मत्ती 6
6
कोःकेनक्याला तेर्केन बारेला येशुइ लोप्क्योक
1“च्यागाताःक्पु पेःदी तेः, ख्योक्याइ मीःक्याला तेङ्जेइ लागी धर्मकर्म माःबे। मीःङे लाःना नी नाःम्खालीङला तेःकेन ख्योक्याइ आबा कोन्ज्योलाःम्ले ख्योक्याइ चीङ इनाम मेःज्योर्केन एः।
2ओः सोङ्गारा, ख्योक्याइ कोःकेन मीःक्याला चीङ तेर्कासुना लाःक्पा माःतुःङ। एःन्डुबा नी खोक्नाकक्याइ का मीःक्यालाःम्ले प्रशंसा ज्योर्चेला जोम्साखीम ओःले लाःमक्याला पेःउए। तेःन्दामरा ङाः ख्योक्याला लाःके, खुङक्याइ ज्योर्कोःन इनाम खुङक्याइ ज्योर्सीःङ्क्योक ओःङ्गुए। 3ओः सोङ्गारा, कोःकेन मीःक्याला तेर्कासुना च्याःबु लाःक्पाइ तेर्क्योक योमा लाःक्पाइ माःछोर्च्युक। 4तेर्कासुना खाजुम्माले तेर ओःले खाजुम्माले तेर्कासुना थोङेन ख्योक्याइ आबा कोन्ज्योइ ख्योक्याला इनाम तेर्केन एः।
प्रार्थना पेःगेन बारेला लोप्क्योक
(लुका ११:२-४)
5ख्याक्या प्रार्थना पेःगासुना खोक्नाकक्याइ च्योःङ्रा पेःदी प्रार्थना माःबे। खुङक्या नी राःङ्सा मीःक्याइ थोङ्ज्युक लाःती जोम्साखीमक्याला ओःले लाःमगीइ सुःरसाःरला लाःङ्दी प्रार्थना पेःजेला सेम थेकुए। तेःन्दामरा ङाः ख्योक्याला लाःके, खुङक्याइ ज्योर्कोःन इनामदी ज्योर्सीःङ्क्योक ओःङ्गुए। 6इःनाङ ख्योक्यादी प्रार्थना पेःगासुना कोठा नाःङ्ला स्युःदी कोः चेती सुइयाङ मेःथोङेन आबा कोन्ज्योला प्रार्थना पेःदो। ओःले ख्योक्याइ खाजुम्माले पेःक्योक लेःगा थोङेन आबा कोन्ज्योइ ख्योक्याला इनाम तेर्केन एः।
7राःङ्सा क्युःपाइ मीःक्याइ पेःक्योक च्योःङ्रा एःन्दाराङ सेफार क्याःप्ती प्रार्थना माःबे। खुङक्या नी रीःबु रीःङ्बु प्रार्थना पेःमीःजीक का लेःन ज्योर्कुए लाःती ठीवा चेकुए। 8ओः सोङ्गारा, ख्योक्यादी खुङक्याइ च्योःङ्रा माःबे चीलेलाःना लाङ्जे भन्दा तोःङ्लारा ख्योक्याला ची तामगीइदी ताःसुक एःपा लाःकेन ताम नाःम्खालीङला तेःकेन ख्योक्याइ आबा कोन्ज्योइ सेउए। 9ख्योक्यादी एःन्डुले प्रार्थना पेःगेन्दी पेःदो,
‘नाःम्खालीङला तेःकेन उःइ आबा कोन्ज्यो,
मीःक्याइ ख्या चाङ्मा कोन्ज्यो इःङे लाःती ङोःसेज्युक।
10ख्याइ क्याःल्खाप ओःङ्ज्युक,
ख्याइ सेम थेक्योक ताम नाःम्खालीङला चोङ्रारा दी साजाम्बुलीङलाङ छाङ्ज्युक।
11ङीःमारी टाःङ्मा कोःकेन साःप्च्या ङीःला तीःरीङाङ ना।
12ङीःइ वीरुद्धला लाःयो पेःगेन्दीक्याला ङीःइ क्षमा पेःक्योक च्योःङ्रारा,
ङीःइ लाःयोक्या क्षमा पेःतेर।
13ङीःला छ्योम्बो परीक्षाला लेप्माच्यु,
इःनाङ ङीःला माःरीक्पा लालाःम्ले थार्च्युतेर।
[चीलेलाःना क्याःल्खाप, ल्हे ओःले महीमा तेन्दुइ लागी ख्याइदीरा इःङे, आमेन।]’#६:१३ काःजे ग्रीक तामगीइ तोःङ्गीइ कोन्ज्योइ छेला दीखो बो म्याः।
14ख्योइ वीरुद्धला लाःयो पेःगेन्दीला क्षमा पेःसी लाःना नाःम्खालीङला तेःकेन ख्योइ आबा कोन्ज्योइयाङ ख्योक्याला क्षमा तेर्केन एः। 15इःनाङ ख्योक्याइ राःङ्साला क्षमा माःबे लाःना ख्योक्याइ आबा कोन्ज्योइयाङ ख्योक्याइ लाःयो क्षमा मेःबेगेन एः।
खा चाङ्मा तेःकेन बारेला लोप्क्योक
16खा चाङ्मा तेःकासुना खोक्नाकक्याइ च्योःङ्रा पेःदी ख्योक्या छेन्दा नाःक्पु माःजो। खोक्नाकक्या नी खा चाङ्मा तेःती एः लाःती राःङ्साला तेङ्जेला छेन्दा नाःक्पु जोदी तेःकुए। तेःन्दामरा ङाः ख्याक्याला लाःके, खुङक्याइ ज्योर्कोःन्दी इनाम ज्योर्सीःङ्दी एः। 17इःनाङ ख्योदी खा चाङ्मा तेःकासुना तोःङ्बा ठुदो ओःले गोला माःर्कु टुःल्दी तेः। 18एःन्डु पेःगासुना मीःक्याइ मीःङे, इःनाङ मीःक्याइ मेःथोङेन ख्योइ आबा कोन्ज्योइ चीग्रा ख्यो खा चाङ्मा तेःक्योक थोङेन एः, ओःले ख्योइ खाजुम्माले पेःक्योक लेःगा थोङेन ख्योइ आबा कोन्ज्योइ ख्योला इनाम तेर्केन एः।
नाःम्खालीङगीइ नोःरक्युःक्या
(लुका १२:३३-३६; १६:१३)
19राःङगीइ लागी साजाम्बुलीङला नोःर क्युःक्या रुःप माःजो। दीला रुःप जोक्योक नोःर क्युःक्याला नी बु क्याःप्क्योइ, चाइ साःउए ओःले कुमेनगीइ कुउए। 20बरु राःङगीइ लागी नाःम्खालीङलारा नोःर क्युःक्या रुःप ज्योदो। ओःला रुःप जोक्योक नोःर क्युःक्या नी बुङ मेःक्यापए, चाइयाङ मेःसाए ओःले कुमेनगीइयाङ मीकुए। 21चीलेलाःना काःला ख्याक्याइ नोःर क्युःक्या एःपा, ओःलारा ख्याक्याइ सेमाङ ओःङ्गुए।
22जुबुइ छेमीदी मी इःङे। मी याःबु एः#६:२२ मी याःबु एः यहुदीक्याइ लागी “मी याःबु एः” लाःक्योकदी खुङक्याइ राःङ्सा मीःक्याला नीङ च्योःउए लाःक्योक इःङे। ओःन्डुलेरा “मी माःइबा एः” लाःक्योकदी खुङक्याइ राःङ्सा मीःक्याला ताःम्बु सेम पेःउए लाःक्योक इःङे। लाःना थाम्जेर जुबु साङ्बु ओःङ्गुए। 23इःनाङ ख्याइ मी माःइबा एः लाःना थाम्जेर जुबु नाःक्पु ओःङ्गुए। ओःन्डुलेरा ख्याइ सेमला एःक्योक साङ्बुदी नाक्जुक काःल्सी लाःना ओःखो ताःरुङ काःजे नाक्जुक ओःङ्डो!
24काःन्दीङ लाबुइदी ङीथाल ताःक्पुक्या ओःङ्मीःखुए, चीलेलाःना खुङगीइ चीगला हेला पेःउए ओःले राःङ्साला च्याःम्बु पेःउए, की खुङगीइ चीगकीइ लाःक्योक ङीःन्गुए ओःले राःङ्साइ लाःक्योक मीःङीन एः। ओःन्डुलेरा ख्योक्याइयाङ कोन्ज्यो ओःले नोःर ङीक्कारकीइ लेःगा थाङ्मा चीगलारा पेःमीःखुए।
तुःङाल पेःजे मेःयुङे
(लुका १२:२२-३१)
25ओः सोङ्गारा, ङाः ख्याक्याला लाःके, सेन्जेइ लागी ‘ची साःगा ओःले ची थुङ्गा’ लाःती ओःले राःङगीइ जुबुइ लागी ‘ची केःङ्गा’ लाःती तुःङाल माःबे। ची मीःजी साःगेन स्याः भन्दा ओःले जुबु केःङेन केःला भन्दा छ्योम्बो मीःङे रा? 26च्याःज्युङ्माक्याला तादो, खुङक्याइ ना सेन ताप्कुबा, ना डु तुःदी योःङला ज्याउबा, इःनाङ ख्योक्याइ नाःम्खालीङला तेःकेन आबा कोन्ज्योइ ओःखोक्याला साःजे तेर्कुए। ची ख्योक्या ओः च्याःज्युङ्माक्या भन्दा माःङ्बु रीःनगीइदी म्याःपा रा? 27ख्योक्या नाःङ्ला सुइयाङ तुःङाल पेःदी राःङगीइ छे तीबी चीग रीःङ्बु जोजे खुउबा रा?
28ओःले ख्योक्या चीले केःङेन केःलाइ लागी तुःङाल पेःउबा? रीःइ लीली मेःन्दोक्या छार्क्योक तादो, ओःखोक्याइ लेःगाङ मेःबेए, केःङ्जेला केःलाङ मेःथाए। 29इःनाङ ङाः ख्योक्याला लाःके, सोलोमन क्याःल्बुइ ओःजेइ नोःर क्युःक्या एःकासुनाङ खुङ ओः मेःन्दो चीगकीइ चेङ छेदी म्याःके। 30तीःरीङ एःकेन्दी ओःले ङार्तो मेःला सातेर्केन मेःन्दोइ चाला नी कोन्ज्योइ एःन्डुले छेदी ज्याउए लाःना, ची खुङगीइ ताःरुङ माःङ्बु पेःदी ख्योक्याला मेःज्याबा रा? ख्योक्याइ सेमल्हुक खोइ ले?
31ओः सोङ्गारा, ची साःगा, ची थुङ्गा ओःले ची केःङ्गा लाःती तुःङाल माःबे। 32आबा कोन्ज्योला सेमल्हुक मीलुगेन राःङ्सा क्युःपाक्याइ का एःन्डुबा तुःङाल पेःउए। दी थाम्जेर ताम ख्योक्याला कोःउए लाःती नाःम्खालीङला तेःकेन आबा कोन्ज्योइ सेदी एः। 33इःनाङ तोःङ्ला कोन्ज्योइ क्याःल्खाप छोल्दो ओःले खुङगीइ आज्ञाक्या ङीःन्दो, ओःले खुङगीइ दी थाम्जेर ताम ख्योक्याला पाःतेर्केन एः। 34ओः सोङ्गारा, ङार्तोइ लागी तुःङाल माःबे, चीलेलाःना ङार्तोइ ङीःमाइ लागी ङार्तोइ राःङगीइ तुःङालरा ओःङेन एः। तीःरीङगीइ तुःक्पु तीःरीङलारा दाङ्जे एः।”
Selectat acum:
मत्ती 6: SYW
Evidențiere
Partajează
Copiază
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fro.png&w=128&q=75)
Dorești să ai evidențierile salvate pe toate dispozitivele? Înscrie-te sau conectează-te
© 2024 (Active), Wycliffe Bible Translators, Inc. All rights reserved.