मत्ती 7
7
राःङ्साला माःताक्पा माःच्याङ
(लुका ६:३७-३८,४१-४२)
1येशुइ ताःरुङ लाःतेर काःल्सी, “राःङ्साला माःताक्पा माःच्याःङ, ओः सोङ्गारा, कोन्ज्योइयाङ ख्योक्याला माःताक्पा मेःच्याःङेन एः। 2चीलेलाःना काःन्डुले ख्योक्याइ राःङ्साला माःताक्पा च्याःङ्बा, ओःन्डुलेरा कोन्ज्योइयाङ ख्योक्याला माःताक्पा च्याःङेन एः। ख्योक्याइ राःङ्साक्याला काःन्डुले ताःप्पी तेर्पा, ओःन्डुले कोन्ज्योइयाङ ख्योक्याला ताःप्ती तेर्केन एः। 3राःङ्साइ गोखाला सीक थोङेन्दीइ राःङगीइ जुबुइ माःइ चीले मेःथोङ्बा? 4राःङगीइ जुबुइ माःइ मेःथोङेन्दीइ राःङ्साला काःन्डुले लाःचे खुउबा, ‘खोइ खोइ, ङाः ख्याइ गोइ सीक तेङ्तेर्के?’ 5ए खोक्नाक! तोःङ्ला राःङगीइ मीइ माःइ तेङ्दी क्युर्तो ओःले का राःङ्साइ गोइ सीक तेःमुलेरा तेङ्खुउए ओःले सेखुउए।
6चाङ्मा स्याःक्या खीला मातेर, ओःक्याइ लोःदी ख्योक्याला काःप्टो। राःङगीइ मोतीक्या फाइ तोःङ्ला माक्युर, मीःङे लाःना ओःखोइ राःङगीइ काङ्बाइ ओःक्या नेम्ङेन एः।#७:६ यहुदीक्याइ खीक्याला क्युक्ट्वा पेःउके। ओःले फाक्यालादी असुद्ध लाःकुके।
लाङ्दो, छोल्दो ओःले कोः तुःङ्दो
(लुका ११:९-१३)
7लाङ्दो ले ज्योर्केन एः, छोल्दो ले फ्रेकेन एः, कोः तुःङ्दो ले ख्योक्याइ लागी कोः फ्यागेन एः। 8चीलेलाःना काःखोइ लाङ्गुबा ओःखोइ ज्योर्कुए, काःखोइ छोल्गुबा ओःखोइ फ्रेकुए, ओःले काःखोइ कोः तुःङ्गुबा ओःखोइ लागी कोः फ्याउए। 9ख्योक्या नाःङ्ला सुदी एःन्डुबा आबा एःस्वाँ, ओःखोइ राःङगीइ पुःइ खुरा लाङ्गासुना तोः तेर्कुबा? 10ओःले ङ्याः लाङ्गासुना प्रुःल तेर्कुबा? 11ख्योक्या माःइबा एःनाङ राःङगीइ पुःपोःमोला याःबु ताम तेर्चे सेउए लाःना, ताःरुङ ख्योक्या भन्दाङ नाःम्खालीङला तेःकेन ख्योक्याइ आबाइ खुङ ङीमु लाङेनक्याला याःबु स्याः तेर्कुए।
12राःङ्साइ ख्योक्याला ची पेःतेर्क्योक सेम थेकुबा, ख्योक्याइयाङ राःङ्साक्याला ओःन्डुरा पेःदो। दीखोरा मोशाइ ठीम ओःले कोन्ज्योइ लेःङ्गो तेर्केनक्याइ लाःक्योक तामक्याइ लेःन इःङे।
छीमी कोः ओःले छीमी लाःम
(लुका १३:२४)
13छीमी कोःलाःम्ले नाःङ्ला स्युःदो चीलेलाःना ङ्याल्वाला क्याल्गेन कोः छ्योम्बो ओःले लाःम तेःमु ओःङ्गुए। दीखो लाःमला डोगेन मीःक्या माःङ्बुरा ओःङ्गुए। 14इःनाङ मीःलीला क्याल्गेन कोः छीमी ओःले लाःम काःबु ओःङ्गुए। ओःले तीःबी मीःक्याइ चीग्रा दी लाःम फ्रेकुए।
तोःङ्बो ओःले ओःखोइ ब्रुम्दो
(लुका ६:४३-४६; १३:२५-२७)
15स्योप क्युःर्केन कोन्ज्योइ लेःङ्गो तेर्केनक्या ङीमु च्यागाताःक्पु पेःदी तेः। खुङक्या लुःक च्योःङ्रा छेन्दा लेःङ्दी ओःङ्गुए, इःनाङ नाःङ्ला जीबा लाःङ्जे च्योःङ्रा फारा च्योःङ्रा ओःङ्गुए। 16ख्योक्याइ खुङक्याला खुङक्याइ लेःगालाःम्लेरा ङोःसेगेन एः। ची छेर्माङगीइ पुःङला अङ्गुर मेःकोःङ्ए, ओःले सीउँडीइ पुःङला नेभारा मेःकोःङ्ए। 17ओःन्डुलेरा याःबु तोःङ्बोइ याःबु ब्रुम्दो कोःङ्च्युए। इःनाङ माःइबा तोःङ्बोइ माःइबा ब्रुम्दो कोःङ्च्युए। 18ओःले याःबु तोःङ्बोइ माःइबा ब्रुम्दो कोःङ्च्यु मीःखुए, ओःले माःइबा तोःङ्बोयाङ याःबु ब्रुम्दो कोःङ्च्यु मीःखुए। 19याःबु ब्रुम्दो कोःङ्मीच्युगेन थाम्जेर तोःङ्बो तुप्ती मेःला सागेन एः। 20ओः सोङ्गारा, ख्योक्याइ स्योप क्युःर्केन कोन्ज्योइ लेःङ्गो तेर्केनक्याला खुङक्याइ लेःगालाःम्लेरा ङोःसेगेन एः।
21ङाःला ‘प्रभु, प्रभु’ लाःकेन्दी थाम्जेर नाःम्खालीङगीइ क्याःल्खापला स्युःजे मेःज्योर्केन एः। नाःम्खालीङला तेःकेन ङाःइ आबाइ लाःक्योक ङीःङेन मीःक्या चीग्रा ओःला स्युःजे ज्योर्केन एः। 22ठीम पेःगेन ङीःमु ङाःला माःङ्बुरा मीःक्याइ लाःकेन एः, ‘प्रभु, ए प्रभु, ची ङीःइ ख्याइ मीःनला कोन्ज्योइ लेःङ्गो माःलाःप्पा ले? ख्याइ मीःनला हेन्डीक्या माःत्याःबाले? ओःले ङीःइ ख्याइ मीःनला याःमाछाककीइ माःङ्बुरा लेःगाक्या माःबेबा ले?’ 23ओः तेःकासु ङाः खुङक्याला लाःके, ‘ए माःरीक्पा लेःगा पेःगेनक्या, ख्योक्याला ङाःइ नाःमाङ ङोःसेदीरा म्याः। ङाःलाःम्ले थारीःङ्बु सुङ!’
खीम जोगेन मेःन्दा ङी मीःक्या
(लुका ६:४७-४९)
24ओः सोङ्गारा, ङाःइ लाःक्योक दी ताम कोःदी ङीःङेन मीःदी राःङगीइ खीम राःम्बु च्यार्का तोःखाला जोगेन नावा साल्बु मीः च्योःङ्रा इःङे। 25खीम जोमीःजीक नाम क्याःप्सी, बाढी ओःङ्सी ओःले ल्हाबालुजुप ओःङ्दी खीमला फोसी, इःनाङ चार राःम्बु च्यार्का तोःखाला एःकारा खीम माःरील। 26इःनाङ ङाःइ लाःक्योक ताम कोःदीङ मीःङीङेन्दीदी पेःमाखाला खीम जोगेन आक्याक्पा मीः च्योःङ्रा इःङे। 27खीम जोमीःजीक नाम क्याःप्सी, बाढी ओःङ्सी, ल्हाबालुजुप ओःङ्दी खीमला फोसी ओःले ओः खीम रोःम्सी। ओःले ओः खीमगीइदी जीबा लाःङ्जे च्योःङ्रा सीःङ्दाक काःल्सी।”
28येशुइ योबाक्याला एःन्डुले लोप्क्योक कोःदी मीःक्या याःमाछाक नेसी। 29चीलेलाःना खुङगीइ राःङ्सा छ्येइ ठीमगीइ लोबेनक्याइ च्योःङ्रा मीःङे, इःनाङ आङ्ज्या एःक्योक मीःइ च्योःङ्रा पेःदी लोप्कुके।
Selectat acum:
मत्ती 7: SYW
Evidențiere
Partajează
Copiază
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fro.png&w=128&q=75)
Dorești să ai evidențierile salvate pe toate dispozitivele? Înscrie-te sau conectează-te
© 2024 (Active), Wycliffe Bible Translators, Inc. All rights reserved.