MATIYE 11

Zaŋ Batisi vaŋ kaa sar Yeesu

(Liki 7.18-35)

1Bə minti Yeesu təwaŋ kel gə minti wə a bə wəətiya a *kaa gə guudu hor ciiri ɓasiŋ kəyaŋ, wə kooroŋ bə ɗe a hate daana a waate kel wəra giidə vil də giidə seŋka də Galileŋa. 2Zaŋ Batisi a jəŋ a daŋgaya lam, wə əskəŋ sam joŋre bə minti Kristu bə jəwaŋ, kəya wə vaŋ sərdə kaa gə guudu suru faɗi 3a law ku minti: «Tam haa hulum bə minti a sə a biŋ mo? Jəəne paapaŋ, are məə baalaŋ la mo?» 4Yeesu hərnəy kel minti: «Aŋ ɗee la a waate Zaŋ cəərə karman bə minti aŋ bə usku daana bə əsu 5minti: kaa kə bəwə-bəwiŋ bə ase, kaa kə dəlay bə ɗe, kaa kə fə̃yaŋ seereŋ wəra, kaa kə nəŋkaŋ bə iski, kaa kə mee-meŋ haraŋ wəra dədərgə, kaa kə caacaŋ bə iski *Kel pəsaŋ kəmarwaŋ kə Pepeŋa. 6Waaleŋ kə hulum bə minti taakaŋ de bə guudən gud kel dəna baŋ.»

7Bə minti kaa gə gud Zaŋ kooroŋ anəkay, Yeesu əsəŋ bə waate sam Zaŋa a kaa kə ablaw minti: «Aŋ a ɗeŋ a gole giidə fula haa maa mo? Hulum bə boobo bə minti bə velwe damdi derga ɗoote kas kaŋkaw ana mo? 8Jəəne paapaŋ, aŋ a ɗeŋ a gole haa maa mo? Hulum bə ganə-gene də dəməəmə pasa mo? Kaa gə minti gə ganə-gene də dəməəmə pasaŋ, teŋ ger kəkamnaŋa. 9Aŋ ɗeŋ a gole haa maa tə mo? *Hulum bə jogte ku mini kə Pepeŋ mo? Bədoona gəəzi, ten waataŋ ha'aŋ, wə dəŋaŋ hulum bə jogte ku mini kə Pepeŋ pə ɗaw. 10Zaŋ ha'aŋ hulum bə minti kefter kə Pepeŋ waataŋ wəra cuuru minti: ‹Ten Pepeŋ bə gam hulum bə digi nin yaŋ tiinim na a ɗampam kəkəy warna tiinim na .› 11Gəəzi ten waataŋ: adəwaldə kaa gə minti kəram wəənəy keɗeŋ, hulum bə deŋe Zaŋ boblo jəŋ kəm ba. Ana doloy ɗaw ha'aŋ, hulum bə minti jəəne nuutu adoro ne'-ne'iŋ a *Kumna kə Pepeŋaŋ, wə dəŋaŋ Zaŋ boblo. 12Də ko kə Zaŋ Batisi hãã daynaŋ, kaŋ ɗalte Kumna kə Pepeŋ bə jəw baymele paapa boomə-boome ba, daana mindi mindi mo bə golde də səɓaki a kusru minti tó kele ada. 13Də ana hãã dər *ku gili kə *Moyisiŋ daŋ də kaa kaayaŋ gə jogte ku mini kə Pepeŋ keɗe, də Zaŋ Batisi ada gəm, yə waataŋ kel wəra cəərə *Kumna kə Pepeŋa. 14Aŋ doŋ haa də kel nin neŋ, aŋ bə ase yaŋ minti Zaŋ haa hulum tó bə minti yə məntu *Eliŋ daana bə minti sə a bi. 15Hulum bə minti jəəne də kosoŋ kirka əskiŋ, wə əskə la pisi faɗi!

16«Kaa gə dogoynaŋ, ten ŋərəy la haa də mindi mo? Yə gə ŋarə-ŋere də kəmar koncoŋ gə minti gə əsə-isi a ko bə alumaŋa, yə naakte kuy a kumsi minti: 17‹Are ufnuŋ parway, aŋ hurgunu ba! Are haŋ gudul bə hageŋ, aŋ hagaŋ bə gəm!› 18Bədoona ana, Zaŋ bəŋ, wə hamte anə hərəp-hərəpi ba, wə sete kumuy bə gəm. Aŋ minti: ‹Wə də kəwal cuuru›. 19Ten *Kormə Hulúm bəŋ, ten hame, ten se kumuy. Aŋ minti: ‹Golə hulum toŋ la kəm! Wə də həryəm də kar keɗe, də kumuy gəm. Wə jaa də *kaa kə tope lambaŋ də kaa kə bayməlaŋ ablaw gəm.› Də teŋ keɗe, ase kə Pepeŋ vəɗaŋ wəra pisi ɗeker ha'aŋ gud joŋre nuutu pisiŋa. »

Kaa gə minti bele de haa də kel kə Yeesu baŋ

(Mat. 10.15; Liki 10.12-15)

20Kəya Yeesu əsəŋ bə ji gəbaŋa a kaa gə minti giidə anə vil də minti wə jəətəŋ daŋgeŋ də miɗi nuutuŋ ada gud bə minti yə koloŋ kirki a baymele neeteŋ baŋ. 21Wə minti: «Gəəliŋ nəəti, aŋ kaanə Korazeŋ! Gəəliŋ nəəti, aŋ kaanə Betsaydaŋ! Gud minti miɗi bə minti jəŋ gerdəŋa a jəə la giidə vil də Tira daana Sidoŋ, yə a kəna təraŋ dəməəmə də laaweŋ ne siri, yə a kəna əstəŋ dər koroya bə hage, yə a kəna ayaŋ giidi ne wəra dayday. 22Bədoona ana ten waataŋ, dər hi bə kəətiŋaŋ, Pepeŋ jeme kəəti boblo yaŋ cəərəŋa, dəŋaŋ kə kaanə Tir də Sidoŋ. 23Te, vil də Kapernam, te ɗəkəŋ haa minti Pepeŋ əŋkəy səməy yaŋ warna apəy na mo? Paapa! Wə bəsəy yaŋ wəra a ko kə kaa kə mee-meŋa ɗaw. Gud maa mo, sar miɗi bə minti a jəətəŋ girdiya gilaŋ a jəətə la ger kaanə Sodomaŋ, Pepeŋ a sə a ɓalke vil taŋ wəra ba. 24Haa gud teŋa minti, dər hi bə kəətiŋaŋ, Pepeŋ jeme kəəti boblo yaŋ ciiriya dəŋaŋ kə kaanə Sidoŋ.»

Aŋ bəəda sar Yeesu da, aŋ fele ko bə faakeŋ

(Liki 10.21-22)

25A ko toŋa kəya, Yeesu əsəŋ bə toose, wə minti: «Ten tokɗom Abaŋ, Bərdə ko bə apəyaŋ də ko bə adawraŋ, gud bə minti tam meteŋ kel teŋ wəra dər kaa kə asə-aseŋa daana dər kaa gə minti də ciiriŋa, səma tam vəɗnəy wəra a kəmar koncoŋ. 26Bədoona Abaŋ, teŋ doonom dərəm bə ji bədoona ana.»

27Kəya Yeesu əsəŋ bə waate kaŋa minti: «Barən aynan kar wəra keɗe. Hulum anə məna asaŋ minti Kormə Pepeŋ haa mindi mo ba; əsnu ha'aŋ Abaŋ ɗaaməna. Hulum asaŋ minti Abaŋ haa mindi mo ba; əsnu ha'aŋ Kurmuyuŋ ɗaaməna daana hulum bə minti Kurmuyuŋ bele vəɗu du wəraŋ. 28Aŋ kaa gə minti gəyaŋ wəra kasi eele bə hale ku giliŋ, aŋ bəəda sarən da, ten ayaŋ faake yaŋ. 29Aŋ humi kosoŋ la cəərəna damdi kəccəŋ humi kosoŋ gud táŋ də kuuriŋa ana, daana aŋ doo hate katən la. Gud maa mo ten haa hulum sããya'iŋ daana paapa bə haa-he cəərən apəya bə gəm. Bədoona ana aŋ fele faake yaŋ guudəna. 30Gəəzi, táŋ də minti ten gaŋ dəŋ kuurəŋa halaŋ gəəli ba, eele bə minti ten ayaŋ dəŋ kəfaŋ.»

Selectat acum:

MATIYE 11: KERNT05

Evidențiere

Partajează

Copiază