Susuuon 2
2
Korikatan di Tatod Tolidang
1Opulupo tadau mantad diri kinoinsavatan di Yisus om korikot iri Tadau Tagajo Pintokusta. Nga minoiuntun kasangkat i tongotulun i naparsaya di Yisus siri iso pantok. 2Om tigog kai dii do korikot iso dolou#2:2 dolou: bongut mantad silo tavan#2:2 tavan: langit muvob-nguvob irad do sarup tologod. Nga tumongkop iri dolou diri siri saralom di valai pantok diolo songingogom. 3Om kaantangai nopo dii diolo iri irad do sinindoi do tapui om tumikid dii diri kinasangkatan di tongotulun. 4Om inosuan iolo di Tatod Tolidang. Om timpuunno dii iolo santangar-tangar do moisosondiang dii iri tinangaran diolo sabap tinudukan di Tatod do Kinoringan i tongoginavo diolo mitangar.
5Om kivaro tongotulun Joudi mantad pointikid-tikid vonuvo do poingijon soi Bandar Yorusalim. Iolo nopo nga rumalan maja do ugama Joudi. 6Karangaai nopo dii diolo i dolou songgolitok om oguu dii iolo mongoi muntun siri. Kopoiuuntun nopo dii iolo siri om nokorongou diri tinangar di tongotulun i naparsaya di Yisus do moisosondiang tinangaran diolo. Nga oboringou dii i tongotulun Joudi do nokorongou di tinangaranjo kondiri do iri tongotulun i naparsaya di Yisus mitangar do tangar do pointikid-tikid bansa. 7Nga ongoiranan dii marong i tongotulun Joudi do mitangar i tongotulun i naparsaya di Yisus do moisosondiang tinangaran. Om kadiolo, “Iti nopo tongotulun diti do mitangar moisosondiang tinangaran nga kasangkat iolo mantad Vonuvo Golilia. 8Nokuro iolo do apandai mitangar diti tinangaran tokou kondiri? 9-11Tokou nopo nga tulun do mantad soi Vonuvo Parti, Vonuvo Midi, Vonuvo Ilami, Vonuvo Mosuputami, Vonuvo Yudia, Vonuvo Kopoduki, Vonuvo Puntus, Vonuvo Osia, Vonuvo Porigia, Vonuvo Pompilia, Vonuvo Masir om ponong Vonuvo Libia, i kososomok do Bandar Korini. Om kivaro nogi tulun Joudi om tulun di okonko bansa Joudi di minaja do ugama Joudi siti pialatan tokou om mantad iolo soi Bandar Ruum. Om kivaro nogi i tongotulun mantad do Vonuvo Koriti om Vonuvo Arab. Insan irad diri nga ongorongou tokovi iti tongotulun do mitangar do tinangaran tokou kondiri. Om popoilo iolo di pimvavaal do Kinoringan iri koiranan,” kadiolo. 12Nga ongoirananno marong iolo sampai noboringou marong, om poiduduatno dii iri tongotulun nokorongou do ka, “Onu dii kinojodian diti do inong diti?” ka.
13Nga kivaro tulun vokon monginsasana di tulun i naparsaya di Yisus do minitangar do irad diti, “Iolo nopo dilo om naavuk,” ka.
Ponudukan di Pitrus
14Nga ingkakatno dii i Pitrus om kasangkat di opulu om iso susuuon di Yisus vokon. Om mitangar i Pitrus di tongotulun do dolou opuod do irad diti, “Oou kosusuladanku, rongoo mujuno iti tangaronku dikovu i tongotulun Joudi, om kasangkat kou tongotulun vokon i poingijon siti Bandar Yorusalim. Poiloonku ikovu nong onu komoion diti. 15Nokuro do ponguranan ikoi dikovu do naavuk do baru nogi pukul sombilan minsarap iti maino? 16Sondiangno iti, do minitangar i nabi Yuil, i popolombus di tinangaran do Kinoringan di pogulu pasal diti, om kadisido,
17‘Mitangar i Kinoringan do irad diti,
“Itino vaalonku do touri#2:17 touri: toudi tadau.
PotimbuluakonKu potuntug i TatodKu Tolidang silo ginavo di tongotulun do aparsaya Dogo.
Ii nopo koturunan muju kusai om tongondu nga popolombus di tinangaranKu si di tongotulun.
Iri nopo tongotomulok nga kivaro ipoontong si diolo.
Om iri nopo tongolumoing nga moginipi.
18Insan i susuuon kusai om tongondu nga potimbuluakonKu si diolo potuntug i TatodKu Tolidang
ontok do tadau diri,
om popolombus iolo do tinangaranKu si di tongotulun.
19-20Om mamaal Oku do koiranan silo tavan,
irino misok ilo tadau om rumagang ilo vulan irad do raa.
Om mamaal Oku do pongintutunan siti tana, irino raa, om tapui om oguu lisun.
Om ontok nopo diri nga auno alaid i Tadau do Tuhan,
irino tadau tagajo om koiranan do Kopongukuman di Tuhan do vonuvo diti.
21Nga isai-isai nopo i mongoloou di Tuhan do mokitulung
nga irino kaanu do kovijaan do auso koovion,”
kadi Kinoringan,’
i tinulis di Yuil.#Antangai Yuil 2:28-32.
22Oou tulun Israil, rongou kouno diti tinangaranku. I Yisus nopo nga mantad si Bandar Nasarit om inonuan Isido do kuasa mantad do Kinoringan. Om minamaal Isido do kosunduvan, koiranan om nogi pongintutunan mantad di kuasa do Kinoringan. Nga irino vinaal di Yisus supaya otutunan muju do Isidono i kikuasa mantad do Kinoringan, do siti dikovu kinapamaalan Disido i kosunduvanJo. 23Nga nitaak i Yisus si dikovu om noilaani di Kinoringan laaid do irad dino Isido do irino kouvangan di inaturJo laaid. Om papasalib kou di Yisus om ipapatai muju Isido di tulun kiduso. 24Nga pinovijau do Kinoringan i Yisus om popoidu Disido mantad do kosusaanJo, irino kapatajanJo, do misti i Yisus mogidu si kapatajan. 25Sabap nga pinaabar di taki tokou, ngaranjo i Daud, iri tinangaran di Yisus di pogulupo, do kadi Yisus,
‘ “Soumur aantanganKu i Tuhan, do poimvaja Isido Dogo.
Nga ausoi korosijanKu do soumur monulung Isido Dogo.
26Irad diri asanang i ginavoKu,
om otomon#2:26 otomon: oomong okui.
Insan apataipo iti kojuvanKu,
nga aui osusa ginavoKu do mangaarap Oku do Kinoringan,
27do okonko poboyoon Disido i tatodKu silo poijanan di tongotulun nongapatai.
Om okonko poboyoon Disido i kojuvanKu apasa
do Iokuno i SusuuonJo iri rumalan.#2:27 Antangai si Susuuon 13:35.
28Om minonuduk i Kinoringan Dogo do mongoi Oku si kovijaan talaid.
Poimvaja Isido Dogo, om sabap diri asanang marong i ginavoKu,”
kadi Yisus,’ kadi Daud.#Antangai Buuk Sinding 16:8-11.
29Oou kosusuladanku, opusu oku mitangar dikovu pasal di taki tokou, i Daud. Nga napatai isido, om nolobongno om sitipo i lobongjo gosob do tadau maino. 30Nga i Daud nopo nga nabi, irino popolombus di tinangaran do Kinoringan. Om noilaan disido iri nisumpa do Kinoringan do mangajanji si disido; irino do kivaro iso tulun, i koturunanjo, do posuvolijon do Kinoringan sumiliu do Raja irad di Daud pogulu. 31Om noilaanno di Daud laaid do povijauon do Kinoringan i Koristus do Isidono iri pinili do Kinoringan sumiliu diri Raja. Jadi minitangar i Daud pasal do kinovijaan di Koristus kavagu mantad si kapatajanJo irad diti,
‘Okonko poboyoon di Kinoringan i tatodJo silo poijanan di tongotulun nongapatai.
Om okonko poboyoon Disido i kojuvanJo do apasa,’ kadi Daud.
32Nga norikot i tinangaran di Daud do i Yisus nopo diti om pinovijau do Kinoringan kavagu mantad si kapatajon. Om nokoontong ikoi kasangkat do novijauno Isido. 33-35Om pinoinsavatno do Kinoringan i Yisus, om pinorikot si ponong vananJo. Okonko i Daud iri pinoinsavat si suruga, nga irino i Yisus komoion di Daud do kadisido,
‘Sinuu di Tuhan irino i Kinoringan i Tuhanku do,
“Ogomno siti ponong vananKu
gosob do ipapasokKu Dikau i tongomusuNu
tanda do nakala iolo,”
kadi Kinoringan,’ kadi Daud.
Nga korikot nopo i Yisus siri TamaJo, om nokotorima Isido di Tatod Tolidang irad di nijanji diTamaJo. Nga pinaatod Disido i TatodJo Tolidang siti dagai om pinotimbuluak ikoi Disido potuntug diri TatodJo. Nga irino naantangan muju om norongou muju do maino,” kadi Pitrus.#Antangai Buuk Sinding 110:1.
36Om kadi Pitrus kavagu, “Oou tulun Israil, rotio mujuno marong do itino i Yisus, i pinasalib muju. Kouvangan do Kinoringan nopo nga sumiliu i Yisus do Tuhan, irino kikuasa mantad onuu nopo vokon. Om Isidono pinili do Kinoringan sumiliu di Koristus, irino Raja,” kadi Pitrus di tongotulun.
37Nga korongou nopo dii iri tongotulun di tinangaran di Pitrus om nosurau i ginavo diolo. Om duatono dii di tongotulun i Pitrus om i tongosusuuon di Yisus vokon do ka, “Oou kosusuladanja, onu naku iri gaagayaja do aandai?” kadiolo.
38Nga jawapno dii i Pitrus diolo do ka, “Rumorogo kouno mamaal do duso muju. Om mokibatis kouno saralom do ngaran di Yisus Koristus supaya ompunan kovi do duso muju. Om kaanu kou nogi dino di Tatod do Kinoringan iri itaak do Kinoringan dikovu. 39I Kinoringan nopo nga i Tuhan tokou. Om nijanji Disido do manaak do TatodJo Tolidang dikovu, om tongotangaanak muju om i tongotulun do siri sodu. Isai-isai nopo i pinorikotJo siri Disido nga irino taakan Disido di TatodJo Tolidang,” kadi Pitrus.
40Nga okonko iri om iri noo tinangaran di Pitrus, nga oguupo sondiang tinangaran disido. Om monuduk isido do pogirot do ginavo di tongotulun do irad diti, “Rijang kouno mantad di tulun taraat do maso maino supaya ovijau kou om au kou kavaja diolo oukuman,” ka. 41Nga nokorongou nopo dii i tongotulun di tinangaran di Pitrus pasal di Yisus, om oguu dii diolo do naparsaya di Yisus. Om isai-isai nopo naparsaya nga nobotisan.#2:41 nobotisan: noboptoisan Nga kivaro dii kama tolu noribu ginuu diolo do nokoruang diri tulun laaid do naparsaya di Yisus.
42Om soumur iolo mokituduk di tongosusuuon di Yisus, om moivavaja iolo do miiso ginavo diolo, om minoiuntun iolo mangakan di kuui mongondom di kinapatajan di Yisus om sumambayang iolo.
Gaagaya di Tongotulun i Nakaparsaya di Yisus
43Om oguu dii tongokoiranan om pongintutunan vinaal di tongosusuuon di Yisus mantad di kuasa do Kinoringan. Nga naantangan dii di tongotulun om nokorosi dii iolo. 44Om kasangkat di tongotulun i naparsaya di Yisus nga kopiiso ginavo moiuntun-untun. Om kasangkat diolo nga manansanganu di tongoporompon, om isai-isai nopo diolo nga buli moisusuvoli mamakai. 45Om iri nopo tongoarata vokon diolo nga ijual supaya poiboboogijon iri torogo di kinasangkatan diolo. Isai iri osimpit marong oguu pataakon. 46Om kopiiso ginavo diolo pointikid-tikid tadau mongoi siri Valai Sasambayangan Tagajo. Om moiuntun-untun iolo mangakan di kuui mongondom di kinapatajan di Yisus siri valai diolo. Om ongasanang i ginavo diolo om osompini i ginavo. 47Om i tongotulun i naparsaya di Yisus nopo nga mangarajou do Kinoringan. Om kasangkat di tongotulun au naparsaya di Yisus nopo nga ongaandaian di tongotulun i naparsaya. Om tikid tadau ruangan do Tuhan iolo do tulun i nakaanu do kovijaan do auso koovion.
Selectat acum:
Susuuon 2: LabukPKV
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 1995, Wycliffe Bible Translators, Inc. All rights reserved.
