LUCAS 21

Mä ijma warmin Diosar qullqi churasitapa

(Mc 12.41-44)

1Jesusasti Tatitun utapankaskänwa, ukat kunjämtix qamirinakax qullqi churapkän uk uñjäna, 2ukatsti jan kunan mä ijma warmiruw cobret lurat pä jisk'a qullqi uchir uñjäna. 3Ukat Jesusax säna:

—Qhanak sapxsma, aka jan kunan ijma warmiw taqinit sipan juk'amp jil churi; 4taqi jupanakasti kunatix jilt'ki ukatak churapxi, aka warmisti, jan kunan kankañapanxa, kunatix jakañapatak utjkän uk taqpach churxi —sasa.#21.4 2 Co 8.12.

Jesusax Diosan utapan t'unjatäñap yatiyi

(Mt 24.1-2; Mc 13.1-2)

5Yaqhipanakax Tatitun utapxat parlasipkäna, kunja sumäkäntix qalanakapasa, kunanaktix churapkän ukanakampi k'achachatanakasa. Ukat Jesusax säna:

6—Mä uruw purinini, taqi akanak uñjapkta ukanakax q'ala t'unjatäniwa, janiw mä qalas yaqha qalxar uchatax utjkaniti. Taqipuniw t'unjatäni —sasa.#21.6 Jerusalén markax 70 d.C. uka maran Romankir ejerciton q'ala t'unjatänwa.

Akapach janïr tukuskipan unañchanaka

(Mt 24.3-28; Mc 13.3-23)

7Ukat juparux jiskt'apxäna:

—Yatichiri, ¿kunapachas ukax lurasini? ¿Kuna unañchanakarak ukanakan phuqhasiñapatak utjanisti? —sasa.

8Jesusasti sänwa:

—Amuyasipxam, jan sallqjayasipxamti. Waljaniw sutixar jutapxani: ‘Nayätwa Cristoxa’ jan ukax, ‘Uka urux purinxiwa’ sasa. Ukampis jan ukanakar arkapxamti.#21.8 Mc 13.21; Lc 17.23; 1 Jn 2.18. 9Kunapachatix nuwasiñanakampita, ch'axwanakampit parlir ist'apkäta ukkhax, jan mulljasipxamti; ukanakasti nayraqat phuqhasiñapapuniwa; ukampis janïraw tukuyäkiti —sasa.

10Ukxarux saskakïnwa:

—Mä jach'a markax yaqha jach'a markampiw nuwasini, mä jisk'a markas yaqha jisk'a markampiw nuwasini. 11Taqi chiqan uraq khathatinaka, manq'at awtjayasiñanaka, usunakampiw utjani, alaxpachansti mulljaskañanakampi, jach'a unañchanakampiw uñjasini.#21.11 Is 19.2; Ap 6.3-8,12-17.

12“Ukampis taqi akanak nayraqatasti, jumanakaruw katuntapxätam, t'aqhisiyañatakiw arknaqapxarakïtam. Sinagoganakaruw taripañatak apapxätam, carcelaruw uchantapxätam, ukatsti reyinakana, marka apnaqirinakan nayraqataparuw sutix layku irpapxätam.#21.12 Mt 10.17-18. 13Ukanakasti jumanakan nayat arsupxañamatakïniwa. 14Jumanakasti arsuñatak jan nayraqat wakichasipxamti, 15nayaw jumanakarux yatiñ kankañan phuqt'at arunak churapxäma, ukarusti janirakiw khiti uñisirinakamas kun kamsañatakis ch'amanïpkaniti.#21.15 Mt 10.19-20; Mc 13.9-11; Lc 12.11-12. 16Jumanakasti awkinakamana, jilanakamana, wila masinakamana, uñt'at masinakaman aljantatäpxätawa.#21.16 Mt 10.21; Mc 13.12; Lc 12.52-53. Jumanakat yaqhiparux jiwayapxätamwa, 17sutix laykusti taqinin uñisitaw sarnaqapxäta;#21.17 Mt 10.22; Jn 15.18-25. 18ukampis janiw mä ñik'utamas chhaqkaniti. 19¡Ch'aman sayt'asipxam, jakañam qhispiyasiñataki!

20“Kunapachatix Jerusalén markar ejercitonakan muyuntat uñjapkäta ukkhaxa, uka markan jank'ak t'unjatäñap yatipxäta. 21Ukapachasti, Judeankirinakax qullunakar jaltxapxpan; Jerusalén markankirinakasti uka markat mistxapxpan, pampankirinakasti markarux jan kutintapxpati. 22Uka urunakasti mutuyäwi urunakäniwa,#21.22 Os 9.7. kunjämtix Qillqatan siski ukanakaw phuqhasini. 23¡Ay ukürunakan usur jaqi warminakata, jan ukax asu wawaninakata! Wali t'aqhisiñaw uka markan utjani, mä axsarkañ mutuyäwiw taqi jaqitak utjani. 24Yaqhipanakax nuwasïwin jiwarayatäpxaniwa, mayninakarusti yaqha markanakaruw katuntat apayapxani; Jerusalén markasti yaqha markat jutirinakan t'unjatäniwa, uka jaqinakan markar apnaqañapax tukuskani ukapachkama.#21.24 Is 63.18; Dn 8.13; Ap 11.2.

Jaqin Yuqapax wasitat akapachar jutani

(Mt 24.29-35,42-44; Mc 13.24-37)

25“Ukapachax unañchanakaw uñstani: intina, phaxsina, warawaranakana;#21.25 Is 13.10; Ez 32.7; Jl 2.10; 2.31 (3.4); Sof 1.15; Sab 5.22; Ap 6.12-13. uraqinsti jaqinakax mayjt'atäpxaniwa, quta mathapinakan qhuthutitapat wal mulljasipxani. 26Jaqinakax axsarañat samkarapxaniwa, kunatix aka uraqin luraskani uk yatisina; alaxpachan jach'a ch'amanakapamppachaw khathatini.#21.26 Alaxpach jach'a ch'amanaka: Ukax kunayman warawaranaka, phaxsi, inti, taqi ukanakaruw ukham sutichapxirïna. 27Ukapachaw Jaqin Yuqapar uñjapxani, qinay patan jach'a ch'amampi, qhapaq kankañamp jutaskiri.#21.27 Dn 7.13; Mt 16.27; 26.64; Ap 1.7; 1 Ts 4.13-18. 28Ukanakan ukham lurasiñap qalltipanxa, ch'amachasipxam, sartasipxam, jumanakax jank'akiw qhispiyatäpxäta —sasa.

29Ukhamarakiw aka amuyt'äwi säna:

—Higo quqar uñtapxam, jan ukax yaqha quqarus uñtapxam. 30Kunapachatix laphinakap niya ch'uxñtasinkir uñjapkäta ukkhasti, jumanakpachaw jallupachan jak'ankxatap amuyapxtaxa. 31Ukhamarakiw taqi ukanak lurasir uñjapkäta ukkhaxa, Diosan qhapaq markapan jak'ankatap yatipxäta.

32“Qhanak sapxsma, taqi ukanakax janïra jichha pacha jakir jaqinak jiwarkipan phuqhasini. 33Alaxpachampi akapachampix tukusiniwa, ukampis arunakaxax janiw tukuskaniti.

34-35“Amuyasipxam, chuymanakam janiy qalarayasipxamti; jan wali lurañanakampi, machañanakampi, aka uraqin llakisiñanakampi, ukatarak taqi ukanakax akatjamat sipitar uñtat khä urux katuntasipkiristam, uka urusti akapachan jakir taqi jaqinakxaruw jutani. 36Jumanakax wakicht'atäpxam, Diosat mayisipxapunim, ukhamat taqi ukanak luraskani ukat jaltapxañamataki, ukatsti Jaqin Yuqap nayraqatan uñstapxañamataki.

37Jesusax sapüruw Tatitun utapan yatichirïna,#21.37 Lc 19.47; 22.53; Jn 18.20. arumjarusti Olivos sat qulluruw sarxirïna. 38Jaqinakasti sapa qhantatiw Jesusar ist'ir Tatitun utapar sarapxirïna.

Selectat acum:

LUCAS 21: AYOPD

Evidențiere

Partajează

Copiază