Ягья 10

Хъсан чубан

1 Исади лагьана:

– За квез лап рикӀивай лугьузва: вуж хиперин парахдиз ракӀарай ваъ, маса чкадай – жугъундилай акьахна гьахьзаватӀа, гьам угъри ва чапхундайди я. 2РакӀарай гьахьдайди хипер хуьдай чубан я. 3Адаз ракӀарал алайда рак ахъайда, хиперни адаз муьтӀуьгъ жеда. Ада вичин хипер тӀварар кьаз эвериз парахдай акъудда. 4Вичин хипер парахдай акъудайла, ам абурун кӀвенкӀве аваз фида; адан ван чиз хиперни адан гуьгъуьна гьатна фида. 5Абур чарадан гуьгъуьна аваз фидач. Чарадакай абур катда, абуруз чарадан ван таниш туш.

6Амма фарисеяр Исади ахъаяй кьисадин гъавурда гьатнач.

7Исади давамар хъувуна:

– За квез лап рикӀивай лугьузва хьи, Зун хипер физ-хкведай рак я. 8Залай вилик атай кьванбур вири угъриярни чапхундайбур тир, амма хипер абуруз муьтӀуьгъ хьанач. 9Зун рак я. Вуж Зай фейитӀа, гьам хилас жеда. Зай физ-хтайдаз хъсан яйлахни жагъида. 10Угъри анжах чуьнуьхиз, яна рекьиз ва тергиз къвезвайди я. Зун уьмуьр гун патал атанвайди я. За ам алахьна ацӀайди ийида. 11Зун хъсан чубан я. Хъсан чубанди вичин хипер патал чанни гуда. 12Киридихъ кьунвайдакай хиперин иеси хьтин чубан жедач. Жанавур акурла, ам хиперни туна катда. Жанавурри хиперал вегьена абур кьуд патахъ чукӀурда, хипер гьар сад санихъ чкӀида. 13Киридихъ кьунвай чубан катда, ада хиперин аявалдач. 14Зун хъсан чубан я, Заз Зи хипер гьикӀ чидатӀа, Зунни Зи хипериз гьикӀ чидатӀа, 15гьакӀ Зи Бубадизни Зун чида ва Зазни Зи Буба гьакӀ чида. Зани Зи чан хипер патал гуда. 16Захъ и парахда авачир маса хиперни ава, гьабурни За санал кӀватӀна кӀанзава. Гьабурузни Зи ван чида. Зи хиперикай кьиле са чубан авай са суьруь жеда. 17За Зи уьмуьр Заз цӀийи кьилелай мад уьмуьр хъхьун паталай гузва, гьа и кардиз килигна Зун Зи Бубадиз кӀанни ийида. 18Садани Завай Зи чан къачузвач, амма За адалай Жуван хушуналди гъил къачузва. Захъ Жуван чан гудай ва ам мад къахчудай ихтияр ава. И тагьким Заз Зи Бубади гана.

19И гафари чувудрин кьиле авайбурун арада мад гьуьжетар туна. 20Абурукай гзафбуру лугьузвай:

– Ам жин акатна пехъи хьанва. Чна Адаз вучиз яб гузва?

21– А гафар жин квайданбур туш, – лугьузвай муькуьбуру. – Жинживай буьркьуьдан вилер ахъайиз жеда жал?

Иса кьабул тавун

22ХъуьтӀуьн вахт тир. Ярусалимда Аллагьдин КӀвал ЦӀийи хъувунин сувар#10:22 ЦӀийи хъувунин сувар – чувудри чпин душманривай-мажусийривай Аллагьдин КӀвал къахкъудайдай гуьгъуьниз ам цӀийи ва михьи хъувуниз, Аллагьдиз талукьарнавай сувар. алукьнавай. 23Иса Аллагьдин КӀвалин гьаятда Сулейманан ширасдик квай. 24Инал чувудар Исадал алтӀушна ва лагьана:

– Вуна чун кьве рикӀин яз гьикьван гагьда тада? Вун Месигь ятӀа, чаз ачухдиз лагь.

25– За квез лагьанай, амма куьн Зи чӀалахъ хьанач, – жаваб гана Исади. – За Зи Бубадин ТӀварцӀелай ийизвай крари Закай шагьидвал ийизва. 26Амма куьне Захъ иман ийизвач, куьн Зи хипер туш эхир. 27Зи хипер Заз муьтӀуьгъ жеда, Зазни гьабур чида, абур Зи гуьгъуьна гьатна жеда. 28За абуруз эбеди уьмуьр гузва. Гьич са чӀавузни абур я рекьидач, я Зи Гъиляй абур садани акъуддач. 29Абур вири Заз гайи Зи Буба виридалайни вине я, Зи Бубадин гъиляй садавайни са затӀни акъудиз жедач. 30Зунни Буба сад я.

31Инал чувудри, Адал гьалчун патал, мад къванер гъилера хкьуна.

32– Зи Бубадин куьмекдалди За квез гзаф хъсанвилер авуна, – лагьана Исади. – За авунвай гьи хъсанвиляй квез Зун къванцин хура тваз кӀанзава?

33– Вуна, Вун инсан яз, Жув Аллагьдиз барабар яз кьазва, – жаваб яз лагьана чувудри. – Вуна авур хъсан крарай ваъ, ви асивилиз килигна, чаз Ваз къван гуз кӀанзава.

34– Куь Къанунда «Аллагьди лагьана: куьн аллагьар я»#Забур 81:6. лагьай гафар кхьенвачни мегер? – жаваб гана Исади. – 35Каламда кхьенвайбур чӀуриз жедач. Аллагьди Вичин Гафунин ван къвезвайбуруз аллагьар лугьузва. 36Бубади Хкянавай ва дуьньядиз Ракъурнавай За Зун Аллагьдин Хва я лагьайла, вучиз куьне, Зун аси хьанва лугьузва? 37За ийизвай крар Зи Бубадин крар туштӀа, Зи чӀалахъ жемир. 38Куьн Зи чӀалахъ жезвачтӀа, За ийизвай Зи Бубадин крарин хьайитӀани чӀалахъ хьухь. Зи крарихъ куьн чӀалахъ хьайитӀа, квез Зун Зи Бубада, Бубани За авайди чир жеда.

39Гьа чӀавуз чувудрин кьиле авайбуруз мад Ам кьаз кӀан хъхьана, амма Иса абурун гъиляй акъатна. 40Иса мад Ярдан вацӀун а патаз хъфена, виликдай Ягьяди инсанрив цик акахьун къачуз тазвай чкадиз атана ва гьана амукьна. 41Гзафбуру атана лугьузвай:

– Ягьяди авур са ахьтин керемат-ишара авач, амма ада Исадикай авур ихтилатар гьакъикъибур тир.

42Ана авай гзаф инсанар Исадихъ ийизвай имандал атана.

Selectat acum:

Ягья 10: ЛезПК

Evidențiere

Partajează

Copiază