Matthieu 7

Adwe gá bʉ́ʉ́ bʉ̂r mebě

(Luc 6.37-38, 41-42)

1«Adwe gá bʉr mebě ebě, bɨ̌n ntémé ámû jaá dweŋɔɔ mê. 2Mbi bɨ́n dí edwe bʉ̂r mebě wɨ́, mbi ngwár e ngwár waá ntémé ó Nzyɛ̌m ngá dwe bɨ́n mǎ wɨ́. Bím mébě gó ngá dwe bʉ̂r má, bím yaá ntémé ó bé ngá dwe gó yɨ́. 3Gǒ jaá bɨbee ó, njɨ mpǔm dí mɨ́ɔɔ́ gǒ ɨ́ dîh yɨ́, kâr éjʉ̂ʼrǎ mbʉ́ŋʉʉ̌ ntinɨ̂ dí ɨ́ lô dîh wɨ́, ɨ́ yé? 4Gǒ e nkul elɛ́ɛ mɨ́ʉ̌ nyá ó: “Paá nze. Me pɛ́ʼɛɛ go mpǔm dí go ɨ́ dîh yɨ́,” tó kœb ó, gua, go mʉr tɨ̂, gó e mbʉ́ŋʉʉ tʉ́ŋlʉ̌ dîh? 5Ányâ-mikóo, tááráá épɛ̌ʼ mbʉ́ŋʉʉ dí ɨ́ díh lô wɨ́. Jɔʼ yaá ó gó ngá gwá bee, ntɔ̂ʼ pɛ̌ʼ mpǔm dí mɨ́ɔɔ́ gǒ ɨ́ díh lé yɨ́.

6«Adwe gá ompyê sá dí ti yɨ́. Bé ámû jaá dwira, lʉ̂ le enya bɨ́n. Adwe gá onkʉ̌ mindwê mi dí ɨ́ buo día mí. Bé ámû jaá tyéele myê.»

Jɨʼlaa gá e Nzyɛ̌m

(Luc 11.9-13)

7«Gwámáá gâ, bɨ̌n nkʉ̂ bi. Sáŋáá gâ, bɨ̌n nkʉ̂ bee. Kwáʼláá gá ebê, lé nkʉ̂ dibɔɔ bɨ́n. 8Ebě, mʉr nyɨnyɛ̂h dí egwâm nyá, óbi. Mʉr dí esáa nyá, óbee. Ebê, lé ódibɔɔ lɨ́ esú é mʉ̂r dí ekwâʼle nyá. 9Wáa mʉ̂r dí ɨ́ sɔ́má yɨ́n, mwân wé gwám nyé blêr nɛ́ɛ: nyě kǎ dwe nyé mekóʼ? 10Nzê nye ódwe nyé nyʉ́a ɨ́ jɔʼ nyê jáʼ sû yɨ́ ɛ́? 11Bím bíbɨ́bla bi bʉ̂r bɨ́n dí nɨ̌, bɨ̌n pǎ nyɛɛ́ dwe bwán bɨ́n bisá bímpâ, á dwɛʼra e Sɔ́ŋ wɨ́n dí ɨ́ jʉ́o kʉ́ nyá! Nye ódwe bʉ̂r o dí egwâm nyé bá, laa náǎ.

12«Mbi bɨ́n dí ekpɛl ó bʉr sâʼ bɨ̌n wɨ́, sáʼ gá bé ntémé nó. Nó ó dí cɛmá ɨ́ mekaná métié, le maá ógwíha o mílɔ̌b mé Nzyɛ̌m yɨ́.»

Mebé mébá

(Luc 13.24)

13«Níʼéé gá lɨ́ ebê dí ɨ́ twâʼwo lɨ́, ebě, nzɨ̌ dí ɨ́ bwaʼ le akɔbla nyɨ́, nyě tó ó, nko éswie. Nó bʉr o dí ecɨɨ tɨ̂ʼ bá, bé ɨ́ buo. 14Tó kœb ó, nzɨ̌ dí etô nkǒ twiʼ nyɨ́, nye ɨ́ kɔbla. Ebé é tɨ̂, lé ɨ́ twâʼwo. Bʉr o dí ecɨɨ ɨ́ nzɨ̌ nyaá bá, bé abuo.»

Bé kʉ́ gwá dweʼě lɨ́ ó ɨ́ mpumó nyé

(Luc 6.43-44)

15«Bɨ̌n a báʼ ógwíha o mílɔ̌b o bíbɛr, ebě, bé nzɨ́nzé ɨ́ sɔ́má yɨ́n ó e njwɨr ɨ́ tala tala, nwɨɨla e binteme. Tó kœb ó, ɨ́ milémé myɔ́ɔ́ tʉ́ŋlʉ̌, bé ó mpʉ ónkœœ dí ekpɛl édɛn bínteme bá. 16Bɨ̌n bé ódweʼe bé ó ɨ́ bisyɛ́ɛla byɔ́ɔ́. Mʉr nyé abe lɨ́ emwâʼ mpúmó sɔɔ́ lɨ́ esyɛh, nkʉ̂ mpumó nwâʼ lɨ́ esɨ́ǎ. 17Mpǎŋ lɨ́, yé gúmó ó mpumó mpâ. Bǒl lɨ́ gúmó ó, mpumó dí ɨ́ bébe nyɨ́. 18Mpǎŋ lɨ́, yé ágúmó bébebébe mpumó. Bǒl lɨ́ agúmo mpúmó dí ɨ́ mbɨa nyɨ́. 19Lɨ́ yɨ́yɛ̂h dí agúmo mímpǎŋ mi mpúmó yɨ́, yé lɨ́ ecwɛlɔɔ, guhɔɔ lɨ́ ebéʼé é siʼe. 20Nó bɨ̌n bé ódweʼe ógwíha o mílɔ̌b ó bíbɛr ó ɨ́ bisyɛ́ɛla byɔ́ɔ́.»

Elɛ́ɛ le esâ

(Luc 13.25-27)

21«Ntʉ mʉ̂r nyɨnyɛ̂h ngá lɛ́ɛ ó: “Dâ ɔ́, Dâ ɔ́!” nyá, ngá nî ɨ́ Mpóʼo mé Dâ Nzyɛ̌m, njɨ waá nyɨnyɛ̂h dí esâ gwɨ́má mé Sɔ́ŋ wǎm dí ɨ́ jʉ́o kʉ́ nyá. 22Ebě, ɨ́ móhó étíʼ é mílɔ̌b, bʉr ɨ́ buo buo, bé ólɛ́ɛ e me ó: “Dâ ɔ́, Dâ ɔ́, paá bee ɔ̌! Bɨ̌h bé á si gwîh milɔ̌b mé Nzyɛ̌m ɨ́ díé lô. Ɨ́ díé lô, bɨ̌h bé á si so meleme! Ɨ́ díé lô, bɨ̌h bé á be ó sí sâ mésimá ɨ́ buo buo!” 23Nó me óyala e bé ó: “Ajóʼo! Mé agʉ́a bɨ́n. Pʉʼaa gá me ɨ́ mîh, bɨ̌n baányâ-ebébe bâ!”»

Kɨkɛna ménzumó mebá

(Luc 6.46-49)

24«Nó ó, mʉr nyɨnyɛ̂h dí ejóʼǒ lwǐb mê lwǐb e bɨ̌n yɨ́, le esâ mpʉ mê lɛ́ɛ́ yɨ́ nyá, nyě nwɨɨlá ó e twóó mʉrʉ̂m á sumo mbɛ̌r, tyêl wé lɨ́ ekóʼ nyá. 25Mpíé nzě nwɨ́ɨ, mpɨɨ mamle, onkúo kwoolo, nkaŋa ɨ́ mbɛ̌r waá. Sâ gwár, mbɛ̌r l'abîʼ, ebě, bipǎb, byé á be ó tyélá lɨ́ ekóʼ. 26Mʉr nyɨnyɛ̂h mû sí jóʼǒ lwǐb yɨ̂, asâ mpʉ mê lɛ́ɛ́ yɨ́ nyá, nwɨɨla ó e gʉʼlʉgʉ́ yé á sumo mbɛ̌r kʉ́ epum lé ósɨ́ǎ yɨ́. 27Mpíé nzě nwɨ́ɨ, mpɨɨ mamle, onkúo kwoolo, bê nzě nkaŋa ɨ́ mbɛ̌r waá, mbɛ̌r nzě bîʼ ɨ́ kum, wɨ́wɛ̂h lɨ́ ebîʼ ɨ́ jɔʼ gwár.»

Nkul jwɨ́ɨ mé Yésʉs

28Jɔ̌ʼ Yésʉs á sil edwe mentumo me bʉ̂r milɛ́ʼlá myaá yɨ́, lwǐb yé, yé á be ɨ́ buú mɛ̂r bé ɨ́ miléme. 29Ebě, nye á bé adwe bé milɛ́ʼlá mpʉ ólɛ̂ʼla o métié bɔ́ɔ́. Nye á lɨlɛ̂ʼle bé ó e nkul jwɨ́ɨ.

Selectat acum:

Matthieu 7: ozm

Evidențiere

Partajează

Copiază