Mateu 17
17
Isus at Kawalungan Anbali
Mk 9:2-13; Lk 9:28-36
1Ay nu nlangfe unumk menit, Isus nataban Pedru ay anggan Santiagu ay Uan fag duksay, ay naundaud sa sik buksul ngabat yud e taw. 2Ay Isus at kawalungan anbali gina sit ibama at salubangan, ay at mata masulo kata menit. Ay anggan at lanbung at kalaksian, ganinag kata menit nu gyamag. 3Ay sik duama nsure, kanya Muisis ay Elyas, ay gfakamatoan Isus.
4Ay Pedru nalong sas Isus te, “Em Fun, fadi, iste tuami. Nu kaylat tuo, nangawat au tuluk balean, at sadi sa emu, ay at sadi sas Muisis, ay at sadi sas Elyas.”
5Ay gina Pedru garingang, sik linyabu masulo nasuklub anya fagayu. Ay sanya ginan sad linyabu e naringang te, “Kanya wan ku fakesugun ku Baguama. Maksvn nu guseganan au anya. Dungugani anya.”
6Ay kafag tuluk tagadal, nu nadungug kafag longan, namalub at kaksvnan nu kalimu. 7Ay Isus ankakbang sanya fag tuluk tagadal ay nafatayuk at daluap sa anya ay nalong te, “Malindugi wan, lag kalimu.” 8Ay kafag tuluk tagadal nu nadama, we lagan ya duama, Isus way lang.
9Ay gina Isus ay at tuluk tagadal gtagbung, Isus nalong anya te, “Lag yap gfoyung sa tibak taw ay nalag yakmay ban ku Mama nafadog nafaleleg angku, Taw at Baguama.”
10Ay kafag tuluk tagadal nainto sas Isus te, “Nataw at masuad, ngay tagfoyung Muisis at Faugali at fagnalongun te, Elyas fag taglong gguna ban kadasug?”
11Ay Isus gbalus anya te, “Matuyan, Elyas umdasug laman namalganan nusnge wain. 12Ay glong au ayu te, Elyas andasug wan, dewa katanya, ngay taw wa natoglag anya. Ay kafag ngay taw at fakamulun sa anya gfaning way at ngay sadili fakaylatun. Ay katanya yangay, kanya ban fagayu namaurianan angku, Taw at Baguama.” 13Ay arodi vtv at ngay tagadal nasaful te, Isus at longan sabaliwas Uan Tagfasurung.
Isus Nafafia sik Baguama ke Mauri fag Falad
Mk 9:14-28; Lk 9:37-42
14Ay Isus ay at tagadal fag tulu anfoli sa sangay taw. Ay sik mangama nkakbang sas Isus ay natudan ay get sa anya te, 15“Ku Fun, afanyui ku baguama, aroro kanya glayun nu gfatfat ay maksvn nu gidapan. Ay ngayu ginan nu kasale sasad afuy ay anggan nu katong sasad lino. 16Ay nataban koma anya sam ngay tagadal, ay kanya wa mafafia.”
17Ay Isus nabalus te, “Sik ngay taw wayam at yud gafanud ay at yud mamatanganan. Seduge ya ban nu gbanwan au si ayu ay nu gagwantan au galo ayu? Agvd, kin, tabani stie.” 18Ay Isus nagras kafag mauri fag falad ay kafag falad naubun kanya fag baguama, ay arodi nfia wan.
19Ay gina yud sanya tibak taw, at ngay tagadal nanangakbang sas Isus, ay nainto anya te, “Wain manga ami em fagyudun mafafaiyan kafag mauri fag falad?”
20Ay Isus nabalus anya te, “Aroro alay way ay fagafanudun. Ay matuyan nu glong au ayu te, ay fagafanudun dewa kadaul sik rigrig burarad, malong am ste fag buksul te, ‘Alini wan sanya ginan,’ ay kanya galin. Ay mafafakamulun am nusnge wain.” 21[Dewa katanya, mafaiyan am takatanya fag falad at mauri siginan way langs darangin ay nu yud gfangon.]
Isus Gdog yay Nafoyung sabaliwa nu Kabul Ban
Mk 9:30-32; Lk 9:44,45
22Ay kaduge at ngay tagadal maful sis talun Galilea, Isus nalong anya fagayu te, “E namoyung ban angku, Taw at Baguama, sat mauri fag ngay taw. 23Ay kanya fagayu gfabul ban angku, ay si bans fatuluk menit, e gfadog yay ban gfaleleg angku.” Ay at ngay tagadal nu nadungug takatanya, maksvn nu kabalu.
Famonun sas Dius at Bale
24Ay Isus ay at ngay tagadal andasug sas Kapernaum. Ay sanya sik ngay tagbul famayad siginan sangay taw laman sas Dius at bale. Ay kafag ngay tagbul nanangakbang sas Pedru ay nainto te, “O ay takamoyung gfon ngawan at famayad laman sas Dius at bale?”
25Ay Pedru nabalus te, “Sabv.”
Ay Pedru nu ndasug sat bale, Isus nainto anya te, “Simun, nu gamatangan o, sinu tagfon famayad sas fun? O kafag fun at ngay taw? Ay mannga tibak talun at ngay taw kafag fun at nababo ebi ataw?”
26Ay Pedru nabalus te, “Tibak talun at ngay taw.”
Ay Isus nalong te, “Nu katanya, kafag fun at ngay taw wa gfon famayad. 27Ay dewa katanya, laman ro ngay taw di kauri anta, loi wan sas tigyangan lino ay fasai sad lino am fambis. Ay taguna fag albon am nagamat, suangi at bibig ay lumag ro wo sik salapi, ay foni kanya fag salapi sanya fag ngay taw laman ta famayad.”
Selectat acum:
Mateu 17: OCCT
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Copyright © 2021 by OMF International, Philippines
