Mak 5
5
Gyisɛse tu nrenya bie anwo mbɔnsam
(Mat 8.28-34; Luk 8.26-39)
1Gyisɛse nee ye ɛdoavolɛma ne dwule aze wɔ Galeli Tandane ne anzi wɔ Gɛlasa#5.1 Gɛlasa: Ɔwɔ mbuluku bie mɔ anu Gadala anzɛɛ Gɛgɛsa. maanle nu. 2Gyisɛse vi ɛlɛne ne anu dwule la, nrenya bie mɔɔ sunsum ɛtane wɔ ɔ nwo la vi azie ne azo rayiale ye. 3Nrenya ɛhye ɛva azie ne azo ɛyɛ ye sua nu; awie biala ɛngola ɛngua ye nwɔnzɔnwɔnzɔ. 4Mekɛ dɔɔnwo ne ala menli ɛzɔ ye ɛbɔ ye kpanwu, noko yedu kpanwu ne na yetete nwɔnzɔnwɔnzɔ ne mɔɔ gua ɔ sa nee ɔ gyakɛ la amuala; awie biala ɛngola ye sɔ. 5Alehyenlɛ nee aledwolɛ muala ɛnee ɔluolua azie ne nee awoka ne mɔ azo ɔteɛdea nuhua na ɔfa awolɛ ɔpepɛ ɔ nwo.
6Ɔnwunle Gyisɛse kɛ ɔlua moa moa lɔ ɔlɛba la, ɔnriandile ɔrahotole ɔ nyunlu ɛkɛ ne 7na ɔhanle ye kpole kɛ, “Anwuma Anwuma Nyamenle Ara Gyisɛse, ɛ nee me lɛ bie ɔ? Mefa Nyamenle mekpa wɔ kyɛlɛ, mmatea me!” 8(Ɔhanle ɛhye, ɔluakɛ ɛnee Gyisɛse ɛlɛka kɛ, “Sunsum ɛtane, ɛvi nrenya ye anwo tu!”)
9Gyisɛse bizale ye kɛ, “Kɛ bɛfɛlɛ wɔ ɛ?”
Nrenya ne buale ye kɛ, “Bɛfɛlɛ me ɛlɔne, ɔluakɛ yɛ nwo zonle.” 10Na ɔbodole Gyisɛse kɛ ɔmmatu bɛ ɔfi maanle ne anu.
11Mekɛ ne anu ɛnee agbolike dɔɔnwo bie ɛlɛdidi boka bie anye anwo wɔ ɛkɛ ne afoa nu. 12Sunsum ɛtane ne mɔ bodole Gyisɛse kɛ, “Maa yɛ adenle maa yɛhɔwolo agbolike ne mɔ nu.” 13Gyisɛse manle bɛ adenle. Sunsum ɛtane ne mɔ vile nrenya ne anwo, na bɛhɔwolole agbolike ne mɔ. Agbolike ne mɔ mɔɔ bo apenle nwiɔ la dule twi pianle bɛ nwo wɔ boka ne anye anwo na bɛhɔguale tandane ne anu bɛwule.
14Menli mɔɔ ɛlɛnea agbolike ne mɔ la nriandile hɔbɔle suakpole ne nee namunamu ne mɔ azo amra amaneɛ. Menli rale kɛ bɛbanlea mɔɔ ɛzi la. 15Bɛradwule la, ɛnee nrenya bɔnavolɛ ne mɔɔ anrɛɛ mbɔnsam dɔɔnwo wɔ ɔ nwo la anye zo ɛtete ye, na ɔheda ɛdanlɛ ɔde Gyisɛse anwo ɛkɛ. Ɛhye yɛle bɛ ɛzulolɛ kpole. 16Menli mɔɔ nwunle mɔɔ zile la hanle kɛ ɔyɛle mɔɔ nrenya ne anye zo zile tetele ye nee mɔɔ zile agbolike ne mɔ anwo zo la amuala hilele bɛ.
17Ɛhye ati bɛzele Gyisɛse kɛ ɔvi bɛ maanle ne anu ɔhɔ.
18Gyisɛse kɔ ahɔvo ɛlɛne nu la, nrenya ne mɔɔ anrɛɛ mbɔnsam ne mɔ wɔ ɔ nwo la razɛlɛle ye kɛ, “Maa me nee wɔ ɛlua!” 19Na Gyisɛse amkponle zo. Ɔzele ye kɛ, “Sia kɔ sua nu na kɔha debie mɔɔ Nyamenle ɛyɛ ɛmaa wɔ nee anwunvɔne mɔɔ yeze wɔ la kile ɛ gɔnwo mɔ.”
20Yemɔti nrenya ne ziale hɔle na ɔbɔle ɔ bo kɛ ɔbɔ mɔɔ Gyisɛse ɛyɛ ɛmaa ye la nolo wɔ Azuamgbole Bulu#5.20 Azuamgbole Bulu anzɛɛ Decapolis (Bɛbɔ ye Dɛkapɔlese). ne mɔ azo. Na ɔyɛle bɛdabɛ mɔɔ bɛdele la amuala azibɛnwo.
Gyeeyaelɛse ara raalɛ ne nee raalɛ ne mɔɔ vale ɔ sa hanle Gyisɛse tɛladeɛ ne la
(Mat 9.18-26; Luk 8.40-56)
21Gyisɛse ziale pɛle rale azule nzi nehae bieko, na menli dɔɔnwo rayiale ye wɔ ɛnwea ne anloa. 22Gyeeyaelɛse mɔɔ le sua ne azo nyianu sua ne mgbanyima ne mɔ ko la radule dɔle ɔ gyakɛ anu 23na ɔbodole ye kɛ, “Me ra raalɛ ekyi ne ɛlɛdie ewule awu. Mebodo wɔ, bɛla bava ɛ sa to ɔ nwo zo maa ɔde kpɔkɛ na ɔnyia ngoane.”
24Na Gyisɛse nee ye hɔle. Menli dɔɔnwo kpalɛ doale ye na bɛhyelele ɔ nwo zo.
25Raalɛ bie wɔ ɛkɛ, yedudu mogya toonwo ɛvolɛ bulu nee nwiɔ, 26na yenwu amaneɛ dɔɔnwo wɔ ninsinlima asa anu. Ɔ nwo ezukoa muala ɛwie, noko ɔnde kpɔkɛ; ye ewule ne, ɔ nyunlu ala a ɔkɔ a. 27Ɛnee yede Gyisɛse nganeɛ, yemɔti ɔralile ɔ nzi wɔ menli ne anu, 28na ɔhanle ye ɔ ti anu kɛ, “Saa mefa me sa meka ye tɛladeɛ ne bɔbɔ a, me nwo kɛza.”
Ɛhye ati ɔvale ɔ sa ɔhanle Gyisɛse tɛladeɛ ne, 29na ɛkɛ ne ala mogya ne mɔɔ ɛlɛtu ye la pɛle, na ɔdele ye wɔ ye nu kɛ yede kpɔkɛ. 30Ɛkɛ ne ala Gyisɛse dele ye wɔ ye nu kɛ tumi vi ye nuhua ɛhɔ. Ɔhakyile ɔ nwo na ɔbizale kɛ, “Nwane a vale ɔ sa hanle me tɛladeɛ ne a?”
31Ye ɛdoavolɛma ne mɔ buale ye kɛ, “Nea kɛ menli ɛhyele ɛ nwo zo bie a; duzu ati a ɛlɛbiza kɛ, ‘Nwane a vale ɔ sa hanle me a?’ ”
32Na Gyisɛse vale ɔ nye kpɔlale nu kɛ ɔnea ahenle mɔɔ vale ɔ sa hanle ye la. 33Raalɛ ne nwunle mɔɔ ɛzi ye nu la, ɔvale ɛzulolɛ nee anwowozolɛ ɔrahotole Gyisɛse agyakɛ anu, na ɔhanle ye edwɛkɛ nɔhalɛ nu ɔhilele ye. 34Gyisɛse zele ye kɛ, “Me ra raalɛ, wɔ diedi ɛlie wɔ ngoane. Fa anzonudwolɛ kɔ na wɔ ewule ne ɛhɔ bɔkɔɔ.”
35Gyisɛse anloa wɔ zo ɔlɛtendɛ la, ɛbɔfoɔ vi Gyeeyaelɛse sua nu razele ye kɛ, “Ɛ ra raalɛ ne ati ɛbɔ aze na mmagyegye kilehilevolɛ ne bieko.”
36Gyisɛse dele mɔɔ bɛhanle la, noko ɔzile nyianu sua ne kpanyinli ne ahonle na ɔzele ye kɛ, “Mmasulo, wɔmɔ die di ala.” 37Yeammaa adenle yeammaa awie biala nee ye angɔ kɛ Pita nee Gyemise nee ɔ diema Dwɔn ala. 38Bɛdwule Gyeeyaelɛse awuke ne anu la, Gyisɛse nwunle menli dɔɔnwo wɔ ɛkɛ ne na bɛlɛsu bɛye awolɛ. 39Ɔhɔle sua ne anu na ɔzele bɛ kɛ, “Na ɛzunlɛ bebelebe ye ɛ? Kakula ne ɛtɛwule; ɔlɛdafe ala!”
40Menli ne mɔ zelele ye. Yemɔti ɔdule bɛ muala ɔvile sua ne anu na ɔvale kakula raalɛ ne ɔ ze nee ɔ nli yɛɛ ye ɛdoavolɛma nsa ne na ɔ nee bɛ hɔle ɛleka mɔɔ bɛdeda kakula ne la. 41Ɔzɔle kakula raalɛ ne asa na ɔzele ye kɛ, “Talita, Kumi!” Ɔ bo a le “Kakula raalɛ, mese, dwazo!”
42Ɛkɛ ne ala ɔdwazole na ɔkpɔsale sua ne anu. (Ɛnee yeli ɛvolɛ bulu nee nwiɔ.) Ɛhye yɛle menli ne nwanwane kpole. 43Na Gyisɛse bɔle bɛ nloa kɛ bɛmmaka bɛkile awie biala, na ɔzele bɛ kɛ, “Bɛmaa ye debie ɔli.”
Selectat acum:
Mak 5: NB
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Bible in Nzema © Bible Society of Ghana, 1998.
