Mak 6

Nazalɛtema kpole Gyisɛse

(Mat 13.53-58; Luk 4.16-30)

1Gyisɛse vi ɛkɛ ne la ɔ nee ye ɛdoavolɛma ne ziale rale ye sua zo. 2Ɛnwomenlelielɛ Kenle ne dwule la, ɔbɔle ɔ bo kɛ ɔyɛ ngilehilelɛ wɔ nyianu sua ne anu. Ɛnee menli dɔɔnwo kpalɛ wɔ ɛkɛ; bɛdiele ye bɛwiele la, ɔzinle bɛ nwo na bɛbizale kɛ, “Nienwu a nrenya ye nee ɛhye vi a? Ɔzukoale ye nrɛlɛbɛ ɛhye wɔ nienwu? Adenle boni anu a ɔfa ɔyɛ ye nwanwane ninyɛne ɛhye mɔ a? 3Na tɛ Mɛle ara kapenta ye ɛ? Tɛ ɔ mediema mrenya a le Gyemise, Dwosefi, Dwudase, yɛɛ Saemɔn? Tɛ ɔ mediema mraalɛ noko a yɛ nee bɛ gua sua ye azo la ɔ?” Na bɛkpole ye.

4 # Dw 4.44 Gyisɛse zele bɛ kɛ, “Nyamenle kpɔmanvolɛ biala lɛ ɔ nyunlu wɔ ɛleka biala, kyesɛ ɔdaye ye sua zo, ye mbusua nu anzɛɛ ye sua nu ala.”

5Yeangola yeanyɛ nwanwane debie wɔ ɛkɛ ne kɛ ɔ sa mɔɔ ɔvale ɔguale wuleravolɛma ekyi bie anwo zo ɔyɛle bɛ ayile la ala. 6Na ɔyɛle ye azibɛnwo kpole kɛ menli ne ɛnlɛ diedi a.

Gyisɛse soa ɛdoavolɛma bulu nee nwiɔ ne

(Mat 10.5-15; Luk 9.1-6)

Akee Gyisɛse hɔkpɔsale namunamu ne mɔ mɔɔ zuozua ɛkɛ ne la azo hilehilele menli ne. 7Ɔvɛlɛle Bulu nee Nwiɔ ne na ɔzoanle bɛ nwiɔ nwiɔ, na ɔmanle bɛ tumi wɔ sunsum ɛtane nwo zo, 8#Luk 10.4-11 na ɔzele bɛ kɛ, “Bɛmmafa debie biala bɛtu adenle ne kɛ kpɔma ala; bɛmmafa aleɛ anzɛɛ kodoku, yɛɛ bɛmmafa ezukoa bɛbɔ bɛ nwo. 9Bɛwula mgbɔlaboa, noko bɛmmafa tɛladeɛ bieko bɛboka mɔɔ bɛwula la anwo.” 10Eza ɔzele bɛ kɛ, “Awuke biala mɔɔ bɛkɛlie bɛ nu la, bɛdɛnla ɛkɛ ne ala bɛmaa ɔhɔkpula kenle mɔɔ bɛkɛvi sua ne azo la. 11#Gyi 13.51 Saa bɛkɔ sua bie azo noko na menli ne anlie bɛ anzɛɛ ɛnrɛdie bɛ a, bɛvi ɛkɛ ne bɛhɔ na bɛkpɔlɔkpɔla bɛ gyakɛ anwo munlutu bɛgua, bɛva bɛhile kɛ menli ne di ɛzonle.”

12Yemɔti bɛzile nu bɛhɔle na bɛbɔle nolo kɛ menli ɛnlu bɛ nwo. 13#Gye 5.14 Bɛdule mbɔnsam dɔɔnwo, na bɛvale nwole bɛkpokpale wuleravolɛma dɔɔnwo bɛyɛle bɛ ayile.

Dwɔn Sɔnevolɛ ne ewule

(Mat 14.1-12; Luk 9.7-9)

14 # Mat 16.14; Mak 8.28; Luk 9.19 Belemgbunli Hɛlɔdo dele ɛhye mɔ anwo bie, ɔluakɛ Gyisɛse nganeɛ ɛdwu ɛleka biala, na menli ɛlɛkeha kɛ, “Dwɔn Sɔnevolɛ ne ɛzia ɛra ngoane nu bieko, yemɔti a ɔkola ɔyɛ nwanwane ninyɛne ɛhye mɔ a.”

15Bie mɔ se, “Yilaegya ɔ.”

Bie mɔ noko hanle kɛ, “Ɔle Nyamenle kpɔmanvolɛ, kɛ mɔmoane Nyamenle kpɔmanvolɛma ne mɔ anu ko la.”

16Mɔɔ Hɛlɔdo dele ɛhye la ɔhanle kɛ, “Dwɔn Sɔnevolɛ ne mɔɔ memanle bɛpɛle ɔ ti la a ɛzia ɛra ngoane nu bieko la.” 17#Luk 3.19-20 Hɛlɔdo manle bɛhyele Dwɔn bɛguale ye nwɔnzɔnwɔnzɔ na bɛdole ye efiade wɔ ɔ diema Felepe aye Hɛlɔdease mɔɔ ɔdaye Hɛlɔdo ɔgyale ye la ati, 18ɔluakɛ Dwɔn vale zile Hɛlɔdo anyunlu dahuu kɛ, “Ɔnle amaamuo kpalɛ kɛ ɛkɛgya ɛ diema ne aye ne.”

19Ɛhye ati Dwɔn anwo yɛle Hɛlɔdease ɛya kpole na ɔbɔle kpɔkɛ kɛ ɔnyia ye a ɔkɛhu ye, noko Hɛlɔdo ammaa ye adenle. 20Hɛlɔdo zulole, ɔboalekɛ Dwɔn le sonla mɔɔ ye ɛbɛla tenrɛ na ɔ nwo te a, yemɔti ɔvale ye ɔziele kpalɛ. Ɔhulole kɛ ɔkɛdie Dwɔn anloa edwɛkɛ, noko kenle mɔɔ ɔkɛdie ye la ɛnee ɔ ti akunlu ɛzɛkye bɔkɔɔ.

21Nzinlii Hɛlɔdease asa hanle Dwɔn wɔ mekɛ mɔɔ ɛnee Hɛlɔdo ɛlɛdi ye awolɛ kenle ɛvoyia la. Hɛlɔdo dole ɛkponle na ɔvɛlɛvɛlɛle arane mbɔlɔba mgbanyinli, ye safohyenlema nee Galeli mgbanyima ne mɔ amuala. 22Wɔ ɛkponledolɛ ne abo, Hɛlɔdease ara raalɛ ne razile agole manle ɔzɔle Hɛlɔdo nee mgbanyima ne mɔ anye. Na belemgbunli ne zele ye kɛ, “Biza me debie biala mɔɔ ɛkulo la na menwɔva menwɔmaa wɔ.” 23Akee ɔhanle ndane kɛ, “Debie biala mɔɔ ɛkulo la, biza, saa me belemgbunli maanle ye foa ko bɔbɔ a, menwɔva menwɔmaa wɔ.”

24Bɛlɛra ne vindele hɔbizale ɔ nli kɛ, “Duzu a membiza a?”

Ɔ nli buale kɛ, “Biza die Dwɔn Sɔnevolɛ ne ati.”

25Na ndɛndɛ ne ala bɛlɛra ne razele belemgbunli ne kɛ, “Mekpondɛ kɛ ɛfa Dwɔn Sɔnevolɛ ne ati ɛto apawa nu ɛmaa me kɛkala.”

26Ɛhye yɛle belemgbunli ne nyane somaa, noko akee yeha ndane, yɛɛ wɔ ye mgbanyima ne mɔ nee ye nyɛvolɛ ne mɔ anyunlu, yeangulo kɛ ɔkɛdo ye ndane ne. 27Ɛhye ati ɔzoanle sinzavolɛ ko ɔmanle ɔhɔle efiade ne ɔhɔpɛle Dwɔn ati, 28ɔvale ɔdole apawa nu ɔrɛlɛle bɛlɛra ne, na ɔvale ɔhɔmanle ɔ nli. 29Dwɔn ɛdoavolɛma ne mɔ dele, bɛhɔliele ye funli ne na bɛhɔziele ye.

Gyisɛse maa menli apenle nnu aleɛ

(Mat 14.13-21; Luk 9.10-17; Dw 6.1-14)

30Ɛzoanvolɛma ne ziale rale na bɛrahanle ninyɛne mɔɔ bɛyɛle nee mɔɔ bɛhilehilele la amuala bɛhilele Gyisɛse. 31Kɛmɔ ɛnee menli dɔɔnwo si kɔ na bɛba Gyisɛse anwo ɛkɛ ne la, ɔ nee ye ɛdoavolɛma ne mɔ annyia adenle bɔbɔ na bɛade aleɛ bɛawula bɛ nloa anu. Yemɔti ɔzele ye ɛdoavolɛma ne mɔ kɛ, “Bɛrɛla bɛmaa yɛhɔvea ɛleka bie koonwu na bɛlie bɛ ɛnwomenle ekyii.” 32Na bɛdabɛ bɛ ngome bɛvale ɛlɛne bɛzile nu kɛ bɛkɔ bɛahɔvea ɛleka bie koonwu.

33Noko menli dɔɔnwo ze bɛ, yemɔti mɔɔ bɛnwunle kɛ bɛlɛkɔ la bɛvale ɛnriandilɛ bɛvi azua ne mɔ azo bɛbule bɛ nyunlu. 34#Ɛdi 27.17; 1 Arl 22.17; 2 Edk 18.16; Yiz 34.5; Mat 9.36 Gyisɛse vi ɛlɛne ne anu dwule aze la, ɔnwunle menli dɔɔnwo ne na ɔ kunlu yelɛyelale ye kpole, ɔluakɛ bɛle kɛ mboane mɔɔ ɛnlɛ neavolɛ la. Zɔhane ati ɔbɔle ɔ bo ɔhilehilele bɛ ninyɛne dɔɔnwo. 35Mɔɔ aleɛ ne hɔle bie la, ye ɛdoavolɛma ne mɔ razele ye kɛ, “Aleɛ ne anloa ɛbɔ aze, yɛɛ ɛke noko ɛmbikye sua zo. 36Yemɔti maa menli ye adenle maa bɛhɔ azua nee namunamu ne mɔ azo na bɛhɔdɔ debie bɛli.”

37Gyisɛse buale bɛ kɛ, “Bɛdabɛ bɛmaa bɛ debie bɛli.”

Bɛbizale ye kɛ, “Ɛnee yɛhɔdɔ kpanwo etaku nna nna ɛya nwiɔ yɛmaa bɛ ɔ?”

38Gyisɛse zele bɛ kɛ, “Bɛhɔnlea kɛ bɛlɛ kpanwo nyɛ?”

Bɛhɔnleanle na bɛrazele ye kɛ, “Kpanwo nnu yɛɛ fɛlɛ nwiɔ.”

39Gyisɛse zele ye ɛdoavolɛma ne mɔ kɛ bɛmaa menli ne mɔ ɛdɛnlɛdɛnla aze ekpunli ekpunli wɔ ndile ne azo.

40Menli ne mɔ dɛnlɛdɛnlanle aze ekpunli ekpunli, ekpunli ne bie anu amra le ɛya, bie noko le abulanlu. 41Na Gyisɛse vale kpanwo nnu ne nee fɛlɛ nwiɔ ne na ɔnleanle anwomanyunlu, ɔyɛle Nyamenle mo, ɔbubule kpanwo ne ɔmanle ye ɛdoavolɛma ne mɔ kɛ bɛva bɛmaa menli ne mɔ. Eza ɔhyɛle fɛlɛ nwiɔ ne ɔmanle bɛ muala. 42Awie biala nyianle bie lile manle ɔ ko yile tɛkɛɛ. 43Na ɛdoavolɛma ne sesale kpanwo nee fɛlɛ ne abo zo ne ahɛndɛne bulu nee nwiɔ.

44Menli mɔɔ lile kpanwo ne la, saa ɛye mraalɛ nee ngakula ne mɔ nu a bɛlua mrenya apenle nnu.

Gyisɛse tia azule nye

(Mat 14.22-33; Dw 6.15-21)

45Ndɛndɛ ne ala Gyisɛse manle ye ɛdoavolɛma ne vale ɛlɛne ne lumuale ɔ nyunlu wɔ sunvoa lɔ, wɔ Bɛteseeyeda sua zo na ɔyɛle ɛ ɔnea yeagyakyi menli ne adenle. 46Ɔ nee menli ne wiele nrɛlaleɛ di la, akee ɔhɔle boka bie azo kɛ ɔkazɛlɛ.

47Aleɛ ne muanle nwo la, ɛnee ɛlɛne ne la tandane ne buma ne anu lɔ na yeha Gyisɛse angome wɔ ɛnwea ne anloa. 48Ɔnwunle kɛ ye ɛdoavolɛma ne anwo ɛhyele bɛ wɔ azule ne anye lɔ, ɔluakɛ ɛnee anwoma ne ɛlɛbɔ atia bɛ. Zɔhane ati aleɛbahye ne kɛyɛ akɔlɛmɔleɛ, ɔdiale azule ne anye ɔrale bɛ nwo ɛkɛ ne na ɔyɛle kɛ ɔse bɛ nwo. 49Mɔɔ ɛdoavolɛma ne mɔ nwunle ye la, bɛdwenlenle kɛ nwomenle ɔ, yemɔti bɛdeɛdeanle nu, 50ɔluakɛ ɛnee bɛ ahonle ɛdu kpole kpalɛ.

Ndɛndɛ ne ala Gyisɛse zele bɛ kɛ, “Bɛdo bɛ ahonle azule nu! Medame ɔ, bɛmmasulo!” 51Na ɔvole ɛlɛne ne anu la, ɛkɛ ne ala anwoma ne gyakyile ɛdulɛ. Ɛhye yɛle ɛdoavolɛma ne nwanwane kpole, 52ɔluakɛ ɛnee bɛtɛtele ɔ bo kɛ ɔzile ɔyɛle mɔɔ Gyisɛse holale manle menli apenle nnu ne aleɛ la; nɔhalɛ, ɛnee bɛ adwenle ɛnzo nu fee.

Gyisɛse yɛ wuleravolɛma ayile wɔ Gɛnɛzalɛte

(Mat 14.34-36)

53Bɛpɛle tandane ne bɛrale sua bie mɔɔ bɛfɛlɛ ye Gɛnɛzalɛte la azo na bɛhendanle bɛ ɛlɛne ne wɔ ɛvoleɛ ne. 54Bɛvi ɛlɛne ne anu bɛdwule aze ala la yɛɛ menli ne nwunle Gyisɛse a. 55Zɔhane ati bɛhanle bɛ nwo bɛwolole maanzinli ne anu ɛleka biala; bɛhɔzoale bɛ wuleravolɛma wɔ ɛkpa nu bɛrɛlɛle Gyisɛse wɔ ɛleka biala mɔɔ bɛkɛde kɛ ɔwɔ la. 56Ɛleka biala mɔɔ ɔhɔle la, saa namule nu o, saa suakpole zo o, anzɛɛ ɛya nu bɔbɔ a, menli vale bɛ wuleravolɛma raguale gua ne mɔ azo na bɛbodole ye kɛ ɔmaa adenle ɔmaa bɛva bɛ sa bɛha ye tɛladeɛ ne anloa ala, na bɛdabɛ noko mɔɔ bɛyɛle ye zɔhane la amuala dele kpɔkɛ bɔkɔɔ.

Selectat acum:

Mak 6: NB

Evidențiere

Partajează

Copiază