ÂTHAONA 35
35
Khazohpa ta Bethel liata Zakaw byhnâ a awpa
1 #
Âtn 28.11-17
Khazohpa ta Zakaw hnohta, “Thyu la, Bethel lâ khy la, cha liata pahrâ la, na unawhpa Esaw tawhta nâ râ nota na hnohta a vaw luahpa Khazohpa châta, cha liata maisâh tao mah y,” tah ta. 2Chatawhcha Zakaw ta a chhôhkha nata a hnohta a ypa zydua hnohta, “Nama hry liata râh hropa khazohzy kha thy khai u la, a pathai u la, nama chysia a patly teh u. 3Thyu sih la, Khazohpa o lâ khy ei suh u. Ei nôpo nota nâ chhy ta, ei siena liata ei hnohta a y lymâpa Khazohpa châta maisâh ei tao aw,” tah ta. 4Chatanachata râh hropa khazoh ama ku liata a ypa zydua nata ama nah liata rahy amâ bapa zydua cha Zakaw pie ei ta, Zakaw ta Sekhe kiapâh ôkâ tho ry liata pabu ta.
5Chatawhcha sie ei ta, Khazohpa chichhihna ta ama chheipâh khihzy cha bie khai ha ta, Zakaw sawchapawzy cha a chadai veih ei. 6Zakaw cha ano nata a hnohta a ypa zydua chhaota Kâna râh liata Luzi khih tlô ta. Luzi cha Bethel a châ. 7Cha liata maisâh tao ta, a unawhpa tawhta â râ nota Khazohpa a hnohta â luahna su a châpa vâta, a moh ta Elbethel#35.7 “Elbethel” tahpa cha, “Bethel Khazohpa” (Khazohpa o) tahna a châ. a bi. 8Chatawhcha Rebekâ mohôhtuhpa Debawrâ cha thi ta, Bethel mathi liata ôkâ tho ry liata pabu ei ta, chavâta a moh Alawbakhuh#35.8 “Alawbakhuh” tahpa cha, “Chana Ôkâ Tho” tahna a châ. bipa a châ.
9Zakaw cha Pâdâ-Aramia tawhta â vy nahta, Khazohpa ta a hnohta a vaw luah heih ta, byhnâ awpa ta. 10#Âtn 32.28Khazohpa ta Zakaw hnohta,
“Na moh Zakaw châ ta,
Châhrasala na moh Zakaw cha tah khao aw veih ei;
Na moh cha Izarei a châ bâ aw,” tah ta.
Chatanachata Khazohpa ta Zakaw cha Izarei tahpa ta a moh a bi. 11#Âtn 17.4-8Chatawhcha Khazohpa ta Zakaw hnohta,
“Kei he Khazohpa Atotaotheipa châ na ta,
Chi hluhpi pathlapa ta pôh mah y.
Phopi nata phopi a pazaopakhypazy
Nâma tawhta vaw pua aw ei ta,
Na chhôh tawhta beizy ama pua aw.
12Abarahâ nata Aisika hnohta râh ei piepa kha,
Nâ cha pie na ta;
Na pathla a vaw y lymâ awpazy hnohta chhao,
Râh cha ei pie aw ei,”
tah ta. 13Cha khai tawhta, Khazohpa ta Zakaw cha, bie â chhona su tawhta a siesai haw. 14#Âtn 28.18,19Zakaw ta Khazohpa ta bie â chhona su liata alô bô ta, a chô liata dopa hlâna bao ta, sathaw chhao a chô liata bao hra ta. 15Khazohpa ta bie â chhona su moh cha, Zakaw ta Bethel a bi.
Râkheli thina
16Bethel tawhta sie ei ta, Epharâ khih ama tlô nawpa â hla kaw chyna su liata Râkheli cha saw a zeih ta, a nawh pi ru ngaita ta. 17Riethei ngaitapa ta saw â zeih hai nota, nawh paytuhpa ta a hnohta, “Chi khah y, sawchapaw hropa na hnei,” tah ta. 18Chatawhcha Râkheli cha thi ha ta, a thlahpa a pathlie hai nota, a moh Benôni#35.18 “Benôni” tahpa cha, “Ei pachârôhna sawchapaw” tahna a châ. tahpa ta kaw reih ta, châhrasala a paw ta Benzami#35.18 “Benzami” tahpa cha, “Vâpha awpa Sawchapaw” tahna a châ. tahpa ta a moh a bi. 19Râkheli cha thi ta, Epharâ lâpi liata ama pabu. Epharâ cha Bethlehe a châ. 20A thlâ chô liata Zakaw ta alô bô ta, cha cha Râkheli thlâ lôbô tahpa ta pahnopa a châ. Tanoh taihta cha liata a y. 21Izarei cha sie lymâ ta, Ederâ osâhpa khô liata poh o rai ta.
Zakaw pathlazy
(1 Ttr 2.1-2)
22 #
Âtn 49.4
Cha râh liata Izarei a y nota, Rubena cha vawh ta, a paw nôtho Bilhâ a ziakhei ta. Izarei ta cha cha pahno ha ta.
Zakaw cha sawchapaw pahrawh hleino hnei ta. 23Liah sawchapawzy cha Zakaw sawchapaw uhtheipa Rubena, Simeôna, Livai, Zudâh, Iskâra nata Zebulawna zy ama châ. 24Râkheli sawchapawzy cha Zawsi nata Benzami ama châ. 25Râkheli seichanô Bilhâ sawchapawzy cha Dânâ nata Nâthalai châ ei ta, 26Liah seichanô Zilpâ sawchapawzy cha Kâdâ nata Asera zy ama châ. Âmo cha Zakaw ta Pâdâ-Aramia liata a sapa a sawchapawzy ama châ.
Aisika thina
27 #
Âtn 13.18
Zakaw cha Kiriathâbâ kiapâh Mamre khih liata a ypa a paw Aisika kô kei tlô ta. Cha khih cha Hebraw tahpa châ hra ta, Abarahâ nata Aisika zy pahrâna khih a châ. 28Aisika cha kô 180 hroh ta. 29Aisika cha a thlahpa pathlie ta, machâpa a chhâ palopa ta thi ta, a chiheihzy hnohta pahlyhpa ta y ta. A sawchapawpa Esaw nata Zakaw ta ama pabu.
Selectat acum:
ÂTHAONA 35: MARVBSI
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
The Bible Society of India
© 2023, Used by permission. All rights reserved.