Matiye 11

1Maa ga Iisa gaamiyya beneyti oko jobookeetee ku orro o seera, gaa ƴiiliɗe min iŋaa, gaa garkayɗiy o ga tasaaca kabarre ta daana oko giimo gawaagargeeco Yawudigeyyo.

Innico jobookeetee Yaaya ma batasayya giimi

(Elloŋ Lik 7.18-35)

2Wikinne kaaka pa, ga Yaaya ma batasayya giimi giyyiko min daŋaye maa gu bakamɗiya, lubaakitee Masi. Gaa n̰aamiyyee minnaw min oko jobookeetee. 3Maa gu sarɗe guu inniyya goo: «Ay kii aɗe ma ay Masi, gata maa ga Mella aparre ma asaa e, e ni ucu missa kaƴi?» 4Gaa Iisa tiiliyyoo gaa: «Yookoŋ ku deeɗineegu jeppa oko Yaaya gaari maa ku geewa o maa ku ella: 5Koor̰ee gu iɗiico ella o mugulee tan̰aa samaane o majaddimnigee rayyide gu deeɗe samaane unti Mellayi o ambuukee geewa o ma matakke naɗe o kabarre ta daana deero taasenta oko giimi ku saamo. 6Baarikenta ay gimu maa na deewee ɗa botol ku maa ga poociɗo amanno oko naa.»

7Maa gu jobookeetee Yaaya kaatiɗe, gaa Iisa inniɗiy giimi ku maani kotti ma gaartee Yaaya gaa: «Maa ku kaatiɗe kayni ku aŋakke ku deeɗo ella we? Ku kaate ku deeɗe ella gimu maa gi kayaati lamatta ka aleŋ coori maa ga ussu azakka iŋee o iŋee e? Haha. 8A ku dee ella we? Ku dee ella gimu ma esekke kaɗiŋgee samaane e? A gata pa ma esekke kaɗiŋgee ku samaane ku gasakka gerraco salaataŋgeyyo. 9A ku dee ella we kayni? Nabiinice e? Haa, na beneyyatoŋ ƴa, ku dee ella ma ƴiila kulla nabiinice. 10Yaaya ay gata appe maa ga Mella beneyya gaartee Kitamniti gaa: “Omma min oko kii, na n̰akammaa palaynicitu, ga deeɗamga pana butulcum#11.10 Elloŋ Malasi 3.1..” 11Na beneyyatoŋca seene, min oko giimi paracco ma ellica paato ga lekka ɗa gimu ma tatta ƴiila min oko Yaaya ma batasayya giimi. Gaa ma kaaka aɗe pa, ga ka rootta ƴiila mulunniti Mellayi alɗo tatta ƴiila min oko Yaaya. 12Min oko wikinne maa ga Yaaya ma batasayya giimi tasawɗiya beneyti Mellayi namma ya haŋka, gu giimi ku gazanta asarrica mulunniti Mellayi o gu deyekke cawwití. 13A guta pa nabiinigee paracco o Kitamniti Muusa beneyye ma ka mulunniti Mellayi namma ya wikinniti Yaaya ma batasayya giimi. 14Kuu aŋka ku ibinɗo samaane pa, ga Yaaya ay gata appe ma ay Eliyas ma akka yooka#11.14 Elloŋ Malasi 3.23.. 15Maa gaa lekka deyya, ga giyyu.»

16Gaa Iisa beneyɗo missa gaa: «Giimi ku haŋka kooko na massallay pe ma ini we? Guta saabayye aleŋ miici ma nowotte were ka timmiti guu daare kolowɗiy gicco goo: 17“Ni paanitoŋ teelo kuu alɗe waara ɗa. Nii reeɗitoŋ riyaawiŋgee ku haziniyti, kuu alɗe laatiya ɗa.” 18A gata pa Yaaya maa ga asiɗe ga teewa ɗa diŋ diŋ o ga ar̰aa ɗa, guu giimi beneyɗo goo ga lekka aarinne#11.18 Oko Yawudigeyyo, ga gimu maa gi kayaati ɗaɗɗakko ɗa ay gimu maa ga aarinne bakammiya.. 19A Runti Gimi pa aseero, gaa tewɗo o ga ar̰aa, guu giimi beneyɗo goo: “Elloŋga ƴa miiɗi keeke! Gata keeke leewe kee ka aatti ka o ka mowwiti. Gata ay lanjinco oko sokookee ku miiri o oko giimi ma leewa zunubgee.” A ibino ta gaaro soopa tee ta Mellayi kadar gi ɗayaŋ deewa ibinenta ma garrarriti.»

Giimi ku gawaagargeyyo ma pocaa amanno

(Elloŋ Lik 10.13-15)

20Gaa Iisa makaɗɗiyo oko giimi ku gawaagargee maa ga leyyoo maani gaari ku ajjibiti ƴiila asan gu meeliy ɗa gaarco ku miɗɗa. 21Gaa beneyɗiy gaa: «Diigane ocokkitoŋ kuŋ giimi ku geegar ka Korazim o ka Betsayda! Gaari ku ajjibiti maa na leetoŋ gawaagargeetoŋ, naa alɗiy liyaw geegar ka Tir o ka Sidon#11.21 Tir o Sidon pa ay gawaagargeeco giimi ma ay Yawudigee ɗa., ga koɗokka ka saa gu esekka kaɗiŋgee ku haziniyti o gu sosoyya bitti zeneeco ku maa gu gaariɗo kadar gu meeliy gaarco ku miɗɗa. 22Ay ɗakko appe na beneyɗitoŋ naa gi meene ta parlanti ga kuŋ giimi ku geegar ka Korazim o ka Betsayda ga Mella akkitoŋga zilla bogorti ƴiila min oko ta giimi ku geegar ka Tir o ka Sidon. 23A kuŋ, giimi ku geegar ka Kaparnawom pa, ku leewe kuu walaŋ ga Mella on̰aatoŋ uwwa namma ya samaani e? Kaw, gata beraatoŋ soo namma ya oolati, asan gu gaari ku ajjibiti maa na leelo wikirtoŋ, naa alɗiy liyaw geegar ka Sodom#11.23 Sodom pa ay geegar maa gu giimi nowottiyee wikinniti Biraayim. Mella pa bittiy ma n̰aawo ta okkati o ta bitti gazanta asan gu giimi ku geegar kaaka leewa miɗɗa ta kaw unti Mellayi. Elloŋ Diilo ta Lawwi Paracco 18–19., ga ya haŋka ga ayee missa. 24Ay ɗakko appe na beneyɗitoŋ naa gi meene ta parlanti ga kuŋ giimi ka Kaparnawom ga Mella akkitoŋga zilla bogorti ƴiila min oko giimi ku geegar ka Sodom.»

Iisa leewee barkinti oko Tatti

(Elloŋ Lik 10.21-22)

25Gaa oko wikinne kaaka ga Iisa beneyyiɗe payya gaa: «Baaba, kii ma ay Milti samaani o ka kiɗaati, na logokkam asan gu gaari kooko maa ki kiiliyoogu oko giimi ma ibina gaari o maa gu kayyeeco ecekka, ki gaariyoogu oko ku rootta ta kaw. 26Ay seene Baaba, asan ga keeke deyyam daanam ga deeɗo goŋŋa.»

27Gaa Iisa beneyɗiyo payya oko giimo gaa: «Gaari paracco ga Tattu damawgu. Lekka ɗa gimu ma ebennano naa Runti Mellayi illa ay Mella Baaba, o ga lekka ɗa gimu ma ebennaa Mella Baaba illa ay naa Runti. A naa Runti Mellayi pa aŋka na gaariyyooga Baaba oko giimi daare, gu ibiniyya kulla.»

Asaw oko Iisa lekka nambo

28Gaa Iisa gaayiyyo payya gaa: «Asoŋ oko naa, ga kuŋ parattoŋ ma rakee ma icco ta suuruwe ka tirta, naa birittoŋ nambo. 29Oyyoŋ ku jeepiyya botol maa na garaatoŋ o ku ɓeldoŋca giraanitu, asan ga naa detta o galbantu lekka ɗa koolipo. Goŋŋa ku gasakkaca nambo. 30Ay seene, jeepo ta botol maa na garaatoŋ daana ka o suuruwe maa na beraatoŋ acapta ka.»

Selectat acum:

Matiye 11: mmy

Evidențiere

Partajează

Copiază