YOHANET 1
1
Ebe Wene atì abat agaike wene
1Emakum ero ba nen, wene Ebe Wene welagaike. Ebe Wene atì re, Ala eperagat logolìk he, ebe Ala at. 2At atì emakum ero ba nenat Ala eperagat logolìk, 3Ala nen yì mene tì mene obogat elalìk wagaike atì ebe re, at Ebe Wane nenat elalhike. At ebe lek logoilepma re, omakeat aike elalilep legat o. 4Ninelugu'ninaperek mene ero arat welagarek atì nen he, nit apùnì lìa'ninabi wagaike. 5Nit o mùmmo were'ma lìa'ninabi wagaike mene kìalek were'ma, o mùm atì nen lamuguthousak mea nen kìalegat welagarek.
6-7O lìa'ninaperek mene atì elu mene nen abok yogonisoagalùk he, Ala nen ap etage Yohanet atì ayoko hìlìk lakhei wagaike. Lakhei wagaikomo, wagaike atì re, lìa'ninaperek mene atì, abok apùnì obogat yogoisikenem, inetaùken at oba hìpìrethouagalùk wagaike atì. 8At Yohanet ebe lìa'ninaperek mene atì hùk. We, at lìa'ninaperek mene atì abok yogonisagalùk wagaike. 9At lìa ebe mene atì, kweangma yoma waga logolìk, nit apùnì obogat ninebe lopok lìa'ninabi wagaike.
10At enat pogot kweang elalhike meneat he, at ebe kweangma wagaikesik were'ma re, it apùnì kweangma mene yoma nen, at ebe hùthìgì'lek welagaukwa. 11At okawerek aua wagaika meneat he, at oe agot en ebe wanhì'lek hebisasukwa. 12Atì'nogo hebisasukwa meneat he, it apùnì aike nen, at ebe wìlìk he, inetaùken at oba hìpìrethesukwama, Ala againapùrì ebe mene asuagalùk eserinapike. 13Eserinapikomo, at againapùrì agaukwa atì re, apùnì inagainapùrì taka walok en holelinabìk mep mene logalogo taginaparek atì hak hùk. We, at Ala nenat taginapike o.
14Ebe Wene a'nogo abat agaikesik ninomat welagagu. Ninomat logolìk he, at ebe atì Ala aput omakeat tago nogo nen he, hogoratarek mene nineileken hasugu o. At oabùt hano nen, hanorogo haga'ninapik, wene ebe wene yogonisìgìk, iko motok were'ma nineileken hasugu.
15Wene at ebe hesik Yohanet en mel yogoisasike:
“An nopolik hobuk ap aike wesigin, ìlùk abok yogohisìgìrek a'nogo re, ebe yìat o. At yì hobuk an nopolik waga meneat he, ebe an oan ta'lagì'lek werek kolek, at alebat welagaike atì nen he, an nebe maben o. Kain he, arat o,” ìlùk, ane hùkorogo yogoisasike.
16Nen, at oabùt hano motok en ninebe obogat hobugalep hano'ninabì'logo. 17Wene Ala nen ninasuk wasike wene a'nogo yakùlnisoagalùk, alebat Musa lakhei wagaikomo, yakùlnisasike meneat he, Ala oabùt hano nen hano'ninapìk, ebe wene yakùlnisìgìk, uagalùk, Yesùt Karìsùt lakhei wagaikomo yakùlnisasike atì. 18Apùnì aike nen Ala ebe ineileken motok hìgì'lek meneat he, at aput omakeat tago opase era'lu eperak higit welagaikarek mene atì nenat Ala ebe sekek hogo yakùlnisa wagaike atì.
At Yohanet okawerek hesik abok pìlìngìrogo yogoisasike wene
(Mat.3:1-12; Mrk.1:1-8; Luk.3:1-18)
19At Yohanet en wene atì'nogo yogoisiko were'ma, it ap Ala esewerek mene mel, inùkùl etage Lewi mene mel, inom en,
“Yohanet. Hat hebe sa hak nogo,” ìlùk, oba hinok wanuagalùk, ap Yahuri mene o Yerusalem en laksa wagaukwama Yohanet oba wagaukwa. 20Wagaukwasik, at oba hinok wanhukwama re, at Yohanet en okawerek abok labelogo yogoisìgì'lek, we pak hogoat yogoisìkì logolìk, mel yogoisasike:
“An nebe re, apùnì telninapùkwe Ala nen ayoko hìlìk lakhei wesigin isike a'nogo hùk. Lek o,” ìlùk yogoisasike. 21Atì'nogo yogoisasikomo it en he, mel yogosukwa:
“Halok he, hat hebe sa nogo. Hebe Elia he a?” ìlùk yogosukwama, at en he,
“An nebe at atì hùk, hùnogoat o,” ìlùk, yogoisìkì lagaikomo, it en he, mel yogosukwa:
“Halok he, ap aike Ala ane yogonisìkì logouagalùk ayoko hìlìk lakhei wesigin isike a'nogo he a?” ìlùk yogosukwama, at en he,
“Atì hùgat,” ìlùk yogoisasike. 22Atì'nogo yogoisasikomo it en he, mel yogosukwa:
“Halok he, hat he, hebe sa nogo. Nit wene sekek hogo yogonisamo re, it ap nit lakhina wagaika mene, nit en wene aike yogoisa lagùkwe re, hat hokawerek habok nìkì'nogo egetek. Ninelu asuak en, sekek hogo yogonisan o,” ìlùk yogosukwa. 23#Yes.40:3 Atì'nogo yogosukwama re, at Yohanet en he, mel yogoisasike:
“At Yesaya Ala ane yogoisìkì lagaike mene a'nogo nen, mel isike:
Ap aike o leimo apùnì le'ma atoma ane wai ìkì logolìk he,
Ninoe Etagepogot wesiginkwe hanorogo yatì logoni o, ìlùk, ìkì logogin,
ìlùkisikomo helal waganek werek a'nogo re, nebe anat o,” ìlùk yogoisasike. 24It ap wagaukwa atì re, it ap Parisi mene nenat laksa wagaukwama wagaukwasik, aike mel yogosukwa:
25“Hat en he,
An nebe re apùnì telninapukwe Ala nen ayoko hìlìk lakhei wenigin hike a'nogo lek o. Nen, Elia legat o. Nen, Ala ane yogonisìkì logouagalùk lakhai wesigin isike a'nogo legat o, egen meneat he, apùnì ima pelaginapì lagen atì nahalok,” ìlùk yogosukwama re, 26at Yohanet en he, mel yogoisasike:
“An nen apùnì we ima pelaginapì lagì meneat he, ap aike hit on ebe hùthìgì'lek mene hinekele'ma metek werek o. 27At atì ebe hobuk an nopolik waga meneat he, at ebe kain. An nebe yekerek atì nen he, at esok agùt hele homago mene atì, an nen hikalusak mea o,” ìlùk yogoisasike. 28Wene atì'nogo isukwa atì re, at Yohanet en apùnì i Yoretan aik ìlì bakwe, ima pelaginapì lagaìke ba, o etage Petania logolìk en isukwa.
Yohanet en Yesùt ebe yakùlisasike wene
29Wene atì'nogo isukwasik, nogo ìlùk, hùenkwe, at Yesùt Yohanet oba waganem eileken lakhìlìk he, wene mel yogoisasike:
“Ala ako topa mene nit apùnì kweangma weak hagatorek mane korogo heraksegein mene a'nogo waga a'lì hineileken lakhani. 30Alebat wene an nen yogohisìkì logolìk he,
Ap aike nopolik wesigin meneat he, an oan ta'lagì'lek werek kolegat welagaike atì nen, an nebe yekerek mene re, at enek he, kain o, ìlùk, abok yogohisìgìrek a'nogo re, ebe waga arìat o. 31An alebat, at ebe nokotma re, sa heat, hùthìgì'lek welagagi meneat he, apùnì Isirael mene at ebe inelu asuagalùk ima pelaginapì logoigìlùk wagagi atì,” ìlùk yogoisasiko.
32Atì'nogo yogoisasikesik, hohuk at eileken hasike mene pak hogo mel yogoisasike:
“Ala Areagùn sùe pal hake mane pogot oba nen pi wagasik Yesùt ot oba laboksek were'ma neileken hìgì o. 33Atì sat he, at ebe sa heat an nokot welagì meneat he, Ala nen an apùnì we imaat pelaginapì logouagalùk lakhani wagaike mene a'nogo nen yogonetì logolìk he, mel yogonesike:
An Nareagùn ap aike ot oba labok i pi wìrìk were'ma heileken hegen halok he, at atì nen apùnì ima pelaginabu hak, Nareagùn inoba pelabi waga logogin o, ìlùk, yogonesikesi'mo nogo nen he, 34at ebe neileken tùkùm hogo hìgìrìk hùthìgì o. Atì'nogo hùthìgìrìk, at atì Ala aput eberogoat o, ìlùk, abok hit pak hogo yogohisìkì lagì yì,” ìlùk yogoisasike.
At Yesùt agoromi emakum opolik lagaukwa wene
35At Yohanet en atì'nogo yogoisasikesik, nogo ìlùk, hùenkwe re, at Yohanet ebe mel, agoromì ane wanhì lagaukwa mene inebe pìre mel, inom, atoma metek welagaukwa. 36Atì'nogo were'ma, Yesùt kwe atìkwe lagalùk waganem Yohanet eileken lakhìlìk he, mel yogoisasike:
“Ala ako topa mene a'nogo waga a'li lakhani,” ìlùk yogoisasikomo, 37agoromì inebe pìre aremnogo at ane yogoisasike mene inasuk holhukwasik he, Yesùt opolik lagaukwa. 38Atì'nogo opolik laganem, Yesùt elokwe hebek hogo eileken lagisìlìk he, mel isike:
“Nagoromì, hit nena mene herarìk wagep,” ìlùk yogoisasikomo, it en he, nit ninane ba,
“Wene yakùlnisegetek mene noe,” ìlùk u hak, it inane ba,
“Rabi noe. Hat haua o koma welagatek mene,” ìlùk yogosukwama, 39at en he,
“Hit en hineileken tomok hoageip en we'ni o,” ìlùk yogoisasike. Atì'nogo yogoisasikomo, it eperagat inom lagaukwasik he, o mo korok i laga kolek jam 4 sore hake, at welagaike ba ineileken hasukwasik, inom welagaukwa.
40Nen, it ap inebe pìre Yohanet ane ikenem inasuk holhukwasik, Yesùt opolik lagaukwa mene atem ap aike etage re, Atereat, Simon Peterùt a'nogo agot. 41Yesùt opolik lìlìk inom welagaukwasik he, at Atereat atì tak oe Simon a'nogo herarìk lagaikesik, eperak apì agaukwasik he, mel yogosike. Nit ninane ba Karìsùt apùnì telninapùkwe Ala nen ayoko hìlìk lakhei wesigin isike a'nogo u hak he, it inane ba, Mesiat ìlùk,
“Mesiat a'nogo nit arat ninom apì ago,” ìlùk, yogosike. 42Atì'nogo yogosikesik he, Yesùt oba wolok wagaikomo, at Yesùt eileken at lakhìlìk he, mel yogosike:
“Simon Yohanet aput yì, nagot e. Hat hetage Kepat ìkì logouagalùk salhapi o,” ìlùk yogosike. Atì'nogo yogosike atì re, nit yoma ninane ba etage helep isa u hak, Yunani inane ba Peterùt egarek hak, Iberani inane ba etage Kepat ìlùk salhike atì.
Yesùt en Pilipùt Nataniel eperak inayoko hesike wene
43Etage atì'nogo salhikesik, nogo ìlùk hùenkwe re, at Yesùt o Kalilea lagai wesigìlùk akasikesik lagai wagaike hak, ap etage Pilipùt eperak apì agaukwasik he, mel yogosike:
“Nagot e. An nopolik eme o,” ìlùk ayoko hesikomo opolik lagaike. 44At Pilipùt atì re, Atereat mel, Peterùt mel inom inawì sili o Pesaira omakima mene. 45Opolik laga logolìk, at Pilipùt a'nogo hobuk ap Nataniel eperak apì arìk, mel yogosike:
“Nataniel. At Musa nen wene Ala nen ninasuk wasike wene a'nogo ba, ap aike abok ìkì logolìk helal wanhìk, nen, it ap Ala ane yogoisìkì lagaukwa mene amanogo nen abok ìkì logolìk helal wanhìk, isukwa mene a'nogo, nit arat ninom apì ago. At ebe re, Yùsùp aput o Nasaret mene Yesùt at o,” ìlùk yogosike meneat he, 46at Nataniel en he, mel yogosike:
“A! O Nasaret a'loma nen hano mene aike elogat wesusak nogo? Mea o,” ìlùk yogosikomo, at Pilipùt en he,
“Hat heileken tomok hanok en eme o,” ìlùk yogosike. 47Atì'nogo yogosikomo, at Nataniel Yesùt oba wesigìlùk waganem, at Yesùt eileken lakhìlìk, at abok mel yogoisasike:
“Ap arì ebe Isirael ebe mene. Ane pìre ikerek motok lek mene arì lakhani!” ìlùk yogoisasikomo, 48at Nataniel en he,
“Egi! Noe. An hagatìrek mene noabùt nìkì'nogo nen helu agama,” ìlùk oba hinok wanhìkomo, at Yesùt en he, mel ogosike:
“Nagot e. Pilipùt en hat oan wahetì'lek werek kolek, hat hebe e ara eroma hùrek welagen a'naga, an tak neileken hììgì o,” ìlùk yogosikomo 49at Nataniel en he, mel yogosike:
“Noe. Ala aput nit Isirael mene ninoe kain Hetagepogot harat hììgì o,” ìlùk yogosike. 50Atì'nogo yogosikomo, Yesùt en he, mel yogosike:
“An nen,
Hat e ara eroma hùrek welagen a'naga an arat neileken hììgì o, ìlùk, yogohetì atì ba hùthanhen a? Atì re, we hamùlùgat negen hagatenem neegen meneat he, hobuk hùkorogo hagatenem heileken neegein o,” ìlùk isikesik, 51hobuk wene aike mel yogoisasike:
“Apùnì e pelarek obakwe lagagìk, pìgìk, egarek atì hak, hobuk pogot healogo it malaikat Ala nen yoko laksa wagarek mene amanogo, an abat ta'lasi wagagi a'nogo noba lagagìk, pìgìk, ikenem hineileken nisìkì logogun o, ìlùk nane eberogoat yogohisìgì,” ìlùk yogoisasike.
Selectat acum:
YOHANET 1: LAIDNI
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
