KEJADIAN 27
27
Nai Ishak anfe tetus neu Nai Yakub
1Anbi neno mese, leka Nai Ishak namnasi nalali ma in matan anfolo, in anboin Nai Esau, in anmone nael, oke te nak neune nak, “Au anah ko!”
Ma Nai Esau natae nak, “Koi, au Ama.”
2Nai Ishak nak neune nak, “Ho muhin mulali nak au umnasi ma au of ka moni fa lo anteni. 3Es nane te maiti ho aklaot ma ho anef, meki sin amnao nai amli'u man mu'it mese anbi mnela. 4Muhan in nai nok aminat onle au lomi ani, ma meki nem neu kau. Leka au bukae ulali te, of au fe ani tetus neu ko nahun na'ko au fe ka mate fa.”
5Bi Ribka in nen Nai Ishak ma Nai Esau sin molok nane. Es nane leka Nai Esau in nao hen li'u mu'i fui, 6bi Ribka in nak neu Nai Yakub nak, “Au le amnen ulali ho Ama nak neu Nai Esau nak, on i, 7‘Amli'u man mu'i fui mese ma muhan nok aminat neu kau. Leka au bukae ulali, of au fe ani neu ko tetus anbi Uisneno In human In matan, nahun na'ko au fe ka mate fa.’ 8Es nane, au anah ko,” bi Ribka in nak anteni “amnen nai ma mo'e nai sa' le of au ak neu ko le i. 9Amnao nai neu hit bibi kase sin o'of, ma amheke man bibi kase nua le apokat, he nati' au uhan anfani mnahat aminat le ho ama anlomi. 10Nalali te ho meki neu in he in anbukae, ma oke onane te in of anfe neu tetus nahun na'ko in fe kan mate fa.”
11Mes Nai Yakub nak neu in ainaf nak, “Ain, Nai Esau nane in aon nane manafu, mes au kahaf? 12Kaisa-kaisa ama in anpoe au aok ma in nahin nak au fuli in; ma of in kan fe neu kau fa tetus, mes in ansukat kau.”
13In ainaf natae nak, “Au anah, kaisa ho mumtau. Maut he au sutai in sukat nane. Anmo'e nai sa' le au lenu ulali neu ko, amnao nai ma maiti bibi-bibi le nane.” 14Nai Yakub in anao ma naiti bibi-bibi nane ma in neki sin neu in ainaf, oke te bi Ribka in nahan bukae le Nai Ishak anlomi nani. 15Nalali te bi Ribka naiti Nai Esau in blua pake amasat sin, le nabelak sin anbi ume, ma in napakeb neu Nai Yakub. 16In an amu amsa Nai Yakub in niman ma in to'an ai in neon le ka mafunu fa nane, neki bibi in pasun. 17Oke te in anfe mnahat aminat nane nok utunu' le in mo'e nani nane neu Nai Yakub.
18Nalali te Nai Yakub anao neu in amaf ma in nak, “Ama!”
Nai Ishak natae nak, “Ho sekau ko, Nai Esau ai Nai Yakub?”
19Nai Yakub natae nak, “Au Nai Esau kau, au ama ho anmone nae; au ama ho totis nane au mo'e ulali. Amtoko nai ma ambukae nai sisi na'ko mu'i fui le au eki, he nati' au ama amfe mani tetus neu kau.”
20Nai Ishak nak, “Au anah, ho mupeni labah mnahat le i.”
Nai Yakub natae nak, “Natuin Uisneno le au ama ho Uisneno le ho mubes neune es antuntaku kau.”
21Oke te Nai Ishak nak neu Nai Yakub nak, “Ho aum amhaumak kau he au poe ko. Namneo ka ho Nai Esau ko ka?” 22Nai Yakub anhaumak in amaf anpoe in ma in nak, “Ho hanam on Nai Yakub in hanan, mes ho niman on Nai Esau in niman.” 23Nai Ishak ka nahin fa Nai Yakub natuin in niman manafu on Nai Esau in niman. Mes anbi tabu in hen fen Nai Yakub tetus, 24in fe natoti anteni haefes nak, “Namneo ho Nai Esau ko ka?”
Nai Yakub natae nak, “Namneo.”
25Oke te Nai Ishak nak, “Amfe kau sisi nane. Leka au bukae ulali of au fe au tetus neu ko.” Nai Yakub anfe sisi nane neune ma in anfe nani tua min kase kle'o amsa he in ninu. 26Oke te in amaf nak neune nak, “Aum amhaumak kau nai, au anah ko, ma amnek kau nai.” 27Leka Nai Yakub anhaumak he nek in, Nai Ishak nafoi Nai Esau in bael pake in fon, oke te in anfe nani tetus neu in. Nai Ishak namolok nak, “Au anah in fomenin nane onle mnela in fomenin le Uisneno anfe nalali tetus. 28So nati' Uisneno anfe nani oe tene na'ko neno tunan, ma napokab ho lene-lene sin! So In anfe nani neu ko aen kase ma tua min kase nok athoes! 29So ale pah nane anfani ho ate, ma ale uf-uf pah nane nabes neu ko. So nati' ho muplenat ho olif ma ho tataf sin, ma ho ainaf in sufan nane nabes anbi ho humam ma ho matam. Sukat neu ale atoni le ansukat ko, ma tetus athoe neno neu ale atoni le anfe ko tetus.”
Nai Esau antoti he nati' Nai Ishak anfe neune tetus
30Leka Nai Ishak anfe nalali tetus neu in, ma Nai Yakub in nao kun, Nai Esau in anfani nem na'ko bale li'ut. 31In amsa nahan mnahat aminat oke te in neki neu in amaf, ma in nak, “Amfen ma amtoko nai ma ambukae sisi le' au eki neu ko, he nati' ho amfe kau tetus.”
32Nai Ishak natoti nak, “Ho sekau ko ka?”
In natae nak, “Au Nai Esau kau le au Ama ho anmone nael.”
33Nai Ishak in aon anlilitai ok-oke, ma in natoti nak, “Kalu onane, sekau es anli'u nalali mu'i fui ma lelon in neki nem neu kau? Au aiti ma au bukae ulali nahun na'ko ho aum amtia. Oke te au fe ulali au tetus amsoput neune, ma tabu le i tetus nane anfani in-ini talantia nabal-bal.”
34Leka Nai Esau in nen lasi nane, in ankae nahel-helnon ma nahenu nok nek nu'ut, oke te in nak, “Amfe neu kau tetus amsa, koi Ama!”
35Nai Ishak in namolok nak, “Ho olif in nem nalali ma anfuli kau. In ansimo nalali tetus le namneo au he fe ani neu ko.”
36Nai Esau in nak, “Le i hae nua le in anfuli kau. Es nane te namneo in kanan Nai Yakub. In nasik nani au pa' anfani li'anmone nael, ma tabu le i in ansimo nani tetus le anfani au ini. Au Ama oin ho ka mu'im teni fa tetus bian neu kau ka?”
37Nai Ishak natae nak, “Au mo'e ulali in anfani on ho usi, ma in olif tataf sin au mo'e sin anfani in ate. Au fe ulali neune aen kase ma tua min kase. Tabu le i kan mu'in teni fa sa'-sa' le au he mo'e neu ko, au anah!”
38Nai Esau ka nas-nas fa hen toti neu in amaf nak, “Ai al ho mu'i tetus mese Ama? Amfe neu kau tetus amsa, Ama!” Oke te in ankae anteni.
39Oke te Nai Ishak nak neune nak,
“Of kan mu'i teni fa oe tene na'ko neno tunan neu ko,
ma ho lene of ka maafa fa.
40Of ho moni mu'ko ho suni,
mes of hom aetnom neu ho olif,
mes leka ho maban mok in,
of ho mufetnom mu'ko in kuasat.”
41Es nane te Nai Esau in nek nanan Nai Yakub natuin in anfe nalali tetus neu in olif. In natenab nak, “Ka lo fa anteni Ama of anmate ma leka haim kae ma amkul milali, of au umate Nai Yakub!”
Nai Ishak anlenu Nai Yakub anao neu Nai Laban
42Leka bi Ribka in nen Nai Esau in sali' nane, in anlenu ma no'en Nai Yakub ma nak, “Amnen nai, ho tataf Nai Esau natenab hen seunbanin in nek nanan ma he namate ko. 43Anmo'e nai sa' le au lenu ko le' i. Amnao nai neu au tataf Nai Laban anbi Haran, 44ma mumaika mok in tabu fauk-fauk in nanan, talantia ho tataf in to'as nane anain, 45ma in nikan sa' le ho mo'e mulali neu in. Nalali te of au lenu atoni he neki ko amfain aum. Au ka lomi fa he uneku au anah sin nuasin anbi neno mese.”
46Es nane te bi Ribka nak neu Nai Ishak nak, “Au len ma makan leka au kiso Nai Esau in fenainu na'ko uf atoni anao amnemat nane. Leka Nai Yakub amsa in anmafe anteni nok li'feto Het, leko nesi au mate nai.”
Selectat acum:
KEJADIAN 27: AOZ
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te