Johannes 5
5
1Hehan iyohakam Juda oyate omniciye wan kagapi he icunhan Jesus Jerusalem he en i.
2Jerusalem en taḣinca wanunyanpi tiyopa kin he en ikiyadan, mini kiwitayapi, Hebrew iapi Bethesda eciyapi, zaptankiya aohanziya hdepi.
3Hena ohna wicaśta wayazanka ota, huśte, iśta gonga, ṭaṭaka ko ota en raakan hiyeya, mini śkanśkan ape hiyeya.
4Tohan iyehantu eca, maḣpiya ohnihde wan mini kin en hi qa śkanśkanya ece. Tokiya yazan kin owasin tohan mini in he śkanśkan eca tuwe tokaheya en iyoḣpeic̣iya eca asni ece.
5Wicaśta wan he en wanka, waniyetu wikcemna yamni sanpa śahdogan hehanyan wayazanka.
6Wicaśta kin he makata wanka, wanakaja tanhan wayazanka Jesus wanyaka, qa, Anisni kta yacin he, eciya.
7Wicaśta wayazanke cin heciya; Itancan, mini kin śkanśkan keś tuwedan en iyoḣpemaye śni; en mde kta keś tuwe tokeca mitokam en iyeic̣iya ece.
8Najin, owinja ehdaku qa mani wo, Jesus eciya.
9Unkan ecahankeya wicaśta kin akiśni, qa owinja kin ehdaku, qa mani. Unkan anpetu kin he anpetu wakan.
10Heon etanhan Juda oyate kin wicaśta asniyanpi qon heciyapi; Nakaha anpetu wakan; owinja yec̣in kin he hecetu śni ce.
11Tuwe asnimaye cin he, Owinja ehdaku qa mani wo, emakiya ce, ewicakiya.
12Hehan, Wicaśta kin, Owinja ehdaku qa mani wo, eniciye cin he tuwe he, eya iwangapi.
13Tuka wicaśta asniyanpi kin he tuwe kin sdonye śni: he icunhan wicota hen unpi hecen Jesus icunonpa iyaya.
14Hehan iyohakam tipi wakan en wicaśta kin he Jesus wanyaka, unkan, Wanyaka ye, wanna anisni; icimana waḣtani śni wo; okinni ake taku wanji śica sanpa tanka iyanihde kta ce, eciya.
15Unkan wicaśta kin he kihde c̣a, Tuwe asniye ciqon he Jesus ee, Juda oyate owicakiyaka.
16Heon etanhan Juda oyate Jesus kuwa ayapi, qa anpetu wakan kin icunhan hena econ kin heon ṭeyapi kta e akitapi.
17Unkan, Ate nahaḣin ḣtani he etanhan miśeya ḣtawani, Jesus ewicakiya.
18Unkan Juda oyate hehan iyotan Jesus ṭeyapi kta sanpa akitapi, anpetu wakan botica, qa nakun Wakantanka atayedan Ateya keic̣iye cin, Wakantanka kici akiyecen ihdawa kin, heon etanhan.
19Unkan Jesus waayupte c̣a hewicakiya; Wowicake, wowicake eciyatanhan heciciyapi, Cinhintkuyapi kin takudan iye cinka econ kta okihi śni; Ateye cin taku econ wanyaka eca, hehan Cinhintku kin iś eya iyecen econ ece.
20Ateyapi kin Cinhintku waśte kidake cin heon taku econ kin hena owasin onspekiya; qa nakun ceś wicoḣan dena sanpa tanka onspekiye kta, hecen ininihanpi kta.
21Ateyapi kin tuwe ṭa keś niye c̣a wiconi wicaqu ece; he iyecen Cinḥintku kin iś tona cin kinhan wiconi wicaqu ece.
22Nakun Ateyapi kin tuwedan yaco śni, tuka woyaco owasin Cinhintku kin qu.
23Heon etanhan owasin Ateyapi kin token ohodapi hecinhan he iyecen Cinhintku kin ohodapi kta. Tuwe Cinhintku kin ohoda śni kin he Atkuku u śi kin he nakun ohoda śni.
24Wowicake, wowicake eciyatanhan heciciyapi, Tuwe mioie kin anagoptan, qa u maśi kin he awacin kinhan, owihanke wanin wiconi yuhe kta; qa woyaco en i kte śni, wanna wiconṭe etanhan wiconi ekta e i.
25Wowicake, wowicake eciyatanhan heciciyapi, Anpetu wan u qon wanna hi, wicaśta ṭa tona Wakantanka Cinhintku ho kin naḣon kta; qa tona naḣon kinhan hena ni kta.
26Ateyapi kin iye cinka wiconi hduha, he etanhan Cinhintku kin iś iye cinka wiconi hduhe kta e qu.
27Qa nakun wowaśake woyaco kin he nakun Cinhintku qu, Wicaśta Cinhintku kin e heon etanhan.
28Ihnuhan hena ininihanpi kin do; anpetu wan hi kta ce, wicaśta wicaḣapi kin owasin iye ho kin naḣonpi kta;
29Qa hninanpapi kta, tona waśte econpi kin hena wiconi woekicetu ekta; qa tona taku śica econpi kin hena woyaeo woekicetu ekta hiyupi kta.
30Miye cinka taku ecamon owakitpani; taku mdaco kin hena taku nawaḣon kin heoiya tanhan; qa taku mdaco kin hena hecetu. Miye mitawacin he owakide śni, tuwe u maśi kin he tawacin owade.
31Miye mihdaotanin kinhan, taku mdaotanin kin he wowicake śni.
32Wanji tokeca mayaotanin ece; unkan wayaotanin iye mayaotanin kin he wowicake e sdonwakiya.
33Johannes ekta ye wicayaśipi; unkan taku yaotanin kin wowicake kin hee.
34Tuka wicaśta akantu wayaotaninpi kin iwacu śni; tuka dena on yanipi kta e heciciyapi.
35He peta ijanjan iyege c̣a okitanin; unkan iyoyanpa tawa kin on kohanna iyuśkin wacannipi.
36Tuka Johannes sam iyeya tanka wayaotanin mduha; wicoḣan ecamon kta Ate maqu qon hena e ecamon ece; Ate umaśi e yuotanin kin hena ee.
37Qa Ateyapi umaśi qon he nakun mahduotanin: He tohiani ho kin nayaḣonpi śni, qa itohnake wandakapi śni:
38Qa oie kin en niunpi śni, tuwe u śi kin he wicayadapi śni, heon etanhan.
39Wowapi wakan kin en akita po; heciyatanhan wiconi owihanke wanica duhapi kecannipi; unkan omayake cin hena ee.
40Tuka owihanke wanin wiconi duhapi kta e on miye en mayaupi yacinpi śni.
41Wicaśta ekta mitawootanin kin awecite śni.
42Tuka Wakantanka waśtedakapi kin he en niunpi śni e sdonciyapi.
43Ate cajeyan wahi, tuka iyowinmayakiyapi śni; tuwe iye caje atayedan hduha hi kin hee iyowinyakiyapi kta.
44Niye iyakitedan nitawootaninpi kin ayecitapi, qa Wakantanka eciyatanhan wootanin kin ayakitapi śni, he token on wicayadapi kta he.
45Ate en aciyapi kta e kecanmakinpi śni po; Moses he wacinyayapi qon he iye taku iyanioapapi ce.
46Moses wicayadapi unkanś miś eya wicamayadapi kta tuka. He miye on wowapi kaga.
47Tuka iye wowapi kage cin hena wicayadapi śni kinhan, ecin token mioie kin wicayadapi kta he.
Selectat acum:
Johannes 5: DAKOTANT
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Copyright 2015 American Bible Society. All Rights Reserved.
