ЛукӀа 2

Иса дидедиз хьун

1Гьа йикъара, чилел алай кьван инсанар сиягьдиз къачун патал, АгъустӀас пачагьдилай эмир атанай. 2Им Куьруьна Суьрия идара ийизвай чӀав тир. Сад лагьай гъилера халкь сиягьдиз къачузвай. 3Чпин тӀварар кхьиз тун патал, вирибур чпин тухумрин шегьерриз хъфенай. 4Галилейдин Назарет шегьердай Ягьудатдиз, Давуд пачагьдин ватан тир Бетлегьем шегьердиз, Давудан тухумдикай тир Юсуфни фена. 5Ам аниз ада лишан кутунвай Майрамни галаз чпин тӀварар сиягьда тун патал фейиди тир. Майрам кӀвачел заланзавай. 6Абур Бетлегьемда авайла, Майрамаз аял жедай вахт алукьна. 7Ада Хва – сифте Аял хана, Ам пекерик кутуна, мугьманар кьабулдай кӀвале чка тахьуниз килигна, тӀуна эцигна.

8Абур акъвазнавай чкадин мукьув гвай чӀура йифиз чпин суьруьяр хуьзвай чубанар авай. 9Садлагьана абурун вилик Реббидин малаик акъатна. Абур алай чка Реббидин къудратдин нурари экуь авуна. Абуруз кӀевелай кичӀе хьана. 10Амма малаикди лагьана:

– КичӀе жемир, за квез Исраилдин вири инсанар шадардай зурба муштулух гузва: 11къе Давудан шегьерда куь Хиласкар – Ребби Месигь дидедиз хьанва. 12Имни квез ишара: тӀунай квез пекерик кутунвай Аял жагъида.

13Садлагьана малаикдин патав Аллагьдиз шукурар ийиз-ийиз атай цаварин гзаф кьушунар пайда хьана:

14– Шукур хьуй цавараллай Аллагьдиз! – лагьана абуру. – Адаз хуш инсанар авай чилел ислягьвал хьурай!

15Малаикар цаварал хъфейла, чубанри сада садаз лагьана:

– Ша чун Бетлегьемдиз фин, ана вуч хьанатӀа килигин. Чаз Реббиди вуч малумнаватӀа акван.

16Тади кваз аниз атай абуруз Майрам, Юсуф ва тӀуна авай Аял жагъана. 17БицӀек акурла, чубанри малаикди чпиз Адакай лагьай гафар анал алайбуруз тикрар хъувуна. 18Чубанрин ихтилатар ван хьайи вири мягьтел хьана. 19Амма Майрама ибур вири вичин рикӀе хвена, ибурукай фикирзавай. 20Чубанар чпиз акурдай ва ван хьайидай Аллагьдиз шукурар ийиз-ийиз хъфена: вири крар абуруз лагьай жуьреда кьиле фенвай.

21Аял дидедиз хьайи муьжуьд йикъалай Ам суьннет авунай ва Адал Иса тӀвар эцигна. А тӀвар дидедин руфуна аял кьадалди малаикди гайиди тир.

Иса Аллагьдин КӀвале

22Реббиди Мусадиз гайи Къанундалди михьивилердай адет кьилиз акъуддай вахт алукьайла, Юсуфани Майрама БицӀек Реббидиз къалурун патал Ярусалимдиз гъана. 23-24Гьа Къанунда кхьенвайвал, гьар са сифте гада аял Реббидиз талукьарна ва кьве тӀапӀас ва я кьве жегьил лиф къурбанд гана кӀанзавайди я.

25Гьа вахтунда Ярусалимда Суьмегьал лугьудай кас аваз хьана. Ам гьахъ-михьи ва Аллагь рикӀел алайди тир, вични Исраил гъамарикай азад жедай югъ атунал вил алай, Пак Руьгь акатнавай инсан тир. 26Реббидин Месигь вилералди такунмаз вич рекьин тийидайди адаз Пак Руьгьди лагьанвай.

27Суьмегьал Руьгьдин эсерди Аллагьдин КӀвализ гъана. Чпин БицӀек патал Мусадин Къанунда къалурнавай къайдаяр кьилиз акъудиз, Исадин дидени буба Аллагьдин КӀвализ гьахьайла, 28Суьмегьала абурувай аял къачуна гъилерал кьуна, Аллагьдиз шукурар авуна ва лагьана:

29 – Заз гайи гаф Вуна кьилиз акъудна,

Вири Ихтияррин Иеси,

гила На заз рухсат гуда,

30-31 Зи вилериз вилик вири халкьарин

На гьазурай Хиласвал акуна.

32 Гьар са халкьдиз рехъ къалурдай экв гуда,

Ви халкь Исраилдал гъида Ада баркалла.

33Аялдин бубани диде Адакай авур ихтилатри мягьтеларнай. 34Суьмегьала абуруз хийир-дуьа авуна, Аялдин диде Майрамаз лагьана:

– Ингье, и аялдикай Исраилда гзафбур агъуз ва виниз хьунин себеб жеда. Адакай Аллагьди ганвай, амма гзафбуру кьабул тийидай ишара жеда. 35Гьа идалди абурун рикӀера вуч аватӀа ачух жеда. Ваз, лагьайтӀа, рикӀ атӀай кьван тӀар жеда.

36Инал Ашеран тайифадикай тир Фануилан лап кьуьзуь хьанвай руш Гьайна алай. Ам Аллагьдин мецелай раханай. Гъуьлуьз фейидалай кьулухъ ада вичин итимдихъ галаз санал ирид йисуз уьмуьр тухванай. 37Ам кьудкъанни кьуд йис хьанвай хендеда тиртӀани, ада, Аллагьдин КӀвале жез, йифди-югъди дуьаяр ийиз, сив хуьз Аллагьдиз къуллугъ ийидай. 38Гьанна гьа вахтунда Аялдин диде-бубадин патав атана, ада Аллагьдиз шукурар авуна ва ада Ярусалим азад авунал вил алай кьванбуруз таза аялдикай ихтилатар ийиз хьана.

39Реббидин Къанунда кхьенвайвал, вири лазим крар авуна куьтягь хьайила, абур Галилейдиз, чпин Назарет шегьердиз хтана. 40Аял къвердавай чӀехи жезвай, ва къвез-къвез къуватда ва камалда гьатзавай. Ам Аллагьдин нуьсретдик квай.

41Гьар йисуз Адан диде-буба Ярусалимдиз Песагь суварик фидай. 42Къайда яз, суварик Ярусалимдиз фидайла, абуру аниз цӀикьвед йиса авай Иса сад лагьай гъилера тухванай. 43Суварин йикъар куьтягь хьана, абур элкъвена хквезвайла, гада Иса Ярусалимда амукьна. Ам хквен тийизвайди Адан диде-бубадиз эвелдай чир хьаначир. 44Абуру Ам масабурухъ галаз хквезва жеди лагьана фикирнай. Амма са йикъан рехъ атӀайдалай кьулухъ, абур мукьва-кьилийринни танишрин арада гададихъ къекъвез хьанай. 45Ам жагъун тавурла, Адахъ къекъвез элкъвена Ярусалимдиз хъфенай. 46Пуд йикъалай абуруз Ам, Аллагьдин КӀвале муаллимрихъ яб акализ ва абурун вилик суалар эцигиз, абурун арада ацукьнаваз жагъанай.

47Исадин ван хьайибур Адан акьулдал ва Ада гузвай жавабрал гьейран тир. 48Ам акурла, дидени буба мягьтел хьана амукьна.

– Я Хва, – лагьана дидеди, – Вуна чаз вуч авуна? Ви бубани Зун рикӀик гъалаба кваз Вахъ къекъвез хьана.

49– Куьн Захъ вучиз къекъвена? – жаваб гана Исади. – Зун Зи Бубадин кӀвале хьана кӀанзавайди квез чизвачирни?

50Амма абур Исади лагьай гафарин гъавурда гьатнач. 51Ам абурухъ галаз элкъвена Назаретдиз хтана. Исади абуру лагьай вуч хьайитӀани ийизвай. Адан дидеди Ярусалимда хьайи агьвалат рикӀел хвена. 52ЧӀехи жердавай Исадин камал гзаф, Аллагьдини инсанри Адахъ ийизвай майилар артух жезвай.

Selectat acum:

ЛукӀа 2: ЛезПК

Evidențiere

Partajează

Copiază