Mateu 11
11
Isus ay Uan Tagfasurung
Lk 7:18-35
1Ay Isus nu ntabu wan nu gfoyung sat tagadal fag labi dua, kanya nalo sanya ginan laman namoyung sat dayu fag ngay furuan.
2Ay gina Uan maubungan, nadungug sabaliwa Dius at nafili fag Fun#11:2 Dius at nafili fag Fun: sas Griegu, Kristu. at fakamulun, ay kanya nasugu at ngay tagadal, 3laman nanginto sas Isus te, “O o wan ebi at foyungan tagakadasugun? Ay o mannga gfanya yay ban mi?”
4Ay Isus gbalus Uan at ngay tagadal te, “Loi wan ay foyungi sas Uan ay nadungug ay ay nalag. 5Ngay taw yud glag ebi, katsi glag tua, ay ngay yud malao, katsi malao tua, ay ngay tagabangbang#11:5 bangbang: sik fakasaitun sis balat tagfatoglag te, kafag taw wa masine ya magamut sas fagngayuan. katsi anfia tua, ay ngay yud gdungug, katsi gdungug tua, ay ngay kinbul nadog tua naleleg, ay ngay yud e kwa, katsi e nafadungug tua at Masine fag Barita sa anya fagayu. 6Sik taw mauseganan tua nu ddi gaduanun sa angku.”
7Ay Uan at ngay tagadal nu nalo wan, Isus gfasigad gfoyung sa sangay taw sabaliwas Uan te, “Wain ro ay fagnaloun sas talun at yud e taw? Nataw ya ay fagyalagunun sanya? O kaylat am nanlag sik sigbo, tagmara at fagfauyusun? 8Ay nu bunyay kanya ay fagyalagunun, nataw ya fia ay fagyalagunun sanya? O kaylat am nanlag sik taw at ke lanbung at maksvn nu masine? Takatanya fag taw nu gbanwan sa tua tiba tungud fag fun at bale. 9Ay nu bunway kanya, nataw ya ay fagyalagunun? O kaylat am glag Dius at taglong at sadi? Ay kin, nu katanya, glong au ayu te, Uan gtungud tua tibak taglong. 10Kanya wan Dius at nafoyung sit Rirukan ebi te,
‘Gsugu kban ku fagsuguan laman at nangguna emu.
Ay kanya ban namalganan am dalan.’ #11:10 Malakyas 3:1.
11Matuyan nu glong au ayu te, ya batang e nsalug tagtungud tua Uan Tagfasurung. Ay dewa katanya, nusnga sinu tiba daga sis Dius at fagfagtainanan, kanya gtungud tua Uan. 12Ay siginan Uan Tagfasurung nu nanfamoyung dasug katsi, Dius at fagfagtainanan anke maidap siginan tagfangauri fag ngay taw tagugatan gasanyaun ay gfabulun gagoan. 13Aroro Dius at ngay taglong ay anggan Muisis at Faugali, nafoyung sabaliwa Dius nu gfagtainan kaduge Uan yud andasug. 14Nu kaylat tuam gafanud takatanya, kanya wan ay fagsegun takadasug fag taglong Elyas. 15Fagayu am tagdungugan, amatangani tua fia.
16“Dada ro nu gfafaskudanan au katsi fag ngay taw? Kanya fagayu kata way sik ngay sisian tagawean ay at malunggung lang sis fagawean ay gfanguroan sa tiba te,
17‘Dewami gfawang tulali laman gfauseganan ayu, wam gfalelegan ay bilug.
Ay dewami galubad kata nu gwayway, wam gawaywayun.’
18Katatuy ku faydayuanan aro at masuad. Uan nu ndasug e buknga wa gfangon laman gdarangin, ay wa yangay ginum fanlangu. Ay ngay taw kauri anya te, sik mauri fag falad si anya. 19Ay au, Taw at Baguama, gina au ndasug, gfangon ktua ay ginum. Ay ngay taw glong te, ‘Ida, kanya fag taw sik tagfangkumon way ay annanad glanguan, ay gfagadgalangan ngay tagbul famayad laman sas fun, ay anggan tagasalanan.’ Dewa katanya, gtuyan tam te, Dius at fagmamatanganun matuyan siginan at ngay fakamulun.”
Isus Nafararang sa sik ngay Furuan at Yud Naubun at Asalanan
Lk 10:13-15
20Ay arodi Isus nagras sanya fag ngay furuan at ngay taw, aroro dewa ngayu at nafakamulun at madulo sanya, kafag ngay taw wa naubun at ngay asalanan. 21Ay Isus nalong te, “Ida, furuan Kurasin ay furuan Betsaida at ngay taw. Aroro nu sa di ngap furuan Tiru ay Sidun nu gfakamulun au ku nafakamulun sa ayu at madulo, kanya ro fag duak furuan glugo wan nu gubun at ngay asalanan, ay gsulun saku, ay malunggung sis dafug, laman gfalag te, gubun wan at ngay asalanan. 22Ay glong kyangay ayu te, gina ban fanginsafulan asalanan fag menit, gafaurianan am gtungud yay furuan Tiru ay Sidun. 23Ay am fag ngay taw tagbanwan sis furuan Kapernaum, o gamatangan am te, e namabat ban ayu sas banwa? Duan! Nustua e nangukas way ban ayu sa sangay kinbul at talun. Aroro nu nafakamulun kdi at madulo sas furuan Suduma, kata ku fakamulun sa ayu, satu ro kafag furuan sanya yay dasug katsi. 24Ay furuan Kapernaum, glong au ayu te, gina ban fanginsafulan asalanan fag menit, gafaurianan am gtungud yay furuan Suduma.”
Isus Gfafiangalay Antam
Lk 10:21-22
25Ay ginanya, Isus glong te, “Mama, o wan banwa ay fagdaul daga at Fun. Fadi fadi nafasuksuk tuo ku foyungan at masuad sa sangay taw at mamatanganan ay anggan sat ke ngay fagsafulun, ay nafasure tuo ku foyungan at masuad sa takata sik ngay sisian fag taw. 26Anud, Mama, aroro katanya tua am fakaylatun.”
27Ay Isus glong sa sangay taw te, “Ku Mama wan at nafon sa angku fagayu nusnge wain. Au, at Baguama, wa fia e gtoglag angku, ku Mama way lang tagtoglag angku. Ay we taw gtoglag fia ku Mama, nu bunway au way lang, at Baguama. Ay kayu ku fakaylatun gfatoglag ku Mama, anggan kafag taw tumoglag ku Mama.
28“Nusnga sinu am takalufuy ay at ke famubaun mabyat, akbangi sa angku, ay gfafiangalay au ayu. 29Folii sa ayu ku fantungud liug, ay faningi fagayu ku foyungan ayu, aroro mafanyan ktua ay malukme, ay gfafiangalay ayu. 30Aroro wa mabyat ku nafon ayu fag fantungud liug ay magan way ku nafon ayu fag famubaun.”
Selectat acum:
Mateu 11: OCCT
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Copyright © 2021 by OMF International, Philippines
