Mateu 2
2
At Mamatanganan fag ngay Taw Nanansibo Isus
1Isus ansalug sis furuan Betleem sis talun Udea, gina Erudes gfunan. Ay abandi, sik ngay mamatanganan fag taw siginans fakamenitan fag talun andasug sas furuan Erusalem ay ginto te, 2“Dada manga at kinsalug fag ngay taw Udyu at fun? Aroro nalag ami kafag fun at galeme gina ami sis fakamenitan fag talun. Ay katsi, andasug ami stie laman nanseg anya.”
3Ay fun Erudes nu nadungug katanya, gafanawa, ay anggan fagayu taw sis furuan Erusalem gafanawa yangay. 4Ay fun Erudes nafaful fagayu taw Udyu at ngay fun tagfon fanggalangun ay at ngay tagfoyung Muisis at Faugali ay nainto te, “Inda Dius at nafili fag Fun#2:4 Dius at nafili fag Fun: sas Griegu, Kristu. nu kasalug?”
5Ay kafag ngay taw Udyu gbalus anya te, “Sis furuan Betleem sis talun Udea. Aroro katatuy Dius at taglong ebi at rirukan te,
6‘O wan Betleem sis talun Udea,
o tua at tiba tungud fag furuan sis fagdaul talun Udea,
aroro siginan emu umsure ban sik Fun,
at namagtainan ban ku ngay taw Israel.’ ”#2:6 Mikas 5:12.
7Ay fun Erudes gsuksuk nafaful kafag mamatanganan fag ngay taw ay ginto te, “Ginain wan nu nsure ay nalag fag galeme?” 8Ay kanya nasugu anya fagayu sas Betleem, ay nalong te, “Nanrvbvy am fia kafag sisian. Ay nu nalag am anya, foyungi yap angku, laman anggan au nanlag kyangay ay nanseg anya.”
9Ay kafag ngay mamatanganan fag taw nu nadungug kafag fun at longan, nalo wan. Ay arodi kafag galeme at nalag ebi sis fakamenitan fag talun, naguna wa anya ay anragang sa kafag sisian at tungud bale. 10Ay kafag ngay mamatanganan fag taw maksvn nu guseganan nu nalag kafag galeme. 11Ay nu nasakbo wan sanya fag bale, ay nu nalag kafag sisian ay anggan at mina Maria, kanya fagayu namalub sasad salug ay gseg kafag sisian. Ay kanya nafaduksun at fagsuadan at ramraman, ay nafon sanya fag sisian sik ngay gintu ay ngay famaebebanglu ay anggan ngay lune. 12Ay Dius nasalag kafag ngay mamatanganan fag taw sit taginfan te, “Lag am kafoli sas fun Erudes.” Nu katanya, kanya fagayu nu kafoli sat talun nasaruyan way sa tibak dalan.
Isus at ngay Fagtainan Nantaban Anya sas Talun Igiptu
13Ay kafag ngay mamatanganan fag taw nu nalo wan, tam Fun at tagbarita at sadi ansure sas Use sit taginfan ay glong anya te, “Afuloi wan, ay tabani masakit am talanak sas talun Igiptu. Ay sanyai yap gugat yakmay au gdog nalong emu. Aroro fun Erudes grvbvy ay ngenge laman namabul.”
14Ay ginanya Use anfulo ay nataban at talanak ginanya yay fag yabi ay nalo sas talun Igiptu. 15Ay talanan gbanwan yay sanya yakmay fun Erudes anbul, laman gfafasludan tam Fun at longan ebi ataw siginan at taglong te, “Nauro au ku baguama siginans talun Igiptu.”#2:15 Usea 11:1.
16Ay fun Erudes nu nasaful te, kanya fag ngay mamatanganan fag taw nadaya way mangaro anya, kanya maksvn nu kadotama. Ay kanya nasugu laman namabul fagayu munama siginan bagu kasalug sitsigon duak banwa sis furuan Betleem ay anggan sit ligung fag ngay talun gfaning kafag ngay mamatanganan at nafoyung te, kadugenya kafag galeme nu kasure. 17Ay at fakamulun katanya nafafasludan Dius at taglong Eremyas ebi at longan te,
18“Andungug sik taw tagwayway sis furuan Rama.
Maksvn at fakabaluun.
Rakel gwayway aroro sat ngay sisian,
ay kanya wa kaylat nu e gfasun anya,
aroro at ngay sisian anbul wan.”#2:18 Eremyas 31:15.
At Fagnoliun siginans Talun Igiptu
19Ay fun Erudes nu nbul wan, tam Fun at tagbarita gdog yay ansure sas Use sit taginfan gina sis Igiptu, ay glong anya te, 20“Afuloi wan ay tabani am talanak sas talun Israel, aroro katsi anbul wan at ngay tagyafabulun ay ngenge.”
21Ay Use anfulo ay nataban at talanak ay anfoli sas talun Israel. 22Ay Use fagnasaful di te, fun Erudes at baguama Arkelaus gfunan wan, kanya kalimu nu nangadasug sanya. Ay Dius nafararang Use sit taginfan ay nu katanya, kanya nalo sas talun Galilea. 23Ay talanan nu ndasug wa sanya, namanwan sa sik furuan at ngayan Nasaret, laman namafasludan Dius at ngay taglong ebi at longan te,
“E gfangayan ban anya sik taw Nasaret.”
Selectat acum:
Mateu 2: OCCT
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Copyright © 2021 by OMF International, Philippines
