Mateu 10
10
Isus at Labi Duak Nasugu at Ngayan
Mk 3:16-19; Lk 6:12-16; Fkm 1:13
1Ay Isus nafaful at tagadal fag labi dua, ay nafae fagmabalyananun anya fagayu laman mafaiyan mauri fag ngay falad ay laman mafafia fagayu taw nusnge wain at fakasaitun. 2Ay Isus at labi duak nasugu at ngay ngayan: taguna Simun, at sadi at ngayan Pedru, ay at arian Andres, ay Santiagu ay at arian Uan, Sebedeu at baguama fagdua, 3ay Felipe ay Bartulume, ay Tumas, ay Mateu, sik tagbul at famayad laman sas fun, ay Santiagu, Alfeu at baguama, ay Tadeu, 4ay Simun Maseganama, ay Udas Iskariute, at namoyung ban Isus sat mauri fag ngay taw.
Isus Nasugu at Tagadal fag Labi Dua
Mk 6:7-13; Lk 9:1-6, 10:4-12
5Ay Isus nasugu kafag labi dua te, “Lag am nandalan sas yud Udyu fag ngay taw at talun. Ay lag yangay nandalan sa sangay taw Samarya at ngay furuan. 6Sai yakman ngay taw Israel. Aroro kafag ngay taw kata sik ngay tupa at nalyam. 7Ay foyungi te, ‘Munakbang wan Dius nu gfagtainan taw.’ 8Ay fafiai at ke ngay fakasaitun, ay falelegi at ngay kinbul, ay fafiai at ngay tagabangbang,#10:8 tagabangbang: sik taw at ke fakasaitun sis balat tagfatoglag te, kafag taw wa masine ya magamut sas fagngayuan. ay anggan aiyani ngay mauri fag falad siginans taw. Fakamuluni takatanya ay lag am get famayad, aroro anke fagmabalyananun am yud e famayad. 9Ay lag am gbuba salapi nusdi alay sirut say fagsuadan. 10Ay lag am gasabian nu glo am. Ay lag gfadua ay lanbung, ay lag e lapak ay e tulag, aroro sik taw tagfakamulun e gfon tua sa anya at fagayudanun.
11“Ay nusnga nday fag furuan nu kadasug am, insafuli yap sanya te, ‘Sinu ste at matuyan fag taw?’ Ay nu e nafoyung tua ayu, banwani yap sanya yakmay am nalo sanya ginan fag furuan. 12Ay nu nasakbo am sa sik bale, longi sanya fag ngay taw te, ‘Andasug wa sa ayu fagmasineun.’ 13Ay sanya fag bale at ngay taw nu gfasakbo tua ayu, darangini laman Dius gfae fagmanabayanun anya fagayu. Ay nu dway gfasakbo ayu, Dius at fagmanabayanun kafoli sa ayu. 14Ay nusnga sinu nu dway gfasakbo ayu ay nu dway kaylat gdungugan ay foyungan, nu glo am sanya ginan fag bale, ay sanya ginan fag furuan, fagfagi tagsi ay darafa fag lukbu, laman famasaful te, kafag ngay taw wa gfaning. 15Ay matuyan nu glong au ayu te, gina ban fanginsafulan asalanan fag menit, kafag ngay furuan gafaurianan gtungud yay furuan Suduma ay Gumura.
E Nanfauri ban ngay Tagafanud
Mk 13:9-13; Lk 21:12-17
16“Katsi gsugu au ayu kata sik ngay tupa sas wa idu talun. Ay am, mamatangani tua kata ule nu mamatanganan, ay katai yangay sik labikung nu magup. 17Ay madiriani tua sa sangay taw, aroro tumaban ayu sa sangay taw Udyu at ngay fagtainan ay gfalang ayu si sangay bale fakafulan. 18Ay e tumaban yangay ban ayu sat ngay afud talun at ngay fun ay sat ngay fun, aroro gafanud am sa angku. Ay ginanya ban mafafamoyung am sabaliwa angku sa kafag ngay fun ay sas yud Udyu fag ngay taw. 19Ay nu nataban ban ayu, lag am gafanawa te, tain siring ay longan, ay nataw ay foyungan. Aroro ginanya ban e gfamatanganan ayu sik longan at masine, laman ban e foyungan tuam sanya fag ngay taw. 20Aroro bunwa ban am tagaringang, nu bunway ay Mama tua ban at Masine fag Falad tagaringang sa ayu.
21“Ay sik taw ban nantaban at faduksay sa tibak taw laman namabul. Ay katanya yangay ban sik mama at fakamulun sat sisian. Ay sik sisian ban kamabo at fagtainan laman namabul. 22Ay ginanya ban fag ngay menit, fagayu ban taw kauri ayu, aroro gafanud am sa angku. Ay dewa katanya at namabakvd sat fagafanudun sitsigons fakatabuan umlangfe tua ban. 23Ay sik furuan at taw nu gfauri way ayu, lagyui sat fadogan fag furuan. Aroro matuyan nu glong au ayu te, ya ban am nadasug ngay taw Israel at ngay furuan tiba, au, Taw at Baguama, yakmay kban andasug.
24“We tagadal tagtungud at takamoyung. Ay we fagsuguan tagtungud at tagfayafun. 25Sak wan sik tagadal nu nkata wan at takamoyung, ay sak wan sik fagsuguan nu nkata wan at tagfayafun. Ay nu e nafangayan sik fagyafunan at fun te, Lango at Fun,#10:25 Lango at Fun: sas Griegu: Beelzebul, Satanas at ngayan at sadi. kaugat wan at ngay fagsuguan nu gafalingunan.
Sinu Tua Tam Fakalimuun
Lk 12:2-9
26“Nu katanya, lag am kalimu kanya fag ngay taw. Aroro fagayu at yud kalag umsure ban, ay fagayu at masuksukan umsaful ban. 27Ay fagayu ku longan ayu sis dulum, longi sis mayamag, ay ku naibugan sa ayu, foyungi laman fagayu taw dumungug. 28Ay lag kalimu tagfabul ay bilug aroro we mafafabul ay falad. Ay fakalimuun at mafamin tua ay falad ay ay bilug sas Afuy Daul. 29O nunda duak maya nu kabayad bunwa sadi wayk salapi? Nusdi sadik maya ya kabul bunyay tam Mama at fakaylatun. 30Ay anggan ay buk, Dius natap wan. 31Ay nu katanya, lag am kalimu, aroro ay kamafanudan gtungud tuam ngay maya.
32“Nusnga sinu tagfoyung sa tiba te, ‘Gafanud au sas Isus,’ gfoyung kyangay ban sa ku Mama sas banwa te, ‘Kanya ku taw.’ 33Ay nusnga sinu yud gfoyung sa tiba te, ‘Gafanud au sas Isus,’ kwa yangay ban gfoyung sa ku Mama sas banwa te, ‘Kanya ku taw.’
Ngay Taw Ginkafudan Aroro sas Isus
Lk 12:51-53
34“Lag am gamatangan te, ku fagindasugun namae fagmanabayanun au ngay taw ste swa daga. Duan. Ku fagindasugun kwa namae fagmanabayanun nu bunway namainkafudan. 35Ku fagindasugun, namabadbaboan au sik talame ay sik talanak, ay sik talmanugang. 36Ay sik taw at fawayan at kalongan yay.#10:36 Mikas 7:6.
37“Ay nusnga sinu takesug angku nu dway gtungud nu kesug at mama ay at mina, wa masine nu gfangayan au anya te, ku taw. Ay katanya yangay nusnga sinu takesug angku nu dway gtungud nu kesug at baguama ay at baguina, wa masine nu gfangayan au anya te, ku taw. 38Ay nusnga sinu at yud gbuba at fasulungan kayu ay nangalo angku, wa yangay masine nu gfangayan au anya te, ku taw. 39Ay nusnga sinu takesug way at leleg, umkalyam way ban at leleg. Ay nusnga sinu tagfon tua at leleg aroro gafanud sa angku, kanya ban e leleg tua kabavn.
Isus at Foyungan sabaliwa sik Taw nu Namul at Masine
40“Nusnga sinu tua takaylat ayu, kaylat yangay angku. Ay nusnga sinu takaylat angku, kaylat yangay at nasugu angku. 41Ay nusnga sinu takaylat tua Dius at taglong aroro kanya Dius at taglong, mul yangay ban at masine, kata sik taglong nu gbul at masine. Ay nusnga sinu tua takaylat at matuyan fag taw aroro siginan at fagmatuyanun, mul yangay ban at masine, kata kafag taw at matuyan nu gbul at masine. 42Matuyan nu glong au ayu te, nusnga sinu at nafon dewa way sik taya mamam sa ku tagadal at yud kaksvn tiba, wa ban kalyam ya at fagnamulun siginans Dius.”
Selectat acum:
Mateu 10: OCCT
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Copyright © 2021 by OMF International, Philippines
