ЛукӀа 1
1
Зекеридин патав малаик атун
1-2Гзафбур чи арада кьиле фейи, гьакӀни эвелдилай чпиз вилералди акур ва Аллагьдин Гафуниз къуллугъ авур ксаривай чаз ван хьайи вакъиайрикай кьисаяр туькӀуьриз эгечӀна. 3-4Гьавиляй зани вун патал, играми Тегьафил, вун жуваз гайи чирвилер дуьз тирвилин чӀалахъ рикӀивай хьун патал, вири крар лап эвелдай авайвал чирна, галай-галайвал сад садан гуьгъуьналлаз кхьин кьетӀна.
5 Ягьудат вилаятдин пачагь Гьирудан девирда Аби кьиле хьайи хахамрин кӀватӀалдик Зекери лугьудай са хахам квай, адан паб Элисабат Гьарунан тухумдикай тир. 6Аллагьдин вилик абур Реббидин вири къайдайрални тагькимрал кӀевелай амал ийизвай гьахъ-михьибур тир. 7Амма абурухъ аялар авачир, вучиз лагьайтӀа Элисабат эремек тир, абурун кьведанни яшар хьанвай.
8Садра Аллагьдин КӀвале къуллугъ ийидай нубат Ави кьиле хьайи хахамрин кӀватӀалдал атана. 9Чип вегьидай къайда авай, хахамрин арада атирдин ни галай гум акъудун и гъилера чпинай Зекеридал атана. 10Ада Аллагьдин КӀвале ни галай затӀар кудайла, къецел алай гзаф инсанри дуьаяр ийизвай. 11Гьа и вахтунда адаз атир галай гум акъуддай къурбангандин эрчӀи пата Реббидин малаик акъвазнаваз акуна. 12Ам акурла, Зекери вич вичивай квахьна ва адаз гзаф кичӀе хьана.
13– КичӀе жемир, Зекери, – лагьана малаикди, – Аллагьди ви дуьаяр кьабулнава, ви паб Элисабата ваз хва хада, вуна адал Ягья тӀвар эциг. 14Ам дуьньядал атуни ваз чӀехи шадвал гъида, гзаф инсанриз хвеши жеда. 15Аллагьдин вилик адакай зурба кас жеда. Ада я чехир, я буза хъвадач. Гьеле дуьньядиз татанмаз ам Пак Руьгьдив ацӀанваз жеда. 16Ада Исраилдин гзаф ксар чпин Аллагь тир Реббидихъ элкъуьрда. 17Ильясан хьтин руьгьни къудрат аваз ам, бубайрин рикӀер веледрихъ элкъуьр хъийиз, Аллагьдин рекьяй акъатнавайбур дуьз рекье хутаз, Ребби къведалди виликамаз халкь гьазурун патал, Адалай вилик дуьньядиз къведа.
18– ГьакӀ жедайди заз гьикӀ чир хьурай? – жузуна Зекериди, – Зун кьуьзуь я эхир, зи пабни жегьил туш.
19– Зун Аллагьдин вилик акъвазнавай Жабраил я, – жаваб гана малаикди, – зун, вахъ галаз рахун патал ва ваз и муштулух гун патал, Гьада ракъурнавайди я. 20За ваз лагьай кар, вахт агакьайла, кьилиз акъатда. Амма вун зи гафарин чӀалахъ тахьайвиляй, за лагьай кар кьилиз акъатдалди, вун мез кьуна рахан тийиз амукьда.
21Халкьдин вил Зекеридал алай, ам Аллагьдин КӀвале геж хьуни инсанар мягьтел авунвай. 22Зекери экъечӀна, амма адавай рахаз хъхьанач. Халкь адаз Аллагьдин КӀвале карагун акурдан гъавурда гьатна. Зекери инсанрихъ галаз ишарайралди рахазвай, ам чӀал кьуна амай.
23Къуллугъ ийидай йикъар куьтягь хьайила, Зекери вичин кӀвализ хъфена. 24Са тӀимил вахтунилай адан паб Элисабат кӀвачел залан хьана ва сифтегьан вад вацра кӀваляй экъечӀнач. Ада лугьуз хьана:
25– Им Аллагьди инсанрин вилик айиб залай алудун паталди авунвайди я.
Малаикди Майрамаз муштулух гун
26-27Элисабат аялдик кваз ругуд лагьай варз хьайила, Аллагьди Галилейда авай Назарет шегьердиз Давудрикай тир Юсуфа лишан кутунвай Майрам тӀвар алай рушан патав малаик Жабраил ракъурна. 28Жабраила атана Майрамаз лагьана:
– Саламар хьуй ваз! Аллагьдиз кӀаниди! Ребби вахъ галаз я.
29Жабраилан гафарин ван хьайила, вичи вич квадарай руша ибур вуч гафар ятӀа лугьуз фикирар авуна.
30– КичӀе жемир, Майрам, – лагьана малаикди, – вун Аллагьдин берекатдик акатнава. 31Ингье, вун руфунал залан жеда, вуна хва хада, Адални Иса тӀвар эциг. 32Ам чӀехи кас жеда, Адаз Виридалай Виниздан Хва лугьуда. Ребби Аллагьди Ам Адан бан-бубайрикай тир Давудан тахтуна ацукьарда. 33Ада Якьубан несилриз даим пачагьвал ийида ва адан пачагьвилин эхир жедач.
34– Им жедай кар яни? – жузуна Майрама. – Зун гьеле гъуьлуьз фенвайди туш эхир!
35– Вун Пак Руьгьдин эсердик кваз жеда, – жаваб гана малаикди. – Вун Виридалай Виниздан къудратдик акатда. ГьакӀ хьайила, вуна хадай пак Аялдиз Аллагьдин Хва лугьуда. 36Ингье, икьван гагьди эремек яз гьисабзавай ви мукьвади тир Элисабат кьуьзуь кьиляй аялдик кваз ругуд варз я. 37Аллагьдилай алакь тийидай са карни авач.
38– Зун Аллагьдин лукӀ я! – лагьана Майрама. – Къуй гьа вуна лагьайвал хьурай!
Малаик адан патавай хъфена.
Майрам Элисабатан патав фин
39Гьа идалай кьулухъ са тӀимил йикъарилай Майрам, экъечӀна, тадиз Ягьудатдин дагъдик квай са шегьердиз фена. 40Ада, Зекеридин кӀвализ атана, Элисабатаз салам гана. 41Майраман саламдин гафар ван хьайила, Элисабатан бедендик квай аял юзана, Элисабат Пак Руьгьдай ацӀана.
42Ада ван алаз лагьана:
– Вири папарилай гзаф Аллагьдин нуьсрет алайди!
Ви бедендик квай аялдални Аллагьдин нуьсрет ала.
43Зи Реббидин диде зи патав атун – им заз гьинай жагъай бахт я! 44Ви саламдин сес зи япарихъ галукьайла, зи бедендик квай аялдик шадвилин юзунар акатнава. 45Реббиди ваз лагьайбур кьилиз акъатдайдан чӀалахъ хьайи вун бахтавар я.
46Майрамани лагьана:
– РикӀ ацӀурна алхишда за Реббидиз,
47 Руьгь шад я зи хилас ийир Аллагьдал,
48 Вичин табий лукӀ акурдал цаварай,
гила вири несилра зи бахтунин
49 тариф гьатда. Къудрат Авайда шафакъат # 1:49 Шафакъат – Аллагьди ракъурнавай регьим, куьмек.
авуна заз багъиш, пак я ТӀвар Адан.
50 Гьар девирда Ада вичин регьимдик
Вичихъай кичӀебур кутазва.
51 Ада Вичин къуват авай гъилелди
лавгъа рикӀер авай ксар чукурна.
52 Гьукум гвайбур тахтунилай гадарна,
усал тирбур Ада виниз хкажна.
53 Авачирдаз гана Ада мал-девлет,
девлет авайбур туна гъилер ичӀи яз.
54-55 Ада фейи чӀавара чи бубайриз,
Ибрагьимаз ва гьакӀ адан веледриз,
эбеди яз гуда лугьуз хиве кьур
регьим рикӀел хвена, Вичин къуллугъда
акъвазнавай Исраилдиз куьмекна.
56Элисабатан кӀвале пуд варз кьван акъудайдалай кьулухъ Майрам элкъвена вичин кӀвализ хъфена.
Ягья пайгъамбар дидедиз хьун
57Элисабата аял хадай вахт алукьна – адаз гада хьана. 58Реббиди адаз зурба мергьемет авуна лагьай ван хьайи къуншийрини мукьва-кьилийри адахъ галаз шадвилер авуна. 59Аял хьайи муьжуьд лагьай юкъуз абур ам суьннетиз атана, абуруз аялдал вичин буба Зекеридин тӀвар эцигиз кӀан хьана. 60Амма аялдин диде рази хьанач:
– Ваъ, адан тӀвар Ягья жеда.
61– Ви мукьва-кьилийрик и тӀвар алай кас хьайиди туш, – лагьана абуру 62ва аялдин бубадивай ишарайралди адал гьихьтин тӀвар эцигда лагьана хабар кьуна.
63Зекериди кьул тӀалабна, адал: «Адан тӀвар Ягья я» лагьана кхьена. Вири мягьтел хьана амукьна. 64Зекеридиз гьасятда чӀал ахкъатна ва ада Аллагьдиз шукурар ийиз хьана. 65Инал Зекеридин къуни-къуншийрик кичӀ акатна ва инал хьайи крар вири Ягьудатдин дагъдик квай чкайрин инсанрин сивера гьатна. 66И кардикай ван хьайибуру и Шад Хабар чпин рикӀе хуьз хьана. Абуру чпи чпик: «И аялдикай вуж жедатӀа?» – лугьуз фикирзавай. Гьакъикъатдани, Аллагьдин къуват гьадахъ галай.
67Ягьядин буба Зекери, Пак Руьгьдин эсердик кваз, пайгъамбар хьиз рахаз эгечӀна:
68 – Шукур хьурай Реббидиз, Исраилдин Аллагьдиз
Вичин халкьдал кьил чӀугур, ам хиласиз.
69-71 Адан пак тир пайгъамбаррин мецелди
хиласда лугьуз чи халкь душманрин
ва гьакӀни чун такӀанбурун гъиликай
чаз лап фадлай хиве кьурвал Реббиди,
Ада чаз чун хиласдай гуж гана
Вичин лукӀ Давудан пак велед яз,
72 чи бубайрал регьим къурун паталди,
рикӀел алаз вичин пак тир Икьрарни,
73-75 Ибрагьимаз Вичи кьур кьин рикӀеваз,
хуьда лугьуз чун мидяйрин пацукай,
гуда лугьуз чаз даиман мумкинвал
Вичиз пак яз, гьахъ-михьи яз къуллугъдай.
76-78 Виридалай Виниз Тирдан пайгъамбар
лагьай тӀвар ваз гуда, бала, вун Адан
фида вилик кваз, халкь хилас хьунухьин
цавар ацӀай регьимдив чи Аллагьди
гъил къахчунин гунагьрилай инсанрин
муштулухар, чирвилер, Шад Хабар гуз,
чи Реббидиз гьяркьуь, дуьз рехъ гьазуриз;
Адан регьим цӀийи йикъан ярар яз
хкаж жеда, 79чаз къени рехъ ачухиз,
мичӀивиле авайдаз ва ажалдин
хъенди кичӀе авурбуруз эквер гуз.
80Аял чӀехи жезвай ва руьгьдалди мягькем жезвай. Исраилдин халкьдин вилик экъечӀдай вахт алукьдалди ада кьурумра уьмуьр тухвана.
Selectat acum:
ЛукӀа 1: ЛезПК
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Институт перевода Библии, 2010-2024
