Ягья 8

Гунагькар паб

1 Иса Зейтун пелел фена. 2Экуьнахъ Ам мад Аллагьдин КӀвализ хтана; Адан патав вири халкь къвезвай. Ада, ана ацукьна, чирвилер гузвай. 3И арада тавратдаррини фарисейри Адан патав зинавал ийизвайла кьур паб гъана, ам юкьвал акъвазарна.

4– Муаллим, – лагьана абуру, – и паб зинавал ийизвайла кьунвайди я. 5Мусади вичин Къанунда ихьтинбуруз къван гана кӀанда лагьанва. Вуна вуч лугьуда?

6Абуру и гафар, Ам кӀеве тваз кӀанз, ахпани Адак тахсирар кутун патал, лугьузвай. Амма Исади агъуз хьана, тупӀув чилел кхьинар ийизвай. 7Адавай мадни хабар кьаз хьайила, Ада, хкаж хьана, абуруз лагьана:

– Квекай ник гунагь квачтӀа, сифте къван гьада гьалчрай.

8Агъуз хьана, Ада мад чилел кхьинар авун давамна. 9И гафарин ван хьайила, вири хъфиз эгечӀна, сифте агъсакъалар хъфена. Тек Исани адан вилик акъвазнавай паб амукьна. 10Къарагъна, Исади адаз лагьана:

– Я вах, вал гунагьар илитӀзавайбур гьинва? Ваз кар атӀуз кӀан хьайи кас хьанани?

11– Гьич садни, я Агъа! – жаваб гана ада.

– Зани ваз кар атӀузвач, – лагьана Исади. – Ахлад, мад гунагь крар хъийимир.

Иса – дуьньядин экв

12Исади халкьдиз мад лагьана:

– Зун дуьньядин экв я. Зи гуьгъуьнаваз атайди са чӀавузни мичӀе гьатдач, уьмуьр гузвай экв адахъ галаз жеда.

13И чӀавуз фарисейри Адаз лагьана:

– Ибур вири Вуна Жува Жувакай ийизвай шагьидвилер я, гьакӀ хьайила Ви гафар дуьзбур туш.

14– Гьатта За лугьузвай гафар Жува Жувакай ийизвай шагьидвилер ятӀани, абур дуьзбур я, – жаваб яз лагьана Исади. – Зун гьинай атанатӀа ва гьиниз хъфидатӀа Заз чизва; амма квез Зун гьинай атанатӀа ва гьиниз хъфидатӀа чизвач. 15Куьне вири инсанри ийидай хьтин дуван ийизва. За саданни дуван ийизвач. 16За са нин ятӀани дуван ийизвай чӀавуз, За кьилди са Жува ваъ, Зун ракъурай Бубадихъ галаз дуван ийизва, гьавиляй За ийизвай дуван халисанди я. 17Куь Къанундани кьве инсандин шагьидвал дуьзди я лугьузва. 18Закай Зани шагьидвал ийизва, Зун ракъурай Зи Бубадини.

19Инал абуру Исадивай хабар кьуна:

– Бес Ви Буба гьина ава?

– Квез Зунни чидач, Зи Бубани, – жаваб гана Исади. – Квез Зун чидайтӀа, квез Зи Бубани чир жедай.

20И гафар Исади Аллагьдин КӀвале, садакьадин пул вегьидай кьватидин патав гвайла, лагьайбур тир. Ада ана чирвилер гузвай. Ам садани кьунач, вучиз лагьайтӀа Адан вахт алукьнавачир.

Чувудрихъ галаз ихтилатар

21Исади абуруз мад лагьана:

– Зун хъфизва, амма Зун хъфизвай чкадиз квевай къвез жедач, куьн Захъ къекъвез жеда, амма квез жагъидач, гьа икӀ куьн гунагьар кумаз рекьида.

22Инал чувудри чпи чпиз лагьана:

– «Зун физвай чкадиз квевай къвез жедач» гафаралди адаз вуч лугьуз кӀанзава? Вичиз Вич рекьиз кӀанзава жал?

23Исадини абуруз лагьана:

– Куьн агъанай, Зун вининай я. Куьн и дуьньядай я; Зун и дуьньядай туш. 24Гьавиляй За квез лагьанай, куьн куь гунагьарни кумаз рекьида. Зун Гьам Вич Тирдан чӀалахъ куьн тахьайтӀа, куьн гунагьарни кумаз рекьида эхир.

25Анал алайбуру Адаз лагьана:

– Бес Вун вуж я?

– Зун Вуж ятӀа, За квез сифтедилай лугьузва, – жаваб гана Исади. – 26Завай квекай гзаф ихтилатарни ийиз жеда, квек кутаз жедай тахсирарни гзаф я. Амма За Зун Ракъурайдавай ван хьайи гафар лугьузва. Зун Ракъурайди гьакъикъи я.

27Ада Бубадикай лугьузвайдан гъавурда абур гьатнач.

28Исади абуруз мад лагьана:

– Инсандин Хва виниз хкаж хьайила, квез Ам Зун Тирди чир жеда. За Жува Жувалай са карни лугьузвайди туш, За ийизвайди анжах Зи Бубади Заз чирнавайди я. 29Зун Ракъурнавайди Захъ гала; За датӀана Адаз кӀандайвал ийизва. Гьавиляй Ада Зун текдиз тазвач.

30Ада и ихтилатар ийидайла, Адахъ гзафбуру иман авуна. 31Имандал атанвай чувудриз Исади лагьана:

– Куьн Зи Гафариз вафа яз амукьайтӀа, квекай Зи гьакъикъи тилмизар жеда. 32Квез гьакъикъат чир хьайитӀа, ада куьн азад ийида.

33– Чун Ибрагьиман веледар я, – лагьана абуру, – чун са чӀавузни садазни лукӀ хьайибур туш. Вучиз вуна «Куьн азад жеда» лугьузва?

34– За квез лап рикӀивай лугьузва, – жаваб гана Исади, – гьар ни гунагь кар ийизватӀа, гьадакай гунагьдин лукӀ жезва. 35ЛукӀ хизанда амукьдач, амма хва уьмуьрлух хизанда амукьда. 36Хци куьн лукӀвиляй азад авуртӀа, куьн рикӀивайни азад жеда. 37Куьн Ибрагьиман тухумдикай тирди Заз чизва. Амма, гьакӀ ятӀани, куьне За лугьузвай гафар кваз кьазвач. Гьавиляй квез Зун рекьиз кӀанзава. 38За лугьузвайди Заз Зи Бубадивай ван хьайиди я. Куьнени вирида куь бубайри лагьайвал ийизва.

39– Чи буба – Ибрагьим я, – жаваб яз лагьана абуру.

– Куьн Ибрагьиман веледар тиртӀа, куьне Ибрагьиман крар кьиле тухудай, – лагьана Исади. 40– Исятда За квез Заз Аллагьдивай ван хьайи гьакъикъат лугьузва, амма квез Зун рекьиз кӀанзава. Ибрагьима акӀ ийидачир. 41Куьне куь бубади ийидай хьтин крар ийизва.

Инал абуру лагьана:

– Чун пажар туш. Чахъ са Буба ава, Амни Аллагь я.

42– Аллагь куь Буба тиртӀа, квез Зун кӀан жедай, – лагьана Исади, – Зунни Аллагьдин патавай атана ина авайди я эхир. Зун Жув-Жувалай атанвайди туш, Зун Гьада ракъурнавайди я. 43Вучиз квевай За лугьузвай гафарин гъавурда гьатиз жезвач? Вучиз лагьайтӀа квевай Зи гафариз яб гуз жезвач. 44Куь буба иблис я, квез куь бубадиз вуч кӀанзаватӀа гьам ийиз кӀанзава. Ам лап сифтедилай инсанар рекьизвайди я. Иблис дуьзвилин патал алайди туш, вучиз лагьайтӀа адахъ са дуьзвални авач. Таб авун адаз вичин дидед чӀалал рахай мисал я. Ам тапархъан ва тапаррин буба я. 45За авайвал лугьун себеб яз, куьн Зи чӀалахъ жезвач.

46Квевай нивай Зак гунагьар ква лагьана Зак тахсир квайди субутиз жеда? Квевай Зун гунагькар тирди субутиз жезвачтӀа, вучиз куьн За авайвал лугьуз хьайила, Зи чӀалахъ жезвач? 47Ни вич Аллагьдинди яз кьазватӀа, гьада Аллагьдин гафариз ябни гуда. Куьн Аллагьдинбур тахьуниз килигна, куьне Зи гафариз ябни гудач.

Иса ва Ибрагьим

48Чувудри Исадиз жаваб яз лагьана:

– Чна Вун самариятви я, вични жинерар квайди я лугьузвайла, чун гьахъ тушни бес?

49– Зак жинерар квач, – жаваб гана Исади. – За Зи Бубадин гьуьрмет хуьзва, амма куьне Зи гьуьрмет агъузарзава. 50Зун Жуван баркалладихъ галтугзавач, амма Аллагьдиз Зал баркалла атана кӀанзава. Къуй Ада Вичи дуван авурай. 51За квез лап рикӀивай лугьузва, ни За лагьай гафар кьилиз акъудайтӀа, ам са чӀавузни рекьидач.

52– Вак жин квайди гила чаз чир хьана, – лагьана чувудри. – Ибрагьимни кьена, пайгъамбарарни кьена, амма Вуна лугьузва хьи, Вуна лагьай гафар кьилиз акъудайди са чӀавузни рекьидач. 53Вун чи буба Ибрагьималай артухди яни? Ам кьенва, вири пайгъамбарарни кьенва. Вуна Жув няй кьазва?

54– За Жува Жувал баркалла гъизвайтӀа, Зи баркалладихъ са къиметни жедачир, – жаваб гана Исади. – Зал баркалла гъизвайди Зи Буба я. Куьне Ам куь Аллагь я лугьузва. 55Квез Ам чидач, амма Заз чида. За Жуваз Ам чидач лагьанайтӀа, Закай куьн хьтин тапрукь жедай; амма Заз Ам чида ва Адан Гафни За кьилиз акъудзава. 56Куь буба Ибрагьим Зун къведай йикъахъ эрзиман тир: адаз Зун дуьньядиз атайди акунни авуна ва ам а кардал гзаф шадни хьана.

57Инал чувудри Адаз лагьана:

– Ви яхцӀурни цӀуд йисни хьанвач, Ваз Ибрагьим акунани кьван?

58– За квез лап рикӀивай лугьузва: Ибрагьим жедалдини Зун Авайди я, – жаваб гана Исади.

59Исадиз къван гун патал, абуру гъиле къванер кьуна. Амма Иса Аллагьдин КӀваляй экъечӀна, инсанрин вилерикай хкатна.

Selectat acum:

Ягья 8: ЛезПК

Evidențiere

Partajează

Copiază