MATIYE 10

Kaa hor ciiri ɓasi gə minti Yeesu vəənəy

(Mar. 3.16-19; Liki 6.14-16)

1Yeesu mantaŋ *kaa gə guudu hor ciiri ɓasiŋ suru da. Kəya wə əynəy abay bə sarme kəwal wəra, bə seerte gidiirə ɗemeŋ keɗe daana kaa kə dagtə-dagteŋ wəra keɗe gəm. 2Sam *kaa hor ciiri ɓasi kə vaa-veŋ haa kənaŋ: hulum bə ajew haa Simoŋ, yə məntu minti Piyer, də siinu Andereŋ; Zaki kormə Zebedeŋ də siinu Zaŋ; 3Filipi də Bartelemi; Tomasi də Matiye *hulum bə tope lambaŋ; Zaki kormə Alfeŋ, də Tade; 4Simoŋ hulum bə minti bele seŋka nuutuŋ ablaw, də Zudasi Iskariyoti haa toŋ anə derra bə minti ayaŋ Yeesu wəra a kaa kə acukur nuutuŋ.

Joŋre kə kaa gə minti Yeesu bə vay

(Mar. 6.7-11; Liki 9.2-5)

5Kaa hor ciiri ɓasi teŋ, Yeesu vəənəy warna də joŋre kəəsi na, wə wəətənəy ada minti: «Aŋ a ɗe giidə seŋka kə kaa gə minti paapa gə Ziwifi baŋ ba, aŋ a ve giidə vil də Samariŋa bə gəm. 6Aŋ ɗee la nəətiŋ haa sar kaanə *Israyel gə minti damdi kaamaŋ gə lentə-lenteŋ anaŋ. 7Bə minti aŋ bə ɗe lam, aŋ waatə kel la wəra a kaŋ minti *Kumna kə Pepeŋ wəra maŋ. 8Aŋ seertə kaa kə ɗemeŋ la wəra, aŋ kuntə kaa kə mee-meŋ la wəra, aŋ koltə kaa kə fə̃yaŋ la wəra pəsaŋ, aŋ sarmə kəwal gə cəərə kaŋ la wəra. Aŋ a fəlaŋ kar teŋ haa boobo, aŋ əytəy la a kaŋ haa boobo gəm. 9Aŋ a he karman kaasəŋa bə ɗe a gəryiŋ ba: aŋ a humti soloy ba, koo nuutu karmə soloy a posi dəŋa. 10Aŋ a humi mandəhaŋ ba, dəməəmə də ɓasi bə gəm, kalmasi bə gəm, gədəwa bə gəm. Gud maa mo hulum bə joŋreŋ fele werke nuutuŋ kasi kaa gə minti wə bə kəyəyaŋ, haa akəsa.

11Bə minti aŋ tuukuŋ ne giidə vil kəmanaŋ, ɗalba giidə wəlasi kəmana moŋ, aŋ goldə la kəm haa kuli kə hulum pisi bə minti toŋ də caadə doŋ irku dəŋ girduŋ. Aŋ həətə la haa girdu hãã bə minti aŋ yaake ko toŋ wəraŋ. 12Bə minti aŋ vaŋ ne giidə kuli kəmanaŋ, aŋ mirkə kaa teŋ la kəm ajew minti: ‹Kəkaɓiŋ jəə la cəərəŋa.› 13Jəəne minti kaa gə giidə kuli toŋ doonoŋ irku dəŋ neŋ, pisi də mirki nəətiŋ bə ji yaŋ ciiri gəm. Jəəne paapaŋ, kəkaɓi nəətiŋ hare yaŋ səraŋ da. 14Jəəne minti kaŋ bəlaŋ doŋ irku dəŋ baŋ, kumundu ba yə bəlaŋ jeɓreŋ kel nəətiŋ baŋ, a kəkəy bə yaake kuli toŋa mo, vil taŋa mo, aŋ po'ə tərwə də kampəraŋ la wəra gəm. 15Gəəzi ten waataŋ, dər hi bə jeme kəətiŋa ha'aŋ, kəəti kə Pepeŋ ji yaŋ gəəli ablaw cəərə vil taŋa dəŋaŋ kə vil də Sodom daana də Gomor gəm.»

Gəəli bə joŋreŋ

(Mar. 13.9-13; Liki 21.12-19)

16«Aŋ golə la, ten vaŋ ha'aŋ damdi kaamaŋ adəwaldə kaaya kə pəəri ana. Aŋ jəə kusrəŋ la də hel damdi hənjiŋ ana, daana kel kə bayməlaŋ a ji ku tarməyaŋa ba, damdi abaakuŋ ana. 17Aŋ amə kusrəŋ la pisi gud minti kaa kəman bə ayaŋ yaŋ warna a ko bə jeme kəəti na, yə bə wətəŋ yaŋ giidə *kuli bə toose neeteŋa. 18Yə bə ɗeete yaŋ dəərəŋ warna tiinə kaa kə dəməəməŋ na daana tiinə kəkamnaŋ na gud kel dəna. Aŋ ji bərdə kəkəy də kel katən yaŋ wəra a niini daana a kaa gə minti paapa gə Ziwifi baŋ haa də ko toŋ faɗi. 19Bə minti yə bə ɗeŋ ne a ayaŋ a ko bə kəətiŋaŋ, aŋ a yaake ku tarməyaŋ bə ceme wəra minti aŋ bə ɗe a waate kəna minti harmə moŋ daana minti aŋ bə doy bəlam də kel teŋ haa naanaanə moŋ ba. Aŋ koloŋ ne warna ada naŋ, Pepeŋ bə ayaŋ kel gə minti aŋ wəətəy laŋ. 20Gud maa mo aŋ bə waate kel haa paapa bay cəərəŋ ba, səma Tiiru kə Bəraŋ bə kaltaŋ kel teŋ wəra kuŋa haa tá.

21Seenə hulum derra'iŋ bə əyu yaŋ wəra a kaa kəman minti yə əwu la wəra, koo bar beebeŋ bə ji duuru haa bədoona gəm. Kəmar koncoŋ bə kole kuy yaŋ wəra cəərə kəmniŋa, yə bə jəy kel di yaŋ minti yə əwəy la wəra gəm. 22Kaŋ keɗe bə məlaŋ dərəŋ yaŋ wəra gud səmana. Səma hulum bə minti əsəŋ ne ŋəŋ ku kel teŋa hãã a me duŋ, wə seere yaŋ wəra. 23Yə ɗəlaŋ ne bə lasəŋa giidə vil kəmanaŋ, aŋ vaa la wəra də tara giidə vil daalaŋa. Gəəzi ten waataŋ, ten *Kormə Hulúm bə bi haa ajew də minti aŋ kəm bay tewe joŋre nəətiŋ wəra giidə vil də *Israyela keɗeŋ. 24Hulum bə hateŋ deŋe hulum bə hətuŋ ba, hulum bə joŋreŋ deŋe burduŋ bə gəm. 25Yə mante kasi hulum bə hateŋa minti wə kole la wəra gəga'i də hulum bə hətuŋ təwa, daana minti hulum bə joŋreŋ kolə la wəra gəga'i də burduŋ gəm. Kaŋ waataŋ cəərə bərdə kuliŋa minti wə kəna *Belzebul tə bə moŋ, kəkəy bə ji ciiri máŋ pisi jəə minti yə waatə la bədoona cəərə kaa gə girduŋa gəm.»

A ji walka də kaŋ ba

(Mar. 8.38; Liki 12.2-9)

26«Gud teŋa ta, aŋ a ji walka kas kaŋ ba. Kel gə metə-meteŋ, guudi ge yaŋ wəra keɗe, kel gə minti yə wəətəy dəgaaya-dəgaayaŋ, kaŋ iskiy yaŋ wəra keɗe gəm. 27Kel gə minti ten waataŋ di duugŋ leŋ, aŋ ɗee la a dugtuy wəra daaway anə pəɗaki. Kel gə minti yə wiskiniy ne kosnoŋa aləwa ɗaw, aŋ ɗee la a sewle wəra diiri kəkər. 28Aŋ a ji walka kasi kaa gə minti awaŋ kusrəŋ wəra təwa, anaaŋa yə paapa gə nakə-neke bə awaŋ tiirəŋ baŋ ba. Aŋ jəə walka la ɗaw haa kasi Pep bə minti wəra bə nakə-neke bə awaŋ kusrəŋ wəra də tiirəŋ keɗe daana bə vay dər cəwaŋaŋ. 29Ahir ɓasi, kaŋ gusuy wəra haa suŋku məna bə mo? Də teŋ keɗe kumundu awe wəra adawra anə məna minti Bəraŋ bay aseŋ, paapa. 30Aŋ ha'aŋ, kaaɗe gə cəərəŋ wəra gə aŋkə-aŋke məna-məna keɗe. 31Bədoona ana, aŋ a ji walka ba, kel dəŋ dəŋaŋ ahir kampa ablaw!

32Hulum bə minti waatənan səman ne wəra kəkər minti tó katən, ten də kusrən ha'aŋ, ten waate yaŋ wəra kəkər tiinə Barən bə apəyaŋa minti wə haa hulum katən gəm. 33Səma mindi mindi mo maltaŋ ku ne wəra kəkər tiinə kaŋa minti tó asnan baŋ, ten də kusrən ha'aŋ, ten malte kun yaŋ tiinə Barən bə apəyaŋa minti ten əsnu bə gəm.»

Kaŋ ceme dər kumsi wəra gud Yeesu

(Mar. 8.34-35; Liki 12.51-53; 14.26-27)

34«Aŋ a ɗiki minti ten bəŋ haa də kəkaɓiŋ cəərə seŋkaŋa ba. Ten bəŋ paapa də kəkaɓiŋ ba, ten bəŋ də kel gə minti koloŋ yaŋ bə ɗalte kumsəŋa. 35Gəəzi ten bəŋ haa a ɓarse dər hulum wəra də buru, dər tər wəra də nərə, dər həlgəŋ wəra də adi dəŋ gəm. 36Kaa gə acukur nəmtiŋ bə ji haa kaa kə gerdem toki. 37Hulum bə minti bele buru daana nuru daŋnan, wə neke bə ji hulum bə guudən ba. Hulum bə minti bele kurmuyuŋ daana turnuŋ daŋnan, wə neke bə ji hulum bə guudən bə gəm. 38Hulum bə minti haŋ kəbaŋ gə larga nuutuŋ baŋ , wə haanan bəlam dən bə gəm, wə neke bə ji hulum bə guudən ba. 39Hulum bə minti bele minti tó jəə la caw saksakiŋ, wə bese dədərgə du wəra haa bese ɗaw. Səma hulum bə minti bəsaŋ dədərgə du ne wəra gud kel dənaŋ, wə fəlaŋ dədərgə du wəra faɗi.»

Tope bə kə irku də kaa kə Yeesu haa karman pisi

(Mar. 9.41; Liki 9.48)

40«Hulum bə minti doonoŋ irku dəŋ ne, wə doonon haa irku dən faɗi. Hulum bə minti doonon irku dən neŋ, wə doŋ haa irku də Hulum bə minti a gaanan da. 41Hulum doŋ irku də *hulum bə jogte ku mini kə Pepeŋ ne gud bə minti wə asaŋ minti wə haa hulum bə jogte ku mini kə Pepeŋ, wə fele haa sar werke bə minti hulum bə jogte ku mini kə Pepeŋ fəluŋ gəm. Hulum doŋ irku də hulum ɗekeri ne gud bə minti wə asaŋ minti wə hulum ɗekeriŋ, wə fele haa sar werke bə minti hulum ɗekeriŋ fəluŋ gəm. 42Hulum kəman ayaŋ ne nuutuŋa koo kan gə arsə-arse a hulum gud *kaa gə guudənaŋ gud bə minti wə hulum bə guudən, gəəzi ten waataŋ, wə ɗe a fele werke diŋ wəra me'i.»

Selectat acum:

MATIYE 10: KERNT05

Evidențiere

Partajează

Copiază