Matiye 12

Runti Gimi ay Miltí oko meene ta nambiti

(Elloŋ Mark 2.23-28, Lik 6.1-5)

1Gaa oko wikinne kaaka pa, ma meene kaƴi ta nambiti, ga Iisa ma jobookeetee ƴelewɗo ma botol ma petay ganna ku gemeyyi. Guu jobookeetee gi maya dewɗiy. Guu ɗemeɗɗo ganaadalgee gu ayamɗo. 2Maa gu Pariziyennigee elliyya liyawco kaaka, guu beneyyiyyee oko Iisa goo: «Elliy ƴa jobookeecam maa gu loboɗɗo ma meene ta nambiti maa gu hukumnigeetine oko kee Yawudigeyyo toɗokkine#12.2 Elloŋ Oomiti min Masir 34.21.!» 3Gaa Iisa pa tiiliyyoo gaa: «Ku garkiyya ɗa kaytiŋ aattí Kitamniti Mellayi latta maa ga sultan Dawud leelo e? Meene kaƴi gi maya deyyiy ma gittee. 4Gaa Dawud un̰n̰iɗe bazzane ta waagiti ma Mella. Gaa icciyya mappa ka duwenta oko Mellayi#12.4 Elloŋ 1 Samiyel 21.2-7 o Soƴoowee ku Saɗikaŋgeyyo 24.5-9.. Guu aymiɗe ma gittee maa gu marawɗe. Ampane kee pa, ga gata ma gittee kotti lekka ɗa botol ka aymiti mappa kaaka asan gu hukumnigeetee Muusa toɗokkiyoo. Ay soƴoowee ku saɗikaŋgeyyo ka ma lekka botol!» 5Gaa Iisa beneyyiyyoo payya gaa: «Ku garkiye ɗa kaytiŋ Kitamniti Muusa ma gaarco soƴoowee ku saɗikaŋgeyyo e? Guta kotti pa, ma meene ta nambiti maa gu lobokka aatti girti Mellayi gu jobokkaca ɗa hukumne taata o gu lekka ɗa oorane#12.5 Elloŋ Gemmico Giimi ku Isirayel 28.9-10.. 6Na beneyyatoŋ, lekka iŋee pa ma ƴiila girti Mellayi! 7Mella beneyye Kitamniti gaa: “Maa na aŋka ƴiila ay ku kawayɗiyo oko giimo, ay saɗikane ɗa ta gaaruwo maa na aŋka#12.7 Elloŋ Ozee 6.6..” Kuu ebenɗiya samaane beneytí keeke, ku caɗaayo ɗa parlane oko giimi ma negekke ɗa kuu gu leewe zunubgee. 8A gata pa Runti Gimi ay Miltí oko meene ta nambiti.»

Iisa rayyadda miiɗi meene ta nambiti

(Elloŋ Mark 3.1-6, Lik 6.6-11)

9Gaa min iŋaa ga Iisa ƴiiliɗe. Gaa deeɗe un̰n̰a oko kaƴi min oko gerraco Yawudigeyyo ku giraaniti. 10Gaa lekkiɗo iŋaa gimu maa ga pitti maatenta. Guu Pariziyennigee aŋkiɗo gu gassiyyee botol kee ka luumiyti unco taattuweeco Yawudigeyyo. Ay ɗakko appe gu inniyya goo: «Hukumnigeetine oyowwine aɗe ke rayyidiɗo gimu meene ta nambiti?» 11Gaa Iisa soopa tiiliyyoo gaa: «Gaa gimu min aattoŋ lekka tamaw kaƴi, gaa ma meene ta nambiti, ga galɗe oko beena ta siƴƴa, ga milti kaaka kataa ɗa aɗe ga deeɗiya cimma min beenati e? 12A gimu pa maa ga ƴiila tamaw! Ay kaaka pe gu hukumnigeetine oyowɗine ke lewɗo samaane meene ta nambiti.» 13Gaa Iisa beneyyiyyee oko gimu ka pitti maatenta kaaka gaa: «Taariya piccum.» Gaa taariyya. Gaa pitti rayyidiɗe caŋ aleŋ giiti ka samaane. 14Guu Pariziyennigee oomiɗe min ger ka giraaniti kaaka. Guu deeɗe timma gu boodiɗe ma ka diyawti Iisa.

Iisa ay lubaakati Mellayi

15Maa ga Iisa leeɗe kabarre kadar gu Pariziyennigee boode ma ka diyawti, ga ƴiile min iŋaa. Guu giimi maani jobbiyya. Gaa rayyaɗɗiy paracco ma parayya. 16Gaa uwwiyyoo atarre gaa: «Aɗoŋ beneyya ɗa oko giimo baŋ na ay we.» 17Ay goŋŋa pe ga beneyti Mellayi maa ga nabiinice Esaya beneyye min tippa asiɗo butulti. Gata pa beneyyiyee gaa:

18«Keeke ay lubaakatu maa na aparre, maa na ƴekka,

o gi parhantu parattí aaye oko gata.

Na akkeeca gaga Ruuhantu.

Gaa asiyya gaara butulti Mellayi ka cur oko giimi ku ballee paracco ku kiɗaati.

19Gata kaltaya ɗa ma giimi, o ga hawwayya ɗa,

o gu geewa ɗa ga beneyya bottollo.

20Gata ɗekemma ɗa coori ma kotee

o ga betekkaca ɗa lampa ma mowokka missa#12.20 Coori ma kotee o lampa ma mowokka missa ay aleŋ giimi ma gi amannico paalta ka..

Gata leewa pe goŋŋa aɗe

namma ga kaatikkiki ka cur ya nosorriti,

21guu giimi ku ballee paracco ku kiɗaati

asiɗiy duwa galbigeeco oko gata#12.21 Elloŋ Esaya 42.1-4..»

Iisa o Belzebul ma ay tattuwco awaaradgeyyo

(Elloŋ Mark 3.22-30, Lik 11.14-23, 12.10)

22Iisa gu itiriyee gimu maa ga aarinne bakammiya ga koor̰owɗiya o ga toɗokkiyee beneyyi. Gaa Iisa rayyidiyya namma ga beneyɗo o ga ella. 23Guu giimi ku maani kotti ajjibiɗe, guu beneyɗo goo: «Gata keeke, deewa pe gata aɗe ma ay Runti Dawud e?» 24Maa gu Pariziyennigee giyyiɗe, guu beneyyiɗe goo: «Gimu keeke petekka awaaradgee illa ma gudirane ta tattuwco awaaradgeyyo kee Belzebul#12.24 Belzebul pa ma ay tattuwco awaaradgeyyo gu kolaa kulla goo Seetanne..»

25Mileŋ ga Iisa pa ibinca mooyico, ga beneyyiyoo gaa: «Guu melleeti mulunniti nekerkití mulunnico beenannico, gi mulunnico taata galaa. Kulla geegar aɗe o ger maa gu gimtee ɗedekke, ɗemekka. 26A gaa Seetanne appe pa petekka Seetanne, gaa nekerɗo ma ziiti ka, gi mulunniti deewa pe gee me? 27A gaa naata petekka awaaradgee ma gudiranti Belzebul, gu gittoŋ pa petekka pe ma gudiranti we? Ay ɗakko appe gu gittoŋ saa kulla asittoŋ yooka goo ku ay kaatiynigee. 28A naata petekka awaaradgee ma Ruuhanti Mellayi. Keeke pa garaa kadar gi mulunniti Mellayi sartoŋ paaɗe. 29Lekka ɗa gimu ma gederra ga un̰n̰iɗo girti oko gimu ka amma ga deeɗiy sokka lawtee, illa gaa gederre ga onniyya ƴa omma hatta gaa deeɗiy sokka ka pe. 30Ma aaye ɗa ma naata, aŋkino ɗa, o ma tapakka ɗa giimi mulunniti Mellayi aleŋ tanni, tecellay. 31Ay ɗakko appe na beneyɗitoŋ naa ga Mella saamayyayoogu zunubgeeco giimi paracco o n̰ilawco parattí maa gu n̰eleɗɗiya. Gaa gimu soopa n̰ilca Ruuhanti, ga Mella saamayyeegu ɗa zunubgeetee kotti. 32Gaa gimu beneyya ma gaari ku miɗɗa oko Runti Gimi, ga Mella akkee saamiya. A ma beneyya ma gaari ku miɗɗa oko Ruuhanti Mellayi soopa gasakka ɗa saamiyo, bala ga min oko dunuune teete o bala ga min oko dunuune ma akka asa.»

Masal ta ettu ma rontee

(Elloŋ Matiye 7.16-17, Lik 6.43-45)

33Gaa Iisa beneyɗo missa gaa: «Gaa ettu samaane, ga runti kulla daana. A gaa ka miɗɗa pa, ga runti kulla daana ɗa. Ettu gu ibinya min rontee. 34Kuŋ Pariziyennigee ma ay ronco koykokko, ku gederra pe kuu me ku cimmiɗo beneyyiŋgee ku daana ga kuŋ ma gidaani ɗa? A gata pa maa ga biiti gimi cemekka, ay ma unenta galbanti. 35Gimu ka gidaani leewa gaari ku samaane asan gi galbanti samaane. A gimu ka gidaani ɗa soopa leewa gaari ku miɗɗa asan gi galbanti miɗɗa. 36Na beneyyatoŋ ƴa, oko meene ta parlanti gu deeɗitoŋgu gemma beneyyiŋgeeco paracco ma gayee ɗa maatiki maa gu dawakke, 37asan ga ay min oko beneyyiŋgeecam appe ga Mella asiyyam caaɗa parlane, guu ibinɗum baŋ ki ɗayaŋ e, e baŋ ki galenta.»

Iisa pocaa liyaw ta latta ka ajjibiti

(Elloŋ Matiye 16.1-4, Mark 8.11-12, Lik 11.29-32)

38Guu daare min oko aalimnigee ku Kitamniti Muusa o daare min oko Pariziyennigeyyo inniyya Iisa goo: «Garaawa, leeni ɗe latta ka ajjibiti ma garaani kadar ga Mella n̰akammum.» 39Gaa Iisa tiiliyyoo gaa: «Giimi ku haŋka kooko maa gu gaarco miɗɗa o gu jobokka ɗa ka Mellayi enaa latta ka ajjibiti ma garaa kadar ga ay Mella ma n̰akamminoo. Mella soopa oyaa ɗa ga gaariyyoo ya kaƴi, illa ay latta ka ajjibiti ma deyyee oko nabiinice Yuunus. 40Aleŋ ta Yuunus tee aɗe maa ga leeɗe meeni subba aandoŋ o paato aatti buusu ka tatta, ga Runti Gimi kulla akka lee meeni subba aandoŋ o paato aattí kiɗaati. 41Meene ta parlanti, gu giimi ku geegar ka Niniiwa akka waca ma giimi ku haŋka kooko, guu giimi ku Niniiwa asiɗiy luumiya, asan gu giimi ku Niniiwa meeliy gaarco ku miɗɗa maa ga Yuunus taasiyyooga beneyti Mellayi. A iŋee pa ga lekka pe ma tatta ƴiila min oko Yuunus. 42Oko meene ta parlanti taata, gi sultanniŋga#12.42 Sultanniŋga taata ase elliti Suleman oko wikinne maa ga hekemeyɗe kiɗa ta Isirayel. Elloŋ 1 Salaataŋgee 10.1-10. ma hekemeyya watuunití kiɗa ta Isirayel akka waca ma giimi ku haŋka kooko, gii asiɗiy luumiya, asan ga tippa gi aseero min kiɗaayee ku arro ku maa gi asiɗiy giyya beneyyiŋgeetee sultan Suleman, ma unenta ma ibino ta gaaro. A iŋee pa ga lekka pe ma tatta ƴiila min oko Suleman.»

Yookiti aarinni

(Elloŋ Lik 11.24-26)

43Gaa Iisa beneyyiyyoo payya gaa: «Wikinne maa gaa aarinne oome min oko gimi, ga kataa ga deeɗo araariya kiɗaayee ku aƴinta karɗam karɗam ku maa ga deeɗo diyya were ka nambiti. Gaa gasse ɗa pa, 44ga beneyya ma galbanti ka gaa: “Na yokaa girtu ka heeta kee aɗe maa na oomiɗe.” Gaa yooke pa, ga akkiya gassa gaa lekka ɗa ma nowottiyee o ga sawwenta patal patal o ga kakkiɓenta samaane. 45Gaa kaatiɗo ga deeɗo gulma awaaradgee daare paysara maa gu gaarco miɗɗa ƴiila min oko gata. Guu asiɗo un̰n̰a gu nuntiɗo. Goŋŋakite, gi nuntiti gimu kaaka maa gu suubiyee pa deewa saa pe miɗɗa ƴiila min ta heeta. A giimi ku haŋka kooko kulla maa gu gaarco miɗɗa, gi akkiyoo dee pe goŋŋa aɗe.»

Yaati Iisa o seneetee

(Elloŋ Mark 3.31-35, Lik 8.19-21)

46Iisa ƴa beneyyayo missa oko giimi ku maani kotti, gii yaati o seneetee asiɗe warra renta min oko were maa ga alɗo, guu aŋkiyya gu beneyyiyyee. 47Gaa gimu kaƴi asiyyee beneyya gaa: «Giyyu! Yaacum o seneecam ay guta kooko aɗe waraɗɗe renta, guu aŋkiɗum gu beneyyiyam.» 48Gaa Iisa tiiliyyee oko gimu kaaka gaa: «Yaatu ay we, o seneetaw ay ini we?» 49Gaa gaariɗiy ma pitti jobookeetee, gaa beneyyiɗe gaa: «Kooko appe ay yaatu o gu ay seneetaw. 50A gata pa kulla gimu aɗe ma leeway gaari maa ga Tattu ma aaye samaani aŋka, gata kaaka ay sintu, o gi suttu, o gi yaatu.»

Selectat acum:

Matiye 12: mmy

Evidențiere

Partajează

Copiază