YOHANET 2
2
O Kana ap aike agwe ìgetenem Yesùt en elalin hagasike wene
1Atì'nogo hagatì lagaukwasik, nogo ineki pìre ìlùk en, ineki aike ba nen he, o Kalilea o kota aike etage Kana atì, ap aike agwe ìgetenem Yesùt agosa ayoko hesukwama atoma inom welagaukwa. 2Atoma were'ma, at Yesùt agoromì ane wanhì lagaukwa mene inom hogo re, inayoko hesukwama lagaukwasik welagaukwaat. 3Lagaukwasik werek kolek, anggur eken amusu keralek mene obogat lek agaikomo re, Yesùt agosa nen at mel yogosike:
“It anggur eken amusu keralek mene lek agama werek o,” ìlùk yogosike. 4Atì'nogo yogosikomo, at Yesùt en he, mel yogosike:
“Eige. Nagosa. An nen hagasusak oba oan higit asi wagì'lek werek kolek, hat en an nahalok yogoneten,” ìlùk yogosike. 5Atì'nogo yogosike meneat he, at agosa nen, it he ita esewerek inatitigeke mene mel yogoisasike:
“At en,
Yì'nogo haga'ni, ike halok he, at igin mene atìat haga'no,” ìlùk yogoisasike. 6It apùnì Yahuri mene nen hageat atoma nenat hagatì logolìk he, yì mene tì mene mel, inebenakwe mel, sobalogo nek hagatarek mene hesik isoak torom hake ebe helep mene hagarek hùkotek mene ebe 6 en atoma hesukwama welagaike. Torom hake atì ebe lopok a'la re, i 100 liter hake hinasusak elok welagaike. 7Atì'nogo were'ma re, at Yesùt en it inatitigeke mene amanogo yogoisìkì logolìk he, mel yogoisasike:
“Isoak torom hake aroma ha i hina'ni o,” ìlùk yogoisasikomo, apem hesogotìgìk hinasukwa. 8Atì'nogo hinasukwama re, at Yesùt en it mel yogoisasike:
“Yogo. Hinatep mene atì aike keralogo ap kain pesta isate esewerek mene wogosi lani o,” ìlùk yogoisasikomo wogosi lagaukwa. 9It en i keralogo wogosi lagaukwasi'mo nogo nen he, i ebe tì'nogo mene, ìlùk inelu welagaukwa meneat he, at kain a'nogo nek he,
“Koma nen wolok wagaika,” ìlùk okot logolìk he, i a'nogo anggur eken amusuat haga'lagaikomo, etuk mìkhasike hak he, hano nen ap agwe ìgesukwa werek a'nogo ane hakhasike. 10Ane hakhasikomo wagaikomo re, mel yogosike:
“Apùnì obogat en anggur eken amusu wogisìkì logolìk he, hano mene tak wogisikenem, ning hogo nikenem en, hobuk weak mene wogisagarek meneat he, hat enek he, hano mene hinakhìlìk welagatik en hobuk weinamethegen yì, nayùk e!” ìlùk yogosike.
11At Yesùt ebe hùthoagalùk elalin mene aike hagatì'le'ma emakum hagasike re, o Kalilea o kota Kana logolìk hagasike atì. Atì'nogo hagasike atì ba, at hogoratarek mene inelurogo yakùlisasikomo, it at agoromì ane wanhì lagaukwa mane amanogo Yesùt ebe hùthìlìk, inetaùken at oba hìpìrethesukwa.
12Atì'nogo arat haga'lùk he, at Yesùt ebe mel, agosa mel, agaiya'lak mel, agoromì ane wanhì lagaukwa mane mel, inom o Kaperenagùm lagaukwa. Lagaukwasik he, ineki hamùlùgat enek welagaukwa.
Yesùt Ala awì wùrì'mo kìlìk tegelhike wene
(Mat.21:12-13; Mrk.11:15-17; Luk.19:45-46)
13Atoma were'ma nen, it apùnì Yahuri mene nen he,
“Alebat at Ala nen telninapike,” ìlùk, ina'la eberek logolìk topa wam warogo pesta etage Paskah hesik nasak oba arat hakok i wagaikomo re, Yesùt o Yerusalem pisike. 14Pisikesik he, Ala awì wùrì'mo kisike hak he, it apùnì oko abatarek mene, wam sapi mel, topa mel, sùe pel hake mene mel, oko wanhìk, it aike atoma hùrek logolìk uang okotìk, ikenem at eileken isasike. 15Atì'nogo hagatenem eileken isìlìk he, hele kopì mene tùgì hagarogo nen wam sapi mel, topa mel, labìsake tùgì warogo Ala awì wùrì'mo nen mùk hogo wulaksìgìk, e talek oba uang okotì lagaukwa mane amanogo abel etenogo puluk-palak hogo laksìgìk, 16it apùnì sùe pel hake mene oko wanhì lagaukwa mene wenagisìgìk, isike. Atì'nogo wenagisìkì logolìk he,
“Sùe yoma helalùk wùlìbi lani o.An nopase awì wùrì'mo yoma, o oko palharek oba negen palhì lagep yì re, atì'nogo hagasusak motok lek o,” ìlùk yogoisasike. 17#Mzm.69:9=TB 69:10 Atì'nogo wenagisasikomo, it ap at agoromì ane wanhì lagaukwa mane amanogo ina'la nen he!
“Alebat it ap aike nen Ala ane ba helal waganogo hìkì logolìk he, mel isukwama werek a'nogo:
Ala nopase, hat hawì wùrìk netaùaen hutik motok en na'mage motok lagalì'logo,
ìlùk helal wanhukwama werek akìgì,” ìlùk ina'la ebesukwa,
18Yesùt en it apùnì amanogo atì'nogo yogoisasikomo, it ap kaintek Yahuri mene nen Yesùt ebe wenagatì logolìgat he, mel yogosukwa:
“Hat en hagaten yì re, esewerek logolìk hagasusak obaat hagatenma ìlùk, hùthagagùkwe re, elalin mene aike hagasin ta,” ìlùk wenagasukwa. 19Atì'nogo wenagasukwama, at Yesùt en he, mel yogoisasike:
“Ala awì wùrìk yì mesalini o. Arat mesalumo re, an nen hobuk neki pìre ba wùtì logopik neki aike ba nen arat wusigin o,” ìlùk yogoisasike. 20Atì'nogo yogoisasikomo re, it ap kaintek Yahuri mene amanogo nen he, mel yogosukwa:
“Ho. Ala awì yì oan wùto kolek 46 tahun welago meneat he, hat en,
Neki pìre wùtì logopik en, neki aike ba nen arat wusigin, ìlùk, egen atì re, elogat wususak en egen a? Mea o,” ìlùk yogosukwa. 21Atì'nogo yogosukwa mene re, Yesùt en wene Ala awì wùrìk hesik isike atì, o wùrìk mene hesik isike hùk. At okawerek ebe mene hesigat isike o. 22Wene atì'nogo isikesik, hobuk ebe wa'lagaikesik en eluk agaikomo, it ap at agoromì ane wanhì lagaukwa mene amanogo nen,
“Wene yì alebat yogonisikenem ninasuk holhugu mene,” ìlùk ina'la ebesukwasik, Ala ane helal waganek mel, wene Yesùt en yogoisasike mene a'nogo mel, hùthasukwasik ina'la nen eberogoat akasukwa.
Yesùt en apùnì obogat ina'la elu welagarek wene
23Atì'nogo isukwasik werek kolek, o Yerusalem it apùnì Yahuri mene wam topa wam warogo pesta Paskah niko kolek, at Yesùt atoma inom logolìk ebe hùthoagalùk, elalin mene hagarìk lagaike atì nen he, apùnì apik ineileken hasukwasik inetaùken at oba hìpìrethesukwa. 24Atì'nogo hìpìrethesukwa meneat he, at Yesùt okawerek enek he, it inebe obogat inoabùt elu atì nen he,
“Eberogoat wo'nabugun,” ìlùk etaùken it inoba hìpìrethìgì'lek welagaike. 25Apùnì ina'la at elu motok welagarek atì nen he, apùnì aike nen,
“It aike inoabùt yìgìnìk,” ìlùk, at yogosusak motok mea o.
Selectat acum:
YOHANET 2: LAIDNI
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
