San Lucas 13

Rhon balen yotza'arha ka' chhiarherha

1Lagazi tiembo na guiajke balake yajyoke Jesús, na gdixaje'ekene le' Pilato bgotzene rhen ki balaka bene yechhi Galilea le'an rhen kika beaguixi ta bdeke balan.

2Jesús gochhie le'ake: «¿Arhe'akielhe lén ten bedzagaka bene yechhi Galilea tan nakake le'ake mazirhe bene dolaxhkia' ka' yebalaka bene yechhi xhen kie'ake na? 3Rhapa lén labi; na chen lén kuinle birheyo'olhe lo xhneza Diozo, le'aksikan watilhe. 4¿Achen rhe'akielhe, bene chixhonho na gotike kati ze'e sibi ki Siloé byala gbaga le'ake gdapakarhe mazirhe dola' ka' yebalaka bene gzoake lo yechhi Jerusalén? 5Rhapa lén labi; na chen lén kuinle labirheyo'olhe lo xhneza Diozo, le'aksikan watilhe.»

Xhkodza didza ki to yaga higo bichhia tazixi

6Jesús gdixaje'ene le'ake xhkodza didza ni: «To bene goze to yaga higo lo bedzolhi kie', te guiaje yajyoe' chen chhia higo, na bibeyalene nito'. 7Nakan gochhie bene rhonchie' bedzolhi na: "Byokalho, tzona yiza torhoa' chibida rdeyoa yaga higo ni chen chhia tazixi, na bigslabata rheyaleda. Gchogo xha; ¿nobixhkia' glanga yo' targo'onzi?" 8Na bene rhonchie' yo' na, bochhie': "Xanha, bde'e lataj sban yiza ni; ni gzolaja yo' le'an koa' be'abi yanha'. 9Le'an tan na'akalha wabia tazixi; na chen labi, nan xhchogolho."»

Jesús beyonhe dza sabdo to nigolha rhaka xhwe'e

10To dza sabdo Jesús gzolhoe rse'adiene lo to yo'o ga' rhedobike; 11te na' ze'a to nigolha rhaka xhwe'e chizeaj chixhonho yiza. To be'e malha bxolata lo xhkodze, te labi rhaka yolie kuinhe ni le'ati. 12Kati Jesús ble'ene lee, bledze lee na gochhie lee:

—Nigolha, chinakalho welha' lo yelawe'a kio'.

13Na'arhe gdanhe lee, te tina'azi nigolha na beli xhkodze na gzolhoe rhonhe xhen Diozo. 14Te bene yajlo ki yo'o ga' rhedobike bdze'e, le'a tan Jesús beyonhe lee dza sabdo, na gochhie ka bene:

—Dia xopa dza kinda gonrha chhin; leguida dza na kinda yeyonhe lén, te laga dza sabdo.

15Jesús bochhie':

—Tarhonsle, ¿alhabi rhese'achhilhe notite'azilhe lén be'achhi o borodo kie'alhe to dza sabdo, kinda xhche'alheba guia'ajba nisa? 16Le'a nigolha ni, rhaka xozixhtoe Abraham na taxiwe chibe'anta xhwe'e chizeaj chixhonho yiza, ¿alhabi rhala yeyonha nigolha ni, za'akalha naka dza sabdo?

17Kati Jesús gne' ten, bene birle'ekene le' chhia'a bega'anditajke; te yogote'a bene rhebekene kati ble'ekene ta xhen rhonhe.

Xhkodza didza ki bini ki mostaza

(Mt 13.31-32; Mc 4.30-32)

18Jesús le'aksikan gne': «¿Nonaka rna yelarne'abe'a ki Diozo le'an nobi waka gle'abeda? 19Naka ka' to bini ki mostaza to bene rhaze lo yo' kie', na rhe'ani xhchhinte'a gaka ka' to yaga xhengolha te ka bguini rhonkaba lichhikaba lo xhi'inhe.»

Xhkodza didza ki tarlichi lo koa

(Mt 13.33)

20Le'aksikan gne'a Jesús: «¿Nobi le'an waka gle'abeda yelarne'abe'a ki Diozo?» 21Naka kati to nigolha rgotzene tarlichi lo koa le'an taxhengolha bixhte xhnolha na rhon non sdote'a lo koa rhasa.

Rhoa porta dzodi

(Mt 7.13-14,21-23)

22Tzalaka Jesús zeaje yoe' neza Jerusalén, gde'e tixe yechhi le'an yechhi zingo na konga rde'e rse'adiene ka bene. 23Toe' gnabene le':

—Jesús, ¿ale'atikague slake?

Te le' bochhie':

24—Legon balen tzo'olhe rhoa porta dzodi; le'a rhapa lén tixeke ye'ankene tzo'oke, te bigakake. 25Kati xan yo'o na chase na gse'ayaje porta, lén, ga' dzalhe lalealha, gledzalene te sne'alhe: Xanha, gsalhajti. Na le' yochhie'e: Labi nezeda noga bene lén. 26Na'arhe solholhe lén sne'alhe: "Chigdagoto kan goeto le'an loe', te loe' bse'adielho ne'ato layechhi kne'ato." 27Na le' yochhie'e: Labi nezeda noga bene lén. ¡Lekoasa lén, bene we'antaxhinaj!" 28Na'arhe kida yelagrechhi le'an gatilachhilhe, nan sle'elhe Abraham, Isaac, Jacob le'an yogote'a bene btzalajke laza Diozo zoake lo yelarne'abe'a ki Diozo, na lén narhoajlhe lalealha. 29Le'a widaka bene sdapa la'a lichhileyo', kinda koeke gagoke lo yelarne'abe'a ki Diozo. 30Na'arhe, balaka bene nan, rhonke yelhalhe yeyonke nerho, na balake nan rhonke nerho yeyonke yelhalhe.

Jesús rbechhie nia' ki Jerusalén

(Mt 23.37-39)

31Le'aksikan bchhinka balaka fariseos, na gochhike Jesús:

—Beyiaj gayobilha, le'a Herodes rhe'anhene gotie' loe'.

32Le' bochhie':

—Letzeaj te leye'a beza' na: "Byokalho, nan le'an gxe yebeaja ka taxiwe kan yonha ka bene rhaka xhwe'ake, na widzaj gsiochhia'." 33Le'a rhe'anhe tza'ate'aza tzo'oa neza nan, gxe kan widzaj, le'a labi naka wen to bene rtzalaje laza Diozo gatie' tzala'alha lo yechhi Jerusalén.

34«¡Jerusalén, Jerusalén, loe' rhotilho bene rtzalajke laza Diozo kan rkochhilho guiaj bene rsela Diozo! ¡Bala niaa go'onda yotoba xhi'inlo, ka' rhon yajedi rhotobiba yajedido kie'aba xhan xilhaba, te lén labi go'onhelhe! 35Na leguiokalhe, yo'o kie'alhe yega'an kanzi; na rhapa lén, labirhe yelhe'elhe ne'adia kati xhchhinte'arhe tiembo kati lén sne'alhe: "¡Chhia'a tzawe ki no' za'a lo Diozo!"»

Selectat acum:

San Lucas 13: ZAALuk

Evidențiere

Partajează

Copiază