Susuuon Kopoilaan
Kopoilaan
Iti nopo buuk do Sorita Diri Susuuon di Yisus nga toput di buuk di Abar do Aandai di Tinulis di Lukas. Kinoponulisan nopo marong diti buuk do Sorita Diri Susuuon di Yisus nga monorita nong potingkuro i piipiro tulun di Yisus do vojoon di Tatod do Kinoringan do spopintongkop di Abar do Aandai pasal di Yisus do silo Bandar Yorusalim, om silo pointongkop do Vonuvo Yudia, om silo Vonuvo Somoria, om gosob do nokorikot do silo disan tana (1:8). Iti nopo buuk diti om monorita pasal nong potingkuro ugama do Koristian do minonimpuun si di tongotulun Joudi gosob do koinggajono dii om nosiliu do ugama do nokotongkop diti vonuvo.
Ontok di nosusu i Yisus siti vonuvo kivaro iso bandar do okuat marong, irino Ruum. Iri nopo Raja Tagajo si Ruum nga minangala oguu moisosondiang vonuvo gosob do momorinta do oguu vonuvo mivaja do Vonuvo Israil. Andasan nopo daa dii di tongotulun Joudi i mijon siri Vonuvo Israil do i Yisusno iri monguup diolo popoidu di tulun Ruum iri momorinta si vonuvo diolo. Ombopo dii diti do korikatan nopo di Yisus nga irino do mongidu di tongotulun mantad si duso diolo, okonko mongidu diolo mantad si porinta Ruum. Irad nopo diri oguu i tongotulun Joudi au uvang do aparsaya di Yisus do panantaman daa diolo i Yisus okonko sinuu di Kinoringan sumiliu do Raja. Nga mindad-indadpo daa iolo di korikatan diri Mosias diolo, do andasan nopo daa diolo do aupo sinuu di Kinoringan Isido mongoi si diolo sumiliu do Raja. Auno dii koilo iolo do nokorikotno dii Isido.
Nga karaja nopo di susuuon di Yisus, irino do patatap di ginavo di tongotulun Joudi do aparsaya do pinovijau di Kinoringan i Yisus mantad si kapatajon, om irino koilaan do Isidono iri sinuu di Kinoringan mongoi siti vonuvo sumiliu do Raja. Nipoontong di tongosusuuon si di tulun Joudi i tinangaran si Pinongojonjian do Laid do pinoilo di Kinoringan laid do rumikot i Mosias diolo, om pinoontong diolo nogi do nokorikot i Yisus irad di tinangaran si Kitab, om suuon diolo i tongotulun do aparsaya di Yisus.
Mantad diri nga oguu tulun Joudi do naparsaya di Yisus. Om oguu nopo diri tongotulun do okonko bansa do Joudi nogi nga naparsaya di Yisus. Nga kivaro tulun Joudi di aparsaya di Yisus mitangar do au kaanu i tongotulun do okonko bansa do Joudi do kovijaan do auso koovion nong au maja di koubasan do tulun Joudi. Nga pinatarang di Kinoringan si di susuuon di Yisus do tulun Joudi ko tulun do okonko bansa do Joudi nga miirad kaantangan Disido. Isaai nopo aparsaya di Yisus nga onuan do kovijaan do auso koovion sabap di kaparsayaan disido, okonko mantad do vojoon disido i adat do tulun ko koubasanjo (bab 10:1-11:18; 15:1-34).
I Lukas i minonulis do buuk diti nga nokosoromo marong do apatut do poiloon i tulun do mambasa diti buuk do iri nopo i tulun do Koristian nga okoniko pulitik di mosok-losok lumavan di porinta do Ruum, nga iri nopo ugama do Koristian om minongopod marong di ugama do Joudi.
Porinta nopo do Ruum nga kivaro iso Raja Tagajo i mijon siri Bandar Ruum. Bandar Ruum nopo nga bandar do agajo silo Vonuvo Itolia. Iri nopo Raja Tagajo diri nga momili di tongoraja om tongogobonor do suuonjo mongoi sombo-sombo do vonuvo do momorinta siri. Kasangkat do tulun siri Itolia nga kivaro warganagara do Ruum, om kivaropo tulun vokon siri tongovonuvo porintawon di Raja Tagajo do Ruum do obuli mokianu warganagara do Ruum. Isaai nopo kaanu do warganagara do Ruum nga kivaro untungjo, irad do au obuli ukuman isido nong aupo nobisara, om obuli isido mokiongoi siri Bandar Ruum do mokisalasai diri pangadaawaan do tulun si disido. Nong auso warganagara do Ruum nga au kadapat do irad diri. I Poulus nopo i soritawon di Lukas siri bab 13 gosob do bab 28 nga kivaro warganagara do Ruum.
Iti nopo buuk do Sorita Diri Susuuon di Yisus om binaagi do tolu boogian; saralom nopo di tolu boogian diti om popoilo nong potingkuro i Abar do Aandai pasal di Yisus makin alaid makin kotongkop om i kinopudolianan di poiuuntunan do tulun di aparsaya di Yisus. Boogian koiso: Nokoinsavat nopo dii i Yisus silo suruga om ajadi dii i poiuuntunan do tulun di aparsaya di Yisus om timpuun nogi dii iolo kumaraja si di Tuhan silo Bandar Yorusalim (bab 2:1-8:3); boogian koduvo: nokotongkop iolo si piipiro sondiangko pantok silo Polistin (bab 8:4-12:25); boogian kotolu: agajopo dii kavagu kinotongkopo diri ugama do Koristian si piipiro vonuvo do siri misoliput di Laut do Odoria gosob do nokorikot silo Bandar Ruum (bab 13:1-28:31).
Om kivaropo iso iri oponting marong si saralom do buuk do Sorita Diri Susuuon di Yisus diti; iri nopo om i vinaal do Tatod Tolidang di rinumikot do mivaja do kuasa si di tulun di nongaparsaya do silo Yorusalim do ontok di Tadau Pintokusta. Kasangkat nopo di nopimvaal di nokotulis si buuk diti nga pinopointalang nopo do tumilombus i Tatod do Kinoringan popotolunong om popogirot di poiuuntunan di tulun di aparsaya di Yisus om i piipiro kotua si poiuuntunan di tulun di aparsaya di Yisus. Iri nopo pangaabaran di ugama do Koristian di timpuuni om pinodibak siri piipiro ponudukan di susuuon di Yisus. Om iri nopo i kinojojodio di nokotulis si buuk diti om papatarang do kogojoo do kuasa di abar diri siri kovijaan di tulun do Koristian om siri kopisompuuvan do poiuuntunan di tulun di aparsaya di Yisus.
Saralom diti Buuk
1. Sumodia do mongoi mangaabar di Abar do Aandai 1:1-26
a. Ponuuan di kolimumusonno om janji di Tuhan Yisus 1:1-14
b. I sinumuvoli di Yudas 1:15-26
2. Mangaabar silo Bandar Yorusalim 2:1-8:3
3. Mangaabar silo Vonuvo Yudia om silo Vonuvo Somoria 8:4-12:25
4. I vinaal di Poulus 13:1-28:31
a. Kinapanaan di koinsan nogi do minongoi mangaabar di Abar do Aandai 13:1-14:28
b. Miting do agajo do silo Yorusalim 15:1-35
c. Kinapanaan do koinduvo do mongoi mangaabar di Abar do Aandai 15:36-18:22
d. Kinapanaan do kointolu do mongoi mangaabar di Abar do Aandai 18:23-21:16
e. Nokojiil i Poulus silo Yorusalim om silo Bandar Koisoria om silo Ruum 21:17-28:31
Nong kivaro tanda bintang (*) siri tinangaran, nga obuli iumon i komoion diri tinangaran si Kamus Kadajan.
Selectat acum:
Susuuon Kopoilaan: LabukPKV
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 1995, Wycliffe Bible Translators, Inc. All rights reserved.