ULÚKU 17

Aɔ́dā ōhī nɛ̄ Ujísɔ̄si nwū ācɛ ā

(Umát 18.6,7,21,22; Umák 9.42)

1Ujísɔ̄si da ayíkpó kú nū kahíníī, “Aɔ́dā nōo géē yá kú ācɛ kéē bīyíne ā géē yá piíí. Amáŋ ɔ̄cɛ dúúmā nōo géē yá kú ɔdā ɛ́gɔ́ɔmā kóō yá ā le jí ɛɛ́. 2Ó géē lɔhi lɛ ɔ́ fíyɛ́ ɔ́dāŋ kéē kwú ɛgɔ̄ ú gbō playi anú ɔkɔ, cɛ́ɛ́ kéē kwú ɔ̄ ú tá tū ipú ísu, ikɔkɔ ɛdɔ kú italā nēe géē yá ɔ̄ ohígbū koó lɛ éyi kú aɛ́nɛ̄ŋcɛ́ nēé bá nyā yá kéē lɛ íne bīya ā. 3#Umát 18.15Ohígbū ɔ́ɔmā, aá leyī kwɛcɛ ɛ́gɛ́nɛ̄ aá géē yá lɛ ā a! Ɔ́dāŋ ka ɔyínɛ́ uwɔ nɔ̄nyīlɔ lɛ íne bīya, le da ɔ́ ka ɔdā nōó yá ā í lɛ ɔhi ŋ́. Ɔ́dāŋ koó le pīyabɔ̄ kwú yá ɔ̄ ɛhi. 4ɔ́dāŋ koó yá uwɔ ɔdōōbɔ̄bí igbahāapa ɛ̄cī ékpónú, anɔ́ɔ ó gā ɛgiyí uwɔ igbahāapa ā yɔ̄ ī ka kahíníī, ‘N le pīyabɔ̄ ɛɛ́’, kwú yá ɔ̄ ɛhi piíí.”

Ɔfú kú ɔtū ō ce Ɔwɔicō

5Ācotɛ̄hɔ̄ ā da Óndú ā kahíníī, “Le yá kú alɔ lɔtūce Ɔwɔicō nwuné fíyɛ́.” 6Anɔ́ɔ Óndú ā tóohi kahíníī, “Ɔ́dāŋ nɛ̄ ɔtū nɛ̄ aá le ce ā kōō le ligíí bɛ̄ɛka īkpō ɔcí umɔ́stādi ā, aá lɔfú da ɔcí umúlbɛ̄ri nyā ka, ‘Lɛ iyī uwɔ fu ŋmáajɛ tɛgba tɛgba cɛ́ɛ́ ká ā nyɔ̄ í kwú iyī uwɔ í kwu ipú ísu.’ Ó kē í yá ɛ́gɛ́nɛ̄ aá ka ā.

Ɛ́gɛ́nɛ̄ ɔ̄cocɛ̄hɔ̄ olɔhi gē yá ā

7Ɔ̄cɛ í jé ŋ́ nɛ̄ ɔ̄cɛ éyi kú ipú aá lɛ ɔ̄cocɛ̄hɔ̄ éyi nōo yɔ̄ í hɛ́hɔ̄ ámāŋ koó yɔ̄ ī leyīkwu aálá. Eko nōó pīyɛyí ŋmá ɛhɔ̄, ó gē da ɔ̄ kóō yá fíyaa cɛ́ɛ́ kóō gáā cīce kóō lé ɔdōlé nɛɛ? 8Ó lɛ ā glá ŋ́, ikɔkɔ ɔ́ɔmā ó géē da ɔ́ kahíníī, ‘Lɛ ɔdōlé ɔnɔ̄ɔ̄nɛ̄ kú um yá ga um, cɛ́ɛ́ ā le iyī uwɔ tútū ká ā le ɔdōlé je ga um, cɛ́ɛ́ ā háyi cɛ̄ um ɛhɔ̄ jāā gbéeko nɛ̄ n le lé, le gwá kwɛyí. Cɛ́ɛ́ eko ɔ́ɔmā a lɔfú lé ɔdōlé kú uwɔ igbīyājɛ glá. 9É cíkā ō tá ɔ̄cocɛ̄hɔ̄ ā ahínyá ohígbū koó lɛyítáajɛ lɛ́ ɔ́da kú ɔkpani nū ŋ́. 10Ɔdā ékpó ɔ́ɔmā nōó lɛ lɛ aá dúú ā. Eko nɛ̄ aá lɛ ɛjɛ̄ɛ̄jī ɔdā nēé da aá ka aá kóō yá ā yá kwɛyí, aá cíkā ō ka kahíníī, ‘Alɔ wɛ ācocɛ̄hɔ̄ icííci nɛ̄ n. Úklɔ́ kú alɔ nɛ̄ alɔ yá ā, é cíkā ō cɛ̄tra alɔ ŋ́.’

Ujísɔ̄si hɛ́ ācɛ olagwú igwó tá

11Abɔ̄ Ujísɔ̄si yɔ̄ ī ga Ujerúsālɛm ā, ó yɔ̄ ī yɛ bū ɔlɛ́ kú ɛjī nōo yɔ̄ ɔtāhɛ̄ kú Usamérīya mɛ́mla Ugálīli ā. 12Abɔ̄ ó gáā bēhé ga ipú eyīpɔ́lɛ́ éyi ā, ācɛ olagwú igwó gáā jīla anú ɔwɛ. É háyi ɛcɛɛcɛ, 13anɔ́ɔ é dɛ̄gba kahíníī, “Ujísɔ̄si! Ɔkpani! ményinyi alɔ! 14#Ulīf 14.1-32Ujísɔ̄si lɛ uwá má, anɔ́ɔ ó da uwá kahíníī, “Aá nyɔ̄ kú ɔ̄cogwɛ́ɛya ā kóō lɛ aá jila.” Abɔ̄ é bá yɔ̄ ī nyɔ̄ ɔwɛ ā agwú kú uwā ā mɛ. 15Eko nɛ̄ éyi kú ipú uwā le jé ka iyē kú anúɔ kwú lɔhi ɛɛ́ mā, ó le cīgbīhi wā ɛgiyí Ujísɔ̄si, lɛ ɔkɔ cɛyí yɔ̄ ī cɛ̄tra Ɔwɔicō. 16Ó kwú okwúukwu í kwajɛ iyɔ̄bū Ujísɔ̄si, anɔ́ɔ ó le ahínyá tá ɔ̄ á. Ɔnyīlɔ ā wɛ ɔ̄cɛ kú Usamérīya. 17Ujísɔ̄si dɔɔ̄kā kahíníī, “Ó wɛ ācɛ igwó nɛ̄ n hɛ́tá ā ŋ́ nɛɛ? Iní nɛ̄ ācɛ ahāanɛ ohile ā bá ā? 18Ɔdíya nōó wɛ ɔ̄cɛ éwɔhá nyā ōfōōfūnū kwúcē wā í tá Ɔwɔicō ahínyá ā” 19Anɔ́ɔ Ujísɔ̄si da ɔ̄cɛ ā kahíníī, “É le uwɔ hɛ́tá ɛɛ́ ohígbū ka a lɔtūce. A lɔfú nyɔ̄ mɛ́ɛnɛ.”

Ɛ́gɛ́nɛ̄ ajɔ̄ɔ̄cɛ́ kú Ɔwɔicō géē wā lɛ ā

(Umát 24.23-28,37-41)

20Ācɛ Ufárisīi ōhī le ɔ̄kā da Ujísɔ̄si eko nɛ̄ Ɔwɔicō géē wā í ce ɔcɛ́ ipú ɛcɛ nyā ā. Ó tá uwā ohi kahíníī, “Eko nɛ̄ Ɔwɔicō géē wā í cɔcɛ́ ā, í gáā lɛ ɔdōcābɔ̄ dúú nɛ̄ ācɛ í má gbɔbū ɛ́ɛ́ kóō wā ŋ́. 21Ó lɛ ɛ̄nɛ̄ ɔ̄cɛ dúú ī ka kahíníī, ‘Mɔ́ɔ̄! ó yɔ̄ amānyā ŋ́!’ amáŋ ‘Ó yɔ̄ ánūmā’ ŋ́. Ajɔ̄ɔ̄cɛ́ kú Ɔwɔicō ā yɔ̄ ipú aá.”

22Anɔ́ɔ ó da ayíkpó kú nū kahíníī, “Eko éyi géē wā nɛ̄ eyī géē yá aá ká aá lɛ ɛ̄cī ékpónú kénéke kú eko nɛ̄ ami, Ɔyínɔnyīlɔ kú Ɔ̄cɛ géē yɔ̄ mla aá má, amáŋ aá gáā lɔfú má ɔ̄ glá ŋ́. 23Ó lɛ ācɛ nēe géē ka lɛ aá kahíníī, ‘Aá mɔ́ɔ̄, Ɔyínɔ̄nyīlɔ kú Ɔ̄cɛ yɔ̄ anūmā!’ ámāŋ ka ‘Aá mɔ́ɔ̄, ó yɔ̄ amānyā!’ Amáŋ aá cɛ̄ɛ̄lā ɛ́gɔ́ɔmā ámāŋ kōō nyɔ̄ gɛcɛ í dɔɔ̄kā nū ŋ́. 24Ɛ́gɛ́nɛ̄ ɔwolímanya í límanya gē hɛ́ ɔkpáncō igbó ī fíyajɛ gē cɛ̄ lɛ ɛjɛ̄ɛ̄jī ɛcɛ tá péee ā, ɛ́gɔ́ɔmā nɛ̄ ācɛ géē má Ɔyínɔ̄nyīlɔ kú Ɔ̄cɛ péee eko nōó géē wā ā á. 25Amáŋ gbɔbū kóō wā ā, ó géē móōwē nɛ̄ɛ̄nɛ̄hi, ācɛ kú eko nyā kéē í tá ɔ̄ tónū. 26#Ohút 6.5-8Ɛ́gɛ́nɛ̄ ó lɛ eko kú Unówa ā nōó gáā lɛ eko nɛ̄ Ɔyínɔ̄nyīlɔ kú Ɔ̄cɛ géē wā ā á. 27#Ohút 7.6-24Eko ɔ́ɔmā gbɔbū kú enyi kóō kpó ɛcɛ ā, ɛjɛ̄ɛ̄jī ācɛ bá yɔ̄ ī lé ɔdōlé, bá gē gwá. Ācɛ bá gē lɛ ɔbá, é bá gē lɛ ɔnyā, jāā gaá kwu ɛ̄cī piíí nɛ̄ Unówa ga ipú úgbéenyi ɛ́ɛ́ nɛ̄ enyi gē wā ī kpó odúúdú uwā ŋmó ā. 28#Ohút 18.20—19.25Ɛcɛ ā géē lɛ ɛ́gɛ́nɛ̄ ó lɛ eko kú Ulɔ́tu ā. Ɛjɛ̄ɛ̄jī ācɛ bá yɔ̄ ī lé ɔdōlé, gē gwá, bá yɔ̄ ī lá ɔ́lá, bá yɔ̄ ī je ɔlá lá. É bá yɔ̄ ī nyi ɔdɛ̄hɔ̄ klla bá yɔ̄ ī gwó inu. 29Ɛ̄cī nɛ̄ Ulɔ́tu nyɛ̄ɛ̄ ŋmá Usɔ́dɔm ā, ɔlá mɛ́mla ɛcōwō yā ŋmá ɔkpancō wāajɛ klá ācɛ ā le ɛjɛ̄ɛ̄jī uwā kpó ŋmó. 30Ɛ́gɔ́ɔmā nōó gáā lɛ eko nɛ̄ Ɔyínɔ̄nyīlɔ kú Ɔ̄cɛ géē wā ká ācɛ kéē má ɔ̄ á. 31#Umát 24.17,18; Umák 13.15,16Ɛ̄cī ɔ́ɔmā ɔ̄cɛ nōo ce ɛyí inu ɔlɛ́ nū kóō híīī wāajɛ ga ipú inu gaá kpó iyó kú nū ŋ́. Ɔwɛ ékpó ɔ́ɔmā, ɔ̄cɛ nōo yɔ̄ ɛhɔ̄ kóō híīī kwúcē ga ɔlɛ́ ŋ́. 32#Ohút 19.26Aá gbɛlá kwu ɔdā nōo yá ɔnyā kú Ulɔ́tu ā! 33#Umát 10.39; 16.25; Umák 8.35; Ulúk 9.24; Ujɔ́n 12.25Ɔ̄cɛ dúú nōo lɛ abɔ̄ kwɔtū kóō lɛ oyēeyī kú nū nyatá, ó gáā lɛ oyēeyī opiyóó ŋ́. Amáŋ ɔ̄cɛ dúú nōo kwú oyēeyī kú nū ú tónū, ó géē lɛ oyēeyī opiyóó 34N̄ da aá mɛ́ɛ̄ n̄, otú kú ɛ̄cī ɔ́ɔmā ācɛ géē bá yɔ̄ í gbiyɔ̄lā agōdō ékpó. É géē je ɔ̄cɛ éyi ŋmá ipú uwā, é kē í habɔ̄ ɔ̄cɛ ɔhá ā tá. 35Ācɛnyā ɛpa géē yɔ̄ ī gbɔ̄dā ɛgɔ̄ tɔ̄hā. É géē je éyi kú uwā nyɛ̄ɛ̄, é kē í habɔ̄ ɔ̄cɛ ɔhá ā tá. 36Ācɛnyīlɔ ɛpa géē bá yɔ̄ ī yúklɔ́ ipú ɛhɔ̄. É géē je ɔ̄cɛ éyi ŋmá ipú uwā, é kē í habɔ̄ ɔ̄cɛ ɔhá ā tá. 37Ayíkpó kú nū ā da ɔ́ ɔ̄kā kahíníī, “Óndú, iní nɛ̄ ɛ̄nyā í yá ā?” Ujísɔ̄si tá uwā ohi kahíníī, “Ɛga dúúmā nɛ̄ okwu tá ā, nɛ̄ ēpū gē jīla bá á.”

Selectat acum:

ULÚKU 17: IFBCL

Evidențiere

Partajează

Copiază