Mateu 18
18
Tagtungud Ban sis Dius at Fagfagtainanan
Mk 9:33-37; Lk 9:46-48
1Ay ginanya Isus at ngay tagadal nangakbang sa anya ay ginto te, “Sinu at tagtungud sis Dius at fagfagtainanan?”
2Ay Isus nagewan sik sisian sirut ay nafalindug sit ngay tagadal at wabilug. 3Ay Isus nabalus te, “Matuyan nu glong au ayu te, nu dway am natubus ay ugali ay umkata ngay sisian, wa ban am manangatap sas Dius at fagfagtainanan. 4Nusnga sinu takamababaun katatuy fag sisian, kanya wan tagtungud sis Dius at fagfagtainanan. 5Ay nusnga sinu takaylat takata tuy fag sisian, aroro kesug angku, kaylat yangay angku. 6Ay nusnga sinu tagfae asalanan sik sisian sirut tagafanud sa angku, amasine yap sa anya nu e gsiuk at liug sa sik fanligis trigu fag gang ay nu gukas sasad fagngabasadan dagat.
E Gfae Asalanan Ban
Mk 9:42-48; Lk 17:1,2
7“Ida ste swa daga fag ngay taw, aroro e ngay famaskud laman gasalanan. Ay matuyan, umdasug ban takatanya, ay ida nusnga sinu tagfae asalanan at iba.
8“Am daluap ay am darafa nu gfae asalanan way emu, gatvngi wan ay ukasi. Aroro amasine yap dewa sadi am darafa ay am daluap nu e leleg tua ngap ban o at yud e fakatabuan, dewa ngap dua am daluap ay am darafa, nu gaukasan way ban o sas afuy daul yud ban karabung kabavn. 9Ay am mata nu gfae asalanan yangay emu, guladi wan ay ukasi. Aroro amasine yap dewa sadi am mata, nu e leleg tua ngap ban o at yud e fakatabuan, dewa dua am mata nu gaukasan way ban o sas afuy daul.
Isus at Faydayuanan sabaliwa Sik Tupa at Nalyam
Lk 15:4-7
10“Amatangani laman diam kauri dewa tuy way fag ngay sisian sirut, aroro glong au ayu te, tuy fag ngay sisian e tagbarita tua taglag ku Mama sis banwa at mata. 11Au, Taw at Baguama, ku fagindasugun laman namalangfe au at nalyam fag ngay taw.
12“Ay tain nu gamatangan am sabaliwa sik taw nu e sik sandank tupa, ay at sadi nu nalyam? At fakamulun ro, gubun yay at siamk safulu e siam sanya sangay buksul ay glao laman nanrvbvy at nalyam. 13Ay kanya nu nalag wan, matuyan nu glong au ayu te, kanya nu guseganan sanya fag sadi, gtungud yay sas siamk safulu e siam at yud nalyam. 14Katanya yangay, ay Mama sas banwa wa kaylat nu e kalyam nusdi sadi tuy fag ngay sisian sirut.
Masine nu Gfalyam tuo am Iba at Asalanan sa Emu
15“Am iba nu e asalanan sa emu, namakamatoani way fia anya. Ay kanya nu kaylat tua am longan, nanfaduksayan tua ban o anya kata ebi ataw. 16Ay kanya nu dway gdungugan emu, tabani sadi ay mannga duak taw ay kamatoani anya laman nanfatuyan am longan siginan dua ay tuluk taw. 17Ay sanya ginan nu dyay gdungugan emu, fasafuli sas Dius at ngay taw. Ay nu dyay gfaning kanya fag ngay taw, tuyani anya te, kanya kata way sik taw at yud natoglag Dius ay kata sik tagbul famayad laman sas fun.
18“Ay matuyan nu glong au ayu te, nusnga setaw ay fagsalagun ste swa daga, anggan Dius sis banwa gsalag yangay. Ay nusnga setaw ay fagsuguun ste swa daga, anggan Dius sis banwa gsugu yangay.
19“Ay glong kyangay ayu te, duak taw ste swa daga nu gdiuganan tua get sa ku Mama, ku Mama sas banwa gfon anya at fagetun. 20Aroro nusnga nday at maful dewa duak taw ay tuluk taw nu gseg tua angku, sanya kyangay sit wabilug.”
Isus at Faydayuanan sabaliwa sik Fagsuguan at yud Gfalyam at Iba at Bedan
21Ay Pedru ankakbang sas Isus ay nainto anya te, “Ku Fun, seyu ginan kro gfalyam ku iba nu e asalanan way sa angku? O fitu ginan?”
22Ay Isus nabalus anya te, “Bundi fitu ginan. Fituk safulu e fitu tua ginan nu gfalyam o am iba at asalanan.
23“Nu katanya, Dius nu gfagtainan kata yangay sik fun nu kaylat at ngay fagsuguan nu gbayad sa anya at ngay bedan. 24Ay kafag fun gina gfasigad gtap ngay taw at bedan, e nataban sa anya at sadi at fagsuguan tangayu at bedan. 25Ay kafag fagsuguan wa mafabayad takayu nya, ay at fun nasugu tiba te, ‘Faebayadi wan kafag taw ay at talnayan ay anggan fagayu at ramraman, laman at nagbulan famayad at bedan.’
26“Ay kanya fag fagsuguan namalub ay gfainfanyuan te, ‘Anin ngatu, foni yap angku sik buknga, ay namayad kyay ban fagayu ku bedan sa emu.’
27“Ay at fun anfanyu at fagsuguan ay nafalyam wan at bedan fagayu ay nafauli wan.
28“Ay kanya fag fagsuguan nalo wan, ay kaduge glao, kanya nalag yangay sik fagsuguan at ke bedan sa anya. At bedan sik sandank salapi. Ay at nafabedan fag fagsuguan nagamat ay gfasnul anya ay glong te, ‘Bayadi wan am bedan!’
29“Ay at ke bedan fag fagsuguan namalub ay get te, ‘Anin ngatu, foni yap angku sik buknga, ay namayad kyay ban ku bedan sa emu.’
30“Ay at fagbedanan fag fagsuguan wa kafafanya ya. Ay naubung wan at usama, ay ya gfalfas yakmay nafabayad at bedan. 31Ay tibak fagsuguan nu nalag kanya fag fagsuguan at fakamulun, ankuri. Ay kanya fagayu nalo wan ay nanamoyung sat fun at kinfasludan.
32“Ay kafag fun nafakbang kafag fagsuguan ay nagras anya te, ‘Mauri wayo fag fagsuguan. Newa au nafalyam ktua am bedan aroro nafainfanyuan o angku. 33Anfanyu tuo nangus am usama fag fagsuguan kata nu nfanyu au emu.’ 34Ay kafag fun andotama maksvn ay nafataban anya sa sangay tagfauri yakmay ban nafafabayad at bedan.
35“Ay katanya yangay ku Mama sas banwa at fakamulun sa ayu nu dway am nafalyam ay faduksay at asalanan sa ayu.”
Selectat acum:
Mateu 18: OCCT
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Copyright © 2021 by OMF International, Philippines
