Ягья 9
9
Буьркьуьди сагъар хъувун
1Фидай рекье Исадиз буьркьуьдаказ дидедиз хьанвай са инсан акуна. 2Исадивай Адан тилмизри хабар кьуна:
– Я Муаллим! Ам буьркьуьдаказ дидедиз хьун нин гунагьдиз ганвай жаза я? Адан вичин яни, я тахьайтӀа диде-бубадин?
3– Ам буьркьуьдаказ дидедиз хьун – адак вичик ва я адан диде-бубадик гунагьар квайвиляй туш, – жаваб гана Исади. – Инсанриз Аллагьдихъ авай къудрат къалурун патал, ам дидедиз буьркьуьдаказ хьанвайди я. 4Зун Ракъурнавайдан хатурдай ийидай крар чна югъ аламаз авуна кӀанда. Йиф алукьайла, абур садавайни кьилиз акъудиз жедач. 5Зун и дуьньяда амай кьван и дуьньядин экв я.
6И гафар лугьуникди, Ада чилел цуькӀуьн#9:6 ЦуькӀуьн – тфу. вегьена, ам руквадик какадарна, арадал атай гъуруш буьркьуьдан вилеривай гуьцӀна. 7Идалай гуьгъуьниз Ада буьркьуьдаз лагьана:
– Шилугьаман латунал алад, анал чин чуьхуьх.
(Шилугьам – «ракъурнавайди» лагьай чӀал я.) Адани, фена, чин чуьхвена. Хкведай рекье адан вилериз экв хтана. 8Инал алай къуншийри ва виликдай ам къекъвераг яз акурбуру лагьана:
– Им ацукьна фир-хквербуруз це лугьузвай гьа кас тушни?
9Садбуру «Эхь, ам гьам я», муькуьбуру: «Ваъ, им ам туш, идак гьадан ухшар ква» лугьузвай. Ада вичи лагьана:
– Ам зун я.
10Абуру адавай хабар кьуна:
– Ви вилер гьикӀ хьана ахъа хъхьайди я?
11Ада жаваб гана:
– Иса лугьудай Касди гъуруш гьазурна, зи вилеривай гуьцӀна заз лагьана: «Шилугьам гьавиздал фена чин чуьхуьх». За, фена, чин чуьхвена, хкведай рекье зи вилериз экв ахкуна.
12– Иса гьина ава? – хабар кьуна абуру.
Адани абуруз «Чидач» лагьана.
13Виликдай буьркьуь тир и кас абуру фарисейрин патав тухвана. 14Адан вилериз Исади гъуруш яна ам дири хъувур югъ Киш югъ тир. 15Фарисейри адавай мад гъилера вилер гьикӀ сагъ хъхьанатӀа хабарар кьаз хьана.
– Ада зи вилериз гъуруш яна, зани чин чуьхвена, – жаваб гана виликдай буьркьуьда. – Гила заз аквазва.
16Инал фарисейрикай садбуру лагьана:
– А Кас Аллагьдин патай туш, Ада Киш йикъал амал ийизвач.
Муькуьбуру лагьана:
– Ихьтин керемат-ишараяр гунагькардилай алакьдани?
Абурун арада гьуьжет гьатна. 17Абуру виликдай буьркьуь тирдаз лагьана:
– А Касди ви вилериз экв хкана. Вавай Адакай вуч лугьуз жеда?
– Ам Пайгъамбар я, – лагьана виликдай буьркьуьда.
18Амма чувудрин кьиле авайбур, ам виликдай буьркьуь тирдан ва гила адан вилериз экв хтанвайдан чӀалахъ жезвачир, гьавиляй абуру адан диде-бубадиз эверна.
19– И куьне буьркьуьдаказ ханвайди я лугьузвай кас куь хва яни? – хабар кьуна абуру. – Адан вилериз гьикӀ хьана экв ахкурди я?
20– Ам чи хва тирди ва ам буьркьуьдаказ хайиди чаз чизва, – жаваб гана адан диде-бубади. – 21Гила адан вилериз гьикӀ экв хтанатӀа, ам чаз чизвач. Адан вилер ни ахъайнатӀани чаз чизвач. Ам бегьем яшар хьанвай инсан я, ам куьне адавай вичивай хабар яхъ. Вичикай ада вичи лугьурай.
22Адан диде-бубади гьа икӀ жаваб ганай, вучиз лагьайтӀа абуруз чувудрин кьиле авайбурухъай кичӀедай. Чувудар, Иса ни Месигьдай кьуртӀа, гьам синагугдай чукурда лагьана виликамаз меслят хьанвай. 23ГьакӀ хьайила адан диде-бубади лагьанай:
– Ам бегьем яшар хьанвай инсан я, куьне адавай вичивай хабар яхъ.
24Чувудрин кьиле авайбуру виликдай буьркьуь тирдаз кьвед лагьай гъилера эхверна, лагьана:
– Вун гьахъ я лагьана, Аллагьдин вилик кьин яхъ. Ви вилериз экв хкай Кас гунагькар тирди чаз чизва.
25– Ам гунагькар яни-тушни заз чидач, – жаваб гана виликдай буьркьуьда, – заз чидайди анжах сад я – виликдай зун буьркьуь тир, гила заз аквазва.
26Адавай мад хабар кьуна:
– Исади ваз вуч авуна? Ада ви вилер гьикӀ ахъайна?
27– За квез лугьузвай, куьне заз яб гузвачир, – жаваб гана виликдай буьркьуьда. – Квез завай мад вуч кӀанзава? ТахьайтӀа квез Адан тилмизар жез кӀанзавани?
28Абуру экъуьгъна лагьана:
– Адан тилмиз ятӀа вун я, чун Мусадин тилмизар я. 29Чаз чизва хьи, Мусади Аллагьди адаз вуч лагьанатӀа гьам лагьана, амма и Кас гьинай акъатнатӀа чаз чизвач.
30– Мягьтел жедай кар ам я хьи, Касди зи вилер ахъа хъувуна, амма квез Ам гьинай ятӀани чизвач, – лагьана вилериз экв хтай касди. – 31Чаз чизва, Аллагьди гунагькарриз яб гудач. Ада Вич рикӀеллаз Вичи лагьайвал ийизвайбуруз яб гуда. 32Буьркьуьз дидедиз хьанвайдан вилер ахъа хъийидай Кас жеда лагьана эсиллагь ван хьайи кар туш. 33Ам Аллагьдин патай туширтӀа, Адалай затӀни алакьдачир.
34Адаз жаваб яз фарисейри лагьана:
– Хьайи йикъалай туьтуьнив кьван гунагьрай ацӀанвай вуна гила чаз тарс гузвани?
Абуру ам чукурна.
35А кас абуру чукурна лугьудай хабар Исадал агакьна. Ам жагъурна, Исади адаз лагьана:
– Вуна Инсандин Хцихъ иман ийизвани?
36– Адахъ иман ийидайвал Ам вуж я, я Агъа? – лагьана ада.
37– Ваз Ам исятда аквазва, Ам вахъ галаз рахазва, – жаваб гана Исади.
38Адани «За иман ийизва, я Ребби!» лагьана, Исадиз икрамна.
39Исади лагьана:
– И дуьньядиз Зун дуван ийиз атанва: буьркьуьбуруз экв ахкун патал, аквазвайбур буьркьуь хьун патал.
40И гафар ван хьайи Адан патав гвай са бязи фарисейри лагьана:
– Чунни буьркьуь я жал?
41Исади лагьана:
– Куьн буьркьуь тиртӀа, квехъ гунагьар жедачир, амма куьне «чи вилериз экв аквазва» лугьузва. Гьавиляй куьн гунагькарар язни амукьзава.
Selectat acum:
Ягья 9: ЛезПК
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Институт перевода Библии, 2010-2024
