ULÚKU 16

Ɔ̄cɛ o leyīkwu ɔlɛ́ nōo jé ula nɛ̄hi ā

1Eko ɔhá Ujísɔ̄si da ayíkpó kú nū kahíníī, ‘Olagbénú éyi yɔ̄, nōo lɛ ɔ̄cocɛ̄hɔ̄ éyi nōo gē leyīkwu agbénú kú nū lɛ ɔ́. É lɛ ɔ̄cɛ ā kpɛ́pɔ̄ lɛ ɔ́ ka ɔ́ɔ ī ŋmó ije kú ɔkpani nū bónū. 2Anɔ́ɔ ɔkpani nū ā lɛ ɔ́ hīgwú, anɔ́ɔ ó da ɔ́ ɔ̄kā kahíníī, ‘Ɔdā nēé yɔ̄ ī ka lɛyíkwu uwɔ ā wɛ ɔkwɛyi nɛɛ? Á gáā leyīkwu agbénú kú um gɛ ŋ́. Lɛ ɔwɛ nɛ̄ a ŋmó agbénú kú um ā kpó ka ga um dúúdú.’ 3Anɔ́ɔ ɔ̄cotɛ̄hɔ̄ ā ka ipú ɔtū kú nū kahíníī, ‘Ɔkpani um gáā nū ŋmá úklɔ́ ɛɛ́. Ɔdí nɛ̄ n géē yá ā? Ń kē lɔfú hɛ́hɔ̄ glá ŋ́. O nyɔ̄ gaá gbɔɔ́ ō ba ɔdā ā í tū um uwēyī. 4Abālɔbányā, n jé ɔdā nɛ̄ n géē yá ā, cɛ́ɛ́ ká eko nēé lɛ um nū ŋmá úklɔ́ ɛɛ́ ká ācɛ kéē mīyɛ um wā ɔlɛ́ uwā. 5Anɔ́ɔ ó lɛ éyééye kú ācɛ nēe bī ɔkpani nū ulé ā hīgwú wā ɛgiyí nū. Ó le ɔ̄kā da ɔ̄cɛ aflɛ́yí ā kahíníī, ‘Ɔdí nɛ̄ a bī ɔkpani um ā?’ 6Ó tóohi da ɔ́ kahíníī, ‘Ɔgālā anɔ̄ ofɛhɔ̄.’ Ɔ̄cocɛ̄hɔ̄ ā da ɔ́ kahíníī, ‘Cīce fíyaa, cɛ́ɛ́ ā le ofɛpa cigwó tá tāajɛ.’ 7Anɔ́ɔ ó klla lɛ ɔ̄kā da ɔ̄cɛ ɔhá kahíníī, ‘Awɔ ā ɔdí nɛ̄ a bī ɔ̄ ā?’ Anɔ́ɔ ɔ̄cɛ ā da ɔ́ kahíníī, ‘Ɛkpa igwu ofɛhɔ̄!’ Anɔ́ɔ ó da ɔ́ kahíníī, ‘Kwú ɔkpá kú uwɔ ú ká ā lɛ ɛkpa ofɛnɛ tá tāajɛ.’ 8Ɔkpani kú ɔ̄cocɛ̄hɔ̄ nōo jé ula nɛ̄hi nyā cɛ̄tra anú ohígbū ula kú nū. Ó kē wɛ ɔkwɛ̄yi ka ayí kú ɛcɛ nyā jé ula ō yá mɛ́mla ɔdā kú ɛcɛ nyā fíyɛ́ ayí kú ɔlá ofíyajɛ á.”

9Anɔ́ɔ Ujísɔ̄si klla kahíníī, “N da aá ka, aá bī agbénú kú íne o bīya kú ɛcɛ nyā le yá ɔdā o tīile lɛ ācɛ ɔhá cɛ́ɛ́ kú aá le aɔ́ya lɛ. Cɛ́ɛ́ eko nɛ̄ agbénú kú aá í tīile dúúmā gɛ ŋ́, é géē mīya aá wā ɔlɛ́ nōo ī yɔ̄ piyóó ā.

10Ɔ̄cɛ dúúmā nēé lɔtūce ɔ́ ɛgiyí ɔdā olígíi glá ā, é géē lɔtūce ɔ́ ɛgiyí ɔdā nɛ̄hi glá. Ɔ̄cɛ nēé lɔtūce ɔ́ ɛgiyí ɔdā olígíi glá ŋ́ mā, é gáā lɔtūce ɔ́ ɛgiyí ɔdā nɛ̄hi glá ŋ́. 11Ohígbū ɔ́ɔmā, ɔ́dāŋ kéē lɔtūce aá ɛgiyí ije nōo wɛ agbénú kú ɛcɛ nyā glá ŋ́, ɔ̄nyɛ géē lɛ agbénú ɔkwɛyí ā tū aá abɔ̄ ā? 12Ɔ́dāŋ kéē lɔtūce aá ɛgiyí ɔdā kú ɔ̄cɛ ɔhá glá ŋ́, ɔ̄nyɛ kē í je ɔdā nōo wɛ ákú aá tū aá abɔ̄ āa? 13#Umát 6.24Ó lɛ ɔ̄cocɛ̄hɔ̄ dúúmā nōo cɛ̄ aɔ́kpani ɛpa ɛhɔ̄ glá ŋ́. Ó géē yíhɔtū tá éyi fíyɛ́ ɔhá. Ó kē í lɛyítáajɛ lɛ éyi cɛ́ɛ́ ó kē leyī gwō ɔhá bónū. Aá gáā lɔfú cɛ̄ Ɔwɔicō mɛ́mla ije ɛhɔ̄ glá ŋ́.”

Aɔ́dā ɔhá nɛ̄ Ujísɔ̄si nwū ɛlā lɛyíkwu uwá ā

(Umát 11.12,13; 5.31,32; Umák 10.11-12)

14Eko nɛ̄ ācɛ Ufárisīi le odúúdu ɛlā nyā pó kpɛ́mm ā, é yá Ujísɔ̄si okónu ohígbū keé ī yúnwū ije nɛ̄hi. 15Ujísɔ̄si da uwá kahíníī, “Aá wɛ ācɛ nēe gē yá kú ācɛ kéē má aá bɛ̄ɛka ɔdā nɛ̄ aá wɛ ācɛ olɔhi ā Amáŋ Ɔwɔicō jé ɔdā nɛ̄ aá wɛ ɔkwɔ̄ɔ̄kwɛ̄yi ā á. Ohígbū ka aɔ́dā nɛ̄ ācɛ je kéē wɛ ɔdā otīile nɛ̄hi ā, í wɛ ɔdā dúú ipéyī Ɔwɔicō ŋ́.

16 # Umát 11.12,13 Ɔdā nēe tá tāajɛ ipú ɔkpá íne mɛ́mla ɔkpá kú ācomɛ́ɛbɛ ā bī ācɛ jé ɔwɛ jāā gaá kwu eko kú Ujɔ́ni oyúbatísim ā. Óŋmá eko ɔ́ɔmā, é húmáyī tɔ́ɔna kú ɔ̄kōolɔhi lɛyíkwu ajɔ̄ɔ̄cɛ́ kú Ɔwɔicō, odúúdú ācɛ bá gē kwɛga nɛ̄hi kéē bēhé ga ajɔ̄ɔ̄cɛ́ kú Ɔwɔicō abɔ̄fú. 17#Umát 5.18Amáŋ ó tɔ́ɔtɛ lɛ ɔkpáncō mɛ́mla ɛcɛ kéē bī tāajɛ fíyɛ́ o je ɔdā nōo wɛ ɛnɛ̄ŋcɛ́ fíyɛ́ dúú kú íne ā ŋmónyí.

18 # Umát 5.32; 1 Ukɔ́r 7.10,11 “Ɔ̄cɛ dúúmā nōo tá ɔnyā nū nyɔ̄ gaá lɛ ɔnyā ɔhá lɛ, le ajā gbo. Ɔ̄cɛ dúúmā nōo le ɔnyā nēé tá lɛ kē le ajā gbo dúú.

Olagbénú ā mɛ́mla Ulásārɔ̄si

19“Ó lɛ ɔ̄cɛ olagbénú éyi yɔ̄ nōo ī lɛ otóŋ́gwō ahilíki kú otumbíyē wiiyē. Ó klla gē lé ɔdōlé kú abahi ɛ̄cī dóódu. 20Ogbɛhá éyi kē yɔ̄ dúú, nɛ̄ iyē kú nū lé ka Ulásārɔ̄si nɛ̄ ɔkpíyē kú nū kē wɛ ámata ámata. É gē je ɔ́ wā í tá okómpīinu kú ɔlɛ́ ɔ̄cɛ olagbénú nyā ɛ̄cī dóódu. 21Ó leyīce ka anúɔ í má iwili kú ɔdōlé nōo í wāajɛ ŋmá itéblu kú ɔlɛ́ olagbénú ā. Aéwo kōō ī wā ī pla ámata kú nū nyɛ̄. 22Ó yɔ̄ yɛɛ ā, ogbɛhá ā gekwú, anɔ́ɔ aálelékwū-ōtɛ̄hɔ̄ kwú odo kú nū ú ga ajɔ̄ɔ̄cɛ́ kóō gáā yɔ̄ mla Ébrahām á. Olagbénú ā gekwú, é kē lɛ ɔ́ nyi. 23Anɔ́ɔ ipú ɔlíkɔtɔ ā, ó yɔ̄ ī jé ɔnɔ kú iyē nɛ̄hi. Anɔ́ɔ ó je eyī gicō le Ébrahām mɛ́mla Ulásārɔ̄si má bá ɛga oligbó á. 24Olagbénú ā dɛ̄gba kahíníī, “Ádā um, Ébrahām, n yɔ̄ ipú ɛ́kɛma nɛ̄ɛ̄nɛ̄hi ipú ɔlíkɔtɔ amānyā ā! Ohígbū ɔ́ɔmā ményinyi um cɛ́ɛ́ ká ā da Ulásārɔ̄si kóō lɛ ɔyíkabɔ̄ kú nū wu ipú éŋkpɔ̄ wā í le tū um ɔkɔ kóō lɛ um ígblɛ́nyī bɔ́. 25Amáŋ Ébrahām tá ɔ̄ ohi kahíníī, ‘Ɔyí um, bla ka a mīyɛ ɔdā olɔhi kú uwɔ eko nɛ̄ a yēeyī ā, ɛ́gɔ́ɔmā nɛ̄ Ulásarɔ̄si kē mīyɛ aódōbɔ̄bí á. Amáŋ abālɔbányā, é kē ī tū ɔ̄ ɔtūlé amānyā, awɔ ā ke yɔ̄ ipú ɛ́kɛma mɛ́ɛ̄ á. 26Ó wɛ ɛ̄nyā ofūnū ŋ́, amáŋ ɔ̄gɔ̄ o lipú nɛ̄hi tá ɔtāhɛ̄ kú alɔ mɛ́mla awɔ, cɛ́ɛ́ ācɛ nēe tíne ō yɛ ŋmá ɛgiyí alɔ wā ɛgiyí aá, í gáā wā glá ŋ́. Ɛ́ɛ́ nɛ̄ ɔ̄cɛ dúú í kē gáā yɛ ŋmá ɛgiyí aá wā ɛgiyí alɔ glá ŋ́ má.’ 27Ɔ̄cɛ olagbénú ā kahíníī, ‘Ó lɛ ā, n gē gbɔ̄ɔkɔ ga awɔ ádā um, Ébrahām ká ā lɛ Ulásārɔ̄si tɛ̄hɔ̄ ga ɔlɛ́ ádā um. 28Ohígbū ka n lɛ ayínɛ́ nɔ̄nyīlɔ ɛhɔ̄. N tíne kóō nyɔ̄ í lɛ uwá ahɔ̄ pi cɛ́ɛ́ ká ɛ́gɛ́ dúúmā nōó lɛ, kéē híīī wā ɛga kú ɛ́kɛma nyā ŋ́.’ 29Ébrahām tá ɔ̄ ohi kahíníī, Ayínɛ́ uwɔ nɔ̄nyīlɔ lɔfú jé ɔdā nɛ̄ Umósisi mɛ́mla ācomɛ́ɛbɛ tá ā. Uwá kéē lɔtū tá ɔ̄.” 30Ɔ̄cɛ olagbénú ā tóohi kahíníī, ‘Ehée, ádā um, Ébrahām, ɔ́ɔmā í jɛ̄ ŋ́! Amáŋ ɔ́dāŋ ka ɔ̄cɛ éyi lɔfú le héyī ŋmá ɔlékwū ga ɛgiyí uwā glá, é géē mabɔ̄ íne o bīya tá.’ 31Amáŋ Ébrahām da ɔ́ kahíníī, ‘Ɔ́dāŋ kéē lɛ ɛlá wū ɛlā kú Umósīsi mɛ́mla ācomɛ́ɛbɛ ā glá ŋ́, é kōō gáā cɛ̄ ɔ́dāŋ ka ɔ̄cɛ éyi le héyī ŋmá ɔlékwū ŋ́.’”

Selectat acum:

ULÚKU 16: IFBCL

Evidențiere

Partajează

Copiază