Lukas 23
23
1Unkan wicota kin owasin najin hiyayapi, qa Pilate kayapi.
2Hehan hinnakaha wiyaonpapi, qa heyapi; De oyate kin owicayuśice, c̣a Kesar wamnayanpi qupi kin he teḣinda iyeunyanpi; qa iye Messiya Wicaśtayatapi kin heca keic̣iya ce, eyapi.
3Unkan Pilate wiwange c̣a heya; Juda Wicaśtayatapi kin he niye he. Unkan ayupte, c̣a, Niye ecen eha ce, eya.
4Hehan Pilate wawayuśna itancanpi qa oyate kin hena hewicakiya; Wicaśta kin de on taku śica iyewaye śni ce.
5Unkan hecen iyotan wohitipike c̣a heyapi; Oyate kin owodutatonwicaya ece, qa Galile etanhan Juda makoce kin owancaya dehan oiyahdeya waonspekiya ece.
6Unkan Pilate Galile eyapi naḣon qehan, wicaśta kin he Galile wicaśta kin heca hecinhan he iwicawanga.
7Unkan Herod taoyate kin hetanhan e Pilate sdonya, hehan Herod ekta iyayeya; he qe wanna Jerusalem en un.
8Herod Jesus wanyake c̣ehan nina iyuśkin; taku ota on naḣon kin heon wanakajatanhan wanyaka cin; qa wowapetokeca wanji econ wanyake kta kecin.
9Hehan iapi ota un wiwanga; tuka takudan ayupte śni.
10Unkan wawayuśna itancanpi, qa wowapi kagapi kin, hena inajinpi, qa wohitiya wiyaonpapi.
11Unkan Herod ozuye wicaśta wicayuhe cin om takuda śni, qa iḣaha kuwa, qa śina wan ayucopi in kiye, c̣a ake Pilate ekta iyayeya.
12Unkan anpetu kin he en Herod Pilate kici kiciyuwaśtepi; he itokamya tokakiciyapi.
13Unkan Pilate wawayuśna itancanpi, qa itancanwicakiyapi, qa oyate kin hena witaya wicakico qehan, hewicakiya;
14Wicaśta kin de oyate kin owicayuśice cin wan iyecen mayakahipi; unkan iho nitokam Iwanmdaka, tuka taku iyayaonpapi kin hena on, taku śica wicaśta kin de en takudan iyewaye śni.
15Qa nakun Herod hee kaeś, ekta aye ciśipi; unkan iho, ṭe kte cin iyecece cin takudan ecakiconpi śni.
16Hecen wakapsinpsinte, c̣a wakimduśke kta ce, eya.
17Wotapi kin he icunhan wicaśta wanji wicakiciyuśke kta e heon.
18Unkan owasin okonwanjidan heya niyanpi; De tokan aya wo; qa Barabbas hee unkiciyuśka miye.
19He qe otonwe kin en wokipajin kage, c̣a tinwicakte on, etanhan kaśka wicahnakapi tipi kin en ohnakapi.
20Pilate Jesus kiyuśke wacin kin heon ake iyecen ewicakiya.
21Tuka howayapi qa heyapi; Icipaweḣ okatan wo, icipaweḣ okatan wo.
22Unkan iyamni hewicakiya; Tokeca, tukte ecin taku śica econ he. On etanhan ṭe kte cin iyececa takudan iyewaye śni; hecen wakapsinpsinte, c̣a wakimduśke kta ce, eya.
23Unkan hotankakiya kitanpi, icipaweḣ okatanpi kta e hekapi. Unkan iye hopi kin, wawayuśna itancanpi kin om iyakapeyapi.
24Hecen token cinpi kin he iyecen Pilate kiconza.
25Qa tuwe cinpi kin wokipajin kage, c̣a tinwicakte qon, hee wicakiciyuśke; tuka iye tawacinpi kin en Jesus wicaqu.
26Unkan tokan yus ayapi qehan, Kurene wicaśta wan Simon eciyapi makoce kin eciyatanhan u kin he yuzapi, qa cansusbeca kin he Jesus ihakam qin kta e aiḣpeyapi.
27Unkan oyate kin wicota ḣinca winoḣinca ko iyahna yapi, qa waśihda aceyapi.
28Tuka Jesus ekta ihduhomni qa hewicakiya; Jerusalem cunwintkupi kin, miye amaceyapi śni po; tuka niyepi qa nicincapi kin aic̣iceya po.
29Iho, anpetu hiyohi kte cin hena en heyapi kta; Hokśin yuhapi śni, qa wicitpi tohinni cincaton śni, qa aze tohinni azinpi śni kin hena yawaśtepi ce.
30Hehan hinnakana ḣe kin, Unkahinḣpaya po, qa paha kin, Unkaḣpa po, eciyapi ece e kta.
31Qa can teca kin en deceneconpi kinhan, can śeca kin en token econpi kta he, eya.
32Unkan wicaśta tokeca nonpa, oḣan śicapi kin, hena wicaktepi kta e kici awicayapi.
33Unkan tukten Wicapahu eciyapi kin wanna ehan ipi qehan, hen icipaweḣ okatanpi, qa nakun wicoḣan śica econpi qon hena, unma iye etapa eciyatanhan, qa unma kin iś catka tanhan.
34Hehan Jesus heya; Ate, wicakicicajuju wo; taku tokonpi kin sdonkiyapi śni ce. Unkan tawokoyake kin kicipamnipi, qa oeconna econpi.
35Unkan oyate kin opaḣta najin hiyeya: Qa itancanwicakiyapi kin iś eya hena om iḣaḣapi qa heyapi; Wicaśta tokeca niwicaya ece qon; iye atayedan niiciya eśta śni, Messiya Wakantanka hdaḣnige cin hee hecinhan.
36Unkan akicita kin iś eya iḣaḣapi, en au, qa miniskuya kipazopi;
37Qa heyapi; Juda wicaśtayatapi kin he niye hecinhan, niic̣iya wo.
38Unkan iwankam wowapi kin de, Helenes qa Roma qa Hebrew iapi henakiya en owapi; JUDA WICAŚTAYATAPI KIN HE DEE CE.
39Unkan oḣan śicapi en owicakatanpi qon wanji śicaya owakiye c̣a heya; Messiya he niye hecinhan niic̣iya wo, qa unkiś nakun.
40Tuka unma kin waayupte c̣a kiśice c̣a heya; Wakantanka koyakipe śni he; wicayacopi okonwanjidan kici en yaun:
41Qa unkiye kin en he owotanna; taku econku eciyatanhan unkakipa ece; tuka iye qe taku śica takudan econ śni ce.
42Unkan hehan Jesus heciya; Itancan, wokiconze nitawa kin en yaku kinhan, miksuya wo.
43Unkan Jesus heciya; Anpetu kin de en wowaśte makoce kin en mici yaun kta ce, awicakehan eciciya.
44Wanna wihiyayedan oape śakpe hehantu; unkan makoce kin owancaya aotpaza, napcinwanka apa hehanyan.
45Qa anpetu wi kin otpaza icu, qa tipi wakan kin en miniḣuha ozanzan hiyeye cin he cokaya okinaḣdeca.
46Unkan Jesus hotankakiya hoyekiye c̣ehan, hehan heya; Ate, ninape kin en minagi kin owehnaka ce. Unkan hecen eye c̣ehan ṭa iyaya.
47Unkan akicita opawinge wicayuhe cin he token econpi qon he wanyake c̣ehan, Wakantanka yaonihan, qa heya; Awicakehan wicaśta owotanna he de heca ce.
48Unkan oyate kin witaya he wanyag ahi qon, hena owasin token econpi qon hena wanyakapi qehan, maku kin ohnahna aicipapi, qa kihdapi.
49Unkan tona sdonyapi qon hena owasin itehan inajinpi, qa winoḣinca Galile etanhan ihakam upi qon hena taku kin dena wanyakapi.
50Unkan iho, wicaśta wan Joseph eciyapi, wahokonwicakiya ece kin heca, wicaśta waśte qa owotanna;
51He iye kin wakiconzapi qa oḣanpi qon wicawicada śni: Arimathea, Juda totonwepi kin wanji hee etanhan; iś eya Wakantanka tokiconze kin he ape un.
52He Pilate ekta ye c̣a Jesus tancan kin kida.
53Unkan kun eyaku, qa miniḣuha ska opazunte, c̣a imnija kaḣdokapi wicasta hnakapi wanen ohnaka; he itokam tuwedan en ohnakapi śni.
54Unkan anpetu en ihduwiyeyapi ece kin he hee, qa anpetu wakan kin wanna ikiyedan.
55Unkan winoḣinca Galile etanhan kici upi qon hena ihakam iyayapi, ohna hnakapi kin he, qa tancan kin token hnakapi kin hena wanyakapi.
56Qa hetanhan kihdapi, qa pejihuta waśtemna ihepi ko wiyeya ehnakapi. Hehan woahope kin eciyatanhan anpetu wakan kin okiḣpapi.
Selectat acum:
Lukas 23: DAKOTANT
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Copyright 2015 American Bible Society. All Rights Reserved.
