaguhuꞌino Yesus kabhao-bhaono
1:35-51
35Pooli nomentae Yohanes neehe-ehemo dua ne itu bhe anaguhuno dohodua. 36Wakutuu nowoha Yesus nolalo nopugaumo ambano, “Ondoeꞌomu Anano Dhumbano Lahataꞌala!” 37Dofetingke pugauno Yohanes, anaguhuno hoduano maitu lasao dokala doangkafi Yesus. 38Gahaꞌa Yesus nodoli, nowohada doangkafie, dadiꞌanomo nofeenadamo ambano, “Meꞌondofiomu ae?” Ambado, “Rabi, meate ne amai?” (Rabi maꞌanano Guru). 39Ambano Yesus, “Maimoomu wohaꞌao wutomiu.” Dadiꞌanomo dokalamo doangkafie, dowohaemo kaeateꞌano maka oleo aitu deate bhe Yesus. Wakutuu anaꞌa hambi-hambi fato matamo.
40Mie hoduano metingkeno pugauno Yohanes sampe doangkafi Yesus, seemie neano Andreas, kakutaꞌano Simon Petrus. 41Andreas ini lasao noꞌondofi Simon kakutaꞌano bhe nofohatoe ambano, “Insaodi padamo tapoꞌawa bhe Mesias.” (Mesias nopototo bhe Kristus, maꞌanano Omputo Fosalamatino). 42Andreas noowamo Simon ne Yesus. Yesus noꞌondo Simon bhe nopugau ambano, “Hintu Simon anano Yohanes; dakumonako Kefas, nopototo bhe Petrus ⸤ maꞌanano o kontu dempa⸥ .”
43Hato nomentae Yesus neꞌonumo lalono nokala we kadieno Galilea. Ne naꞌa nopoꞌawa bhe Filipus maka nosaliꞌie, “Mai angkafi kanau!” 44Filipus maitu nomaiꞌao we Betsaida, liwundomo dua Petrus bhe Andreas. 45Filipus noꞌondofimo Natanael maka nofohatoe, “Insaodi padamo tapoꞌawa bhe mie nepulaoꞌaono anabii Musa weo Kitabino bhe nepulaoꞌaondo anabii sigaoꞌano. Neano Yesus, anano Yusuf nomaiꞌao we liwuno Nasaret.” 46Ambano Natanael, “Nandoo dua gahaꞌa metaaꞌano maiꞌaono we Nasaret?” Ambano Filipus, “Mai, wohaꞌao wutomu!” 47Nowoha Natanael nomai, Yesus nopugaumo ambano, “Ondoomu, anoa ini miendo Israel sakotuꞌuno, miina namande naepaha-pahaa.” 48Ambano Natanael, “Peda ae pandeꞌa kanau bhahaa?” Notobhoosimo Yesus ambano, “Miinaꞌo nasumaliꞌiko Filipus, awohakomo we pandano puꞌuno ara.” 49Ambano Natanael, “Guru, Hintu Anano Lahataꞌala, Hintumo Omputono Israel.” 50Ambano Yesus, “Ingka padamo afohatoko awohako we pandano puꞌuno ara. Kaparasaeaꞌamumo bhahaa? Namada kaowu sadhulu kabhala kadhadhia so newohamu.” 51Pada aitu Yesus nopugaumo dua ambano, “Amohatoko, kotu-kotuꞌu omoha lani namoengka bhe malaꞌekatino Lahataꞌala damoni sumampu ne Anano Manusia.”
Selectat acum:
Yohanes 1: mnbSD
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2022, Wycliffe Bible Translators, Inc. All rights reserved.
