Lukas 22
22
1Unkan aguyapi napoḣyapi śni yutapi woacakśin eciyapi kin, he wanna ecadan iyehantu kte.
2Unkan wawayuśnapi itancanpi, qa wowapi kagapi kin, hena token econpi, qa ṭeyapi kte cin he akitapi; tuka oyate kin kowicakipapi.
3Unkan akenonpapi kin etanhan, wanji Judas Iskariot eciyapi kin he Satan tancan mahen iyaya.
4Unkan he ekta ye c̣a, wawayuśna itancanpi, qa akicita itancanpi kin hena om wohdaka, token econ qa wicaqu kte cin heon.
5Unkan iyuśkinpi, qa mazaska qupi kta keciyapi.
6Hecen wicada, qa wicota kin en unpi śni icunhan wicaqu kta akita.
7Unkan aguyapi napoḣyapi śni anpetu en woacakśin ktepi kte cin wanna hehantu.
8Hehan Inyan qa Johannes ye wicaśi qa heya; Ya po, woacakśin untapi kte cin ho wiyeya unkicihnaka po.
9Unkan heciyapi; Tukten wiyeya unhnakapi kta yacin he.
10Unkan hewicakiya; Otonwe kin en yaipi kinhan, wicaśta wan wakiśkokpa mini ohnaka yuha itkonicipapi kta; iho, iye tukten tin kihde cinhan, iyahna ya po.
11Qa tipi tawa kin heciya po; Waonspekiye cin heniciya ce; Wotapi tipi ohna woacakśin kin he waonspewicawakiye cin om wate kte cin he tukte e he.
12Kinhan, wankan tipi wan tankaya, qa ayucopi e nicipazopi kta; hen wiyeya hnaka po, eya.
13Unkan iyayapi, qa token ewicakiye ciqon ecen iyeyapi; qa woacakśin wiyeya hnakapi.
14Unkan wanna iyehantu qehan, en iyotanka, qa wahośiyapi akenonpapi kin nakun.
15Unkan hewicakiya; Makakije kte cin he itokamya woacakśin kin de untapi kte cin nina wacin qon.
16Qa heciciyapi ce; tohan Wakantanka tokiconze kin ekta yuecetupi śni kin, hehanyan detanhan ake wate kte śni ce, eya.
17Unkan miniyatkan kin he icu, qa wopida eye c̣a heya; De icupi qa kicipamni po:
18Qa heciciyapi ce; Wakantanka tokiconze kin he tohan hiyohi śni kin, hehanyan hastanhanka iyuwi waskuyeca kin etanhan mdatke kte śni ce, eya.
19Unkan aguyapi kin icu, qa wopida eye, c̣a yuśpaśpa, qa wicaqu, qa heya; Mitancan niyepi on qupi kin he dee ce; decen miksuya econ po.
20Unkan miniyatkan kin iś eya wotapi iyohakamya wicaqu, qa heya; Mawe niyepi kin on papsonpi kin, en okodakiciye teca kin, miniyatkan kin he dee ce.
21Tuka iho, wiyopemaye kte cin he nape kin wahna wotapi kin akan miciun.
22Unkan Wicaśta Cinhintku kin token kiconzapi qon ecen ye kta e hecetu; tuka tuwe he wiyopeya hecinhan he wicaśta kin woteḣi kiciyanka ce.
23Unkan hinakaha iye iyakitedan tukte wanji hecon kte cin he ikiciwanḣ yeyapi.
24Unkan tukte wanji iyotan yawapi kte cin he nakun hdokinicapi.
25Unkan hewicakiya; Oyate kin wicaśtayatapi wicayuhapi kin hena iś iwicadakapi, qa tona wicookihiya owicakiḣanyanpi kin hena ohanwaśtepi, ewicakiyapi ece.
26Tuka niś henicecapi kte śni; tuka niyepi kin ekta tukte wanji tokapa kinhan, hee hakakta kin iyecece kta ce.
27Wota yanke cin, qa wayutankiyapi kin, hena unma tukte iyotan tanka he. Tuwe wota yanke cin hee śni he. Tuka miś wayutankiyapi kin he iyecen cicipi waun ce.
28Wawiyutanmayanpi kin en kici maunpi kin he niyepi:
29Heon Atewaye cin he wokiconze wan maqu kin he iyecen cic̣upi:
30Qa hecen wokiconze mitawa kin en, wahna wotapi mitawa kin ekta wayatapi, qa wadatkanpi kta; qa wicaśtayatapi oyanke kin heca akan idotankapi kta, qa Israel wicoun akenonpapi kin wicadacopi kta ce.
31Hehan Itancan kin heya; Simon, Simon, iho, Satan niyuhe c̣a, aguyapi su iyecen niyucan kta e cin tuka ce.
32Tuka wacinyaye cin he iyotpani kte śni e wocekiye eciciya; qa tohan niś niyuhomnipi kinhan, nihunkawanji wicahduwaśaka wo, eya.
33Unkan heciya; Itancan, wicokaśke wiconṭe ko en nici mde kta wiyeya waun ce.
34Unkan heya; Simon, anpetu kin de anpaohotonna hoton śni, ecen yamni akihde sdonmayaye cin he anayakiḣbe kta, eciciya ce.
35Unkan hewicakiya; Mazaska ojuha, qa wojuhadan, qa hanpa, hena codan yeciśipi qon he ehan, taku wanjidan kaeś iniciyotpanipi he. Unkan, Takudan śni ce, eyapi.
36Hehan hewicakiya; Tuka nakaha tuwe mazaska ojuha ton kinhan, ehdaku kta; qa wojuhadan nakun: qa tuwe mazasagye nice cinhan, wokoyake tawa kin wiyopekiye, c̣a wanji opeton kta.
37Taku wowapi en kagapi qon, Wicoḣan śica econpi kin om yawapi ce, eyapi kin he miye en yuecetupi kta, eciciyapi: Unkan dena miye on ecen econpi kta ce.
38Unkan heciyapi; Itancan, wanyaka wo, den mazasagye nonpa ce. Unkan, Henakeca ce, ewicakiya.
39Unkan tankan hdicu, qa Oliwe paha kin ekta i ece qon, he ake ekta ya; unkan waonspewicakiye cin iś iyahna yapi.
40Unkan wanna ehan i qehan, hewicakiya; Wowiyutanye kin en idadapi kte śni e cekiya po.
41Hehan wicicunonpa inyan ekta eḣpeyapi kin hehanyan ecen i, qa canpeśka makehde inajin qa cekiya,
42Qa heya; Ate hecen nitawacin kinhan, miniyatkan kin de tokan imiciyaye kta; tuka miye mitawacin kin hee śni, niye nitawacin kin hee ecen econpi nunwe.
43Hehan maḣpiya eciyatanhan ohnihde wan en hi qa yuwaśaka.
44Unkan nina ḣin yazanhda qehan, iyotan wokitanyan cekiya; qa temni kin he we ośbuye tankinkinyan makata hinḣpaya se ececa.
45Unkan cekiye cin hetanhan wanna najin hiyaye, c̣a waonspewicakiye cin en wicahdi qehan, wacin iyokiśicapi kin on iśtinmapi iyewicaya.
46Qa hewicakiya; Tokeca niśtinmapi he: najinpi qa cekiya po; hecen wowiyutanye kin en yaipi kte śni.
47Hena hecen eya icunhan, iho, wicota, qa akenonpapi kin etanhan wanji Judas eciyapi kin, he wicitokam u, qa Jesus i iputake kta e ikiyedan hiyu.
48Tuka Jesus heciya; Judas, Wicaśta Cinhintku kin i iputakapi wan on wicayaqu he.
49Unkan kici unpi qon hena, taku toketu kte cin wanna wanyakapi qehan heciyapi; Itancan, mazasagye on waaunpapi kta he.
50Unkan wanji wawayuśna itancan taokiye wanji ape, c̣a etapa kin eciyatanhan noge kin kaśpa.
51Unkan Jesus waayupte c̣a, Hehanyan iyowinmakiya wo, eye c̣a noge yutan, qa asniyan.
52Hehan Jesus wawayuśna itancanpi, qa tipi wakan kin en itancanpi, qa tokapapi en au qon, hena hewicakiya; Mazasagye can ko yuha wamanon sa wan tatpe yapi se iyecen yahipi he.
53Anpetu iyohi tipi wakan kin ohna opeya ciunpi qon ehan, tuwedan nape kin itkom hiyumayakiyapi śni; tuka dehan nakaha kin he niye nitawapi, qa otpaza wowaśake kin, eya.
54Hehan yuzapi qa ayapi, qa wawayuśna itancan ti kin ekta aipi. Unkan Inyan itehan ihakam u.
55Unkan itankan tipi kin en cokaya cetipi, qa ptaya iyotankapi qehan, Inyan iś eya wicehna iyotanka.
56Tuka petkahda iyotankehan yanke cin, hehan wikośka wan wanyake c̣a, opaḣte c̣a heya; Wicaśta kin de iś eya he kici un tuka ce, eya.
57Unkan anakiḣbe, c̣a, Winoḣinc̣a, he tuwe kin sdonwaye śni ce, eya.
58Unkan iecadan wanji tokeca wanyake c̣a heya; Niś eya henitannan ce. Unkan Inyan heya; Wicaśta, hematanhan śni ce.
59Unkan iyohakam wihiyayedan oape wanji ecetu, hehan wanji tokeca yaaṭinze c̣a heya; Galile wicaśta kin de heca, on etanhan awicakehan iś eya he kici un tuka ce.
60Unkan Inyan heya; Wicaśta, token ehe cin he sdonwaye śni ce. Unkan hecehnana, iahan icunhan, anpaohotonna kin hoton.
61Unkan Itancan kin ihduhomni, qa Inyan atonwan. Hehan Itancan kin, Anpaohotonna hoton śni kin itokam yamni akihde anamayakiḣbe kta ce, eye ciqon, oie kin he Inyan kiksuya.
62Hehan Inyan tankan kihde c̣a nina ḣin ceya.
63Unkan wicaśta Jesus yus unpi kin hena iḣaḣapi qa apapi.
64Qa ite kin akaḣpetonpi hehan, ite kin ohna apapi, qa heya iwangapi; Tuwe anipa hecinhan ito iyukcan wo.
65Qa taku toktokeca ota itkom waośtehdaya eciyapi.
66Unkan wanna anpao qehan, oyate kin en tona tokapapi, qa wawayuśna itancanpi, qa wowapi kagapi kin, hena mniciyapi, qa omniciye kin en aupi;
67Qa heyapi; Messiya he niye hecinhan unkokiyaka po. Unkan hewicakiya; Ociciyakapi eśta wicayadapi kte śni.
68Qa wiciwangapi eśta amayaduptapi kte śni, qa amayaduśtanpi kte śni.
69De iyohakam Wicaśta Cinhintku kin Wakantanka towaśake etapa kin eciyatanhan iyotanke kta ce, eya.
70Unkan owasin heyapi; Hecen Wakantanka Cinhintku kin he niye he. Unkan, He miye kehapi ce, ewicakiya.
71Unkan heyapi; Iye i kin eciyatanhan unkiyepi ḣinca wanna naunḣonpi ce; hecen tokeca ecin sanpa wayaotaninpi unkodepi kta he.
Selectat acum:
Lukas 22: DAKOTANT
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Copyright 2015 American Bible Society. All Rights Reserved.
