Jean 11

Laasaar kúm

1Uninja ubɔ nìn būǹ ki bí Beetanii, kitiŋ kin Maarii nì u-maan Maarta nìn kóòyee, bi yíì-u Laasaar#11.1 Kpèè Luuki 10.38-39.. 2- Maarii gbanti di sá un nìn kpáatì talaalu ki sītì ti-Dindaan taaŋi pu ki dū u-yikpiti ki pítèe. U-niija di sá Laasaar un nìn būǹee. - 3Ní Laasaar niisalibee tú ubɔ ú cùú tùkù Yeesu yii: «Ti-Dindaan, a-bɔɔ būǹ.» 4Yeesu gbìl̄ mimmee, ní ki bí yii: «Laasaar weeŋyi nee kaa sá-u ŋkúm, i sá kí tīī Unimbɔti tinyool, ní ki làá tīī u-Jipɔɔn mun tinyool.»

5Yeesu nìn néeń Maarta nì u-naal nì bi-niija Laasaar. 6Nì míǹ kɔkɔee, u nín gbìl̄ yii Laasaar būǹee, u gíti kāl̀ laakin u nìn bée iwiin ili. 7Ní boonee, u tùkū u-boonnooliibi yii: «Tí gítímaan Juudee!» 8Ní u-boonnooliibi kíí-u yii: «Ukpil, yaadal nee ní Juuda yab kpilib kaa bíi nyàab̀ ataŋkpee kí yāŋkì kí kpɔ̀-saaa? Ní a là kí gítí niinaaa?» 9Ní Yeesu bí-bi yii: «Ŋwìiń ń nyā kí dāa jēetée tikúti saalaa nì tili di kaa báaa? Sii un yaa còom̄ ŋwiimpuee, aa gbéetí, kun puee ŋwìiń wāĺ an kɔkɔ. 10Ama sii un yaa còom̄ kunyeeuee di gbéetí, kun puee ŋwalifi kaa ti bí-si.» 11Yeesu lī míǹ ki dóòyee, ní ki gíti kútì yii: «Ti-bɔɔ Laasaar gèen̄. Ama man làá cùú fìntī-u.» 12Ní bi kíí-u yii: «Ti-Dindaan, u yaa gèen̄ee, u làá pɔ̄ɔkì deeyaa!» 13Yeesu nìn là kí lì yii Laasaar kpíì ní, ama ní u-boonnooliibi bíǹ dākafì yii u sòoǹ ŋgeem min báà ŋma gèeǹee pu ní. 14Míǹ puee ní Yeesu tùkū ki cántì-bi, yii: «Laasaar kpíì. 15Ni-puee an mɔ̄ǹ-mi m nín kaa bí niinee, min làá ŋá ní fōō-mi kí kííyee dee. Kɔŋkɔnnee tí nīn cá u-cee!» 16Niinee ní Toomasi (un bi gíti yíì Atee) bí Yeesu boonnooliibi bin kíǹee yii: «Ti mun ń táá-u ti nì ti-Kpiliu ń tin kpú dicilpu!»

Yeesu di sá difìkitil nì dimaŋfal

17Yeesu bàn̄ee ní ki ká yii Laasaar nìn ŋá dikaakulin iwiin inaa. 18Beetanii kaa nìn dátiǹ Jeerusaleem, an nìn sá kii ataŋkpee ata nyɔkɔm ní. 19An di yì-tì ní Juuda yab tikpil nìn dɔ́miń kí sɔ̀ŋkì Maarii nì Maarta pɔbiliŋ bi-niija kúm pu.

20Maarta nín gbìl̄ yii Yeesu dòońee, ní u yíkìi túŋkì-u, Maarii úǹ nìn gbíntìi kā kudiin. 21Ní Maarta bí Yeesu yii: «Ukpil, a yaa bàà nìn bí doo, m-niija kaa bàà kúù. 22Ama m nyí yii, kɔŋkɔnnee gba, tin tin kamaa ní a yaa mēē Unimbɔtee u làá tīī-si kudɔŋu.» 23Ní Yeesu bí-u yii: «A-niija làá fìkitī.» 24Ní Maarta kíí-u yii: «M nyí yii, ŋwinjoolkaa dal, difìkitil yuntiŋuee, u mun làá dāá fìkitī#11.24 Kpèè Dani 12.2..»

25Ní Yeesu kíí-u yii: «Man di sá difìkitil nì dimaŋfal. Sii un fōō-mi ki kííyee, báà a yaa kpíì gba, a làá nīn cáá dimaŋfal, 26ní sii un yaa bí dimaŋfalin ní ki fōō-mi ki kííyee kaa ti kúù jaanjaan. A fōō ki kíí mimmaaa?» 27Ní u kíí-u yii: «Iiin, m-Dindaan: M nyí yii sii di sá Meesiya, Unimbɔti Jipɔɔn un máaǹ kí dāan̄ duulinyanee.»

Yeesu súń

28U sòon̄ míǹ ki dóòyee, ní ki cūtì ki yíiń u-naal Maarii ki tùkū-u soooo yii: «Ukpil bāań ki bàlifī a-pu.» 29Maarii gbìl̄ mimmee, ní ki yíkì dicilpu ki búntì Yeesu cee. 30Di sá yii Yeesu nìn dáá gbíntìi bí laakin Maarta nìn túŋkì-uee, kaa láá kɔ́ kitiŋin. 31Juuda yab bin nìn bí Maarii cee kudiin ki ŋmēentí-uee nín ká u yíkì dicilpu ki nín nyēēyee, ní bi dī-u. Bíǹ dàkafī yii u cá dikaakul pu kí sɔ̄ dee. 32Ŋyunti ŋun Maarii bàn̄ laakin Yeesu bée ki ká-uee, ní u tātìi gbāaǹ u-nimbiin, ki bí-u yii: «Ti-Dindaan, a yaa bàà nìn bí doo, m-niija kaa bàà kúù.» 33Yeesu nín ká u bíi sūǹee, ki kpáaǹ Juuda yab bin nìn nóoń-uee, ní kunimbaau kɔ́-u ki gbēē u-pɔbil, 34ní u bālifì-bi yii: «La ní ni síb́-u ní?» Ní bi kíí-u yii: «Ti-Dindaan, dāá cùú kpèè.» 35Ní Yeesu bíi sūǹ. 36Ní Juuda yab bí yii: «Kpèèmaan, u nín bàà baasii néeń-u puee!» 37Ama ní bi-kansikin biba mun bí yii: «Úǹ un nìn ŋúbitì ujɔfuee nimbiliŋee kaan ŋūǹ kí yàntī Laasaar ń taa bàà kpúɔɔɔ?»

Laasaar fīkitì

38An fātìi tí gbēē Yeesu pɔbil, ní u búntì dikaakul laŋki. An nìn sá ntaŋkpalɔkɔn, ní bi dū ditaŋkpal ki ŋéeb́ di-nyɔkɔ pu#11.38 Paleesitiini tiŋkin Yeesu yuntiŋuee, bi nìn lùkù itaŋkpiifal ataŋkpakpaan poon ŋgbantamu caŋin ní kí dū ditaŋkpakpaandi dikuŋkundi din wāāyee kí pìin̄. Kpèè Maat 27.60, Maar 15.46, Luuki 24.2.. 39Ní Yeesu bí yii: «Nyìkitīmaan ditaŋkpalee!» Niinee ní Maarta, utaŋkpiilee niisal, bí yii: «Ti-Dindaan, an ŋá iwiin inaa dee, u máaǹ ki tin núukì!» 40Ní Yeesu kíí-u yii: «Maa tùkū-si yii, a yaa fōō-mi ki kíí, a làá ká Unimbɔti nyootaaa?» 41Niinee ní bi nyīkitì ditaŋkpal dikaakul nyɔkɔ pu. Ní Yeesu wáaǹ kutaa pu, ní ki bí yii: «M-baa, m jáam̀-si kii a nín pílifíǹ-mee pu. 42M nyí yii a pée pílifíǹ-mi baabadal, ama bin māntì ki tú-mi nee pu ní m bíi lì, bí fōō kí kíí yii sii di túnní-mi.» 43U lī míǹ ki dóòyee, ní ki téeń mpɔn yii: «Laasaar, nyānní!» 44Ní utaŋkpiil nyánní, u-taaŋi nì u-ŋalii fìn̄ iŋaabu, ki kpáaǹ u-nimbiin#11.44 Dūú ŋmàntī nì 20.6-7.. Ní Yeesu bí yii: «Cúú fìntīmaan-u kí yàntī ú nīn cá!»

Juuda yab sòon̄ ki bɔ́ntì Yeesu pu

(Kpèè Maat 26.1-5, Maar 14.1-2, Luuki 22.1-2)

45Juuda yab kansikin bin nìn dɔ́miń Maarii cee ki ká min min Yeesu ŋée tikpil fōō-u ki kíí. 46Ama bi-kansikin biba cūtì ki ká Fariisab ki máafì-bi min Yeesu ŋée. 47Ní bi nì bisaraaŋakpilib kpáfì bibɔsoonliibi kitil kɔkɔ ki sòon̄ yii: «Ti làá ŋá mana ní kijapaayee ŋáań maamaacib tikpil míǹ na! 48Ti yaa yāntì u gbíntìi ŋáań míǹ, báà ŋma làá fōō-u kí kíí. An làá yàntī Room gɔminau ń dāan̄ kí wīī ti-nimbɔtidiiku nì ti-tiŋki.» 49Bi-kansikinee ubɔ nìn bí, bi yíì-u Kaayiifi, úǹ di nìn sá usaraaŋakpil dibindi gbanti, ní úǹ bí-bi yii: «Naa gbìl̀ tibɔti taapu. 50Naa dàkafī yii an ŋān̄ yii unibaanti ń kpú inifunaan pu ní ditimbundi kɔkɔ ń ŋmátáaa?» 51An kaa nìn sá úǹ u-ba di là ní ki sòon̄ an bɔti. U nín nìn sá usaraaŋakpil dibindi gbantee puee, ní Unimbɔti yāntì u sòon̄ yii Yeesu làá dāá kpú Juuda yab pu. 52An kaa sá Juuda yab baba pu, an sá kí kpāfì Unimbɔti biyaamu bin yàl̄ee kɔkɔ bí ŋá ubaanti. 53Ki yōoǹ an wiiŋŋu gbanti ní bi bóob́ yii see bí kpɔ̀ Yeesu. 54An di yì-tì ní Yeesu kíǹ ki còom̄, kaa yàntī Juuda yab kāntí-u, ní ki búntì kitiŋ kiban, kì bí kuteeu caŋin, bi yíì-kì Eefiraayiim. Niin ní u nì u-boonnooliibi nìn cūtìi kāl̀.

55Dilákatil jiŋaaliu nìn tóobiń, ní binib tikpil nìn yíkí ki cá Jeerusaleem kí cù kí ŋá saraabi, kí nyā bi-jɔkɔntin kí wàatī ní jiŋaalee ń nín bàń. 56Bi nìn nyàab̄ Yeesu niin. Bi bí kunimbɔtidiinee, ní ki bíi bàlifī tɔb yii: «Ni dàkafī yii ba ní? U làá dāan̄ jiŋaal neeyaaa, waa làá dāan̄?» 57Di sá yii bisaraaŋakpilib nì Fariisab nìn síiǹ mara yii un yaa nyí laakin Yeesu bée ń lì bí cùú cúú-u.

Selectat acum:

Jean 11: BASSARDC

Evidențiere

Partajează

Copiază