Luka 4
4
Iysanıń sınalıwı
(Mat 4:1-11; Mrk 1:12-13)
1Iysa Muxaddes Ruwxqa tolıp, Iordan dáryasınan qaytıp kelgende, Ruwx Onı shól dalaǵa alıp bardı. 2Sol jerde shaytan Onı qırıq kún sınadı. Ol bul kúnleri hesh nárse jemedi. Sol kunler ótkennen soń, aqırı ash boldı.
3Sonda shaytan Iysaǵa:
– Eger Sen Qudaydıń Ulı bolsań, mına tasqa buyır, ol nanǵa aylansın, – dedi.
4Iysa oǵan juwap berip:
– «Adam tek ǵana nan menen jasamaydı»#Luk 4:4 Bazı qoljazbalarda al Qudaydıń hár bir sózi arqalı degen sózler de bar. #4:4 Nzm 8:3., – dep Muxaddes Jazıwda aytılǵan, – dedi.
5Sonda shaytan Iysanı bir biyik jerge shıǵardı da, Oǵan bir demde dúnyanıń barlıq patshalıqların kórsetip, 6Oǵan:
– Men usı mámleketlerdiń pútkil biyligin hám olardıń sán-saltanatların Saǵan beremen. Óytkeni olar maǵan berilgen, olardı qálegen adamıma beremen. 7Eger maǵan tabınsań, hámmesi Seniki boladı, – dedi.
8Iysa oǵan juwap berip:
– Muxaddes Jazıwda: «Qudayıń Jaratqan Iyege sıyınıp, tek Oǵan xızmet et»#Luk 4:8Muxaddes Jazıwda – Bazı qoljazbalarda bul sózdiń aldında Joq bol, shaytan! degen sóz de bar. #4:8 Nzm 6:13., – dep aytılǵan, – dedi.
9Sońınan shaytan Iysanı Erusalimge aparıp, Ibadatxananıń tóbesine turǵızıp qoydı da, Oǵan:
– Eger Sen Qudaydıń Ulı bolsań, Ózińdi bul jerden tómenge tasla, 10sebebi bılay dep jazılǵan: «Ol perishtelerine Seni saqlap qalıwǵa buyrıq beredi. 11Ayaǵıńdı tasqa urıp almawıń ushın, olar Seni qollarında alıp júredi»#4:10-11 Zab 90:11-12., – dedi.
12Iysa shaytanǵa:
– «Qudayıń Jaratqan Iyeni sınama!»#4:12 Nzm 6:16., – dep aytılǵan, – dedi.
13Shaytan hámme sınawların tamamlaǵannan keyin, waqıtsha Iysanıń qasınan ketti.
Iysanıń Galiladaǵı wazı
(Mat 4:12-17; Mrk 1:14-15)
14Muxaddes Ruwxtıń kúshine tolǵan Iysa Galilaǵa qaytıp keldi hám Ol tuwralı xabar pútkil dógerekke tarqadı. 15Iysa olardıń májilisxanalarında tálim berdi hám Ol hámme adamlar tárepinen alǵıslandı.
Nasıralılardıń Iysanı qabıl almawı
(Mat 13:53-58; Mrk 6:1-6)
16Iysa Ózi ósken Nasıra qalasına kelip, Óz ádeti boyınsha Shabbat kúni májilisxanaǵa kirdi. Iysa oqıw ushın ornınan turǵanda, 17Oǵan Iyshaya payǵambardıń kitabı berildi. Ol kitaptı ashıp, mına sózler jazılǵan jerdi taptı:
18-19«Jaratqan Iyeniń Ruwxı Meniń ústimde.
Ol Meni jarlılarǵa Xosh Xabar járiyalaw ushın mayladı#4:18-19 Mayladı – Qudaydıń tapsırǵan jumısı ushın maylanıp, tayınlanıw.#Luk 4:18-19 Bazı qoljazbalarda mına sózler de bar: Meni jaralı júreklerdi emlew ushın jiberdi.
Ol Meni tutqınlardıń azat bolatuǵının,
Soqırlardıń kóretuǵının xabarlawǵa,
Azap shekkenlerdiń erkinlikke shıǵıwı ushın hám
Jaratqan Iyeniń miyrimlilik jılın járiyalaw ushın jiberdi»#4:18-19 Iysh 61:1-2..
20Sońınan Iysa kitaptı jawdı da, onı xızmetkerge berip, ornına otırdı. Májilisxanadaǵı hámme adamlar Oǵan tigilip qaldı. 21Iysa olarǵa sóyley baslap:
– Usı Muxaddes Jazıwlar búgin, sizler esitken waqıtta orınlandı, – dedi.
22Hámme Iysanı maqtadı hám Onıń awzınan shıqqan jaǵımlı sózlerge hayran qalısıp:
– Bul – Yusuptiń balası emes pe? – desti.
23Iysa olarǵa bılay dedi:
– Sizler, álbette, Maǵan: «Shıpaker, ózińdi óziń emle», – degen naqıldı aytıp, «Bizler Kaparnahumda islegen isleriń haqqında esittik. Bul jerde, Óz ana jurtıńda da solardı isle!» – demekshisizler. 24Iysa dawam etip: – Sizlerge shının aytaman: hesh bir payǵambar óz watanında qabıl alınbaydı. 25Sizlerge haqıyqatın aytaman: Iliyas payǵambardıń zamanında úsh jıl, altı ay aspan jawılıp, jawın bolmay, elde awır asharshılıq bolǵanda, Izrail elinde kóp jesir hayallar bar edi. 26Biraq Iliyas olardıń hesh birewine jiberilmey, tek Sidon eliniń Sarafat qalasındaǵı bir jesir hayalǵa jiberilgen edi#4:25-26 3Pat 17:1-24.. 27Sol sıyaqlı, Elisha payǵambardıń zamanında da Izrailda teri keselligine shalınǵanlar kóp edi. Biraq, tek siriyalı Naamannan basqa hesh kim awırıwınan jazılǵan joq#4:27 4Pat 5:1-14., – dedi.
28Bunı esitken májilisxanadaǵılardıń barlıǵı qattı ashıwǵa mindi. 29Orınlarınan turıp, Iysanı qaladan quwıp shıǵardı da, Onı tik jardan taslap jiberiw ushın, sol qala qurılǵan tawdıń basına alıp bardı. 30Biraq Iysa olardıń arasınan ótip, Óz jolına tústi.
Iysanıń jindi quwıp shıǵarıwı
(Mrk 1:21-28)
31Iysa Galiladaǵı Kaparnahum qalasına keldi hám Shabbat kúni xalıqqa tálim berdi. 32Xalıq Iysanıń tálimine tań qaldı, sebebi Onıń sózinde biylik bar edi.
33Májilisxanada jinge shalınǵan, jawız ruwxlı bir adam bar edi. Ol bálent dawıs penen baqırıp:
34– O, nasıralı Iysa! Bizler menen ne jumısıń bar? Sen bizlerdi joq etiwge keldiń be? Seniń kim ekenińdi bilemen, Sen – Qudaydıń Muxaddesiseń! – dedi.
35Iysa oǵan keyip:
– Únińdi óshir de, onnan shıǵıp ket! – dedi.
Sonda jin hámmeniń kóz aldında adamdı jerge qulattı da, hesh zıyan tiygizbey, onnan shıǵıp ketti.
36Hámme tań qalısıp, bir-birine:
– Bul ne gáp? Ol jawız ruwxlarǵa biylik hám qúdiret penen buyrıq bergende, olar shıǵıp ketedi, – desti.
37Solay etip, Iysa tuwralı xabar sol úlkedegi barlıq jerlerge jayıldı.
Iysanıń kóp adamlarǵa shıpa beriwi
(Mat 8:14-17; Mrk 1:29-34)
38Iysa májilisxanadan shıǵıp, Shimonnıń úyine bardı. Shimonnıń qáyin enesiniń qattı ıssılıǵı kóterilip, awırıp jatırǵan edi. Olar Iysadan onı kóriwdi ótinish etti. 39Iysa hayaldıń bas ushında turıp ıssılıqqa tıyım salǵanda, hayaldıń ıssılıǵı tústi. Hayal dárriw ornınan turıp, olarǵa xızmet etti.
40Quyash batarda hámme hár túrli keselliklerge shalınǵan adamların Iysaǵa alıp keldi. Iysa olardıń hár biriniń ústine qolın qoyıp, shıpa berdi. 41Kóp adamlardan jinler shıǵıp baratırıp: «Sen – Qudaydıń Ulısań!» – dep baqıratuǵın edi. Biraq Iysa olarǵa keyip, sóylewge tıyım saldı. Óytkeni olar Onıń Masiyx ekenin biletuǵın edi.
Iysanıń májilisxanalarda waz aytıwı
42Tań atqanda Iysa úyden shıǵıp, awlaq jerge ketti. Xalıq Onı izlep qasına keldi hám ózlerin taslap ketpewi ushın, Onı alıp qalmaqshı boldı. 43Biraq Iysa olarǵa:
– Qudaydıń Patshalıǵı tuwralı Xosh Xabardı basqa qalalarda da járiyalawım kerek, sebebi Men sol ushın jiberilgenmen, – dedi.
44Solay etip, Iysa Yahudiyadaǵı májilisxanalarda waz aytıp júrdi.
Selectat acum:
Luka 4: QrqMK22
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Институт перевода Библии, 2022
