Yohanes 2
2
Hame-hameno kagaa we Kana
2:1-11
1Nopooli tolu oleo nandoo hame-hameno kagaa we liwuno Kana we kadieno Galilea. Ne naꞌa bhe inano Yesus dua. 2Yesus bhe anaguhuꞌino dobhasida dua we kahame naꞌa. 3Wakutuuno anggurundo nowolomo, nopugaumo inano Yesus ne Anoa, “Nowolomo anggurundo.” 4Ambano Yesus, “Noafa pugauꞌao ne Idi, ina? Ingka miinaꞌo nahumatoa tempoku.” 5Tamaka inano Yesus nopugau ne mie mehe-mengkohano ambano, “O ae maka dua netuduꞌaono, angkafieꞌomu!”
6Ne itu nandoo nomo wua gusi dofontaa-ntaaꞌe mbali defewaniuꞌao peda kaneando miendo Yahudi. Uleano see-seewua napemoꞌono litere. 7Nopugaumo Yesus ne mie mehe-mengkohano ambano, “Fosingiꞌianeomu oe gusi andoa itu.” Gusi anaꞌa dofosingiꞌie ampa nopono. 8Nopugaumo Yesus ne andoa ambano, “Aitu metambuomu seendai maka owaaneomu kamungkula mandeꞌaono kahame ini.” Andoa deowaanemo.
9Kamungkula mandeꞌaono kahame naꞌa nofenamimo oe membalinomo angguru maitu. Anoa miina namandeꞌaane bhahaꞌi nomaiꞌao ne amai angguru maitu, ampamo kaowu mie mehe-mengkohano tumambue mandeꞌaanea. Dadiꞌanomo lasao nosaliꞌi loꞌia buꞌou moꞌane, 10bhe nopugau ambano, “Kotika mehabuno kahame nefolimba deki angguru foliuno kambaka. Nobhahi kaowu dofohoꞌu humatono, kaneꞌomo defolimba tapa seaꞌe mombakaꞌano. Gahaꞌa hintu ini mehunsa-hunsa angguru foliuno kambaka, kaneꞌo folimbae aitu!”
11Kadhadhia aini tanda timenteꞌaono kabhao-bhaonomo nehabuno Yesus; nokadhadhia we liwuno Kana kadieno Galilea. Pedamo aini Yesus nofotiwoha kakalabhiano sampe anaguhuꞌino doparasaeaꞌemo. 12Pada aitu Yesus nokalamo we liwuno Kapernaum nopoowa-owa bhe inano, bhahitieꞌino bhe anaguhuꞌino. Andoa deate ne itu seꞌoleo haa oleo kaomponano.
Yesus nofekangkilo Lambuno Lahataꞌala
2:13-25
Mat 21:12-13; Mrk 11:15-17; Luk 19:45-46
13Hato nomaꞌo hohaeaꞌano Paskando miendo Yahudi, Yesus nokalamo we Yerusalem. 14Weo kadeteno Lambuno Lahataꞌala nehatofi mie mahaasono sapi, o dhumba, o dhaadhaha bhe mebhase-bhaseno dhoi dengkoha-ngkoha ne itu. 15Yesus nehabumo kahambi maiꞌao ne habuta maka kosasawindo mie maitu bhe sapindo bhe dhumbando noꞌambada domaiꞌao weo kadeteno Lambuno Lahataꞌala. Medhando mebhase-bhaseno dhoi nobhansualeda, dhoindo nokambuhie ne wite. 16Mie mahaasono dhaadhaha notududamo ambano, “Fogampidamo kosasawiꞌae itu; koe habuomu lambuno Amaku ini mbali kapodaoaꞌa.” 17Anaguhuꞌino dofeꞌulaimo tibuhino weo Kitabi, “Kaasiku ne lambumu tapedamo efi weo totono laloku somo mekawolo kanau.” #Mzm 69:9
18Miendo Yahudi dofoewa Yesus ambado, “Motiwoha kainsami tanda timenteꞌaono medano ae bhahaa so katandaino hakumu mehabu peda itu?” 19Yesus notobhoosida ambano, “Hunggaeꞌomu Lambuno Lahataꞌala ini maka namooli tolu oleo atumokaemo dua amoehee.” 20Dopugaumo miendo Yahudi ambado, “Fato fulu nomo taꞌu kaomponano Lambuno Lahataꞌala ini dofoehee maka dotokae, gahaꞌa hintu moehee natolu oleo kaowu?” 21Tamaka Lambuno Lahataꞌala nepulaoꞌaono maitu, mbadhano Wutono. 22Nopalusi kawanuꞌano nomaiꞌao ne mate, kaneꞌomo anaguhuꞌino dofeꞌulaiꞌe pugauno maitu. Dadiꞌanomo doparasaeamo ne wambano Kitabi bhe wambano Yesus.
23Tangasano Yesus we Yerusalem ne hohaeaꞌano Paska dobhahi mie marasaeano ne Anoa, hampano dowohamo tanda timenteꞌaono nehabuno. 24Tamaka Yesus miina naposahunaꞌao Wutono ne andoa maitu, hampano nopandeꞌaanda kosasawindo. 25Miina namaraluu damohatoane feꞌilindo manusia, kapaꞌamo nopandeꞌaane totono lalondo manusia.
Selectat acum:
Yohanes 2: mnbSD
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2022, Wycliffe Bible Translators, Inc. All rights reserved.
