Johannes 6
6
1Hena iyohakam Jesus Galile mde kin, he nakun Tiberias mde kin ee, he akasanpa iyaya.
2Unkan oyate ota ihakam yapi, wicaśta wayazanpika en wapetogya oḣanyan wanyakapi qon heon etanhan.
3Unkan Jesus paha wan ekta iyaya, qa waonspewicakiye cin om akan iyotanka.
4Unkan woacakśin, Juda oyate wośnapi tawapi wan, he wanna ikiyedan ihan.
5Jesus iśta yuwankan ikikcu, qa wicota iye yanke cin en au wanwicayake c̣ehan, Philip heciya; Aguyapi dena yutapi kte cin tokiyatanhan opeuntonpi kta he.
6He yukcan kta on etanhan heciya; token econ kte cin he sdonkiya tuka.
7Hehan Philip ayupte; Kaśpapidan opawinge nonpa aguyapi iyopeyapi, qa otoiyohi cikcistinna icupi eśta, nakun iyowicahi kte śni ce, eya.
8Hehan waonspewicakiye cin wanji, Simon Inyan sunkaku, Andrew eciyapi, he nakun heciya;
9Psin ska aguyapi zaptan qa hogan nom hena den hokśidan wan yuha: tuka wicota qa henana on token ḣanpica he.
10Unkan, Wicaśta kin iyotanke wicaśi po, Jesus eya. He en peji ota. Wicaśta kin hena iyotankapi, unkan kektopawinge zaptan iyecetu.
11Hehan Jesus aguyapi kin hena icu qa yawakan, qa waonspewicakiye cin wicaqu; unkan waonspewicakiye cin iyotang hiyeye cin wicakipamnipi; qa nakun hogan tohanyan cinpi kin.
12Unkan imnanpi hehan waonspewicakiye cin hewicakiya, Oyaptapi kin hena pahi po, hecen takudan atakuni kte śni.
13Unkan psin ska aguyapi oyaptapi qon he etanhan makanopiye ohnaka ake nonpa pahipi; wotapi etanhan iwicakiciyaye cin hena ee.
14Taku wapetogya Jesus econ kin oyate kin wanyakapi, qa heon heyapi, Wicaśta wokcan itancan oyate en hi kta keyapi qon he wanna dee.
15Oyate kin Jesus icupi, qa wicaśtayatapi kaḣ wacinpi e sdonkiya, qa paha kin icunonpa akan iśnana iyaya.
16Unkan wanna ḣtayetu hehan waonspewicakiye cin mde kin ektakiya yapi;
17Qa wata wan en opapi qa mde kin he opta yapi, Kapernaum heciya i wacinpi. Unkan otpaza tuka nahanḣin Jesus ekta wicahi śni.
18Unkan tateyanpa ḣinca, on etanhan mde kin nina taja aya.
19Unkan wiyutapi wikcemna nonpa sam zaptan, qa iś wikcemna yamni hehanyan watopapi, hehan wata kin ikiyedan Jesus mini kin amani u wanyakapi; unkan yuśinyayapi.
20Tuka, He miye ce, ihnuhan koyakipapi kin do, ewicakiya.
21Hehan iyokipiya wata kin en iyowinkiyapi; unkan tokiya yapi qon, wata kin kohanna he en ihunni.
22Ihanḣanna hehan oyate mde kin icahda yukanpi kin, hen wata wanica, wanji waonspewicakiye cin en opapi qon heceyedan, qa Jesus waonspewicakiye cin om wata kin en ope śni, tuka waonspewicakiye cin iśnana iyayapi, he wanyakapi:
23Tuka Jesus aguyapi yawakan qa yutapi qon he en ikiyadan Tiberias eciyatanhan wata toktokeca en hipi.
24Oyate kin Jesus waonspewicakiye cin om he en yukanpi śni wanyakapi, unkan oyate kin wata kin hena en opapi qa mde kin opta yapi, Jesus Kapernaum heci un kin he akin yapi.
25Unkan mde kin akasanpa hen iyeyapi qehan, heciyapi; Itancan tohinni den yahi he.
26Jesus awicayupte c̣a heya; Wowicake, wowicake eciyatanhan heciciyapi, Omayadepi kin he taku wapetokeca wandakapi kin heon hecanonpi śni, aguyapi imnahan yatapi qon e heon.
27Taku yutapi on wicatakuni śni heon ḣtanipi śni po; tuka taku yutapi owihanke wanin wiconi hehanyan kte cin hee on ḣtani po, he Wicaśta Cinhintku kin nic̣upi kta; Wakantanka Ateyapi kin wanna he askamton.
28Hehan heciyapi; Token econkupi kta, on Wakantanka toḣan kin unkoḣanyanpi kta he.
29Jesus waayupte c̣a hewicakiya; Wakantanka wicoḣan tawa kin he dee, tuwe u śi kin he wicayadapi kta.
30Heon etanhan heciyapi; Taku wapetokeca ecanon kin tukte e heon, wanunyakapi qa wicaunnidapi kta; taku yakaga he.
31Hunkake wicunyanpi kin eya wanna ḣewoskan manna yutapi qon; Maḣpiya eciyatanhan aguyapi yutapi kta e wicaqu ce, eya owapi qon he iyececa.
32Unkan Jesus hewicakiya; Wowicake, wowicake eciyatanhan heciciyapi; Moses aguyapi kin he maḣpiya kin eciyatanhan nic̣upi śni; tuka Atewaye cin he aguyapi wowicake kin maḣpiya eciyatanhan nic̣upi.
33Aguyapi Wakantanka tawa kin he tuwe maḣpiya eciyatanhan kuntkiya u, qa oyate wiconi wicaqu kin hee.
34Unkan, Eca Itancan, aguyapi kin he ohinniyan unqu po, eciyapi.
35Tuka Jesus hewicakiya; Aguyapi wiconi kin he miye ce. Tuwe en mau kinhan wotektehda śni un kta; qa tuwe wicamada kinhan ipuza śni un kta.
36Eya wanna wanmayadakapi, tuka wicamayadapi śni e, eciciyapi qon.
37Ate tona maqu kin owasin miye en mau kta; qa tuwe en mau kinhan tankan iyewaye kte śni.
38Maḣpiya eciyatanhan wahi kin, he mitawacin owape kte śni, tuwe u maśi kin he tawacin owecipe kta.
39Atewaya u maśi kin he tawacin kin he dee, tona maqu kin wanjidan toki eḣpewaye śni, ecen anpetu ihankeya kin piya icaḣwaye kta.
40Tuwe u maśi kin he tawacin kin he dee, toma Cinhintkuyapi kin he wanyake c̣a wicada kin hena owihanke wanin wiconi yuhe kta, qa anpetu ihankeya kin he en piya icaḣwaye kta.
41Heon Juda oyate kin ajijipi; Aguyapi maḣpiya eciyatanhan kun u kin he miye ce, eye ciqon heon etanhan.
42Qa heyapi; Jesus Joseph cinhintku qon he dee śni he, atkuku hunku ko sdoawicunyanpi ce: hecen token, Maḣpiya eciyatanhan wahi ce, eya okihi he.
43Heon Jeans waayupte c̣a hewicakiya; Niye iyakitedan waajijipi śni po.
44Tuwedan iye cinka en mau kte śni, Ate u maśi qon tuwedan en au śni kinhan, qa anpetu ihankeya kin en piya icaḣwaye kta.
45Unkan owasin Wakantanka eciyatanhan onspewicakiyapi kta ce, wicaśta wokcan kin en cya owapi qon. Heon tona Ate waonspewicakiye c̣a anagoptanpi kin hena owasin en maupi kta.
46Tuwedan Ateyapi kin tohinni wanyake śni, tuwe Wakantanka etanhan u kin hecedan Atkuku wanhdaka.
47Wowicake, wowicake eciyatanhan heciciyapi, Tuwe miye wicamada kinhan, he owihanke wanin wiconi yuhe kta.
48Aguyapi wiconi he miye.
49Nihunkakepi kin ḣewoskan manna yutapi, tuka ṭapi.
50Maḣpiya eciyatanhan aguyapi hi kin he dee, tuwe etanhan yute cinhan ṭe kte śni.
51Aguyapi ni un kin he miye, maḣpiya eciyatanhan wahi; tuwe etanhan yute cinhan owihanke wanin ni kta. Aguyapi wicawaqu kte cin he miceḣpi kin ee, he oyate wicani kta e wicawaqu ce, eya.
52Wicaśta kin de iye ceḣpi etanhan unqupi qa untapi kta heye cin, he token okihi kta e heya he, Juda oyate iyakitedan eya hdokinicapi.
53Hehan Jesus hewicakiya; Wowicake, wowicake eciyatanhan heciciyapi; Wicaśta Cinhintku kin ceḣpi etanhan yatapi śni, qa we kin datkanpi śni kinhan wiconi takudan en niunpi kte ini.
54Tuwe miceḣpi etanhan yute c̣a mawe yatke cinhan owihanke wanin wiconi yuha ece, qa anpetu ihankeya kin en piya icaḣwaye kta.
55Miceḣpi kin he woyute otancanke, qa mawe kin he woyatke otancanke.
56Tuwe miceḣpi yute c̣a mawe yatke cin he mici un, qa miś kici waun.
57Ate u maśi kin he ni un, qa Ate on ni waun, he etanhan tuwe mayute cinhan miye on ni un kta.
58Aguyapi maḣpiya eciyatanhan hi kin he dee. Nihunkakepi manna yutapi qon de iyecece śni, he yutapi tuka ṭapi. Tuwe aguyapi kin de etanhan yute cinhan owihanke wanin ni kta ce, eya.
59Kapernaum en omniciye tipi kin he ohna waonspekiya icunhan hena hecen eya.
60Heon etanhan waonspewicakiye cin ota he naḣonpi qehan, Wicoie kin de teḣika ce, tuwe e naḣon okihi kta he, eyapi.
61Unkan Jesus waonspewicakiye cin hena heya ajijipi kin, iye atayedan sdonye c̣a hewicakiya; Tokeca de iyanipaṭopi he.
62Wicaśta Cinhintku kin wankan un qon ake ekta kihde c̣a, wandakapi kinhan, tokeca kta he.
63Woniya kin he wiconi kaga ece, wicaceḣpi kin takudan okihi śni. Wicoie eciciyapi kin hena woniya qa wiconi kin hee.
64Tuka wanjikji he wicayadapi śni. Otokahe ekta tanhan tona wicadapi kte śni, qa nakun tuwe wiyopeye kte cin hena Jesus sdonya.
65Unkan heya; He etanhan heciciyapi qon, Tuwedan iye cinka en mau okihi kte śni, tuwe Atewaye cin he qu kinhan heceyedan okihi kta.
66Hecetu, unkan heon waonspewicakiye cin ota ayuśtanpi, qa icimana ihakam yapi śni.
67Hehan Jesus akenonpapi kin, Niś eya yahdapi kta he, ewicakiya.
68Unkan Simon Inyan ayupte; Itancan, tuwe ekta unyanpi kta he; owihanke wanin wiconi wicoie duhe cin;
69Qa Messiya Wakantanka ni un Cinhintku kin he niye e wicaundapi qa sdonunyanpi ye, eya.
70Unkan Jesus awicayupte; Akeninonpapi kin miye cicaḣnigapi śni he; tuka wanji wakanśica yaunpi ce, eya.
71Simon cinhintku Judas Iskariyot he ke c̣a hecen eya. Ake nonpapi kin he etanhan tuka he wiyopeye kte cin ee.
Selectat acum:
Johannes 6: DAKOTANT
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Copyright 2015 American Bible Society. All Rights Reserved.
