ЛукӀа 3

Ягья пайгъамбардин чирвал

(МатӀай 3:1-12; Мрк. 1:1-8; Ягь. 1:19-28)

1Тибера Римда пачагьвал ийизвай цӀувад лагьай йисуз ПунтӀи ПилатӀа Ягьудатда сердервал, Гьируда Галилейда гьакимвал, адан стха ФилипӀа Итуратда ва Тарахан вилаятда гьакимвал, Луьсанани Абилинейда гьакимвал ийизвай. 2Гьа и береда Гьайнас ва Каяф кьилин хахамар тир. Гьа чӀавуз Зекеридин хва Ягья кьурумда авай. Ана адаз Аллагь вичихъ галаз рахай ван хьана. 3Ярдан вацӀун патарив гвай чилера къекъвез, ада инсанриз куьн Аллагьдин рекьел ша, и кар кьиле тухунин лишан яз цик акахьун къачу ва гьа чӀавуз Аллагьди квелай гъил къахчуда лугьуз вязер-несигьатар гузвай. 4ГьакӀ хьайила, Яшай пайгъамбардин ктабда икӀ кхьенвай:

«Кьурумда гьарайзавайдан ван чкӀида:

„Реббидиз рехъ гьазура,

Адан рехъ дуьзди ая.

5 Гьар са дере ацӀур хъия,

дагъни тепе дуьзен ая.

Патахъ рекьер дуьзар хъия,

ханвай рекьер цӀалцӀам хъия.

6 Гьа чӀавуз чан алай гьар садаз

Аллагьди гудай хиласвал аквада“» # Яшай 40:3-5. .

7Цик акахьун къачун патал вичин патав атайбуруз Ягьяди лугьудай:

– Эй гъуьлягъдин къеняй акъатайбур! Аллагьди, хъиляй ацӀана, квез гудай жазадикай квевай катиз жеда лагьай фикир куь кьилера ни туна? 8Къуй куь хъсан крарин майвайри куьн Аллагьдин рекьел атанвайди къалуррай! «Чи буба Ибрагьим я», – лугьуз ацукьмир; за квез лугьузва хьи, Аллагьдивай и къванерни Ибрагьиман веледриз элкъуьриз жеда. 9ЯкӀвни датӀана тарарин пунарив гьазур я: хъсан майваяр тегъидай гьар са тар атӀана цӀуз гадарда.

10Халкьди Ягьядивай хабар кьаз хьана:

– Бес чна вуч авун лазим я?

11– Нихъ кьве къат перем аватӀа, авачирдаз це, – жаваб гуз хьана ада, – нихъ недайди аватӀа, авачирдаз це.

12 Харж кӀватӀдайбуруни, цик акахьун къачун патал атана, адавай жузуна:

– Муаллим, чна вуч авуна кӀанда?

13– Тайинарнавайдалай артух харж тӀалабмир, – жаваб гана Ягьяди.

14Адавай аскеррини хабар кьаз хьана:

– Бес чна́ вуч ийида?

– Халкьдивай тарашмир, садални буьгьтен вегьимир, жуваз гайи гьакъидал рази хьухь, – жаваб гана ада.

15Халкь важиб тир са квел ятӀани вил алаз акъвазнавай, абуру, им Ягья Месигь ятӀа лугьуз, хиялар ийизвай.

16Ягьяди, виридахъ элкъвена, лагьана:

– За квев цик акахьун къачуз тада. Амма залай гзаф къудрат авайди къведа. Зун Адан кӀвачин къапарин чӀулар ахъайизни лайих туш. Ада квев Пак Руьгьдик ва цӀук акахьун къачуз тада. 17Адан йирф Вичин гъиле ава, Ада Вичин рат михьда, гатай къуьл Вичин бегьер хуьдай чкадиз кӀватӀда, нагъварни хкахь тийидай цӀал куда.

18Гьа ихьтин гзаф гафаралди ада Шад Хабар инсанрал агакьарзавай ва гьакӀни абур чӀалахъарзавай. 19-20Гьируд бегди вичин стхадин паб Гьирудат вичиз гъуниз килигна, Ягьяди ам халкьдин вилик беябурна. Адалайни гъейри, Гьируд бегди авур амай чӀуру кӀвалахарни Ягьяди винел акъудиз хьана. Виликдай вичи авур кьван чӀуру крар бес тахьана, Гьируда Ягьяни къазаматда тваз туна.

Исади цик акахьун къачун

(МатӀай 3:13-17; Мрк. 1:9-11; Ягь. 1:32-34)

21Вири халкьди цик акахьун къачурдалай кьулухъ Исадини цик акахьун къачунай. Ада дуьаяр ийизвайла, цавар ахъа хьана. 22Лифрен шикилда аваз Пак Руьгь Исадал эвичӀна. Цаварай: «Вун Зи рикӀ алай Хва я, Зи шадвал Валди я!» – лугьудай сес чкӀана.

Иса Месигьдин тухум

(МатӀай 1:1-17)

23Вичин хиве авай кардив эгечӀдайла, Исадин къанни цӀуд йис кьван тир. Халкьди Ам Элидин хва Юсуфан велед тирди фикирзавай. Амайбур Адан бан-бубаяр тир: 24МататӀ, Леви, Мелгьи, Янай, Юсуф, 25МатӀатӀи, Амус, Нагьум, Гьесли, Нагъай, 26МагьатӀ, МатӀатӀи, Шими, Юсех, Ягьад, 27Югьнан, Риза, Зарубабел, Шалатил, Нери, 28Мелгьи, Ади, КӀусам, Элмадам, Эр, 29Иса, Элигьезер, Ярим, МататӀ, Леви, 30Шимун, Ягьуд, Юсуф, Янам, Элиаким, 31Мелей, Менан, МатӀатӀ, Натан, Давуд, 32Ишай, Абид, Багьас, Салман, Нагьшун, 33Аминадаб, Арам, Гьесран, ПерецӀ, Ягьуд, 34Якьуб, Исакь, Ибрагьим, Терагь, Нахар, 35Серуг, Регу, Пелег, Эбер, Шалагь, 36Къенан, Арбахшад, Шам, Нуьгь, Ламех, 37Метушелагь, Гьенух, Яред, Магьалал, Къенан, 38Энаш, ШетӀ, Адам, Аллагь.

Selectat acum:

ЛукӀа 3: ЛезПК

Evidențiere

Partajează

Copiază