Jean 10

Upikpaal nì ipii bɔŋmantikaati

1Yeesu bí yii: «Ibaamɔn, ibaamɔn ní m sòoǹ nì ni, un yaa kaa dī kipunyɔkɔ ki kɔ́ kupikpuŋkpuŋun ní ki yaa dī laabee, udaan sá digaŋgandaan ki sá unaayuu. 2Un yaa dī kipunyɔkɔ ki kɔ́ kupikpuŋkpuŋunee di sá upikpaal. 3Un cí kipunyɔkɔee pìitī-u, ní u-piii nyí u-neen. U yíì u-piii sá kamaa nì i-yiŋŋi, ní ki lìntī i-nyɔkɔpu ki cáǹ-i kupikpaaun. 4U yaa nyántì i-kɔkɔ kupikpuŋkpuŋun ki dóòyee, ní ú lìntī i-nyɔkɔpu ní í páań u-boon, kun puee i nyí u-neen. 5Iaa nōotí uniyaŋyan. I sáń-u ní, kun puee iaa nyí u-neen.»

6Yeesu nìn dū tibɔti nee ki ŋmāntì, ama ní baa nìn gbìl̄ ti-taapu.

Yeesu di sá upikpaamɔnti

7Míǹ puee ní Yeesu gíti lī yii: «Ibaamɔn, ibaamɔn ní m sòoǹ nì ni, man di sá kupikpuŋkpuŋu punyɔkɔki. 8Bin kɔkɔ péeǹ-mi ki bāańee sá digaŋgandambi#10.8 Kpèè Yeer 23.1-2, Eesee 34.2-3., ní ki sá binaayub, ipii mun kaa pílifíǹ-bi. 9Man di sá kipunyɔkɔ. Un yaa dīń man pu ki kóońee kāntí difiil. Udaan ŋūǹ kí nīn kóò ki nyēē ki kāntí u-jinti. 10Kun pu unaayuu dòońee di sá ú yɔ̀, kí kpɔ̀, kí bīil̀. Mamee m dɔ́miń í ká dimaŋfal ní, tiba nì tiba ń taa lóó-i dimaŋfal gbantin. 11«Man di sá upikpaamɔnti#10.11 Dūú ŋmàntī nì Ilan 23.1, Yees 40.11, Eesee 34.15, 37.24., upikpaamɔnti piii pu ní u kúntí u-maŋfal. 12Upaadaan un kpàá ki nyàab̀ animbil, kaa sá upikpaal, kaa yì ipiiyee, u yaa ká usaakpan dòońee, u dù ipii ní kí fá kí sāǹ kí kátí, ní usaakpan ń dāan̄ kí cūtì ipii kí yàaǹ-i. 13Kun pu upaadaan sáńee di sá u nyàab̀ animbil ní, ipii bɔti kaa páb́-u. 14Man di sá upikpaamɔnti. M nyí m-piii ní m-piii mun nyí-mi, 15kii m-Baa nín nyí-mi, ma mun nyí m-Baa puee ní#10.15 Kpèè Maat 11.27, Luuki 10.22.. M kúntí m-maŋfal m-piii pu ní. 16M cáá ipii iba in kaa láá kóoń m-pikpuŋkpuŋku nee poonee. See ḿ cáań-i. I làá dāá gbìl̄ m-neen, ní kupicaŋkpuŋu ń ŋá kubaantiiu, ní upikpaal mun ń nīn sá ubaanti. 17«Kun pu m-Baa néeń-mee di sá m tìì m-maŋfal ní kí fàtīí fōō-dì. 18Ubɔ kaa ŋūǹ kí tìl̄ man maŋfal, see man m-ba di là ní kí dū-dì kí tīī. M ŋūǹ kí dū-dì kí tīī, ki ŋūǹ kí fàtīí fōō-dì mun. M-Baa nín bí ḿ ŋá miŋyee dee.»

19Tibɔti gbanti pu ní Juuda yab cúu yākatì. 20Bi-kansikin tikpil nìn lì yii: «Arasinii ubɔ di kā u-pu ní u sòoǹ fám fám. Ba pu ní ni pílifíǹ-u?» 21Ní biba mun lì yii: «Unil un pu arasinii kēe kaa sòoǹ yéè. Mimmee arasinii ŋūǹ kí ŋúbití bijɔfub nimbiliŋaaa?»

Juuda yab kaa ti là Yeesu

22An nìn sá dipeepɔndi ní. Bi nìn bíi jīǹ bi nín nìn ŋáŋkì kunimbɔtidii puee jiŋaaliu. 23Yeesu nìn bí kunimbɔtidiin, laakin bi nìn yíì Saloomɔn kasarkauee taapu ki còom̄. 24Ní Juuda yab dɔ́miń ki māntì ki tú-u ní ki bí yii: «Áli kí tin sāā ŋyunti ŋulɔŋu ní a làá sòoǹ-ti ibaamɔn ní ti-landɔkɔi ń wāl̀ ní? Sii di yaa sá Meesiya, á cántí kí tùkù-ti!» 25Ní Yeesu kíí-bi yii: «M pée tùkū-ni dooooyee, ní naa fōō-mi ki kíí. Atuun ŋin m cáá m-Baa pɔŋŋu ki tūǹ nee sòoǹ m-pu, 26ní naa fōō-mi ki kíí, kun puee naa sá m-piii. 27M-piii gbìl̀ m-neen pu, ní ma mun nyí-i, ní i nóó-mi. 28M tīī-i dimaŋfal din kaa cáá dikúntilee, i kpá kí kpú jaanjaan, báà ubɔ mun kaa tí ŋūǹ kí fōō-i m-ŋaan. 29M-Baa un tīī-mi-iee cáá mpɔn ki jítiǹ báà ŋma. Míǹ ní ubɔ kaa ŋūǹ kí fōō tiba m-Baa ŋaan. 30Man nì m-Baa Unimbɔti, ti sá ubaanti ní.»

31Niinee ní Juuda yab tí fātìi píí ataŋkpee kí yāŋkì kí kpɔ̀-u. 32Ní Yeesu bí-bi yii: «M dū m-Baa pɔŋŋu ki túń atummɔnti tikpil ni-nimbilin. Mimmee, atuun gbanti kansikinee, dilal pu ní ni là kí yāŋkì-mi ataŋkpee kí kpɔ̀ na?» 33Ní Juuda yab kíí-u yii: «An kaa sá atummɔnti pu ní ti là kí yāŋkì-si ataŋkpee kí kpɔ̀, an sá a nín sòon̄ ki bíil̀ Unimbɔtee pu. Kun puee sii sá unifantanti ní ki ŋèeǹ nì Unimbɔti#10.33 Kpèè Akoo 24.16..» 34Ní Yeesu kíí-bi yii: «An kaa ŋmàn̄ ni-marau poon yii: <M bí yii, ni sá inimbɔtaaa#10.34 Ilan 82.6.?> 35Mara gbɔŋku yaa ŋūǹ kí yíiń bin bin bi sòon̄ Unimbɔti bɔti ki tùkūee yii bi sá inimbɔtee, 36kin un Unimbɔti baasii lēē ki túnní duulinyanee fáà! Kin an dī mana ní nimbi lì yii m ŋèeǹ nì Unimbɔti m nín bí yii man di sá Unimbɔti Jipɔɔnee. 37M yaa kaa bíi tūǹ m-Baa tuuŋŋi, ní taa fōō-mi kí kíí. 38Ní m yaa bíi tūǹ-ŋi, báà ni yaa kaa làá fōō-mi kí kíí, fōōmaan atuun ŋin m bíi tūǹee kí kíí kí baasii béé yii Ubaati bí m-ni ní ma mun bí Ubaatin.» 39Niinee ní bi tí bíi nyàab̀ kí cúú-u ní u ŋmátì bi-ŋaan. 40Ní u fātìi gítì Jɔɔdan buŋgbandi lapu pu, laakin Yoowaneesi nìn dáá kíĺ ki fùul̀ binib nnyimee, ki kāl̀ niin. 41Binib tikpil nìn dòoń u-cee niin, ní ki lì yii: «Yoowaneesi kaa nìn ŋá maamaaci báà ubɔ, 42ama tin kɔkɔwoooo u nìn sòon̄ kijapaai nee puee, an sá ibaamɔn.» Binib tikpil nìn fōō Yeesu ki kíí niin.

Selectat acum:

Jean 10: BASSARDC

Evidențiere

Partajează

Copiază